1. ‘Ua fa‘alogo le tupu fafine o Seepa i le tala ‘iā Solomona ‘ona o le suafa o le ALI‘I, ‘ona sau ai lea o ia e tofotofo ‘iā te ia i ‘upu faigatā.
2. ‘Ua sau o ia i Ierusalema ma le ‘au malaga e matuā to‘atele ma kamela o ‘aumai ai mea manogi, ma auro e matuā tele ma ma‘a tāua; na sau o ia ‘iā Solomona, ‘ona la tautalatala ai lea ma ia i mea uma na i ai i lona loto.
3. ‘Ua fa‘amatalaina atu fo‘i e Solomona ‘iā te ia o ana ‘upu uma; ‘ua leai se mea e lilo i le tupu ‘ua ia le ta‘u atu ‘iā te ia.
4. ‘Ua iloa e le tupu fafine o Seepa o le poto uma o Solomona ma le fale ‘ua ia faia,
5. ma mea e ‘ai o i lana laulau ma ona nonofo o ana ‘au‘auna ma ‘ona tutū o ana tautua ma o latou ‘ofu, ma ana tautū uaina ma le ala na ia alu a‘e ai i le fale o le ALI‘I; ‘ona lē toe i ai lea o se loto ‘iā te ia,
6. ‘Ona fa‘apea lea o ia i le tupu, “‘Ua moni le tala na ‘ou fa‘alogo ai i lo‘u nu‘u i au afioga ma lou poto.
7. ‘Ae peita‘i ‘ua ‘ou lē talia ia tala se‘ia ‘ou sau ma va‘ava‘ai i ai o‘u mata. Fa‘auta, e itiiti mea na talaina atu ‘iā te a‘u, ‘ae tele mea na lē talaina atu; ‘ua sili lava lou poto ma lou manuia i le tala na ‘ou fa‘alogo i ai.
8. ‘Amu‘ia ou tagata, ‘amu‘ia fo‘i au ‘au‘auna nei, o ē tutū i ou luma e lē aunoa ma fa‘alogo i lou poto.
9. ‘Ia fa‘afetaia le ALI‘I lou Atua, o lē na finagalo ‘iā te oe e fa‘anofo ‘iā te oe i le nofoāli‘i o Isaraelu; auā ‘ua alofa le ALI‘I ‘iā Isaraelu e le‘i aunoa, ‘ua na fai ai oe ma tupu, ‘ina ‘ia e faia fa‘amasinoga ma mea tonu.”
10. ‘Ua foa‘i mai e ia i le tupu o auro e tasi le selau ma le luafulu o taleni ma mea manogi e matuā tele lava ma ma‘a tāua; ‘ua lē toe ‘aumaia ni mea manogi e tusa ‘ona tele ma mea na foa‘iina mai e le tupu fafine o Seepa i le tupu o Solomona.
11. O le fua fo‘i o Hiramo na ‘aumai ai auro mai Ofeira; ‘ua ‘aumai ai fo‘i mai Ofeira o la‘au o alemuka e matuā tele ma ma‘a tāua.
12. ‘Ua faia e le tupu i la‘au o alemuka o pou mo le fale o le ALI‘I ma le fale o le tupu, o kitara fo‘i ma napeli mo le ‘au pepese; e le‘i toe ‘aumaia ni la‘au o alemuka fa‘apea, e le‘i toe iloa fo‘i ‘ua o‘o i ona po nei.
13. ‘Ua foa‘i atu e le tupu o Solomona i le tupu fafine o Seepa o mea uma na ia finagalo ma fa‘atoga i ai, e fa‘aopoopoina i mea na foa‘ifuaina atu e le tupu o Solomona ‘iā te ia. ‘Ona fo‘i atu lea o ia ma alu atu i lona nu‘u, o ia ma ana ‘au‘auna.
14. O le fua o le mamafa o auro na ‘aumaia ‘iā Solomona i tausaga ta‘itasi, o taleni o auro e ono selau ma le onogafulu ma le ono;
15. ‘atoa fo‘i ma auro ‘ae ‘ua feoa‘i e fa‘atau, ‘atoa ma ē fa‘atau‘oa ma tupu uma o Arapi ma ali‘i e pule i le nu‘u.
16. ‘Ua faia e le tupu o Solomona o talipupuni auro ‘ua fa‘asalalafaina e lua selau; e ta‘iono selau o sekeli o auro i tali pupuni;
17. ma talitā auro ‘ua fa‘asalalafaina e tolu selau; e ta‘itolu mina o auro i talitā; na tu‘uina atu ia e le tupu i le fale o le vao o Lepanona.
18. ‘Ua faia fo‘i e le tupu o le nofoāli‘i tele i nifo o elefane, ‘ua ia ufitia ai fo‘i i le auro lelei.
19. E ono tulagāvae fa‘a‘apefa‘i e alu a‘e ai i le nofoāli‘i, ‘ua fa‘a‘ofu‘ofu fo‘i i luga o le nofoāli‘i i lona itū i tua; sa i ai mea e fa‘alagolago i ai i itū ta‘itasi o le mea e ti‘eti‘e ai; ‘ua tutū fo‘i leona e lua i tafatafa o mea e fa‘alagolago i ai.
20. Sa tutū ai fo‘i leona e sefulu ma le lua i lea itū ma lea itū o tulagāvae fa‘a‘apefa‘i e ono; e leai se mea e fa‘apea ‘ona fai i se tasi mālō.
21. O ipu inu uma a le tupu o Solomona o auro ia, ma ipu uma o le fale o le vao o Lepanona o auro lelei ia; e leai ni ipu ario; ‘ua ta‘ufa‘atauva‘aina lava ario i ona po o Solomona.
22. Auā sa i ai i le tupu o va‘a Tasesa i tai, fa‘atasi ma va‘a o Hiramo; na fo‘i fa‘atasi i tausaga e tolu o va‘a Tasesa ma ‘aumai ai auro ma ario ma nifo o elefane ma kofi ma tuki.
23. Na silisili le tupu o Solomona i tupu uma o le lalolagi i le mau‘oa ma le poto.
24. Na sā‘ili‘ili atu ‘iā Solomona salemausau uma ‘ina ‘ia latou fa‘alogo i lona poto na tu‘uina e le Atua i lona loto.
25. Na ta‘itasi o i latou ma ‘aumai ai lana mea alofa, o ipu ario ma ipu auro ma ‘ofu ma ‘au‘upega ma mea manogi ma solofanua ma falata, i lea tausaga ma lea tausaga.
26. ‘Ua fa‘apotopoto e Solomona o kariota ma ‘au e ti‘eti‘e i solofanua; sa ‘iā te ia o kariota e tasi le afe ma le fa o selau ma ‘au e ti‘eti‘e i solofanua e sefulu afe ma afe e lua; na ia tu‘uina i latou i ‘a‘ai o i ai kariota, i le ma Ierusalema fo‘i e fa‘atasi ai ma le tupu.
27. ‘Ua fa‘ateleina e le tupu Ierusalema o ario ‘ua fa‘apei o ma‘a; ‘ua ia fa‘ateleina fo‘i o arasi ‘ua fa‘apei o sukamoru i le fanua maulalo.
28. Na ‘aumaia solofanua mā Solomona mai Aikupito; na talia fo‘i le vao tagata fa‘atau o le tupu o le vao solofanua i le tau.
29. Na ‘ava‘e ma ‘aumaia mai Aikupito se kariota i tupe e ono selau ma se solofanua i le selau ma le limagafulu o tupe; sa fa‘apea fo‘i ‘ona ‘aumaia e i latou mā tupu uma o sa Hetī ma tupu o Suria.