Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21

Feagaiga Tuai

Feagaiga Fou

Faamasino 8 O LE TUSI PA'IA - Ekalesia Katoliko Roma (RSCB)

‘Ua Fa‘alaulelei atu Kitiona i sa Efaraimā

1. ‘Ona fa‘apea mai ai lea o tagata o Efaraima ‘iā te ia, “Se a lenei mea ‘ua e faia ‘iā te i matou, ‘ina ‘ua e lē ‘amia mai i matou ‘ina ‘ua e alu atu e tau ma Mitiana?” ‘Ua latou matuā finau tele mai ‘iā te ia.

2. ‘Ona fa‘apea atu ai lea o ia ‘iā te i latou, “Se a se mea ‘ua ‘ou faia nei e tusa ma la ‘outou? E le‘i sili ‘ona lelei ‘ea nai toe fuifui vine o Efaraima i le taugāvine o Apieseru?

3. ‘Ua tu‘uina atu e le Atua i o ‘outou lima o tamaali‘i o Mitiana o Oreva ma Seeva; se a fo‘i se mea ‘ou te mafaia ‘ona fai e tusa ma ‘outou?” ‘Ona fa‘alauleleiina ai lea o i latou ‘iā te ia, ‘ina ‘ua fai atu e ia lenā ‘upu.

4. ‘Ua o‘o atu Kitiona i Ioritana, ‘ua sopo‘ia atu e ia ‘atoa ma le tolu selau o tagata ‘ua ‘iā te ia, ‘ua lailoa i latou, ‘ae tuliloa lava.

5. ‘Ona fai atu ai lea o ia i tagata o Sukota, “‘Ia ‘outou avane ni pōtoi areto i le nu‘u ‘ua mulimuli mai ‘iā te a‘u, auā ‘ua lailoa i latou, a o a‘u, ‘ou te tuliloa atu lava ‘iā Seva ma Salemuna o tupu o Mitiana.”

6. ‘Ona fa‘apea mai ai lea o ali‘i o Sukota, “Po ‘ua e maua nei ‘ea o Seva ma Salemuna matou te avatu ai mea e ‘ai ma au ‘au.”

7. ‘Ona fa‘apea atu ai lea o Kitiona, “A tu‘uina mai e le ALI‘I o Seva ma Salemuna i lo‘u lima, ‘ona ‘ou solia ai lea o ‘outou tino i la‘au tuitui mai le vao ma mea talatala.”

8. ‘Ua alu a‘e ia nai lea mea i Penueli, ‘ua fa‘apea fo‘i ‘ona fai atu o ia ‘iā te i latou. ‘Ona tali mai ai lea ‘iā te ia o tagata o Penueli, e pei ‘ona tali mai e tagata o Sukota.

9. ‘Ona fai atu ai lea o ia i tagata o Penueli, ‘ua fa‘apea atu, “Pe a a‘u fo‘i mai ma le manuia, ‘ona ‘ou sōloia lava lea o lenā ‘olo.”

10. Sa i Karekori o Seva, ma Salemuna, ‘atoa ma le la itūtau‘a fa‘atasi ma i lā‘ua, pe sefulu o afe ma afe e lima, na o i latou ia ‘ua totoe o le itūtau‘a uma a tagata mai sasa‘e; auā na fasia tagata e fai pelu e selau afe ma afe e luafulu.

11. ‘Ona alu a‘e ai lea o Kitiona i le ala o ē ‘ua mau i fale ‘ie i sasa‘e o Nopa ma Iakepea; ‘ona fasia ai lea e ia o le itūtau‘a, auā sa nofo talanoa lava le itūtau‘a.

12. ‘Ua sōsōla fo‘i Seva ma Salemuna, ‘ona tuliloa atu lea e ia ‘iā te i lā‘ua, ‘ua ia maua lava o tupu o Mitiana e to‘alua, o Seva ma Salemuna; ‘ua ia fa‘agateteina le itūtau‘a uma.

13. ‘Ona fo‘i mai lea o Kitiona le atali‘i o Ioasa mai le tau‘a, ‘ua ui ane i le ā‘ega o Heresa.

14. ‘Ona maua lea e ia o le tasi taule‘ale‘a o le tagata o Sukota, ‘ua ia fesili ‘iā te ia, ‘ona tusi ai lea e ia ‘iā te ia i ali‘i o Sukota ma o latou toeaina, o tagata e to‘afitugafulu ma le to‘afitu.

15. ‘Ona alu atu ai lea o ia i tagata o Sukota, ‘ua fa‘apea atu ai, “Fa‘auta, o Seva ma Salemuna na ‘outou tauemua mai ai a‘u, ‘ua fa‘apea mai, ‘Po ‘ua e maua nei ‘ea o Seva ma Salemuna, matou te avatu ai mea e ‘ai ma ou tagata ‘ua lailoa.’”

16. ‘Ona ‘ave ai lea e ia o toeaina o le ‘a‘ai, ma la‘au tuitui mai le vao ma mea talatala, ‘ua ia a‘oa‘iina ai tagata o Sukota.

17. ‘Ona sōloia lea e ia o le ‘olo o Penueli ma ‘ua fasioti i tagata o le ‘a‘ai.

18. ‘Ona fai atu ai lea o ia ‘iā Seva ma Salemuna, “Pe ni tagata fa‘apefea na ‘outou fasiotia i Tapora?”‘Ona la fai mai ai lea, “E pei o oe sa fa‘apea fo‘i i latou; e ta‘itasi ma ‘aulelei e pei ni alo o se tupu.”

19. ‘Ona fai atu ai lea o ia, “O o‘u uso ia, o tama a lo‘u tinā i latou; o lo‘o soifua le ALI‘I, ‘ana ‘oulua fa‘aolaina i latou po ‘ua ‘ou lē fasiotia ‘oulua.”

20. ‘Ona fai atu ai lea o ia ‘iā Ietero lana ulumatua, “‘Inā tula‘i mai ia, ma e fasiotia i lā‘ua.” A ‘ua lē se‘i e le tama lana pelu ‘ina ‘ua fefe o ia, auā o le tama lava ia.

21. ‘Ona fai mai ai lea o Seva ma Salemuna, “‘Inā e tula‘i mai ia oe ma fasi ‘iā te i mā‘ua; auā e pei o le tagata e fa‘apea fo‘i lona malosi.” ‘Ona tula‘i atu ai lea o Kitiona, ‘ua ia fasiotia Seva ma Salemuna; ‘ona ‘ave ‘ese ai lea e ia o mea na asoa ai i ua o ala kamela.

22. ‘Ona fai atu ai lea o tagata o Isaraelu ‘iā Kitiona, “‘Ia e pule ‘iā te i matou, o oe ma lou atali‘i, ma le atali‘i o lou atali‘i; auā na fa‘aolaina mai i matou a‘i lima Mitiana.”

23. ‘Ua fai mai Kitiona ‘iā te i latou, “‘Ou te lē pule ‘iā te ‘outou, e lē pule fo‘i lo‘u atali‘i ‘iā te ‘outou; e pule lava le ALI‘I ‘iā te ‘outou.”

24. ‘Ua fai mai fo‘i Kitiona ‘iā te i latou, “‘Ou te ole atu ‘iā te ‘outou i le tasi mea; ‘ia ‘outou ‘aumai ‘iā te a‘u e ta‘itasi le tagata ma le mama o ana lava vete.” (Auā sa ‘iā te i latou o mama auro; auā o sa Isamaeli i latou.)

25. ‘Ona fai atu ai lea o i latou ‘iā te ia, “Matou te avatu lava.” ‘Ona latou folasia lea o le ‘ofu ma lafo i ai e ta‘itasi le tagata ma le mama o ana lava vete.

26. O le mamafa o mama auro na ia ole atu ai, o sekeli auro ‘ia e tasi le afe ma le fitu o selau, ‘ae tu‘u ia o mea na asoa ai, ma mama i taliga, ma ‘ofu pauli na i ai i tupu o Mitiana, ‘atoa ma filifili auro sa i ua o a la kamela.

27. ‘Ona fai ai lea e Kitiona o le efota, ‘ua tu‘u ai e ia i lana ‘a‘ai o Ofira; ‘ua ō atu i ai o Isaraelu uma, ‘ua mulilua ai; ‘ona ‘avea lea o lenei mea ma mailei ‘iā Kitiona ma lona ‘āiga.

28. ‘Ua to‘ilalo lava Mitiana i luma o le fānauga a Isaraelu, ‘ua latou le toe ‘ea lava. ‘Ona filemū ai lea o le nu‘u i tausaga a fagafulu i ona po o Kitiona.

O le Oti o Kitiona

29. ‘Ona alu ai lea o Ierupaala le atali‘i o Ioasa, ‘ua nofo o ia lona lava ‘āiga.

30. Sa ia Kitiona ona atali‘i e to‘afitugafulu na fānaua lava e ia; auā na to‘atele lava ana avā.

31. O lana palake sa i Sekema, na fānau fo‘i o ia se atali‘i mōna; ‘ona fa‘aigoaina ai lea o ia o Apimeleko.

32. ‘Ua oti fo‘i Kitiona le atali‘i o Ioasa ‘ua toeaina lava ia; na tanu fo‘i o ia i le tu‘ugamau o Ioasa lona tamā i Ofira o sa Apieserū.

33. ‘Ua oti Kitiona, ‘ona toe liliu ‘ese ai lea o le fānauga a Isaraelu e mulimuli ‘iā Paala, e mulilua ai, ‘ua latou faia fo‘i o Paala-perita mo latou atua.

34. ‘Ua lē manatua e le fānauga a Isaraelu o le ALI‘I lo latou Atua, o lē na lavea‘iina i latou a‘i lima o i latou uma lava ē na vagavagai, o ē ita ‘iā te i latou.

35. E le‘i agalelei atu fo‘i i latou i le ‘āiga o Ierupaala, o Kitiona lea, e tusa ma mea uma lava na agalelei atu ai o ia ‘iā Isaraelu.#