1. Sa latou nonofo i tausaga e tolu ‘ua leai se tau‘a ‘iā Suria ma Isaraelu.
2. ‘Ua o‘o i le tausaga e tolu, ‘ona alu ifo lea o Iosefatu le tupu o Iuta, i le tupu o Isaraelu.
3. ‘Ua fai atu le tupu o Isaraelu i ana ‘au‘auna, “Tou te lē iloa ‘ea o Ramota-Kiliata o la tatou ‘a‘ai lea, a ‘ua tatou nonofo ‘ua lē faoa mai le lima o le tupu o Suria.”
4. ‘Ua fai atu fo‘i o ia ‘iā Iosefatu, “Tā te ō atu ‘ea ma a‘u i le tau‘a i Ramota-Kiliata?”‘Ona fai mai lea o Iosefatu i le tupu o Isaraelu, “O a‘u nei e pei o oe lava, o lou nu‘u e pei o lou nu‘u, o a‘u solofanua e pei lava o au solofanua.”
5. ‘Ua fai mai fo‘i Iosefatu i le tupu o Isaraelu, “Se‘i e fesili i le aso nei i se afioga mai le ALI‘I.”
6. ‘Ona fa‘apotopoto mai lea e le tupu o Isaraelu o le ‘au perofeta, pe to‘afa selau o tagata ma na fai atu ‘iā te i latou, “‘Ou te alu atu ‘ea i Ramota-Kiliata e tau ai le tau‘a, pe ‘ou te nofo?”‘Ona latou fai mai lea, “‘Ia e maliu a‘e; auā e foa‘iina mai ai e le Ali‘i i le ‘a‘ao o le tupu.”
7. ‘Ona fai mai lea o Iosefatu, “E lē o ‘i‘inei ‘ea se perofeta a le ALI‘I, ‘ina ‘ia tatou fesili atu ‘iā te ia?”
8. ‘Ona fai atu lea o le tupu o Isaraelu ‘iā Iosefatu, “O le tasi tagata fo‘i o Mekaio, o le atali‘i o Imila, tatou te fesili atu ai i le ALI‘I; a ‘ou te ‘ino‘ino ‘iā te ia auā na te lē vavalo mai ‘iā te a‘u i mea lelei, a o mea leaga.”‘Ona fai mai lea o Iosefatu, “‘Aua le fetalai fa‘apea mai le tupu.”
9. ‘Ona vala‘au lea o le tupu o Isaraelu i le tasi ‘au‘auna sili, ‘ua fa‘apea atu, “‘Ia e fa‘avave mai ‘ia Mekaio le atali‘i o Imila.”
10. ‘Ua ta‘itasi ma nofo i lona nofoāli‘i, o le tupu o Isaraelu ma Iosefatu le tupu o Iuta; sa ‘o‘ofu fo‘i lā‘ua i o lā‘ua ‘ofuali‘i, i le mea e avanoa e lata ane i le faitoto‘a o Samaria; o lo‘o vavalo fo‘i perofeta uma i o la luma.
11. Na faia fo‘i e Setekaia, le atali‘i o Kenaana o nifo u‘amea mo ia ma fai atu, “O lo‘o fa‘apea ‘ona fetalai mai o le ALI‘I, O mea nei ‘e te suatia ai Suria, se‘ia e fa‘aumatia i latou.”
12. ‘Ua fa‘apea fo‘i ‘ona vavalo o Perofeta uma, ‘ua fa‘apea atu, “‘Inā maliu a‘e ia i Ramota-Kiliata ma ‘ia manuia; auā e foa‘iina mai ai e le ALI‘I i le ‘a‘ao o le tupu.”
13. O le ‘au‘auna na alu e ‘a‘ami ‘iā Mekaio, ‘ua fai atu o ia ‘iā te ia, ‘ua fa‘apea atu, “Fa‘auta mai ‘ea i ‘upu a le ‘au perofeta i le tupu, ‘ua tasi, ‘ua lelei; se‘i fa‘apea fo‘i lau ‘upu, ‘ia pei o le ‘upu a so latou, ia e fai atu se ‘upu lelei.”
14. ‘Ona fai mai lea o Mekaio, “O lo‘o soifua le ALI‘I, o le mea e fai mai ai le ALI‘I ‘iā te a‘u, o le mea lea ‘ou te fai atu ai.”
15. ‘Ua sau fo‘i o ia i le tupu. ‘Ona fai atu lea o le tupu ‘iā te ia, “Mekaio e, pe matou te ō atu ‘ea i Ramota-Kiliata i le tau‘a, pe matou te nonofo?”‘Ona fai mai lea o ia ‘iā te ia, “‘Inā maliu a‘e ia, ma ia manuia; auā e foa‘iina mai ai e le ALI‘I i le ‘a‘ao o le tupu.”
16. ‘Ona fai atu lea o le tupu ‘iā te ia, “Pe fo‘i fa‘afia ‘ea ‘ou fai atu ‘ia tautō oe; ‘aua ne‘i e fai mai ‘iā te a‘u se mea e tasi, tau lava o le ‘upu moni i le suafa o le ALI‘I?”
17. ‘Ona fai mai lea o ia, “Na ‘ou iloa atu ‘iā Isaraelu uma ‘ua fa‘ata‘ape‘apeina i mauga, e pei o mamoe ‘ua leai so latou leoleo. ‘Ona fetalai mai lea o le ALI‘I, ‘‘Ua leai so latou ali‘i; ‘ia latou ta‘itasi ma toe fo‘i atu i lona fale ma le filemū.’”
18. ‘Ona fai atu lea o le tupu o Isaraelu ‘iā Iosefatu. “Na ‘ou le fai atu ‘ea ‘iā te oe, na te lē vavalo mai ‘iā te a‘u se mea lelei, na o le mea leaga?”
19. ‘Ona fai mai ai lea o Mekaio, “O lenei, ‘ia e fa‘afogafoga mai i le afioga a le ALI‘I. Na ‘ou iloa atu i le ALI‘I o lo‘o ti‘eti‘e i lona nofoāli‘i; sa tutū fo‘i ‘au uma o le lagi e latalata ‘iā te ia, i lona itū taumatau ma lona itū tauagavale.
20. Na fetalai atu fo‘i le ALI‘I, ‘Po o ai ‘ea na te fa‘a‘ole‘ole ‘iā Aapo, ‘ina ‘ia alu a‘e o ia ma oti i Ramota-Kiliata?’ ‘Ona fai mai lea o le tasi e fa‘apea, ‘ae fai mai le isi e fa‘apea.
21. ‘Ona alu ane lea o le tasi agaga ma tu mai, i luma o le ALI‘I, ‘ua fai mai, ‘‘Ou te fa‘a‘ole‘ole ‘iā te ia.’
22. Na fetalai atu fo‘i le ALI‘I ‘iā te ia, ‘I ni a ‘ea?’ ‘Ona fai mai lea o ia, ‘‘Ou te alu ma ‘ou fai ma agaga pepelo i gutu o ana perofeta uma.’ ‘Ona fetalai atu lea o le ALI‘I, ‘‘E te fa‘aoleole ‘iā te ia ‘e te mālō fo‘i ‘inā alu ia, ‘inā e faia ia o lea.’
23. O lenei, fa‘auta, ‘ua tu‘uina e le ALI‘I le agaga pepelo i gutu o au perofeta nei uma; auā ‘ua fetalai le ALI‘I ‘ia o‘o le leaga ‘iā te oe.”
24. ‘Ona fa‘alatalata mai lea o Setekaia le atali‘i o Kenaana ma na tu‘i mai ‘iā Mekaio i lona alafau ma fai mai, “Po o fea na ui ai le Agaga o le ALI‘I nai ‘iā te a‘u e tautala atu ‘iā te oe?”
25. ‘Ona fai atu ai lea o Mekaio, “Fa‘auta, ‘e te iloa i lea lava aso ‘e te alu atu ai i le afeafe tuloto ‘e te lafi ai.”
26. ‘Ona fai ane lea o le tupu o Isaraelu, “‘Inā ‘ave ia ‘iā Mekaio ma toe ta‘ita‘i ‘iā te ia ‘iā Amone le ali‘i o le ‘a‘ai ma Ioasa le atali‘i o le tupu;
27. ma e fai atu, ‘O lo‘o o fa‘apea mai le tupu: ‘Inā tu‘uina atu ia o lenei tamaloa i le falepuipui ma fafaga ‘iā te ia i le mea e ‘ai a ē ‘ua tigāina ma le vai a ē ‘ua tigāina, se‘ia ‘ou sau ma le manuia.’”
28. ‘Ona fai mai lea o Mekaio, “‘Āfai lava ‘e te toe maliu mai ma le manuia, ‘ua ‘ou lē tautala i le afioga mai le ALI‘I.” ‘Ua fai ane fo‘i o ia, “‘Inā fa‘alogologo mai ia o ‘outou le nu‘u uma.”
29. ‘Ona ō a‘e lea o le tupu o Isaraelu ma Iosefatu le tupu o Iuta i Ramota-Kiliata.
30. ‘Ua fai atu le tupu o Isaraelu ‘iā Iosefatu, “‘Ou te ‘ofu ‘ese a‘u ma alu i le tau‘a; a ‘ia e ‘ofu oe i lou lava ‘ofu.” ‘Ona ‘ofu lea o le tupu o Isaraelu i ‘ofu ‘ese ma alu i le tau‘a.
31. ‘Ua fai atu le tupu o Suria i ali‘i e to‘atolugafulu ma le to‘alua e pule i ona kariota, ‘ua ia fa‘apea atu, “‘Aua ne‘i tou tau ma se tagata nu‘u po o se ali‘i, tau lava o le tupu o Isaraelu.”
32. ‘Ua iloa atu e ali‘i e pule i kariota ‘iā Iosefatu, ‘ona latou fa‘apea ane lea, “Ai o le tupu o Isaraelu lenā.” ‘Ona latou fa‘asaga ane lea, latou te tau ma ia; ‘ona ‘alaga lea o Iosefatu.
33. ‘Ua iloa e ali‘i e pule i kariota, e lē o le tupu o Isaraelu lea, ‘ona latou fo‘i atu lea, ‘ua lē toe tuliloa ‘iā te ia.
34. ‘Ua so‘ona fana e le tasi tagata lana u, ‘ua lavea ai le tupu o Isaraelu i le so‘o o lona ‘ofutau u‘amea. ‘Ona fai atu lea o ia i le ta‘ita‘i o lona kariota, “‘Inā liliu ane ia o lou lima ma ‘ave ‘iā te a‘u i tua o ‘au, auā ‘ua ‘ou manu‘a.”
35. Na fa‘atetele le tau‘a i lea aso; ‘ua lagolagoina fo‘i le tupu i lona kariota e fa‘afeagai ma Suria; ‘ona oti lea o ia i le afiafi; ‘ua sisina ifo le toto o le manu‘a i totonu o le kariota.
36. ‘Ua alu le manu i le goto o le la i ‘au, ‘ua fa‘apea, “‘Ia ta‘itasi ma alu i lana ‘a‘ai ma lona nu‘u.”
37. ‘Ua oti fo‘i le tupu, ‘ua ‘aumai i Samaria; ‘ua latou tanu fo‘i le tupu i Samaria.
38. ‘Ua fufulu e se tasi le kariota i le vailepa i Samaria, ‘ua latou fufulu fo‘i lana ‘au‘upega; na etoeto fo‘i e ulī lona toto, e tusa ma le afioga a le ALI‘I na ia fetalai mai ai.
39. O toe o mea na faia e Aapo ma mea uma na ia faia, ma le fale nifo o elefane na ia faia ma ‘a‘ai uma na ia faia, ‘ua lē tusia ‘ea i le tusi o tala i nofoa‘iga a tupu o Isaraelu?
40. ‘Ua ta‘oto Aapo fa‘atasi ma ona tamā, ‘ona soloa‘i ane lea o Aasaia lona atali‘i e fai ma tupu.
41. O le fa o tausaga o Aapo le tupu o Isaraelu na fai ai Iosefatu le atali‘i o Asa ma tupu o Iuta.
42. E tolu sefulu ma le lima o tausaga o Iosefatu ‘ina o fai o ia ma tupu; na fai fo‘i o ia ma tupu i Ierusalema i tausaga e lua sefulu ma le lima; o Asopa le igoa o lona tinā, o le afafine o Seleki.
43. Na savali o ia i ala uma o Asa lona tamā, ‘ua lē alu ‘ese ai o ia, na faia e ia o meatonu i luma o le ALI‘I, a ‘ua lē ‘ave‘eseina o mea maualuluga; ‘ua fai taulaga pea le nu‘u ma fa‘amūina mea manogi i mea maualuluga.
44. Na lelei Iosefatu ma le tupu o Isaraelu.
45. O toe o mea na faia e Iosefatu ma lona fitafita sa fai ma ona tau‘a, ‘ua lē tusia ‘ea ia i le tusi o tala i nofoa‘iga a tupu o Iuta?
46. O tagata fa‘asotoma na totoe, o ē na totoe i ona po o Asa lona tamā, na ‘ave‘esea e ia a‘i le nu‘u.
47. Sa leai se tupu i Etoma; na fai ma tupu lē na tofia e pule.
48. Na fai va‘a Tasesa e Iosefatu e o i Ofeira e maua ai auro; a ‘ua lē o‘o, ‘ina ‘ua tu‘ia o va‘a i Esiokape.
49. ‘Ona fai atu lea o Aasaia le atali‘i o Aapo ‘iā Iosefatu, “‘Ia ō fa‘atasi a‘u ‘au‘auna ma au ‘au‘auna i va‘a;” a ‘ua lē mafai Iosefatu.
50. ‘Ua ta‘oto Iosefatu fa‘atasi ma ona tamā, ‘ua tanumia fo‘i o ia fa‘atasi ma ona tamā i le ‘a‘ai a lona tamā o Tavita; ‘ona soloa‘i ane lea o Iorama lona atali‘i e fai ma tupu.
51. O le sefulu ma le fitu o tausaga o Iosefatu le tupu o Iuta na fai ai Aasaia le atali‘i o Aapo ma tupu o Isaraelu i Samaria; e lua tausaga na fai ai o ia ma tupu o Isaraelu.
52. ‘Ua amio leaga fo‘i o ia i luma o le ALI‘I, ‘ua ia savali i le ala o lona tamā ma le ala o lona tinā ma le ala o Ierepoamo le atali‘i o Nepata, o lē na fa‘atupuina le agasala ‘iā Isaraelu.
53. Auā na ia ‘au‘auna ‘iā Paala ma ifo atu ‘iā te ia ma na fa‘a‘ono‘ono i le ALI‘I le Atua o Isaraelu, e tusa ma mea uma na faia e ona tamā.