Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24

Feagaiga Tuai

Feagaiga Fou

Luka 19 O LE TUSI PA'IA - Ekalesia Katoliko Roma (RSCB)

‘Ua Vala‘auina Sakaio le Tagata ao Lafoga e Iesu

1. ‘Ua o‘o atu o Iesu i Ieriko, ‘ua ui ane i ai,

2. fa‘auta fo‘i, o le tagata ‘ua igoa ‘iā Sakaio, o ia o le ao lafoga sili, o le mau‘oa fo‘i o ia.

3. ‘Ua fia maimoa o ia ‘iā Iesu pe fa‘apefea o ia; ‘ae lē mafaia ‘ona o le motu o tagata; auā o le tagata sa‘asa‘a o ia.

4. ‘Ua momo‘e o ia i luma, ‘ua a‘e i le la‘au o le sukamoru, e va‘ava‘ai ifo ai ‘iā te ia; auā o le a ui ane ai.

5. ‘Ua o‘o atu Iesu i lea mea, ‘ona tepa a‘e lea o ia, ‘ua silafia o ia, ‘ona fetalai atu lea o Iesu ‘iā te ia, “Sakaio e, ‘ia e vave ifoifo ia i lalo, auā e tatau ‘ona ‘ou nofo i lou fale i le aso nei.”

6. ‘Ona vave alu ifo ai lea o ia, ‘ua tali mai ‘iā te ia ma le fiafia.

7. ‘Ua muimui uma o ē na iloa, ‘ua fa‘apea ane, “‘Ua alu atu o ia i le tagata agasala e api ai.”

8. A ‘ua tu mai Sakaio, ‘ua fa‘apea mai i le Ali‘i, “Fa‘auta, le Ali‘i e, o le a ‘ou vaeluaina atu a‘u mea i ē matitiva; ‘āfai fo‘i ‘ua ‘ou ‘ave mea a se tasi i se ala pepelo ‘ou te taui atu ai e ta‘ifā.”

9. ‘Ua fetalai ane Iesu ‘iā te ia, “‘Ua o‘o mai le fa‘aolataga i le ‘āiga nei i le asō, ‘ina ‘ua fai o ia ma atali‘i o Aperaamo.

10. Auā ‘ua sau le Atali‘i o le tagata e sā‘ili ma fa‘aola i lē na leiloa.”

O le Fa‘ata‘oto i Tupe Aulo

11. ‘Ua latou fa‘alogo i na mea, ‘ona toe fetalai atu lea o Iesu i le fa‘ata‘oto, ‘ina ‘ua latalata o ia i Ierusalema, auā sa latou fa‘apea o le a fa‘aalia loa mai le mālō o le Atua.

12. O lea fo‘i ‘ua fetalai atu ai o ia, “Na alu le tasi ali‘i i le nu‘u mamao e maua ai sona ao e fai ai o ia ma tupu, i le fo‘i mai.

13. ‘Ua vala‘au o ia i ana ‘au‘auna e to‘asefulu, ‘ua avatu ‘iā te i latou ta‘ito‘atasi tupe ‘ua fai atu fo‘i ‘iā te i latou, ‘Tou te fa‘atau ai se‘ia ‘ou toe sau.’

14. A ‘ua itagia o ia e lona nu‘u, ‘ua latou ‘auina atu fo‘i le sāvali e mulimuli atu ‘iā te ia, ‘ua fa‘apea atu, ‘Matou te lē manana‘o i lenā tagata e fai mo matou tupu.’

15. “‘Ua toe fo‘i mai o ia ‘ina ‘ua fai ai o ia ma tupu, ‘ona fai ane ai lea o ia, ‘ia vala‘auina ia ‘au‘auna na ia avatu i ai tupe, ‘ia ō mai ‘iā te ia, ‘ina ‘ia iloa e ia latou ta‘ito‘atasi a latou fa‘atau po ‘ua fa‘apefea.

16. ‘Ona sau ai lea o le tasi, ‘ua fa‘apea mai, ‘Le ali‘i e, o lau tupe lenei, ‘ua maua ai isi tupe e sefulu.’

17. ‘Ona fai atu lea o le ali‘i ‘iā te ia, ‘‘Ua lelei, le ‘au‘auna lelei e, ‘ua e fa‘amaoni i le mea itiiti lava, o lea ‘ia e pule i ‘a‘ai e sefulu.’

18. ‘Ua sau fo‘i le tasi, ‘ua fa‘apea mai, ‘Le ali‘i e, o lau tupe lenei, ‘ua maua ai tupe e lima.’

19. ‘Ua fai atu fo‘i le ali‘i ‘iā te ia, ‘‘Inā pule fo‘i oe i ‘a‘ai e lima.’

20. “‘Ua sau fo‘i le tasi, ‘ua fa‘apea mai, ‘Le ali‘i e, fa‘auta, o lau tupe lenei, sa ‘iā te a‘u na teu i le solosolo.

21. Auā na ‘ou mata‘u lava ‘iā te oe auā o oe o le tagata faigatā, ‘ua e ‘ava‘e le mea na e lē tu‘uina i lalo, ‘ua e selesele fo‘i i le saito ‘e te le‘i lūlūina.’

22. ‘Ona fai atu lea o le ali‘i ‘iā te ia, ‘Le ‘au‘auna leaga e, o lau ‘upu lava ‘ou te fa‘asala ai ‘iā te oe, ‘ua e iloa lava, o a‘u o le tagata faigatā, o lē ‘ava‘e le mea na ‘ou lē tu‘ua i lalo, o lē selesele fo‘i i le saito na a‘u lē lūlūina.

23. Se a le mea na e lē avatu ai la‘u tupe i le faletupe, po ‘ua ‘ou sau ‘ona ‘ou maua ai lea ‘atoa ma lona taui?’

24. “‘Ua fai atu o ia i ē na tutū mai, ‘‘Ia ‘outou fao le tupe ‘ua ‘iā te ia ma avatu i lē ‘ua i ai tupe e sefulu.’

25. ‘Ua latou fai mai ‘iā te ia, ‘Le ali‘i e, ‘ua ‘iā te ia tupe e sefulu.’

26. ‘Ou te fai atu ‘iā te ‘outou, ‘O lē ‘ua i ai mea, e avatu i ai; a o lē ‘ua leai sana mea, e faoa mea ‘ua ‘iā te ia.

27. Peita‘i o i latou ‘ua fai a‘u mo latou fili, o ē na lē mafafai ‘ona fai o a‘u mo latou tupu, ‘ia ‘outou ta‘ita‘i mai latou ‘i‘inei, ma fasioti ‘iā te i latou i o‘u luma.’”

O le Malaga a Iesu i Ierusalema

28. ‘Ua mavae atu ia ‘upu, ‘ona muamua atu ai lea o ia, ‘ua maliu a‘e i Ierusalema.

29. ‘Ua latalata o ia i Petefake ma Petania i le mauga o Olive le igoa, ‘ona ‘a‘au atu lea e ia o ona so‘o e to‘alua,

30. ‘ua fa‘apea atu, “Lua te ō atu i le ‘a‘ai o lo‘o lumana‘i ‘iā ‘oulua; a ‘oulua o‘o i ai, lua te iloa le tama‘i asini ‘ua noatia, e le‘i ti‘eti‘e ai lava se tasi tagata, lua te talaina ma ta‘ita‘i mai.

31. ‘Āfai fo‘i e fesili mai se tasi ‘iā te ‘oulua, ‘Se a le mea lua te tatala ai le asini?’ Lua te fai atu ‘iā te ia, ‘E mana‘o i ai le Ali‘i.’”

32. ‘Ua ō ē na ‘a‘auina atu, ‘ona la maua ai lea, e pei ‘ona fetalai mai ai o ia ‘iā te i lā‘ua.

33. ‘Ua tatala e lā‘ua le tama‘i asini, ‘ona fai mai ai lea o le pule o le asini, “Se a le mea lua te tatala ai le tama‘i asini?”

34. ‘Ona la fai atu lea, “E mana‘o i ai le Ali‘i.”

35. ‘Ua la ta‘ita‘i mai ai lea ‘iā Iesu; ‘ua latou lafo o latou ‘ofu i luga i le tama‘i asini, ‘ona latou fa‘ati‘eti‘e ai lea o Iesu.

36. A o maliu ane o ia, ‘ua latou fofola o latou ‘ofu i le ala.

37. ‘Ua latalata o ia i le ifoa‘i o le mauga o Olive, ‘ona āfua ai lea o le ‘oli‘oli o le ‘au so‘o uma e to‘atele, ‘ua latou vivi‘i atu i le Atua ma le leo tele, auā o vāvega uma na va‘aia e i latou;

38. ‘ua fa‘apea ane, “‘Ia manuia le tupu o lo‘o maliu mai i le suafa o le Ali‘i; o le manuia i le lagi, o le vi‘iga fo‘i i mea aupitoaluga.”

39. ‘Ona fai mai lea ‘iā te ia o isi o le ‘au faresaio mai le motu o tagata, “Le a‘oa‘o e, ‘ia e a‘oa‘i atu i ou so‘o sōia le pisa.”

40. ‘Ona tali atu lea o ia ‘iā te i latou, “‘Ou te fai atu ‘iā te ‘outou, ‘āfai latou te lē pisapisaō, e ‘alalaga mai lava o ma‘a.”

‘Ua Tagi Iesu ‘iā Ierusalema

41. ‘Ua latalata o ia, ‘ua silafia e ia le ‘a‘ai, ‘ona tagi ai lea o ia,

42. ‘ua fa‘apea ane, “‘Ana e iloa, e oe lava i lenei lava aso, o mea ‘e te manuia ai! A o lenei ‘ua lilo i lau va‘ai.

43. Auā e o‘o mai ‘iā te oe ona aso e tanu ai le mea mauti‘eti‘e, e si‘omia oe e i latou ‘ua ita ‘iā te oe, latou te si‘oina lava ‘iā te oe, ma pupuni ‘iā te oe mai itū uma;

44. latou te olopalaina fo‘i oe, ‘atoa ma lau fānau i totonu ‘iā te oe, latou te lē tu‘ua fo‘i se ma‘a i luga o le tasi ma‘a i totonu ‘iā te oe; auā ‘ua lē iloa e oe ona po ‘ua asia mai ai oe.”

‘Ua Maliu atu Iesu i le Malumalu

45. ‘Ua ulu atu o ia i le malumalu, ‘ona amata lea e ia ona tulia i fafo o ē fefa‘ataua‘i;

46. ‘ua fa‘apea atu ‘iā te i latou, “‘Ua tusia,‘O lo‘u fale o le fale tatalo lea;’a ‘ua ‘outou faia ma ana o ē fao mea.”

47. ‘Ua a‘oa‘o o ia i aso fai so‘o i le malumalu. A o le ‘au ositaulaga sili ma le ‘au tusi‘upu, ‘atoa ma ali‘i o le nu‘u, ‘ua latou fia fasioti ‘iā te ia;

48. ‘ae le‘i maua e i latou se mea e fai ai; auā ‘ua naunau le nu‘u uma i le fia fa‘alogo atu ‘iā te ia.