1. Fa‘auta fo‘i, ‘ua sau le tagata o le Atua, i le afioga a le ALI‘I mai Iuta i Peteli; o lo‘o tu mai fo‘i Ierepoamo i tafatafa o le fatafaitaulaga e fa‘amū ai mea manogi.
2. ‘Ona ‘alaga atu lea o ia i le fatafaitaulaga i le afioga a le ALI‘I, ‘ua ia fa‘apea atu, “Le fatafaitaulaga e, le fatafaitaulaga e, o lo‘o fa‘apea ‘ona fetalai mai o le ALI‘I, ‘Fa‘auta o le a fānau mai le tama i le ‘āiga o Tavita, e igoa ia Iosia, na te fai taulaga i luga ‘iā te oe i le ‘au ositaulaga o mea maualuluga, o ē fa‘amū mea manogi i luga ‘iā te oe, e susunuina fo‘i ivi o tagata i luga ‘iā te oe.’”
3. ‘Ona avane lea e ia o le fa‘ailoga i lea lava aso, ‘ua fa‘apea atu, “O le fa‘ailoga lenei ‘ua fetalai mai ai le ALI‘I; ‘fa‘auta, e pā le fatafaitaulaga, e masa‘a ai fo‘i le lefulefu o lo‘o i ona luga.’”
4. ‘Ua fa‘alogo le tupu i le ‘upu a le tagata o le Atua, ‘ua ia ‘alaga atu ai i le fatafaitaulaga i Peteli, ‘ona ‘a‘apa atu lea e Ierepoamo o lona lima nai le fatafaitaulaga, ‘ua fa‘apea atu, “‘Inā pu‘e ia ‘iā te ia;” ‘ona gase lea o lona lima na ia ‘a‘apa atu ‘iā te ia, ‘ua lē toe mafai ‘ona fa‘afo‘i ai ‘iā te ia.
5. ‘Ua māvae fo‘i le fatafaitaulaga, ‘ua masa‘a fo‘i le lefulefu na i le fatafaitaulaga, e tusa ma le fa‘ailoga na avane e le tagata o le Atua i le afioga a le ALI‘I.
6. ‘Ona fai atu lea o le tupu, ‘ua fa‘apea atu i le tagata o le Atua, “‘Ia e ‘ai‘oi atu i luma o le ALI‘I lou Atua ma e tatalo atu mo a‘u, ‘ina ‘ia toe lelei lo‘u lima.”‘Ona ‘ai‘oi atu ai lea o le tagata o le Atua i luma o le ALI‘I, ‘ona toe lelei lea o le lima o le tupu, ‘ua pei o anamua.
7. ‘Ona fai atu lea o le tupu i le tagata o le Atua, “Se‘i tā ō ma a‘u i lo‘u fale, ‘e te mālōlō ai, ‘ou te avatu fo‘i ‘iā te oe se mea alofa.”
8. ‘Ona fai mai lea o le tagata o le Atua i le tupu, “‘Āfai ‘e te foa‘i mai ‘iā te a‘u le vaeluagalemū o mea o i lou fale, tā te le ō fa‘atasi ma oe; ‘ou te lē ‘ai ni mea e a‘i, ‘ou te lē inu vai fo‘i i lenei mea.
9. Auā na fa‘apea ‘ona fetalai mai ai ‘iā te a‘u o le afioga a le ALI‘I, na fa‘apea mai: ‘Aua ‘e te ‘ai i mea e ‘ai, ‘aua ne‘i e inu fo‘i i le vai, ‘aua fo‘i le toe fo‘i mai i le ala ‘e te alu atu ai.”
10. ‘Ona alu atu lea o ia i le tasi ala, ‘ua lē fo‘i atu o ia i le ala na ia alu atu ai i Peteli.
11. Sa nofo i Peteli le tasi perofeta ‘ua toeaina; na ō atu ona atali‘i ma talatala atu ‘iā te ia i mea uma na faia e le tagata o le Atua i lenā aso i Peteli; o ‘upu fo‘i na ia fai atu ai le tupu ‘ua latou talatala atu ai i lo latou tamā.
12. ‘Ona fai atu lea o lo latou tamā ‘iā te i latou, “O le fea ala na atu alu atu ai o ia?” Auā na iloa e ona atali‘i le ala na alu atu ai le tagata o le Atua, o lē na sau mai Iuta.
13. ‘Ua ia fai atu fo‘i i ona atali‘i, “‘Inā fa‘anofoa ia le asini mo a‘u;” ‘ona latou fa‘anofoa ai lea o le asini mo ia; ‘ona ti‘eti‘e ai lea o ia.
14. ‘Ona mulimuli atu lea o ia i le tagata o le Atua, na ia maua atu ‘iā te ia o nofo i lalo o le tapeneto; ‘ona fai atu lea o ia ‘iā te ia, “O oe ‘ea le tagata o le Atua na sau mai Iuta?”‘Ona tali mai lea o ia, “O a‘u lenei.”
15. ‘Ona fai atu lea o ia ‘iā te ia, “Tā te ō ma a‘u i lo‘u fale, se‘i ē tausami sina mea.”
16. ‘Ona fai mai lea o ia, “‘Ou te lē mafai ‘ona tā toe fo‘i atu ma oe ma te ulufale atu ma oe, ‘ou te lē ‘ai i mea e ai, ‘ou te lē inu fo‘i i le vai fa‘atasi ma oe i lenei mea;
17. auā na fetalai mai ‘iā te a‘u le afioga a le ALI‘I: ‘Aua ‘e te ‘ai i mea e ‘ai, pe inu vai i lea mea; ‘aua fo‘i ‘e te liliu mai ma toe fo‘i mai i le ala ‘e te alu atu ai.”
18. ‘Ona fai atu lea o ia ‘iā te ia, “O a‘u fo‘i o le perofeta e pei o oe; ‘ua fai mai fo‘i le agelu ‘iā te a‘u i le afioga a le ALI‘I, ‘ua fa‘apea mai: ‘Inā e toe fa‘afo‘i mai ia ‘iā te ia fa‘atasi ma oe i lou fale, ‘ina ‘ia ‘ai o ia i mea e ai ma inu i le vai.” A ‘ua tala pepelo o ia ‘iā te ia.
19. ‘Ona la toe fo‘i atu lea ma ia, ‘ua ia ‘ai fo‘i i mea e ‘ai i lona fale ma inu vai.
20. ‘Ua o‘o mai le afioga a le ALI‘I i le perofeta na toe fa‘afo‘i atu ‘iā te ia, a o la nonofo i le laulau.
21. ‘Ona ‘alaga atu lea o ia i le tagata o le Atua na sau mai Iuta, ‘ua fa‘apea atu, “O lo‘o fa‘apea ‘ona fetalai mai o le ALI‘I, ‘ua e fouvale i le afioga a le ALI‘I, ‘ua e lē tausi fo‘i i le poloa‘iga na fetalai mai ai le ALI‘I lou Atua ‘iā te oe,
22. A ‘ua e toe fo‘i mai, ma e ‘ai i mea e ‘ai ma e inu vai i le mea na fetalai mai ai le ALI‘I ‘iā te oe, ‘‘Aua ‘e te ‘ai ai i mea e ‘ai, pe inu vai,’ o le mea lea e lē o‘o ai lou tino i le tu‘ugamau o ou tamā.”
23. ‘Ua uma ‘ona ia ‘ai i mea e ‘ai, ‘ua uma fo‘i ‘ona ia inu, ‘ona fa‘anofoa lea e ia o le asini mo ia, mo le perofeta o lē na ia toe fa‘afo‘i mai.
24. ‘Ua alu ia, ‘ona maua lea o ia e le leona i le ala, ‘ua oti o ia ‘iā te ia; ‘ua lafo ifo fo‘i lona tino i le ala, ‘ua tu le asini e latalata i ai, ‘ua tu fo‘i le leona e latalata i le tino.
25. Fa‘auta fo‘i i tagata ‘ua ō ane, ‘ua latou iloa le tino ‘ua lafo ifo i le ala, ma le leona ‘ua tu mai e latalata i le tino; ‘ona latou ō ai lea ma talatala atu ai i le ‘a‘ai sa nofo ai le perofeta toeaina.
26. ‘Ua fa‘alogo i ai le perofeta o lē na toe fa‘afo‘i atu ‘iā te ia i le ala, ‘ona fa‘apea ane lea o ia, “O le tagata o le Atua lea, o lē na fouvale i le afioga a le ALI‘I; o le mea lea ‘ua tu‘uina atu ai o ia e le ALI‘I i le leona, ‘ua saei ‘iā te ia, ‘ua oti ai o ia, e tusa ma le afioga a le ALI‘I na ia fetalai mai ai ‘iā te ia.”
27. ‘Ona fai atu lea o ia i ona atali‘i, ‘ua fa‘apea atu, “‘Inā fa‘anofoa ia le asini mo a‘u.” ‘Ona latou fa‘anofoaina lea.
28. ‘Ua alu o ia, ‘ona maua lea e ia o lona tino ‘ua lafo ifo i le ala ma le asini ma le leona o lo‘o tutū e latalata ane i le tino; ‘ua lē ‘aina e le leona o le tino, ‘ua lē saeia fo‘i e ia le asini.
29. ‘Ona ‘ava‘e lea e le perofeta o le tino o le tagata o le Atua, ma fa‘ae‘e ai i luga o le asini ma toe avatu ai; ‘ona alu atu lea o le perofeta toeaina i le ‘a‘ai e tagitu‘i ma tanu ‘iā te ia.
30. ‘Ua ia tu‘uina lona tino i lona lava tu‘ugamau; ‘ona latou taufaitagitu‘i lea ‘iā te ia, ‘ua fa‘apea, “Auē lo‘u uso e!”
31. ‘Ua uma ‘ona tanu ‘iā te ia, ‘ona fai atu lea o ia i ona atali‘i, ‘ua fa‘apea atu, “Pe a ‘ou oti, ‘ia ‘outou tanu ‘iā te a‘u i le tu‘ugamau ‘ua tanumia ai le tagata o le Atua, ‘ia tu‘u o‘u ivi i tafatafa o ona ivi;
32. auā e taunu‘u lava le ‘upu na ia vala‘au atu ai i le afioga a le ALI‘I i le fatafaitaulaga o lo‘o i Peteli, ma fale uma o mea maualuluga o lo‘o i ai i ‘a‘ai o Samaria.”
33. ‘Ua mavae lenei mea, ‘ua lē liliu ‘ese Ierepoamo i lona ala leaga, a ‘ua toe faia e ia o tagata mai le nu‘u uma ma ositaulaga o mea maualuluga; ai se mana‘o i ai ‘ua ia tofia o ia, ‘ona ‘avea lea o ia ma ositaulaga o mea maualuluga.
34. Na ‘avea lenei mea ma agasala i le ‘āiga o Ierepoamo, ‘ia vavae‘eseina ma fa‘aumatia i le fogā‘ele‘ele.#