1. ‘Ua oti Euta; ‘ona toe amio leaga ai lea o le fānauga a Isaraelu i luma o le ALI‘I.
2. ‘Ona tu‘uina atu ai lea o i latou e le ALI‘I i le lima o Iapino le tupu o Kanana o le na pule i Hasora; a o lē na pule i lana itūtau‘a, o Sesera lea, sa nofo i Haroseta o nu‘u ‘ese.
3. ‘Ona ‘alalaga atu lea o le fānauga a Isaraelu i le ALI‘I; auā na ‘iā te ia o kariota u‘amea e iva selau; na ia matuā fa‘asauā i le fānauga a Isaraelu i tausaga e luafulu.
4. O ona po ia na fa‘amasinoina ai Isaraelu e Tepora, o le perofeta fafine, o le avā lea a Lapitota.
5. Sa nofo o ia i lalo o le pama o Tepora i le vā o Rama ma Peteli, i le mauga o Efaraima; na ō a‘e ai ‘iā te ia le fānauga a Isaraelu ‘ia fa‘amasinoina.
6. ‘Ona ‘a‘auina atu ai lea e ia nisi e ‘a‘ami ‘iā Parako le atali‘i o Apinoamo mai Katesanafatali; ‘ua ia fai atu fo‘i ‘iā te ia, “E le‘i poloa‘i mai ‘ea le ALI‘I le Atua o Isaraelu, ‘‘e te alu ma e ta‘i ‘au i le mauga o Tapora, tou te ō ma tagata e sefulu afe o le fānauga a Nafatali ma le fānauga a Sepulona?
7. ‘Ou te tōsina atu fo‘i Sesera lē pule i le itūtau‘a a Iapino, ma ona kariota, ‘atoa ma ana ‘au ‘iā te oe i le alia o Kisona; ‘ou te tu‘uina atu fo‘i o ia i lou lima.’”
8. ‘Ona fai mai ai lea o Parako ‘iā te ia, “‘Āfai tā te ō ma a‘u, ‘ona ‘ou alu lea; ‘ae ‘āfai tā te lē ō ma a‘u, ‘ou te lē alu.”
9. ‘Ua fai atu o ia, “Tā te ō lava ma oe; ‘ae peita‘i e leai sou vi‘iga i lenei mea ‘e te alu ai oe; auā e tu‘uina atu e le ALI‘I o Sesera i le lima o le fafine.” ‘Ua tu i luga Tepora, ‘ona la ō ai lea ma Parako i Katesa.
10. ‘Ona fa‘apotopoto ai lea e Parako o Sepulona ma Nafatali i Katesa; ‘ua alu a‘e fo‘i ia ‘atoa ma le sefulu o afe o tagata ‘ua mulimuli atu ‘iā te ia; ‘ua la ō a‘e fo‘i ma Tepora.
11. O Kaveru fo‘i o le sa Kenī, o so le fānau a Opapo, o le tamā lea o le avā a Mose, na vavae mai o ia i sa Kenī, ‘ua na tō fo‘i lona fale ‘ie e latalata ane i le aluna i Saanaima, ‘ua i Katesa lea.
12. ‘Ua latou fa‘ailoa fo‘i ‘iā Sesera ‘ua alu a‘e Parako le atali‘i o Apinoamo i le mauga o Tapora.
13. ‘Ona fa‘apotopoto ai lea e Sesera o ona kariota uma, o kariota u‘amea e iva selau, ‘atoa ma le nu‘u uma o ē na ‘iā te ia, mai Haroseta o nu‘u ‘ese e ō i le alia o Kisona.
14. ‘Ona fai atu ai lea o Tepora ‘iā Parako, “Tula‘i ia, auā o le aso lenei e tu‘uina atu ai e le ALI‘I o Sesera i lou lima; e le‘i afio atu ‘ea o le ALI‘I i ou luma?” ‘Ona alu ifo lea o Parako nai le mauga o Tapora, ‘atoa ma le sefulu o afe o tagata ‘ua mulimuli atu ‘iā te ia.
15. ‘Ua fa‘ata‘ape‘apeina e le ALI‘I o Sesera, ma ona kariota uma, ma lana itūtau‘a uma i le pelu i luma o Parako; ‘ona alu ifo ai lea o Sesera nai lona kariota, ma sola i ona vae.
16. A ‘ua tuliloa atu e Parako i kariota ma le itūtau‘a, ‘ua o‘o lava i Haroseta o nu‘u ‘ese; ‘ua oti le itūtau‘a uma a Sesera i le pelu; e leai lava se tasi na toe.
17. A o Sesera, ‘ua sola o ia i ona vae i le fale ‘ie o Iaeli le avā a Kaveru o le sa Kenī; auā ‘ua nofo lelei Iapino le tupu o Hasora ma le ‘āiga o Kaveru o le sa Kenī.
18. ‘Ona alu atu lea o Iaeli e fa‘afetaia‘i ‘iā Sesera, ‘ua fai atu ‘iā te ia, “Le ali‘i e, afe mai ia, ‘inā afe mai ‘iā te a‘u, ‘aua ‘e te mata‘u.” ‘Ona afe ane ai lea o ia ‘iā te ia i le fale ‘ie, ‘ona ufiufi ai lea e le fafine ‘iā te ia i le ‘ie ‘afu.
19. ‘Ua fai mai fo‘i o ia ‘iā te ia, “Se‘i e ‘aumai sina vai ‘ou te inu ai; auā ‘ua ‘ou fia inu lava.” ‘Ona tatala ai lea e ia o le fagu pa‘u o suāsusu, ‘ua avatu ‘iā te ia e inu ai; ‘ona ufiufi ai lea ‘iā te ia.
20. ‘Ona fai mai lea o ia ‘iā te ia, “‘Inā tu ia oe i le faitoto‘a o le fale ‘ie; a sau se tasi e fesili ‘iā te oe, ma fa‘apea mai, ‘O ‘i‘inā ‘ea se isi?’ ‘Ia e fa‘apea atu, ‘E leai lava.’”
21. ‘Ona tago ai lea o Iaeli le avā a Kaveru i se fao o le fale ‘ie, ‘ua ‘ave fo‘i ma le samala i lona lima, ‘ona alu lemū atu lea ‘iā te ia, na ia tutuli ai le fao i lona manifinifi, ‘ua ati ifo i le ‘ele‘ele, auā na moegase ‘ina ‘ua lailoa; ‘ona oti ai lea o ia.
22. Fa‘auta fo‘i, ‘ua tuliloa mai Parako ‘iā Sesera, ‘ona alu atu lea o Iaeli e fa‘afetaia‘i ‘iā te ia, ‘ua fai atu o ia ‘iā te ia, “‘Inā maliu mai ia, ‘ou te fa‘aaliina atu ‘iā te oe le tagata ‘ua e sā‘ilia.” ‘Ona alu ane lea o ia ‘iā te ia, fa‘auta, ‘ua ta‘atia Sesera, ‘ua oti, ‘ua i ai fo‘i le fao i ona manifinifi.
23. O le aso lava lea na fa‘ato‘ilaloina ai e le Atua o Iapino le tupu o Kanana i luma o le fānauga a Isaraelu.
24. ‘Ua manumālō pea lima o le fānauga a Isaraelu, ‘ua mamafa lava ‘iā Iapino le tupu o Kanana, ‘ua o‘o lava ‘ona latou fa‘aumatia o Iapino le tupu o Kanana.