1. O le tasi tagata na i le mauga o Efaraima, o Mika lona igoa.
2. ‘Ua ia fai atu i lona tinā, “O tupe e afe ma le selau e tasi, na ‘avea nai ‘iā te oe, sa e fetu‘u ai, na e fai ane fo‘i a o ‘ou fa‘alogo atu; fa‘auta i tupe, ‘ua ‘iā te a‘u, na ‘ou ‘avea.”‘Ona fai mai lea o lona tinā ‘iā te ia, “‘Ia fa‘amanuia oe la‘u tama e le ALI‘I.”
3. Na ia toe avatu tupe e afe ma le selau e tasi i lona tinā, ‘ua fai mai lona tinā, “Na ‘ou matuā fa‘asāina ia tupe i le ALI‘I a‘i lo‘u lima mo la‘u tama, e fai a‘i se tupua ‘ua ta, ma se tupua ario; o lenei, avatu pea ia ‘iā te oe.”
4. A ‘ua na toe avatu tupe i lona tinā; ‘ona ‘ave lea e lona tinā o tupe e lua selau i le tufuga fai mea u‘amea, ‘ua ia fai a‘i le tupua ‘ua ta ma le tupua ario, sa i ai i le fale o Mika.
5. Sa i le tagata o Mika se fale o le Atua, na ia faia le efota ma tupua, ‘ua ia tofia fo‘i le tasi o ona atali‘i ‘ua fai ma ositaulaga ‘iā te ia.
6. O ona po ia sa leai se tupu ‘iā Isaraelu, sa ta‘itasi ma fai le mea ‘ua tonu i lona lava manatu.
7. O le taule‘ale‘a fo‘i mai Peteleema o Iuta mai le itū‘āiga o Iuta, a o le sa Levī o ia, ‘ua āumau o ia i lea mea.
8. ‘Ua alu o ia nai le ‘a‘ai o Peteleema o Iuta e so‘ona āumau i se mea e maua; ‘ona o‘o atu lea o lana malaga i le mauga o Efaraima i le fale o Mika.
9. ‘Ua fesili atu Mika ‘iā te ia, “Na ifea oe?”‘Ua tali mai o ia ‘iā te ia, “O a‘u le sa Levī, mai Peteleema o Iuta; ‘ou te alu e so‘ona āumau i se mea ‘ou te maua.”
10. ‘Ona fai atu lea o Mika ‘iā te ia, “Tā te nonofo ma a‘u, ‘ia fai oe mo‘u tamā ma a‘u ositaulaga; a o a‘u, ‘ou te avatu ‘iā te oe tupe e sefulu i lea tausaga ma lea tausaga, ma ou ‘ofu ma au mea e ‘ai.” ‘Ona alu ane ai lea o le sa Levī.
11. ‘Ua loto le sa Levī ‘ona la nonofo ma le tagata, sa i ai le taule‘ale‘a ‘iā te ia e pei o sona lava atali‘i.
12. ‘Ona tofia lea e Mika o le sa Levī, ma na fai fo‘i le taule‘ale‘a ma ositaulaga ‘iā te ia sa i ai o ia i le ‘āiga o Mika.
13. ‘Ona fai ane lea o Mika, “O lenei, ‘ua ‘ou iloa e agalelei mai le ALI‘I ‘iā te a‘u, auā ‘ua ‘iā te a‘u le sa Levī e fai ma ositaulaga.”