1. ‘Ua toeaina le tupu o Tavita, ‘ua tele ona tausaga; ‘ua latou ufitia o ia i ‘ie, ‘ae lē mafanafana ai o ia.
2. ‘Ona fai atu lea o ana ‘au‘auna ‘iā te ia, “Se‘i sā‘ili mai se teine taupou mo lo matou ali‘i le tupu, ‘ina ‘ia tu o ia i luma o le tupu, ma tausi ‘iā te ia; ‘ia ta‘oto fo‘i o ia i lou fatafata, ‘ina ‘ia mafanafana ai lo matou ali‘i le tupu.”
3. ‘Ona latou sā‘ili‘ili ai lea i itū uma o Isaraelu o se teine lālelei; ‘ua latou maua Apiseka le Sunema, ‘ona latou ‘aumaia lea o ia i le tupu.
4. O le teine matuā lālelei lava ia, na ia tausia fo‘i le tupu ma ‘au‘auna ‘iā te ia; ‘ae le‘i iloa o ia e le tupu.
5. O Atonia, o le tama tane a Akita, ‘ua fa‘amaualuga o ia, ‘ua fa‘apea, “‘Ou te fai ma tupu.” ‘Ua ia faia fo‘i mōna o le nofoa fa‘ata‘avalevale, ma ē ti‘eti‘e i solofanua ma tagata e to‘alimagafulu e taufetuli i ona luma.
6. E le‘i fa‘atigāina o ia e lona tamā talu ‘ina tupu mai, i lona fai atu, “Se a le mea ‘ua e fa‘apea ai? O ia fo‘i ‘ua ‘aulelei lava lona tino; na fānaua o ia o le tua o ia o Apisaloma.”
7. ‘Ua latou fetautalatala‘i fo‘i ma Ioapo le tama a Seruia ma Aviata le ositaulaga; ‘ua la fesoasoani ma mulimuli atu ‘iā Atonia.
8. A o Satoka le ositaulaga ma Penaia le atali‘i o Ieoiata, ma Natano le perofeta, ma Semi, ma Rei, ma le ‘au toa, o ē sa ‘iā Tavita, ‘ua lē i ai i latou ‘iā Atonia.
9. ‘Ua fafasi fo‘i e Atonia o mamoe, ma povi, ma manu pepeti, e lata ane i le ma‘a o Soelete, e lata ane i Enerokelu, ‘ua ia tala‘i atu ai ona uso uma, o atali‘i o le tupu ma tagata o Iuta uma lava, o ‘au‘auna a le tupu;
10. a o Natano le perofeta, ma Penaia, ma le ‘au toa, ‘atoa ma Solomona lona uso ‘ua ia le tala‘iina.
11. ‘Ona fai atu lea o Natano ‘iā Patesepa le tinā o Solomona, ‘ua fa‘apea atu, “‘Ua e lē fa‘alogo ‘ea o lo‘o fai ma tupu Atonia le tama tane a Akita, ‘ae lē o silafia e lo tatou ali‘i o Tavita?
12. O lenei, ‘inā sau ia, so‘u fa‘atonu atu ‘iā te oe, ‘ina ‘ia fa‘aola oe ‘iā te oe ma lau tama o Solomona.
13. Alu ia oe ma e ulufale atu i le tupu o Tavita, ma e fai atu i ai, ‘Le ali‘i e, le tupu, na e le tautō mai ‘ea ‘iā te a‘u lau ‘au‘auna fafine, ‘ua fa‘apea mai: E moni, e fai la‘u tama o Solomona ma tupu pe a mavae atu a‘u, e ti‘eti‘e fo‘i o ia i lo‘u nofoāli‘i; se a fo‘i le mea ‘ua fai ai Atonia ma tupu?’
14. Fa‘auta mai ia, a o tautalatala ai ‘oulua ma le tupu ‘ou te alu atu fo‘i e mulimuli ‘iā te oe ma ‘ou fa‘amaonia au ‘upu.”
15. ‘Ona alu atu ai lea o Patesepa i le tupu i lona potu, ‘ua toeaina lava le tupu; ‘ua ‘au‘auna fo‘i Apiseka le Sunema i le tupu.
16. ‘Ona punou ai lea o Patesepa ma ifo atu i le tupu. ‘Ona fai mai lea o le tupu, “Se a ‘ea lou mana‘o?”
17. ‘Ona fai atu lea o ia ‘iā te ia, “Le ali‘i e, na e tautō i le ALI‘I lou Atua i lau ‘au‘auna fafine, na fa‘apea mai: E moni, e fai la‘u tama o Solomona ma tupu pe a mavae atu a‘u, e ti‘eti‘e fo‘i o ia i lo‘u nofoāli‘i.
18. O lenei, fa‘auta, o lo‘o fai ma tupu Atonia, a o oe le ali‘i e, le tupu, ‘ua e lē silafia.
19. ‘Ua fafasi fo‘i e ia o povi ma manu pepeti ma mamoe e tele lava, ‘ua ia tala‘iina fo‘i o atali‘i uma lava o le tupu ma Aviata le ositaulaga, ma Ioapo le pule i ‘au; a o Solomona lau ‘au‘auna ‘ua ia le tala‘iina.
20. A o oe le ali‘i e, le tupu, o lo‘o fa‘asagasaga Isaraelu uma ‘iā te oe, ‘ina ‘ia e fa‘asino mai ‘iā te i latou po o ai e ti‘eti‘e i le nofoāli‘i o lo‘u ali‘i le tupu pe a mavae atu o ia.
21. A leai, ‘ona ta‘uagasalaina lea o i mā‘ua ma la‘u tama o Solomona, pe a ta‘oto lo‘u ali‘i le tupu fa‘atasi ma ona tamā.”
22. Fa‘auta, o tautalatala i lā‘ua ma le tupu, ‘ua ulufale atu Natano le perofeta.
23. ‘Ona latou ta‘u atu lea i le tupu, ‘ua fa‘apea atu, “Fa‘auta, o Natano le perofeta.” ‘Ua ulufale atu o ia i luma o le tupu, ‘ona ifo to‘ele lea o ia i luma o le tupu.
24. ‘Ona fai atu lea o Natano, “Le ali‘i e, le tupu, po ‘ua e fetalai ‘ea, ‘E fai Atonia ma tupu pe a mavae atu a‘u, e ti‘eti‘e fo‘i o ia i lo‘u nofoāli‘i?’
25. Auā ‘ua alu ifo o ia i le aso nei ma ‘ua fafasi i povi ma manu pepeti ma mamoe e tele lava; ‘ua tala‘iina fo‘i e ia o atali‘i uma o le tupu, ma ē ‘avea ‘au ma Aviata le ositaulaga; fa‘auta fo‘i, ‘ua latou ‘a‘ai ma feinu i ona luma ma ‘ua fa‘apea ane, ‘‘Ia soifua le tupu o Atonia.’
26. A o a‘u nei lau ‘au‘auna ma Satoka le ositaulaga, o Penaia fo‘i le atali‘i o Ieoiata, ma lau ‘au‘auna o Solomona ‘ua ia lē tala‘iina.
27. Po ‘ua faia ‘ea lenei mea e lo‘u ali‘i le tupu, a ‘e te le‘i fa‘ailoa mai i lau ‘au‘auna po o ai e ti‘eti‘e i le nofoāli‘i o lo‘u ali‘i le tupu pe a mavae atu o ia?”
28. ‘Ona tali mai lea o le tupu o Tavita, ‘ua fa‘apea mai, “‘Inā vala‘au atu ia ‘iā Patesepa e sau ‘iā te a‘u.” ‘Ona sau lea o ia i luma o le tupu, ‘ua tu fo‘i i luma o le tupu.
29. ‘Ona tautō lea o le tupu, ‘ua fa‘apea mai, “O lo‘o soifua le ALI‘I, o lē na fa‘aolaina a‘u i puapuagā uma lava.
30. E fa‘apei ‘ona ‘ou tautō ‘iā te oe i le ALI‘I le Atua o Isaraelu, ‘ua fa‘apea atu ‘E moni, e fai la‘u tama o Solomona ma tupu pe a mavae atu a‘u,’ e ti‘eti‘e fo‘i o ia i lo‘u nofoāli‘i e sui a‘i a‘u, e fa‘apea lava ‘ona ‘ou faia i le aso nei.”
31. ‘Ona punou lea o Patesepa i le ‘ele‘ele, ‘ua ifo o ia i le tupu, ‘ua fa‘apea atu, “‘Ia soifua e fa‘avavau lo‘u ali‘i le tupu o Tavita.”
32. ‘Ona fai mai lea o le tupu o Tavita, “‘Inā vala‘au atu ia ‘iā Satoka le ositaulaga ma Natano le perofeta, ma Penaia le atali‘i o Ieoiata.” ‘Ona latou ō mai lea i luma o le tupu.
33. ‘Ona fai atu lea o le tupu ‘iā te i latou, “‘Inā ō ia ‘outou ‘atoa ma ‘au‘auna a lo ‘outou ali‘i, ma fa‘ati‘eti‘e ‘iā Solomona lo‘u atali‘i i la‘u lava falata, ma ta‘ita‘i ifo ‘iā te ia i Kiona;
34. ma ‘ia fa‘au‘uina o ia i lea mea e Satoka le ositaulaga ma Natano le perofeta, e fai ma tupu ‘iā Isaraelu; ‘ia ‘outou ili fo‘i le pū ma fai atu, ‘‘Ia soifua le tupu o Solomona.’
35. ‘Ona ‘outou ō a‘e lea o mulimuli ‘iā te ia, ‘ina ‘ia sau o ia ma ti‘eti‘e i lo‘u nofoāli‘i; auā e fai o ia ma tupu e sui a‘i a‘u; ‘ua ‘ou tofia fo‘i o ia e fai ma ta‘ita‘i ‘iā Isaraelu ‘atoa fo‘i ma Iuta.”
36. ‘Ona tali atu lea o Penaia le atali‘i o Ieoiata i le tupu, ‘ua fa‘apea atu. “Amene! ‘Ia fa‘apea ‘ona fetalai mai o le ALI‘I le Atua o lo‘u ali‘i le tupu.
37. E fa‘apei ‘ona i ai o le ALI‘I i lo‘u ali‘i le tupu, ‘ia fa‘apea lava ‘ona i ai o ia ‘iā Solomona ma fa‘asili ‘ona mamalu o lona nofoāli‘i i le nofoāli‘i o lo‘u ali‘i le tupu o Tavita.”
38. ‘Ona ō ifo lea o Satoka le ositaulaga, ma Natano le perofeta, ma Penaia le atali‘i o Ieoiata ma le ‘au Kereti ma le ‘au Peleti, ma latou fa‘ati‘eti‘e ‘iā Solomona i le falata a le tupu o Tavita ma latou ta‘ita‘i ‘iā te ia i Kiona.
39. ‘Ona ‘ave lea e Satoka le ositaulaga le fagu nifo o suāu‘u a‘i le fale fetāfa‘i ma fa‘au‘u ai ‘iā Solomona. ‘Ona latou ilia lea o le pū; ‘ua fai atu le nu‘u uma, “‘Ia soifua le tupu o Solomona.”
40. ‘Ona ō a‘e lea o le nu‘u uma o mulimuli atu ‘iā te ia, ‘ua latou ilia fo‘i fagufagu ma latou ‘oli‘oli lava ma le ‘oli‘oli tele, ‘ua māvae le lau‘ele‘ele i lo latou ‘alalaga.
41. ‘Ua lagona ai e Atonia ma i latou uma sa tala‘iina e ia, ‘ina ‘ua uma ‘ona latou ‘a‘ai. ‘Ua lagona fo‘i e Ioapo le leo o le pū, ‘ona fa‘apea lea o ia, “Po o le a ‘ea lenā vāvāō o le ‘a‘ai ‘ua vevesi?”
42. Fa‘auta, o tautala o ia ‘ua sau Ionatana le atali‘i o Aviata le ositaulaga; ‘ona fai atu lea o Atonia ‘iā te ia, “Sau ia, auā o oe o le tagata amio lelei, ma ‘ua e ‘aumaia tala lelei.”
43. ‘Ona tali mai lea o Ionatana ‘iā Atonia, ‘ua fa‘apea mai, “E moni, o lo tatou ali‘i o le tupu o Tavita, ‘ua na faia lava Solomona ma tupu.
44. ‘Ua ‘a‘auina fo‘i fa‘atasi ma ia e le tupu, o Satoka le ositaulaga ma Natano le perofeta ma Penaia le atali‘i o Ieoiata ma le ‘au Kereti ma le ‘au Peleti, ‘ua latou fa‘ati‘eti‘e fo‘i ‘iā Solomona i le falata a le tupu;
45. ‘ua fa‘au‘uina fo‘i o ia i Kiona e Satoka le ositaulaga ma Natano le perofeta e fai ma tupu; ‘ua latou ō a‘e ai ma le ‘oli‘oli, ‘ua vevesi ai fo‘i le ‘a‘ai. O le vāvāō lea ‘ua ‘outou fa‘alogo atu i ai.
46. O lo‘o ti‘eti‘e fo‘i Solomona i le nofoāli‘i o le mālō.
47. I le ma lea fo‘i, ‘ua ō atu ‘au‘auna a le tupu e fa‘amanuia atu i lo tatou ali‘i le tupu o Tavita, ‘ua fa‘apea atu, ‘‘Ia fa‘asili e le Atua o le suafa o Solomona i lou suafa ma ia fa‘asili lenā nofoāli‘i i lou nofoāli‘i.’ ‘Ona ifo lea o le tupu i lona moega.
48. ‘Ua fai mai fo‘i le tupu, ‘ua fa‘apea mai, ‘‘Ia fa‘afetaia le ALI‘I le Atua o Isaraelu, o lē ‘ua foa‘iina mai i le aso nei o le tasi e ti‘eti‘e i lo‘u nofoāli‘i, o lo‘o va‘ai atu i ai o‘u mata.’”
49. ‘Ona matata‘u ai lea o i latou uma ē na tala‘iina o ē sa i ai ma Atonia ma ‘ua latou tutū ‘ua latou ta‘itasi ma alu i lona ala.
50. ‘Ua mata‘u fo‘i Atonia ‘ona o Solomona, ‘ona tula‘i lea o ia ma alu ma tago atu i nifo o le fatafaitaulaga.
51. ‘Ua ta‘uina mai fo‘i ‘iā Solomona ‘ua fa‘apea mai, “Fa‘auta, ‘ua mata‘u Atonia i le tupu o Solomona; fa‘auta fo‘i, ‘ua tago atu o ia i nifo o le fatafaitaulaga, ‘ua fa‘apea mai o ia, ‘‘Ia tautō mai le tupu o Solomona ‘iā te a‘u i le aso nei na te lē fasiotia lana ‘au‘auna i le pelu.’”
52. ‘Ona fai atu lea o Solomona, “‘Āfai e amio lelei o ia e lē pa‘ū sona lauulu i le ‘ele‘ele; ‘ae ‘āfai e iloa se leaga ‘iā te ia, e oti ia.”
53. ‘Ona ‘a‘auina atu lea o nisi e le tupu o Solomona; ‘ua latou ta‘ita‘i mai fo‘i ‘iā te ia a‘i le fatafaitaulaga. ‘Ona sau lea o ia ma ifo mai i le tupu o Solomona; ‘ona fai atu lea o Solomona ‘iā te ia, “Alu ia oe i lou fale.”