1. ‘Ua tepa a‘e o Iesu, ‘ua silafia o ē mau‘oa, o lafo a latou taulaga i le mea o teu ai tupe.
2. ‘Ua silafia fo‘i e ia le tasi fafine mativa ‘ua oti lana tane, ‘ua lafo i ai tupe iti e lua.
3. ‘Ona fetalai atu lea o ia, “E moni, ‘ou te fai atu ‘iā te ‘outou, o mea a lenei fafine mativa ‘ua oti lana tane ‘ua lafo i ai, ‘ua sili lea ‘iā latou uma.
4. Auā o i latou uma, ‘ua latou lafo atu i taulaga a le Atua nisi mea mai a latou mea ‘ua tele; a o ia ‘ua mativa, ‘ua lafo e ia ana mea uma e ola ai sa ‘iā te ia.”
5. ‘Ua tautalatala nisi i mea a le malumalu, i lona teuteuina i ma‘a lālelei ma mea alofa, ‘ona fetalai atu lea o ia,
6. “O ia mea ‘ua ‘outou va‘ava‘ai i ai, e o‘o mai lava ona aso e lē toe i ai se tasi ma‘a i luga o le tasi ma‘a, ‘ae uma ‘ona sōloia i lalo.”
7. ‘Ona latou fesili mai ai lea ‘iā te ia, ‘ua fa‘apea mai, “Le a‘oa‘o e, e taunu‘u ‘ea ia mea afea? Se a fo‘i le fa‘ailoga pe a tāli taunu‘u ai ia mea?”
8. ‘Ua fetalai atu o ia, “‘Ia ‘outou, ne‘i fa‘asesēina ‘outou; auā e to‘atele e ō mai i lo‘u igoa, e ta‘itasi ma fa‘apea ane, ‘O a‘u o ia;’ ma ‘‘ua latalata fo‘i ona po;’ ‘aua fo‘i tou te mulimuli atu ‘iā te i latou.
9. “Pe a ‘outou fa‘alogo i tau‘a ma fouvalega, ‘aua tou te atuatuvale; auā e ao ‘ina mua‘i taunu‘u mai o ia mea, ‘ae lē o‘o loa mai le gata‘aga.”
10. ‘Ona fetalai atu lea o ia ‘iā te i latou, “E si‘i le tau‘a e le tasi nu‘u i le tasi nu‘u ma le tasi mālō i le tasi mālō.
11. E i ai mafui‘e tetele i lea mea ma lea mea, o oge fo‘i ma fa‘ama‘i; ma fa‘a‘ite‘ite ma fa‘ailoga tetele mai le lagi.
12. “A o le‘i o‘o nei mea, latou te pupu‘e ma fa‘asauā ‘iā te ‘outou e tu‘uina atu ‘iā te ‘outou i sunako ma fale puipui, latou te ta‘ita‘iina atu ‘outou i tupu ma kovana ‘ona o lo‘u igoa.
13. O lo ‘outou avanoa lelei lea e fai ai ‘outou ma molimau.
14. O lenei, ‘ia tu‘u i o ‘outou loto, tou te lē mua‘i mafaufau i se ‘upu tou te tali atu ai.
15. Auā ‘ou te avatu mo ‘outou le ‘upu ma le poto, e leai so latou o ē finau mai ‘iā te ‘outou na te mafaia ‘ona tali mai, pe tete‘e mai ‘iā te ‘outou.
16. E tu‘uina atu fo‘i ‘outou e mātua ma uso ma ‘āiga ma uō, o isi fo‘i o ‘outou e fasiotia e i latou.
17. E ‘inosia fo‘i ‘outou e tagata uma ‘ona o lo‘u igoa.
18. ‘Ae leai lava so ‘outou lauulu e tasi e pa‘ū.
19. O lo ‘outou ‘onosa‘i tou te maua ai lo ‘outou ola.
20. “A iloa e ‘outou ‘ua si‘osi‘omia Ierusalema i ‘au o le tau‘a, ‘ia ‘outou iloa i lea aso ‘ua latalata lona fa‘atafunaina.
21. O lea aso, o ē ‘ua i Iutaia ‘ia latou sōsōla i mauga; o ē ‘ua i totonu o lea ‘a‘ai, ‘ia latou ō ‘ese; o ē ‘ua i le vao fo‘i, ‘aua ne‘i latou ō atu i totonu o le ‘a‘ai.
22. Auā o ona aso ia e fa‘asalaina ai, ‘ina ‘ia taunu‘u mai o mea uma ‘ua tusia.
23. ‘Oi talofa i fafine ‘ua totō, ‘atoa fo‘i ma failele i ia lava aso; auā e o‘o le puapuagā tele i le nu‘u ma le to‘asā i le nu‘u nei.
24. E oti i latou i le mata o le pelu; e tāfea fo‘i i nu‘u uma; e solia fo‘i Ierusalema e nu‘u ‘ese, se‘ia fa‘ai‘uina tausaga o nu‘u ‘ese.
25. “E i ai fo‘i fa‘ailoga i le lā ma le masina ma fetū; e atuatuvale ma femēmēa‘i nu‘u o le lalolagi i le ū o le sami ma le sousou,
26. e matapogia fo‘i tagata i le matata‘u ma le fa‘atalitali i mea e o‘o mai i le lalolagi; auā e lūlūina ‘au o le lagi.
27. ‘Ona iloa atu ai lea e i latou ‘o le Atali‘i o le tagata e sau i le ao,’ ma le mana ma le mamalu tele.
28. A āfua ‘ona faia o ia mea, ‘ia tepa a‘e ‘outou ma ‘ia ea i luga o ‘outou ulu; auā e latalata ‘ina fa‘aolaina ‘outou.”
29. ‘Ua fetalai atu o Iesu ‘iā te i latou i le fa‘ata‘oto; “‘Inā va‘ai ia i le mati ‘atoa ma la‘au uma;
30. pe a fa‘ato‘ā mātala mai lau, ‘ua ‘outou va‘ai, ‘ona ‘outou iloa ai lea ‘ua latalata le tau vevela.
31. ‘Ia fa‘apea fo‘i ‘outou, pe a iloa e ‘outou ia mea ‘ua faia, ‘ia ‘outou iloa ‘ua latalata le mālō o le Atua.
32. “E moni, ‘ou te fai atu ‘iā te ‘outou, E lē mavae atu lenei tupulaga, se‘ia taunu‘u mea uma.
33. E mavae atu lava le lagi ‘atoa ma le lalolagi; peita‘i o a‘u ‘upu, e lē mavae atu lava ia.
34. “‘Ia ‘outou, ne‘i mafatia o ‘outou loto i le so‘ona ulavale ma le ‘onā ma le popole i mea a le olaga nei, ne‘i fa‘afuase‘i mai lea aso ‘iā te ‘outou e pei o se mailei,
35. auā e o‘o mai ai i ē nonofo uma lava i le fogā‘ele‘ele uma.
36. O lea ‘ia ‘outou mataala ai ma tatalo ‘ina ‘ia ‘outou maua le malosi e sao mai ia mea uma ‘ua tāli o‘o mai, ma ia tutū i luma o le Atali‘i o le tagata.”
37. Sa masani o ia e a‘oa‘o atu i le malumalu i le ao; a o le po, ‘ua maliu atu o ia i tua ma nofo i le mauga o Olive.
38. ‘Ua malama a‘e le taeao, ‘ona ō ane ai lea ‘iā te ia o le nu‘u uma i le malumalu e fa‘alogologo ai ‘iā te ia.