1. ‘Ua mavae aso e tele, ‘ona o‘o mai ai lea o le afioga a le ALI‘I ‘iā Elia i le tolu o tausaga, ‘ua fa‘apea mai, “‘Inā alu ia oe ma fa‘aali oe ‘iā Aapo, ‘ou te fa‘atotōina fo‘i le timu i le lau‘ele‘ele.”
2. ‘Ona alu ai lea o Elia e fa‘aali o ia ‘iā Aapo;Sa matuā velavela le oge i Samaria.
3. Na vala‘au fo‘i Aapo ‘iā Opetaia, o lē pule i lona ‘āiga. (Sa matuā mata‘u Opetaia i le ALI‘I;
4. auā na fasiotia e Iesepela o perofeta a le ALI‘I, ‘ona ‘ave lea e Opetaia o perofeta e to‘aselau ma nanā ‘iā te i latou e ta‘ito‘alimagafulu i ana, na ia fafaga fo‘i ‘iā te i latou i areto ma vai.)
5. ‘Ua fai atu Aapo ‘iā Opetaia, “‘Inā alu ia oe i le nu‘u i vaipuna uma, ‘atoa fo‘i ma alia uma; pe tatou te maua ni mutia e fa‘aolaina ai solofanua ma falata, ‘ina ne‘i maumau manu uma.”
6. ‘Ona vaeluaina lea e i lā‘ua o le nu‘u, ‘ina ‘ia la feoa‘i ai; ‘ua alu Aapo i le tasi ala na o ia, a ‘ua alu Opetaia i le isi ala na o ia.
7. ‘Ua i ai i le ala Opetaia, fa‘auta, ‘ua la fetaia‘i ma Elia; ‘ua iloa o ia e ia ‘ona fa‘apa‘ū faō ai lea o ia, ‘ua fa‘apea mai, “O oe ‘ea le ali‘i o Elia?”
8. ‘Ona tali atu lea o ia, “O a‘u lava lea. Alu ia oe, ma e fai atu i lou ali‘i, Fa‘auta, o Elia.”
9. ‘Ona fai mai lea o ia, “Se a ‘ea se mea ‘ua ‘ou agasala ai, ‘inā e tu‘uina atu ai lau ‘au‘auna i le lima o Aapo, ‘ia fasiotia ai a‘u?
10. O lo‘o soifua le ALI‘I lou Atua, e leai se nu‘u po o se mālō e le‘i o‘o i ai le fe‘au a lo‘u ali‘i e sā‘ili‘ili ‘iā te oe; a latou tali mai ai, ‘E lē i ai,’ ‘ona ia fai atu lea, e tautō lea mālō ma lea nu‘u, ‘ua latou lē maua oe.
11. O lenei, ‘ua e fetalai mai, ‘Alu ia oe ma e fai atu i lou ali‘i, Fa‘auta, o Elia.’
12. A a‘u alu ‘ese ‘iā te oe, ‘ona ‘avea lea o oe e le Agaga o le ALI‘I i se mea ‘ou te lē iloa; pe a ‘ou alu, ma ta‘u atu ‘iā Aapo, ‘ae lē maua mai oe e ia, ‘ona fasiotia lea o a‘u e ia; a o lo‘o mata‘u lau ‘au‘auna i le ALI‘I talu ‘ina ‘ou itiiti.
13. Pe na lē ta‘uina atu ‘ea i lo‘u ali‘i le mea na ‘ou faia ‘ina ‘ua fasiotia e Iesepela o perofeta a le ALI‘I; na ‘ou natia perofeta a le ALI‘I, o tagata e to‘aselau, e ta‘ito‘alimagafulu i ana, na ‘ou fafaga fo‘i ‘iā te i latou i areto ma vai?
14. O lenei fo‘i, ‘ua e fetalai mai, ‘Alu ia oe ma e fai atu i lo‘u ali‘i, Fa‘auta, o Elia;’ ‘ona fasiotia lea o a‘u e ia.”
15. ‘Ona fai atu lea o Elia, “O lo‘o soifua le ALI‘I o ‘au, o ia ‘ou te tu ai i ona luma, ‘ou te fa‘aali lava a‘u ‘iā te ia i le aso nei.”
16. ‘Ona alu ai lea o Opetaia e fa‘afetaia‘i ‘iā Aapo, ma ta‘u atu ai ‘iā te ia; ‘ona sau ai lea o Aapo e fa‘afetaia‘i ‘iā Elia.
17. ‘Ua iloa atu e Aapo ‘iā Elia, ‘ona fai atu lea o Aapo ‘iā te ia, “O oe ‘ea o lē fa‘atigā ‘iā Isaraelu?”
18. ‘Ona tali mai lea o ia, “E lē o a‘u lē fa‘atigā ‘iā Isaraelu, a o oe ma le ‘āiga o lou tamā; auā ‘ua ‘outou tu‘ua o poloa‘iga a le ALI‘I ma ‘outou mulimuli atu ‘iā Paala.
19. O lenei, ‘inā fe‘au atu ia ma fa‘apotopoto mai ‘iā te a‘u i le mauga o Karamelu o Isaraelu uma ma perofeta a Paala e fa selau ma le lima o sefulu ma perofeta a Asaira e fa selau, o ē ‘a‘ai i le laulau a Iesepela.”
20. ‘Ona fe‘auina atu lea e Aapo i le fānauga uma a Isaraelu, ‘ua ia fa‘apotopoto fo‘i le ‘au perofeta i le mauga o Karamelu.
21. ‘Ona fa‘alatalata atu lea o Elia i le nu‘u uma, ‘ua fa‘apea atu, “Pe tou te fa‘alētonu i manatu e lua se‘ia afea? ‘Āfai o le ALI‘I o le Atua ia, ‘ia ‘outou mulimuli atu ‘iā te ia; ‘ae ‘āfai o Paala, ‘ia ‘outou mulimuli atu ‘iā te ia.” ‘Ae le tali mai le nu‘u ‘iā te ia i se ‘upu.
22. ‘Ona fai atu lea o Elia i le nu‘u, “‘Ua na o a‘u ‘ua toe i perofeta a le ALI‘I; a o perofeta a Paala, e fa selau ma le to‘alimagafulu i latou.
23. ‘Ia latou ‘aumai ‘iā te i matou o povi e lua; ‘ona filifilia lea e i latou se tasi povi mo i latou ma latou pena ma fa‘ae‘e i luga o fafie, ‘ae ‘aua le avane i ai le afi; ‘ou te saunia fo‘i le tasi povi ma fa‘ae‘e ai i luga o fafie, a ‘ou te lē avane i ai le afi.
24. ‘Ona vala‘au atu lea ‘outou i le igoa o ‘outou atua; ‘ou te vala‘au atu fo‘i i le suafa o le ALI‘I. O le Atua na te tali mai i le afi, o le Atua lea.”‘Ona tali mai lea o le nu‘u uma, ‘ua fa‘apea mai, “‘Ua lelei lau ‘upu.”
25. ‘Ona fai atu lea o Elia i perofeta a Paala, “‘Inā filifili ia se povi mo ‘outou ma ‘ia muamua ‘ona sauni ai e ‘outou, auā e to‘atele ‘outou; ‘ia ‘outou vala‘au atu fo‘i i le igoa o ‘outou atua, ‘ae ‘aua le avane i ai le afi.”
26. ‘Ona latou ‘avea lea o le povi na tu‘uina atu ‘iā te i latou, ‘ua latou saunia fo‘i ma latou vala‘au atu i le igoa o Paala, na amata i le taeao ‘ua o‘o i le tutonu o le la, ‘ua fa‘apea atu, “Paala e, ‘ia e fa‘afogafoga mai ‘iā te i matou.” A ‘ua leai se leo; e leai sē na tali mai. ‘Ona latou feosofi lea i le fatafaitaulaga na latou faia.
27. ‘Ua o‘o i le tutonu o le la, ‘ona tauemu atu lea o Elia ‘iā te i latou, ‘ua ia fa‘apea atu, “‘Inā vala‘au atu ia, ‘ia leo tele; auā o le atua ia; po ‘ua tautala ia, po ‘ua alu ‘ese, po ‘ua alu i se malaga; ai lava ‘ua moe ia, e tatau ‘ona fagufagu atu ‘iā te ia.”
28. ‘Ona latou vala‘au atu lea ‘ua leo tele ma latou selei ‘iā te i latou i polo ma tui, e tusa ma la latou tu, ‘ua o‘o ‘ina fa‘amaligiina ifo le toto ‘iā te i latou.
29. ‘Ua mavae le tutonu o le la, ‘ona latou perofeta ane lea ‘ua o‘o i le itūlā e fai ai le taulaga afiafi, a ‘ua leai se leo, e leai sē na tali mai, pe fa‘alogo mai.
30. ‘Ona fai atu lea o Elia i le nu‘u uma, “‘Inā fa‘alatalata mai ia ‘iā te a‘u.” ‘Ona fa‘alatalata atu lea o le nu‘u uma ‘iā te ia, ‘ona toe teu lea e ia o le fatafaitaulaga o le ALI‘I sa sōloia i lalo.
31. ‘Ona ‘ave lea e Elia o ma‘a e sefulu ma le lua e tusa ma le faitauina o itū‘āiga o atali‘i o Iakopo, o le na o‘o i ai le afioga a le ALI‘I, ‘ua fa‘apea, “E igoa oe ‘iā Isaraelu.”
32. ‘Ona faia lea e ia i ia ma‘a o le fatafaitaulaga i le suafa o le ALI‘I; ‘ua faia fo‘i e ia le utu ‘ua so‘o ai le fatafaitaulaga; o lona tele ‘ua tusa ma sea e lua o fua.
33. ‘Ona fa‘aafu lea e ia o fafie ma pena le povi ma fa‘ae‘e ai i luga o fafie; ‘ona fai atu lea o ia, “‘Inā fa‘atumu mai ia o kate e fa i le vai ma sasa‘a ai i luga o le taulaga mū ma luga o fafie.”
34. ‘Ua ia fai atu fo‘i, “‘Inā fo‘i fa‘alua mai ia.” ‘Ona latou fo‘i fa‘alua mai ai lea. ‘Ua ia fai atu fo‘i, “‘Inā fo‘i fa‘atolu mai ia.” ‘Ona latou fo‘i fa‘atolu mai ai lea.
35. ‘Ua tafe le vai ‘ua so‘o ai le fatafaitaulaga; ‘ua tumu fo‘i le utu i le vai.
36. ‘Ua o‘o i le itūlā e fai ai le taulaga afiafi ‘ona fa‘alatalata atu ai lea o Elia le perofeta, ‘ua fa‘apea atu, “Le ALI‘I e, le Atua o Aperaamo ma Isaako ma Isaraelu, ‘ia fa‘ailoa i lenei aso, o oe o le Atua i Isaraelu, o a‘u fo‘i o lau ‘au‘auna ma ‘ua ‘ou faia o nei mea uma e tusa ma lau afioga.
37. ‘ia e fa‘afofoga mai ‘iā te a‘u, le ALI‘I e, ‘ia e fa‘afofoga mai ‘iā te a‘u, ‘ina ‘ia iloa e le nu‘u nei o oe o le ALI‘I o le Atua ma ‘ua e fa‘aliliuina mai o latou loto.”
38. ‘Ona pa‘ū ifo lea o le afi a le ALI‘I ma fa‘aumatia ai le taulaga mū ma fafie ma ma‘a ma le ‘ele‘ele ‘ua miti‘ia ai fo‘i le vai sa i le utu.
39. ‘Ua iloa e le nu‘u uma, ‘ona fa‘apa‘u‘ū faō ai lea o i latou, ‘ua fa‘apea, “O le ALI‘I, o le Atua ia; o le ALI‘I o le Atua ia!”
40. ‘Ona fai atu lea o Elia ‘iā te i latou, “‘Ia ‘outou pupu‘e i perofeta a Paala; ‘aua ne‘i sao atu so latou.” ‘Ona latou pupu‘e lea ‘iā te i latou; ‘ua ‘ave ifo fo‘i e Elia ‘iā te i latou i le alia o Kisona ma na fasioti ‘iā te i latou i lea mea.
41. ‘Ona fai atu lea o Elia ‘iā Aapo, “‘Inā maliu a‘e ia oe, ‘ia e taumafa ma inu; auā o le ta‘alili o le timu tele.”
42. ‘Ona alu a‘e ai lea o Aapo e ‘ai ma inu; ‘ua alu a‘e fo‘i Elia i le tumutumu o Karamelu, ‘ua ia ifo ai i le ‘ele‘ele ma tu‘u ona mata i le vā o ona tulivae.
43. ‘Ua fai atu ia i lana ‘au‘auna, “‘Ia e alu a‘e ma va‘ava‘ai i tai.”‘Ona alu a‘e lea o ia ma ia va‘ava‘ai, ‘ua fa‘apea mai, “E leai se mea.” ‘Ona fai atu lea o ia, “‘Inā fo‘i fa‘afitu atu ia.”
44. ‘Ua o‘o i lona fo‘i fa‘afitu, ‘ona ia fai mai lea, “Fa‘auta, ‘ua alu a‘e i le sami se ao itiiti e pei o se alofilima o se tagata.”‘Ona fai atu lea o ia, “‘Inā alu a‘e ia ma e fai atu ‘iā Aapo, ‘‘Inā sauni ia lou nofoa fa‘ata‘avalevale ma e maliu ifo, ne‘i tāofia oe i le timuga.’”
45. O lo‘o fai fo‘i ia mea, ‘ua fa‘amalumalu ifo le lagi i ao ma le savili; ‘ua tele lava le timu. ‘Ua ti‘eti‘e Aapo i le nofoa fa‘ata‘avalevale ma alu i Isereelu.
46. Sa ‘iā Elia le ‘a‘ao o le ALI‘I; ‘ona fusi ai lea o ia i lona sulugātiti ma tamo‘e i luma o Aapo, ‘ua o‘o i le mea e ui atu ai i Isereelu.#