1. ‘Ua fai le tupu o Solomona ma tupu ‘iā Isaraelu uma.
2. O ali‘i nei sa ‘iā te ia;O Asaraia le atali‘i o Satoka le ositaulaga;
3. o Eliorefa ma Akia, o atali‘i o Sesa, o tusi‘upu ia;o Iosefatu le atali‘i o Ailuta, o le fātua‘iupu;
4. o Penaia le atali‘i o Ieoiata, o lē pule i ‘au;o Satoka ma Aviata, o ositaulaga ia;
5. o Asaraia le atali‘i o Natano, o lē pule i ē na tofia e pule;ma Saputo le atali‘i o Natano, o le faipule, o le uō a le tupu ia;
6. O Akisaro, o le pule i le ‘āiga;ma Atoniramo le atali‘i o Apeta, o lē pule i taulaga.
7. Sa ia Solomona e na tofia e pule e to‘asefulu ma le to‘alua i Isaraelu uma lava, o ē fagaina le tupu ma lona ‘āiga; o le tagata ma lona masina i lea tausaga ma lea tausaga e fafaga mai ai.
8. O latou igoa fo‘i nei;o le atali‘i o Huro, i le mauga o Efaraima.
9. O le atali‘i o Tikeru, i Makasa, ma Salapima, ma Petesemesa, ma Aluna-petana.
10. O le atali‘i o Heseta i Arupoto; sa ‘iā te ia o Suka, ‘atoa ma le nu‘u uma o Eferu.
11. O le atali‘i o Apinatapa sa ‘iā te ia le nu‘u maualuga uma o Toro; o lana avā o Tafata o le afafine o Solomona.
12. O Paana, le atali‘i o Ailuta sa ‘iā te ia o Tanaka ma Mekito ma Peteseana uma lava, e lata ane lea i Saratana i lalo o Isereelu, e pau mai i Peteseana, ‘ae gata atu i Apelemeoloa, e o‘o i tala atu o Iokameama.
13. O le atali‘i o Kipera i Ramota-kiliata, sa ‘iā te ia ‘a‘ai o Iairo le atali‘i o Manase ‘ua i Kiliata, sa ‘iā te ia fo‘i le itū o Arakopo ‘ua i Vasana, o ‘a‘ai tetele e onogafulu, ‘ua i ai pā ma fa‘amaufa‘alava ‘apamemea.
14. O Akinatapu le atali‘i o Ito, sa ‘iā te ia o Maanaima.
15. O Aimaasu, i Nafatali, na fai avā fo‘i o ia ‘iā Pasemeta le afafine o Solomona.
16. O Paana le atali‘i o Husai, i Asera ma Alota.
17. O Iosefatu le atali‘i o Parua, i Isakara.
18. O Semi le atali‘i o Ala, i Peniamina.
19. O Kipera le atali‘i o Uri, i le nu‘u o Kiliata le nu‘u o Sekono le tupu o sa Amorī, ma Oko le tupu o Vasana, ‘ua tofia o ia e pule e to‘atasi i le nu‘u.
20. ‘Ua to‘atele Iuta ma Isaraelu, e pei o le oneone i le matāfaga ‘ona to‘atele, o lo‘o ‘a‘ai ma feinu ma ‘oli‘oli.
21. ‘Ua pule fo‘i Solomona i mālō uma e gata mai i le vaitafe, e pau mai i le nu‘u o Filisitia, e o‘o fo‘i i le tuā‘oi o Aikupito; ‘ua latou ‘aumaia fo‘i mea alofa, ma latou ‘au‘auna ‘iā Solomona i aso uma o lona ola.
22. O mea e ‘ai a Solomona, o le aso ma le tolugafulu o kori o falaoa lelei ma le onogafulu o kori o isi falaoa;
23. o povi pepeti e sefulu ma povi tata‘a e luafulu, ma mamoe e selau; i le ma ‘aila ma sevi ma imura ma parepuri pepeti.
24. Auā na ‘iā te ia le pule i nu‘u uma i tala mai o le vaitafe, e gata mai i Tipesa, e pau mai i Kasa, o tupu uma i tala mai o le vaitafe. Sa ‘iā te ia le filemū i itū uma na vagavagai ‘iā te ia.
25. Sa nonofo ma le filemū o Iuta ma Isaraelu; e ta‘itasi ma nofo i lalo o lona vine ma lalo o lona mati, e gata mai i Tanu, e pau mai i Peresepa i ona po uma o Solomona.
26. Sa ‘iā Solomona mea e nonofo ai solofanua e fa sefulu o afe ma kariota sa ‘iā te ia ma ē ti‘eti‘e i solofanua e sefulu afe ma afe e lua.
27. O ē na tofia e pule sa latou fafaga i le tupu o Solomona ma i latou uma o ē na ō mai i le laulau a le tupu o Solomona; ‘ua latou ta‘itasi ma lona lava masina; ‘ua lē tu‘ua se mea e tasi.
28. O karite fo‘i ma ‘au o saito mā solofanua ma manu tele vavave, ‘ua latou avatua i le mea sa i ai i latou e ta‘itasi le tagata ma lona tofiga.
29. ‘Ua foa‘iina mai e le Atua ‘iā Solomona le poto ma le loto matala e matuā tele lava ma le loto e o‘o i mea e tele, e fa‘apei o le oneone o i le matāfaga.
30. ‘Ua sili lava le poto o Solomona i le poto o tagata uma i sasa‘e ma le poto uma o Aikupito.
31. ‘Ua sili lona poto i lo tagata uma i lo Etano o lo sa Eserā ma Hemana, ma Kalakolu ma Tarata, o atali‘i o Makolo; na ta‘ua o ia i nu‘u uma na vagavagai.
32. O ana fa‘ata‘oto na ia faia e tolu afe ia; o ana pese fo‘i ‘ua tasi le afe ma le lima.
33. Na tautala fo‘i o ia i le uiga o la‘au e āfua mai i le arasi o lo‘o i Lepanona, e o‘o atu i le isopo ‘ua tupu a‘e i le ‘aupā; ‘ua tautala fo‘i o ia i le uiga o manu tata‘a ma manu felelei ma mea fetolofi ma i‘a.
34. ‘Ua latou ō mai e fa‘alogologo i le poto o Solomona mai nu‘u uma ma tupu uma o le lalolagi o ē na logo atu i ai lona poto.