1. ‘Ua alu a‘e le agelu a le ALI‘I mai Kilikala i Pokima, ‘ua fa‘apea atu, “Na ‘ou ‘aveina a‘e ‘outou mai Aikupito, na ‘ou fa‘ao‘oina fo‘i ‘outou i le nu‘u na ‘ou tautō ai i o ‘outou tamā; na ‘ou fa‘apea ane fo‘i, ‘‘Ou te lē tu‘umavaega lava i la‘u feagaiga ma ‘outou e fa‘avavau.
2. O ‘outou fo‘i, ‘aua ne‘i ‘outou fai se feagaiga ma ē o nonofo i lenei nu‘u; ‘ia ‘outou sofaia o latou fatafaitaulaga.’ A ‘ua ‘outou lē fa‘alogo i la‘u ‘upu; se a le mea ‘ua ‘outou fai ai lenei mea.
3. O le mea lea na ‘ou fai atu ai, ‘ou te lē tulia i latou i o ‘outou luma; ‘ae ‘avea i latou ma sasa i o ‘outou itū, e ‘avea fo‘i o latou atua ma mailei ‘iā te ‘outou.”
4. ‘Ua fai atu le agelu a le ALI‘I i nei ‘upu i le fānauga a Isaraelu uma, ‘ona matuā taufaitagi ai lea o le nu‘u.
5. ‘Ua latou fa‘aigoa lea mea o Pokima, ‘ona latou fai taulaga lea i le ALI‘I i lea mea.
6. Sa tu‘u atu e Iosua le nu‘u e ō, ‘ona ō ai lea o le fānauga a Isaraelu e ta‘itasi i lona tofi, e fai mo latou le nu‘u.
7. Sa ‘au‘auna le nu‘u i le ALI‘I i aso uma o Iosua, ma aso uma o toeaina ē na ola mai a ‘ua mavae Iosua, o ē na iloa galuega tetele uma a le ALI‘I ‘ina ‘ia faia mo Isaraelu.
8. ‘Ua oti Iosua le atali‘i o Nuno, le ‘au‘auna a le ALI‘I; ‘ua tasi le selau ma le sefulu o tausaga o lona ola.
9. ‘Ua latou tanu fo‘i ‘iā te ia i le fanua o lona tofi i Timenataheresa i le mauga o Efaraima, i le itū i matū o le mauga o Kaasa.
10. ‘Ua fa‘aopoopoina atu fo‘i o lea tupulaga uma i o latou tamā; ‘ua mavae i latou, ‘ona tupu ai lea o le tasi tupulaga o ē na lē iloa le ALI‘I ma ana galuega na ia faia mo Isaraelu.
11. ‘Ona amio leaga lea o le fānauga a Isaraelu i luma o le ALI‘I, ‘ua latou ‘au‘auna fo‘i ‘iā Paala.
12. ‘Ua latou tu‘ua le ALI‘I le Atua o latou tamā, o lē na ‘aumaia i latou mai le nu‘u o Aikupito, a ‘ua latou mulimuli atu i atua ‘ese, o atua o nu‘u ‘ua vagavagai ‘iā te i latou, ‘ua latou ifo fo‘i i ai, ma latou fa‘a‘ono‘ono ai i le ALI‘I.
13. ‘Ua latou tu‘ua le ALI‘I, ma ‘au‘auna ‘iā Paala ma Asaira.
14. ‘Ona tupu tele ai lea o le to‘asā o le ALI‘I ‘iā Isaraelu, ‘ua ia tu‘uina atu i latou i lima o ē vete mea, o ē na vetea a latou mea; ‘ua tu‘uina atu fo‘i i latou i lima o ē vagavagai mai ‘ua ita ‘iā te i latou; ‘ua latou lē toe mafai ai ‘ona tutū atu i luma o ē ‘ua ita ‘iā te i latou.
15. O mea uma fo‘i na latou o i ai, sa i ai le ‘a‘ao o le ALI‘I ‘ia leaga ai i latou, e pei ‘ona fetalai mai ai o le ALI‘I, e pei ‘ona tautō fo‘i o le ALI‘I ‘iā te i latou; na puapuagāteleina ai i latou.
16. A ‘ua fa‘atūina e le ALI‘I o fa‘amasino, ‘ua latou fa‘aola ‘iā te i latou a‘i lima o ē vetea a latou mea.
17. ‘Ae le‘i fa‘alogo i latou i o latou fa‘amasino, a ‘ua mulimuli atu i atua ‘ese e mulilulua ai, ‘ua latou ifo fo‘i i ai; ‘ua vave ‘ona latou ō ‘ese i le ala na sāvavali ai o latou tamā, ē sa ‘ana‘ana i poloa‘iga a le ALI‘I; ‘ua lē fa‘apea ‘ona latou faia.
18. ‘Ua fa‘atūina e le ALI‘I o fa‘amasino mo i latou, ‘ona i ai lea o le ALI‘I ma le fa‘amasino, ma ‘ua fa‘aolaina i latou a‘i lima o ē ‘ua ita ‘iā te i latou i aso uma o le fa‘amasino; auā ‘ua salamō le ALI‘I i o latou feoi, ‘ona o ē ‘ua fa‘asauā ma fa‘atigā ‘iā te i latou.
19. A ‘ua o‘o ‘ina oti o le fa‘amasino, ‘ona latou liliu ai lea, ‘ua sili fo‘i lo latou leaga i o latou tamā, ‘ina ‘ua latou mulimuli atu i atua ‘ese e ‘au‘auna i ai, ma ifo i ai. ‘Ua latou le tu‘ua a latou amio ma lo latou fa‘alogogatā.
20. O le mea lea ‘ua tupu tele ai le to‘asā o le ALI‘I ‘iā Isaraelu, ‘ua fetalai mai fo‘i o ia, “‘Ua tu‘umavaega lenei nu‘u i la‘u feagaiga na ‘ou poloa‘i atu ai i o latou tamā, e le‘i fa‘alogo fo‘i i latou i la‘u ‘upu.
21. O le mea lea ‘ou te lē toe tulia ai i latou o nu‘u na tu‘ua e Iosua ‘ina ‘ua oti o ia.”
22. ‘Ina ‘ia tofotofoina o Isaraelu e i latou, pe latou te tausiusi i le ala o le ALI‘I e sāvavali ai, pei ona tausiusi ai e o latou tamā, pe leai.
23. O le mea lea na tu‘uina atu ai e le ALI‘I o ia nu‘u, ‘ua lē vave tulia i latou; e le‘i tu‘uina atu fo‘i e ia i latou i le lima o Iosua.