1. Mulimuli ane ‘ua fa‘ata‘amilo o Iesu i ‘a‘ai ma faoa ‘a‘ai, ‘ua tala‘i ma folafola le tala lelei o le mālō o le Atua; ‘ua fa‘atasi fo‘i ma ia le to‘asefulu ma le to‘alua,
2. ‘atoa ma nisi fafine sa i ai agaga leaga ma ma‘i, a ‘ua fa‘amālōlōina; o Maria ‘ua ta‘ua o le Makatala, na ō i fafo ‘iā te ia temoni e to‘afitu,
3. ma Ioana le avā a Kusa le ‘au‘auna pule lea a Herota ma Susana; ‘atoa ma isi fafine e to‘atele, ē na ‘au‘auna atu ‘iā te ia ‘iā latou mea.
4. ‘Ua fa‘apotopotoina mai le motu o tagata e to‘atele, ‘ua ō mai ‘iā te ia mai lea ‘a‘ai ma lea ‘a‘ai, ‘ona fetalai atu lea o ia le fa‘ata‘oto.
5. “‘Ua alu atu le tagata lūlū saito e lūlū ai ana saito; ‘ua ia lūlū saito, ‘ua pa‘ū ai isi i le auala; ‘ona solia lea, ‘ua ‘aina fo‘i e manu felelei.
6. ‘Ua pa‘ū isi i le mea papa; ‘ua tupu ‘ona magumagu ai lea, auā e lē susū.
7. A ‘ua pa‘ū isi i vao tuitui; ‘ua tutupu fa‘atasi ia ma le vao tuitui, ‘ona fētina‘iina ai lea.
8. ‘Ua pa‘ū fo‘i isi i le ‘ele‘ele lelei; ‘ua tupu, ‘ua fua mai ta‘iselau i fua.”‘Ua fetalai atu ia i nei mea, ‘ona ‘alaga atu lea, “O lē ‘ua i ai taliga e fa‘alogo ai, ‘inā fa‘alogo mai ia o ia.”
9. A ‘ua fesili mai ona so‘o ‘iā te ia i le uiga o lenei fa‘ata‘oto.
10. ‘Ona fetalai atu lea o ia, “‘Ua foa‘iina atu ‘iā te ‘outou ‘ina ‘ia ‘outou iloa mea lilo a le mālō o le Atua; a ‘ua fai atu i nisi i fa‘ata‘oto;‘‘ina ‘ia latou lē va‘ai i lo latou va‘ai,‘ina ‘ia lē lagona fo‘i i lo latou fa‘alogo.’
11. “O le fa‘ata‘oto lenei, o le saito, o le afioga lea a le Atua.
12. O ē i le auala, o ē fa‘alogo ia; ‘ona alu ane ai lea o le tiapolo, ma ‘ave‘eseina le ‘upu nai o latou loto, ne‘i fa‘atuatua ma fa‘aolaina i latou.
13. O ē i le mea papa, o i latou ia, pe a fa‘alogo i le ‘upu, ‘ua talia ma le fiafia; ‘ae leai ni o latou a‘a, ‘ua fa‘alētumau lo latou fa‘atuatua, ‘ua o‘o atu i aso e fa‘aosoosoina ai, ‘ona ō ‘ese ai lea.
14. O le mea na pa‘ū i le vao tuitui, o i latou ia ē ‘ua fa‘alogo, ‘ua ō atu ai, ‘ona fētina‘iina ai lea i mea e popole ai, ma ‘oloa, ma mea fa‘afiafia o le olaga nei, ‘ona lē o‘o lea ‘ina matua o latou fua.
15. Peita‘i o le mea na i le ‘ele‘ele lelei, o i latou ia ē ‘ua fa‘alogo i le ‘upu, ma tausi i ai i le loto ‘ua fa‘amaoni ma le lelei, ‘ona fua mai ai lea ma le ‘onosa‘i.
16. “E leai se tagata na te tutu se molī, ma ufiufi ai i le tanoa, pe tu‘u i lalo o le moega; ‘ae tu‘u i luga o le tu‘ugāmolī, ‘ina ‘ia iloa atu le malamalama e i latou ‘ua ulufale mai.
17. “Auā e leai se mea lilo e lē fa‘aalia; e leai fo‘i se mea natia e lē fa‘ailoa, ‘ae i‘u ‘ina fa‘aalia.
18. O lenei, ‘ia ‘outou, pe fa‘apefea lo ‘outou fa‘alogo; auā o sē ‘ua i ai mea, e foa‘iina mai ‘iā te ia; a o sē ‘ua lē i ai mea, e ‘ave‘eseina ‘iā te ia o mea ‘ua peiseaī ‘ua ‘iā te ia.”
19. ‘Ua ō mai ‘iā te ia lona tinā ma ona uso, a ‘ua lē sao mai ‘iā te ia ‘ona o le motu o tagata.
20. ‘Ua fai mai nisi ‘iā te ia, “‘Ua tutū lou tinā ma ou uso i fafo, ‘ua fia feiloa‘i ma oe.”
21. ‘Ua tali atu o ia, ‘iā te i latou, “O ē fa‘alogo i le afioga a le Atua ma latou faia, o lo‘u tinā ma o‘u uso lava ia.”
22. ‘Ua maliu a‘e o ia ma ona so‘o i le tasi aso i le va‘a; ‘ua fetalai atu fo‘i o ia ‘iā te i latou, “Tatou ō ia i le tasi itū vai.” ‘Ona latou tu‘uva‘a atu lea.
23. ‘Ua alu lo latou va‘a, ‘ae tofā o ia, ‘ona tō ifo lea o le afā i le vai, ‘ua osofia lo latou va‘a, e mata a tupu le fa‘alavelave.
24. ‘Ona latou ō ane lea ‘ua fafagu ‘iā te ia, ‘ua fa‘apea mai, “Le Ali‘i e, le Ali‘i e, o le a matou fano.”‘Ona tu lea o ia, ‘ua vavao i le matagi ma peau o le vai; ‘ona mavae ai lea, ‘ua malū.
25. ‘Ua fetalai atu o ia ‘iā te i latou, “O ifea ‘ea lo ‘outou fa‘atuatua?”‘Ua matata‘u lava i latou ma ofo; ‘ua fetautalatala‘i i latou, “O ai ‘ea lenei? Auā ‘ua fetalai o ia i le matagi ma le vai, ‘ona usiusita‘i ai lea ‘iā te ia.”
26. ‘Ua latou o‘o atu i le lau‘ele‘ele o Katara, o le itū vai lea ‘ua feagai ma Kalilaia.
27. ‘Ua maliu a‘e o ia i uta, ‘ona fetaia‘i lea ma ia o le tasi tagata mai le ‘a‘ai ‘ua ‘iā te ia temoni, ‘ua leva ‘ona lē ‘ofu o ia, ‘ua lē nofo fo‘i i se fale, a o tu‘ugamau.
28. ‘Ua iloa mai e ia o Iesu ‘ona ‘alaga mai lea o ia, ma fa‘apa‘ū mai i ona luma, ‘ua fai mai ‘iā te ia ma le leo tele, “Se a se mea ‘e te mana‘o mai ai ‘iā te a‘u, Iesu e, o oe na le Alo o le Atua silisili ‘ese? ‘Ou te ‘ai‘oi atu ‘iā te oe, ‘aua ‘e te fa‘atigā mai ‘iā te a‘u.”
29. Auā na fetalai o ia i le agaga leaga e alu i fafo i le tagata. Auā na atu lasi ‘ona pu‘e ‘iā te ia; ‘ua fusifusia o ia i maea u‘amea, ma mea e fa‘amau ai vae ‘ua leoleoina ai o ia, a ‘ua motumotusia maea ‘iā te ia, ‘ona ‘avea ai lea o ia e le temoni i le vao.
30. ‘Ua fesili atu Iesu ‘iā te ia, ‘ua fa‘apea atu, “O ai ‘ea lou igoa?”‘Ua fai mai o ia, “O Lekeono;” Auā ‘ua uluitino ‘iā te ia temoni e to‘atele.
31. ‘Ua latou ‘ai‘oi mai ‘iā te ia, ‘aua le fetalai o ia ‘iā te i latou e ō i le fafā
32. Sa i ai le lafu pua‘a e tele, sa tata‘a i le mauga; ‘ua latou fa‘anoi mai ‘iā te ia ‘ia tu‘u atu latou te uluitino i ai. ‘Ona tu‘u atu ai lea ‘iā te i latou.
33. ‘Ona ō lea o temoni i fafo nai le tagata, ‘ua uluitino i pua‘a; ‘ona feosofi ifo lea o le lafu i le tofē i le vai, ‘ua malelemo ai.
34. ‘Ua iloa e ē sa faga pua‘a le mea ‘ua faia, ‘ona sōsōla ai lea, ‘ua ō atu ‘ua tala atu i le ‘a‘ai ma ona faoa ‘a‘ai.
35. ‘Ona latou ō mai lea e matamata i le mea ‘ua faia; ‘ua ō mai ‘iā Iesu, ‘ua latou iloa atu le tagata ‘ua ō i fafo ‘iā te ia temoni, o lo‘o nofo o ia i vae o Iesu; ‘ua ‘ofu ia, ma ‘ua atamai; ‘ona latou matata‘u ai lea.
36. O ē na iloa ‘ua latou tala atu ‘iā te i latou le mea na mālōlō ai le tagata sa uluitinoina.
37. ‘Ona ‘ai‘oi mai lea ‘iā te ia le nu‘u uma o Katara, ‘ina ‘ia maliu ‘ese o ia ‘iā te i latou; auā ‘ua o‘o ‘iā te i latou le mata‘u tele; ‘ona maliu a‘e lea o ia i le va‘a, ‘ua toe fo‘i atu.
38. ‘Ua ‘ai‘oi mai ‘iā te ia le tagata ‘ua ō i fafo ‘iā te ia temoni, la te fa‘atasi ma ia; a ‘ua ‘auina atu o ia e Iesu, ‘ua fa‘apea atu,
39. “‘Inā fo‘i atu ia oe i lou ‘āiga ma ‘ia fa‘amatala atu i mea tetele ‘ua faia e le Atua ‘iā te oe.”‘Ona alu ai lea o ia, ‘ua tala‘i i le ‘a‘ai uma i mea tetele na faia e Iesu ‘iā te ia.
40. ‘Ua toe fo‘i atu Iesu, ‘ona talia ai lea o ia e le motu o tagata; auā sa fa‘atali mai i latou uma ‘iā te ia.
41. Fa‘auta fo‘i, ‘ua sau le tagata e igoa ‘iā Iairo, o ia fo‘i o le tasi e pule i le sunako; ‘ua fa‘apa‘ū o ia i vae o Iesu, ma fa‘atoga mai ‘iā te ia ‘ia maliu atu o ia i lona fale;
42. auā o lona afafine e to‘atasi, po ‘ua sefulu ma le lua ona tausaga, o le a oti ia.‘Ua maliu atu o ia, a ‘ua fetaomi mai ‘iā te ia le motu o tagata.
43. O le fafine sa ‘iā te ia le puna toto i tausaga e sefulu ma le lua, ‘ua uma atu ana mea i foma‘i, a ‘ua lē mafai ‘ona mālōlō i se tasi,
44. ‘ua alu ane o ia i ona tua, ma pa‘i ane i le pito o lona ‘ofu; ‘ona te‘a loa lea o lona puna toto.
45. ‘Ona fetalai ane lea o Iesu, “O ai ‘ea na pa‘i mai ‘iā te a‘u?”‘Ua fa‘afiti mai tagata uma, ‘ona fai mai lea o Peteru ma i latou sa fa‘atasi ma ia, “Le Ali‘i e, ‘ua fetaomi ma fetuleni mai le motu o tagata ‘iā te oe?”
46. A ‘ua fetalai atu Iesu, “Na pa‘i mai lava se tasi ‘iā te a‘u; auā ‘ua ‘ou iloa ‘ua alu atu le mana nai ‘iā te a‘u.”
47. ‘Ua iloa e le fafine ‘ua lē lilo o ia, ‘ona alu atu lea o ia ma le gatete, ‘ua fa‘apa‘ū mai i ona luma, ma fa‘amatala mai ‘iā te ia i luma o le nu‘u uma le mafua‘aga na pa‘i atu ai o ia ‘iā Iesu, ma le fa‘amālōlōina loa o ia.
48. ‘Ona fetalai atu lea o Iesu ‘iā te ia, “Lo‘u afafine e, ‘inā fa‘alototele ia oe; ‘ua e ola i lou fa‘atuatua; ‘inā alu ia oe ma le manuia.”
49. A o fetalai Iesu, ‘ua sau le tasi mai le fale o le pule i le sunako ‘ua fai mai ‘iā te ia, “‘Ua oti lou afafine; sōia le toe fa‘alavelave i le a‘oa‘o.”
50. ‘Ua fa‘afofoga i ai Iesu, ‘ona tali atu lea o ia ‘iā te ia, ‘ua fa‘apea atu, “‘Aua ‘e te fefe; tau ‘ina ‘ia e fa‘atuatua, ‘ona ola ai lea o ia.”
51. ‘Ua o‘o o ia i le fale, e lē mafai ‘iā te ia ‘ona ulu atu se tasi tau o Peteru, ma Iakopo, ma Ioane, o le tamā fo‘i ma le tinā o le teine.
52. ‘Ua fētāgisi i latou uma, ma tagitu‘i ‘ona o ia; a ‘ua fetalai atu o ia: “Sōia le fētāgisi; e le‘i oti o ia, a ‘ua moe.”
53. ‘Ua latou tapisa ‘iā te ia, auā ‘ua latou iloa ‘ua oti o ia.
54. A ‘ua tago atu o ia i lona lima, ‘ua vala‘au, ‘ua fa‘apea atu, “Funa e, ‘inā tula‘i ia.”
55. ‘Ua toe fo‘i mai lona agaga, ‘ona tula‘i loa lea o ia; ‘ua fetalai atu fo‘i Iesu, ‘ia avatu ni ana mea e ‘ai.
56. ‘Ona matuā ofo ai lea o ona mātua; a ‘ua vavao o ia ‘iā te i lā‘ua, ‘aua ne‘i tala atu i se tasi le mea ‘ua faia.