Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22

Feagaiga Tuai

Feagaiga Fou

1 Tupu 12 O LE TUSI PA'IA - Ekalesia Katoliko Roma (RSCB)

O le Tete‘e o Itū‘āiga e sefulu i le itū i Matū

1. ‘Ua alu atu Reopoamo i Sekema, auā ‘ua ō mai Isaraelu uma lava i Sekema ‘ia fai o ia ma tupu.

2. ‘Ua fa‘alogo ai Ierepoamo le atali‘i o Nepata a o i Aikupito o ia; auā na sola o ia a‘i luma o le tupu o Solomona, na nofo fo‘i Ierepoamo i Aikupito.

3. ‘Ona latou ‘a‘auina atu lea nisi e ‘a‘ami atu ‘iā te ia. ‘Ona latou ō mai lea o Ierepoamo ma le fa‘apotopotoga uma o Isaraelu, ‘ua latou tautala atu ‘iā Reopoamo, ‘ua fa‘apea atu.

4. “Na fa‘amamafaina e lou tamā o la matou amo; o lenei ‘ia e fa‘amāmā le galuega tigā a lou tamā ma lana amo mamafa na ia fa‘ae‘etia ‘iā te i matou, ‘ona matou ‘au‘auna ai lea ‘iā te oe.”

5. ‘Ona fai atu lea o ia ‘iā te i latou, “‘Inā ō ia ‘outou se‘ia o‘o i ē luā, i le tou toe fo‘i mai ai ‘iā te a‘u;” ‘ona ō ai lea o le nu‘u.

6. ‘Ona filifili lea o le tupu o Reopoamo ma toeaina ē na tutū i luma o lona tamā o Solomona ‘ina o ola o ia, ‘ua fa‘apea atu, “Se a se mea tou te fai mai ‘ou te tali atu ai i lenei nu‘u?”

7. ‘Ona latou tali mai lea ‘iā te ia, ‘ua fa‘apea mai, “‘Āfai ‘e te fai ma ‘au‘auna i lenei nu‘u i le aso nei, ma e ‘au‘auna ‘iā te i latou, ma e tali atu ‘iā te i latou, ma e tautala atu ‘iā te i latou i ‘upu lelei, ‘ona fai ai lea o i latou mau ‘au‘auna e fa‘avavau.”

8. ‘Ae peita‘i ‘ua tu‘ua e ia le ‘upu a toeaina na latou fa‘atonu mai ai ‘iā te ia, ‘ona filifili lea o ia ma taulele‘a o ē na tutupu fa‘atasi ma ia, o ē na tutū i ona luma.

9. ‘Ua fai atu ia ‘iā te i latou, “Se a la ‘outou e fai mai ‘ina ‘ia tatou tali atu ai i lenei nu‘u ‘ua tautala mai ‘iā te a‘u, ‘ua fa‘apea mai, ‘‘Ia e fa‘amāmā le amo na fa‘ae‘etia e lou tamā ‘iā te i matou?’”

10. ‘Ona fai mai lea ‘iā te ia o taulele‘a o ē na tutupu fa‘atasi ma ia, ‘ua fa‘apea mai, “‘Ia e fa‘apea atu i lenei nu‘u na tautala mai ‘iā te oe, ‘ua fa‘apea mai, ‘Na fa‘amamafaina e lou tamā o la matou amo, a ‘ia e fa‘amāmāina ‘iā te i matou;’ ‘ia fa‘apea ‘ona e fetalai atu ‘iā te i latou, ‘O lo‘u lima tama e telē lava lea i le sulugātiti o lo‘u tamā.

11. Na fa‘ae‘etia e lo‘u tamā le amo mamafa ‘iā te ‘outou; a o a‘u, ‘ou te fa‘aopoopoina atu i la ‘outou amo; na a‘oa‘i atu lo‘u tama ‘iā te ‘outou i sasa; a o a‘u, ‘ou te a‘oa‘i atu ‘iā te ‘outou i akarava.’”

12. ‘Ona ō mai lea o Ierepoamo ma le nu‘u uma ‘iā Reopoamo i le aso tolu, e pei ‘ona fai mai ai o le tupu, ‘ua fa‘apea mai, “Tou te toe fo‘i mai ‘iā te a‘u i e luā.”

13. ‘Ona tali atu lea o le tupu i le nu‘u ma le sauā; ‘ua tu‘ua e ia le ‘upu a toeaina na latou fa‘atonuina atu ‘iā te ia;

14. ‘ae tautala atu ‘iā te i latou e tusa ma le ‘upu a taulele‘a, ‘ua fa‘apea atu, “Na fa‘amamafaina e lo‘u tamā o la ‘outou amo; a o a‘u, ‘ou te fa‘aopoopoina atu i la ‘outou amo; na a‘oa‘i atu lo‘u tamā ‘iā te ‘outou i sasa; a o a‘u, ‘ou te a‘oa‘i atu ‘iā te ‘outou i akarava.”

15. ‘Ua lē fa‘alogo lava le tupu i le nu‘u; auā mai le ALI‘I lea mea ‘ina ‘ia fa‘ataunu‘u lana afioga na fetalai mai ai le ALI‘I na ‘aumaia e Akia le Sailo ‘iā Ierepoamo le atali‘i o Nepata.

16. ‘Ua iloa e Isaraelu uma lava e le‘i fa‘alogo mai le tupu ‘iā te i latou, ‘ona tali atu lea o le nu‘u i le tupu, ‘ua fa‘apea atu,“So matou tofi ‘ea Tavita?E lē so matou tofi le atali‘i o Iese.Isaraelu e, ‘inā ō ia ‘outou i o ‘outou fale ‘ie.O lenei, Tavita e, faitalia oe i lou ‘āiga.”‘Ona ō ai lea o Isaraelu i o latou fale ‘ie.

17. A o le fānauga a Isaraelu sa nonofo i ‘a‘ai o Iuta, na fai Reopoamo ma tupu ‘iā te i latou.

18. ‘Ona ‘auina atu lea e le tupu o Reopoamo o Aturamo o le pule i taulaga, a ‘ua fetogi Isaraelu uma ‘iā te ia i ma‘a, ‘ua oti ai o ia. ‘Ona fa‘ata‘alise lea o le tupu o Reopoamo e alu a‘e i lona kariota, e sola atu i Ierusalema.

19. ‘Ua fōua fo‘i e Isaraelu le ‘āiga o Tavita, ‘ua o‘o lava i ona po nei.

20. ‘Ua fa‘alogo e Isaraelu uma ‘ua fo‘i mai Ierepoamo, ‘ona latou ‘a‘auina atu ai lea o nisi e ‘a‘ami atu ‘iā te ia e sau i le fa‘apotopotoga, ‘ona latou fai lea o ia ma tupu i Isaraelu uma; e leai sē na mulimuli atu i le ‘āiga o Tavita, ‘ua na o le itū‘āiga lava o Iuta.

O le Valo‘aga a Semaia

21. ‘Ua o‘o Reopoamo i Ierusalema, ‘ona fa‘apotopoto ai lea e ia o le ‘āiga uma lava o Iuta, ma le itū‘āiga o Peniamina e selau afe ma afe e valu sefulu, o ē ‘ua filifilia, o ē ‘ua taulia tau‘a, e tau ma le ‘āiga o Isaraelu, ‘ia toe maua mai le mālō mo Reopoamo le atali‘i o Solomona.

22. A ‘ua tulei mai le afioga a le Atua ‘iā Semaia le tagata o le Atua, ‘ua fa‘apea mai:

23. ‘Inā fai atu ia ‘iā Reopoamo le atali‘i o Solomona le tupu o Iuta ma le ‘āiga uma o Iuta ma Peniamina ma ē o totoe i le nu‘u, ‘ia fa‘apea atu,

24. “O lo‘o ‘ua fa‘apea ‘ona fetalai mai o le ALI‘I, ‘Aua ne‘i tou ō a‘e, ‘aua ne‘i tou si‘i atu le tau‘a i o ‘outou uso le fānauga a Isaraelu; ‘ia ta‘itasi ‘outou ma fo‘i atu i lona ‘āiga; auā e mai ‘iā te a‘u lenei mea.” ‘Ona latou fa‘alogo lea i le afioga a le ALI‘I, ‘ua liliu ma toe fo‘i atu, e tusa ma le afioga a le ALI‘I.

‘Ua Liliu‘ese Ierepoamo mai le Ali‘i

25. ‘Ua faia e Ierepoamo o Sekema i le mauga o Efaraima ma nofo ai; na ia alu atu ai fo‘i ma na faia o Penueli.

26. ‘Ona fai ifo lea o Ierepoamo i lona loto, “‘Anei e toe fo‘i le mālō i le ‘āiga o Tavita;

27. ‘āfai e ō a‘e lenei nu‘u e fai taulaga i le fale o le ALI‘I i Ierusalema, ‘ona toe liliu ai lea o le loto o lenei nu‘u i lo latou ali‘i, o Reopoamo le tupu o Iuta, ‘ona latou fasioti ai lea ‘iā te a‘u ma toe fo‘i atu ‘iā Reopoamo le tupu o Iuta.”

28. ‘Ona filifili lea o le tupu ma ia faia tama‘i povi auro e lua, ‘ua fai atu fo‘i o ia ‘iā te i latou, “E faigatā ‘iā te ‘outou ‘ona ō a‘e i Ierusalema; Isaraelu e fa‘auta mai ia i o ‘outou atua o ē na ‘aveina a‘e ‘outou mai le nu‘u o Aikupito.”

29. ‘Ua ia tu‘u le tasi i Peteli, ‘ua ia tu‘u fo‘i le isi i Tanu.

30. Na fai lenei mea ma agasala; auā na ō atu le nu‘u i luma o le tasi i Tanu.

31. ‘Ona faia lea e ia o le fale o mea maualuluga; na tofia fo‘i e ia nisi o le nu‘u uma e fai ma ositaulaga, e le ni o le fānauga a Levi i latou.

‘Ua ‘Inosia le Tapua‘iga i Peteli

32. ‘Ua faia fo‘i e Ierepoamo le tausamiga i le masina e valu, i le aso e tasi le sefulu ma le lima o le masina, e pei o le tausamiga ‘ua i ai i Iuta; ‘ona alu a‘e lea o ia i le fatafaitaulaga. Sa fa‘apea ‘ona faia e ia i Peteli, e fai taulaga i tama‘i povi na ia faia; ‘ua ia tofia fo‘i i Peteli o ositaulaga o mea maualuluga na ia faia.

33. ‘Ua alu a‘e o ia i le fatafaitaulaga na ia faia i Peteli i le aso e sefulu ma le lima o le masina e valu, o le masina lea na ia filifilia i lona lava loto; ‘ua faia fo‘i e ia le tausamiga mo le fānauga a Isaraelu; ‘ua ia alu a‘e fo‘i i le fatafaitaulaga e fa‘amū ai mea manogi.