1. O le fa galau ma le valu o sefulu o tausaga talu ‘ona ō mai o le fānauga a Isaraelu a‘i le nu‘u o Aikupito, o lona fa o tausaga o le nofoa‘iga a Solomona i Isaraelu, o le masina o Sefa, o le masina e lua lea, ‘ua amata ai e ia ‘ona fai o le fale o le ALI‘I.
2. O le fale fo‘i na faia e le tupu o Solomona mo le ALI‘I e ono sefulu o kupita o lona umi ma le lua sefulu o lona lautele, ‘ae tolu sefulu o kupita o lona maualuga lea.
3. O le fa‘apaologa fo‘i i luma o le fale o le malumalu e lua sefulu kupita o lona umi, ‘ua tusa ma le lautele o le fale; e sefulu kupita o lona lautele i luma o le fale.
4. ‘Ua faia fo‘i e ia o fa‘amalama fa‘alava punimau.
5. ‘Ua faia fo‘i e ia i tuāfafo o le pā o le fale o potu i itū e so‘o ai; o le pā o le fale e so‘o ai le malumalu ma le mea e fetalai mai ai. ‘Ua faia e ia o potu e so‘o ai.
6. O le potu aupito i lalo, e lima kupita o lona lautele; o le tuloto, e ono kupita o lona lautele; o lona tolu, e fitu kupita o lona lautele; auā ‘ua ia fa‘alauitiina le pā o le fale i lona tuāfafo e so‘o ai, ‘ina ne‘i fa‘amauina la‘au fa‘alava i le pā o le fale.
7. O le fale fo‘i ‘ina o faia, ‘ua faia i ma‘a na ‘aumaia ‘ua uma ‘ona teua, ‘ua lē lagona fo‘i se samala, po o se matau, po o se tasi lava mea u‘amea i le fale ‘ina o faia.
8. O le faitoto‘a e alu a‘e i le potu e tuloto, sa i ai lea i le itū taumatau o le fale; o le ala fa‘ata‘amilomilo fo‘i ‘ua latou ō a‘e ai i le potu e tuloto; ‘ua ō a‘e fo‘i ai le tuloto i lona tolu.
9. ‘Ua faia fo‘i e ia le fale ma ‘ua fa‘aumaina; ‘ua tapapa fo‘i e ia le fale i fa‘alava ma laupapa arasi.
10. ‘Ua faia fo‘i e ia o ona potu i itū uma o le fale, e lima kupita ona maualuga; ‘ua fa‘aso‘oina fo‘i le fale i la‘au arasi.
11. ‘Ua tulei mai le afioga a le ALI‘I ‘iā Solomona, ‘ua fa‘apea mai,
12. “O la‘u ‘upu i le fale nei ‘ua e faia; ‘āfai ‘e te savali i a‘u tulafono ma e faia a‘u fa‘amasinoga ma tausi i a‘u poloa‘iga uma ma savali i ai ‘ona ‘ou fa‘ataunu‘uina ai lea ‘iā te oe o a‘u ‘upu na ‘ou fai atu ai i lou tamā o Tavita.
13. ‘Ou te nofo fo‘i fa‘atasi ma le fānauga a Isaraelu, ‘ou te lē tu‘ulafoa‘i fo‘i lo‘u nu‘u o Isaraelu.”
14. ‘Ua faia e Solomona le fale ma ia fa‘aumaina.
15. ‘Ua faia e ia o pā o le fale i totonu i laupapa arasi, e āfua a‘e i lalo o le pā o le fale e o‘o i ona luga; ‘ua tapapa e ia i totonu i la‘au, ‘ua tapapa fo‘i e ia le lotofale i laupapa perosi.
16. ‘Ua faia fo‘i e ia kupita e lua sefulu i itū o le fale i laupapa arasi, e āfua a‘e i lalo o le pā e o‘o i ona luga; ‘ua faia fo‘i e ia i totonu e fai ma mea e fetalai mai ai, o le mea e sili ‘ona pa‘ia.
17. O le fale fo‘i, o le malumalu i luma lea, e fagafulu ona kupita.
18. ‘Ua togitogiina arasi i totonu o le fale i vine vao, ‘atoa ma fua o la‘au ‘ua mātala; o arasi uma, ‘ua lē iloa mai se ma‘a.
19. ‘Ua ia saunia fo‘i le mea e fetalai mai ai i totonu o le fale, e tu‘u ai le ‘atola‘au o le feagaiga a le ALI‘I.
20. O le mea e fetalai mai ai, e lua sefulu o kupita o lona umi lea i luma, e lua sefulu fo‘i o kupita o lona lautele, e lua sefulu fo‘i o kupita o lona maualuga; ‘ua ia ufitia fo‘i i le auro lelei; ‘ua ia ufitia ai fo‘i le fatafaitaulaga arasi.
21. ‘Ua ufitia e Solomona i totonu o le fale i le auro lelei; ‘ua puipui fo‘i e ia i maea auro i luma o le mea e fetalai mai ai, ‘ua ia ufitia ai fo‘i i le auro.
22. ‘Ua ufitia e ia o le fale uma i le auro, ‘ua o‘o ‘ina ‘atoaina le fale uma; ‘ua ia ufiufi fo‘i i le auro le fatafaitaulaga sa lata ane i le mea e fetalai mai ai.
23. ‘Ua ia faia fo‘i i totonu o le mea e fetalai mai ai o kerupi e lua, i le la‘au o le olive, e sefulu o kupita o la maualuga.
24. E lima fo‘i kupita le ‘apa‘au o le tasi kerupi, e lima fo‘i kupita le ‘apa‘au o le tasi kerupi; e āfua mai i le tasi pito ‘apa‘au e o‘o atu i le tasi pito ‘apa‘au ‘ua sefulu kupita.
25. E sefulu kupita fo‘i o lona lua o kerupi; e tasi lo la fua, ‘ua tino fa‘atasi fo‘i kerupi e lua.
26. E sefulu kupita o le maualuga o le tasi kerupi; e fa‘apea fo‘i lona lua o kerupi.
27. ‘Ua tu‘u fo‘i e ia o kerupi i lotofale o le fale i totonu; ‘ua fa‘aloaloa ‘apa‘au o kerupi; ‘ua pa‘i atu le ‘apa‘au o le tasi i le tasi pā o le fale ma le ‘apa‘au o le isi kerupi ‘ua pa‘i atu i le isi pā o le fale ma ‘ua fepa‘ia‘i o la ‘apa‘au i le taulotoaiga o le fale.
28. ‘Ua ia ufitia fo‘i kerupi i le auro.
29. ‘Ua ia togitogiina fo‘i o pā uma o le fale e so‘o ai i kerupi ‘ua togitogiina ma pama ma fua o la‘au ‘ua matala, i tua ‘atoa ma luma.
30. ‘Ua na ufitia fo‘i le lotofale i le auro i tua ‘atoa ma luma.
31. ‘Ua ia faia puipui mo le faitoto‘a o le mea e fetalai mai ai i la‘au o olive vao; o le fa‘alava ma pou o le faitoto‘a ‘ua fa‘atāfalima ia.
32. O puipui e lua ‘ua ia faia i la‘au o olive vao; ‘ua ia togitogiina ai o kerupi ‘ua togitogiina ma pama ma fua o la‘au ‘ua mātala; ‘ua ia ufitia fo‘i i le auro; ‘ua na folasia le auro i kerupi ma pama.
33. ‘Ua fa‘apea fo‘i ‘ona faia e ia o pou mo le faitoto‘a o le malumalu i la‘au o olive vao e fa‘atafafā.
34. O puipui fo‘i e lua o la‘au o perosi ia; o itū e lua o le tasi puipui ‘ua feagai ma itū e lua o le isi puipui ‘ua feagai.
35. ‘Ua ia togitogiina ai fo‘i o kerupi ma pama ma fua o la‘au ‘ua mātala; ‘ua ia ufitia fo‘i i le auro ‘ua fa‘atatauina i mea na togitogiina.
36. ‘Ona ia faia lea o le lotoā aupito i totonu i le atu ma‘a talai ‘ua sautuatolu ma le atu la‘au fa‘alava o arasi ‘ua talai.
37. O le fa o tausaga, o le masina o Sefa na fa‘avaeina ai le fale o le ALI‘I;
38. o le sefulu ma le tasi o tausaga, o le masina o Pula, o le valu lea o masina, na uma ai ‘ona fai o le fale ma mea uma ‘ua i ai, e tusa fo‘i ma mea uma na fa‘atusa mai. E fitu tausaga o fai ai e ia.