1. ‘Ua mavae le oti o Iosua, ona fesili ai lea o le fānauga a Isaraelu i le ALI‘I, ‘ua fa‘apea atu, “Po o ai e muamua ‘ona alu a‘e i sa Kanana mo i matou, e tau ma i latou?”
2. ‘Ua fetalai mai le ALI‘I, “E alu a‘e Iuta fa‘auta, ‘ua ‘ou tu‘uina atu le nu‘u i lona lima.”
3. ‘Ona fai atu ai lea o Iuta ‘iā Simeona lona uso, “‘Ia tā ō a‘e ma a‘u i lo‘u tofi, ‘ina ‘ia tatou tau ma sa Kananā; o a‘u fo‘i, tā te ō a‘e ma oe i lou tofi.” ‘Ona la ō a‘e ai lea ma Simeona.
4. ‘Ua alu a‘e fo‘i Iuta, ‘ona tu‘uina atu ai lea e le ALI‘I o sa Kananā ma sa Perisē i o latou lima; ‘ua latou fasia fo‘i latou i Piseka e sefulu afe o tagata.
5. ‘Ua latou maua fo‘i Atonipiseka i Piseka; ‘ona latou tau ai lea ma ia; ‘ua latou fasia fo‘i sa Kanana ma sa Perisē.
6. A ‘ua sola Atonipiseka; na latou tuliloa ‘iā te ia, ‘ua maua, ‘ona latou tipi‘esea ai lea ona lima matua ma ona vae matua.
7. ‘Ona fai ane ai lea o Atonipiseka, “E to‘afitugafulu tupu na tipi‘eseina, o latou lima matua ma o latou vae matua, na latou samusamu i lalo o la‘u la‘o‘ai; e pei ‘ona ‘ou faia, e fa‘apea lava ‘ona tauia mai a‘u e le Atua.” ‘Ua latou ‘avea o ia i Ierusalema, ‘ona oti lea o ia i lea mea.
8. ‘Ua si‘i fo‘i le tau‘a o le fānauga a Iuta i Ierusalema, ma ‘ua latou ā‘ea, ‘ua latou fasia ai i le pelu, ma latou susunuina le ‘a‘ai i le afi.
9. E mulimuli ane fo‘i ‘ua ō ifo le fānauga a Iuta e tau ai le tau‘a ma sa Kanana, o ē sa nonofo i le atu mauga, ma le itū i saute, ma le nu‘u maulalo.
10. ‘Ua alu fo‘i Iuta e tau ma sa Kanana, o ē sa nonofo i Heperona; (o Kiriata-arapa, o le igoa lea anamua o Heperona;) ‘ua latou fasia fo‘i o Sesai, ma Aimano, ma Talemai.
11. ‘Ona alu atu lea o latou ai lea mea e tau ma ē sa nonofo i Tiperi; (o Kiriata-sapera, o le igoa lea anamua o Tiperi.)
12. ‘Ona fai atu lea o Kalepo, “O sē na te fasia Kiriata-sapera, ma ā‘ea ai, ‘ou te avatu ‘iā te ia o Akesa lo‘u afafine e fai māna avā.”
13. ‘Ona ā‘ea ai lea e Otinielu le atali‘i o Kinasa, o le uso itiiti lea o Kalepo; ‘ona avatu ai lea e ia o Akesa lona afafine ‘iā te ia e fai māna avā.
14. ‘Ua alu atu ia, ‘ona fa‘aoso ai lea o ia ‘iā te ia, na te ole atu i se fanua mai lona tamā; ‘ua alu ifo ia nai le asini, ‘ona fai mai ai lea o Kalepo ‘iā te ia, “Se a ‘ea lou mana‘o?”
15. ‘Ona fai atu lea o ia ‘iā te ia, “‘Ia e alofa mai ‘iā te a‘u; auā na e avane ‘iā te a‘u le fanua i le itū i saute; ‘ia e foa‘i mai fo‘i ma ni vaipuna.” ‘Ona avatu ai lea o Kalepo ‘iā te ia o vaipuna o i luga ‘atoa ma vaipuna o i lalo.
16. O le fānau a le sa Kenī, o le tamā lea o le avā a Mose, ‘ua latou ō a‘e nai le ‘a‘ai o pama fa‘atasi ma le fānauga a Iuta, i le vao o Iuta i lona itū i saute o Arata; ‘ua latou o fo‘i ma nonofo fa‘atasi ma le nu‘u.
17. ‘Ona ō lea o Iuta ma Simeona lona uso, ‘ua latou fasia sa Kanana, ē sa nonofo i Sefata, ‘ua latou fa‘aumatia ai lava; ‘ona fa‘aigoa ai lea o le igoa o le ‘a‘ai o Horema.
18. ‘Ua maua fo‘i e Iuta o Kasa ma ona fanua, ma Asekelona ma ona fanua, o Ekerona fo‘i ma ona fanua.
19. Na i ai le ALI‘I ‘iā Iuta; ‘ua na tulia ē sa nonofo i le mauga, a ‘ua lē tulia e sa nonofo i le vanu, auā sa ‘iā te i latou kariota u‘amea.
20. ‘Ua latou fa‘atoina atu o Heperona mo Kalepo, pei ‘ona fai mai ai o Mose, na ia tulia fo‘i ai lea mea atali‘i o Anaki e to‘atolu.
21. A o sa Iepusē, ē ‘ua nonofo i Ierusalema, e le‘i tulia i latou e le fānauga a Peniamina; a ‘ua nonofo fa‘atasi o sa Iepusē ma le fānauga a Peniamina i Ierusalema, ‘ua o‘o mai i ona po nei.
22. ‘Ua ō a‘e fo‘i le ‘āiga o Iosefa i Peteli; na ‘iā te i latou fo‘i o le ALI‘I.
23. Na ‘auina nisi e le ‘āiga o Iosefa e asiasi i Peteli; (o Lusa, o le igoa lea o le ‘a‘ai anamua.)
24. ‘Ua iloa atu e na lamalama o le tasi tagata ‘ua sau mai le ‘a‘ai, ‘ona latou fai atu ai lea ‘iā te ia, “‘Inā e fa‘asino mai ‘iā te i matou le ala i le ‘a‘ai, ‘ona matou agalelei atu ai lea ‘iā te oe.”
25. ‘Ua fa‘asino atu e ia ‘iā te i latou le ala i le ‘a‘ai, ‘ona latou fasia ai lea o le ‘a‘ai i le pelu; a ‘ua latou tu‘u atu le tagata ma lona ‘āiga uma e o.
26. ‘Ua alu atu fo‘i le tagata i le nu‘u o sa Hetī, ‘ona faia lea o ia le ‘a‘ai, ma na fa‘aigoa atu ai o Lusa; o lona igoa lea ‘ua o‘o mai i ona po nei.
27. E le‘i maua fo‘i e Manase o Peteseana ‘atoa ma ona faoa ‘a‘ai, o Tanaka fo‘i ‘atoa ma ona faoa ‘a‘ai, ma ē nonofo i Toro ‘atoa ma ona faoa ‘a‘ai, o ē nonofo fo‘i i Ipelamo ‘atoa ma ona faoa ‘a‘ai, o ē nonofo fo‘i i Mekito ‘atoa ma ona faoa ‘a‘ai; a ‘ua finau sa Kananā e nonofo i lea nu‘u.
28. ‘Ua o‘o ‘ina malosi o Isaraelu, ‘ona totogi atu ai lea o taulaga i sa Kanana, ‘ae le‘i matuā tulia i latou.
29. E le‘i tulia fo‘i e Efaraima sa Kananā o ē nonofo i Kasera; a ‘ua nonofo sa Kananā fa‘atasi ma i latou i Kasera.
30. E le‘i tulia fo‘i a Sepulona o ē nonofo i Kiterona o ē nonofo fo‘i i Naalolo; a ‘ua nonofo sa Kananā fa‘atasi ma i latou, ma latou fai taulaga mai.
31. E le‘i tulia fo‘i e Asera o ē nonofo i Ako, o ē nonofo fo‘i i Saitonu, ma ē o i Ailava, ma ē o i Akasepa, ma ē o i Helipa, ma ē o Afeka ma ē o i Reopa.
32. A ‘ua nonofo sa Aserā fa‘atasi ma sa Kananā o ē nonofo i le nu‘u; auā ‘ua latou lē tulia i latou.
33. E le‘i tulia fo‘i e Nafatali o ē nonofo i Petesemesa, ma ē nonofo i Peteanata; a ‘ua latou nonofo fa‘atasi ma sa Kananā ē ‘ua nonofo i le nu‘u; a o ē nonofo i Petesemesa ma Peteanata, ‘ua fai taulaga mai ‘iā te i latou.
34. O sa Amorī ‘ua latou tete‘e atu i le fānauga a Tanu ia nonofo i le mauga; auā na latou lē mafafai ‘ona ia ō ifo o i latou i le vanu.
35. A ‘ua finau sa Amorī e nonofo i le mauga o Heresa i Ailona ma Salapima; a ‘ua lima malosi le ‘āiga o Iosefa, ‘ona latou fai taulaga mai ai lea.
36. O le tuā‘oi fo‘i o sa Amorī, e pau mai i le ā‘ega o Akarava i Sela, ma ona tala atu i luga.