1. ‘Ua fo‘i a‘e Iesu mai Ioritana, ‘ua tumu o ia i le Agaga Pa‘ia, ‘ona ta‘ita‘iina lea o ia e le Agaga i le mea tu‘ufua.
2. ‘Ua fa‘aosoosoina o ia e le tiapolo i aso e fagafulu o aso lava ia e le‘i taumafa ai e ia sina mea e tasi; ‘ua mavae ia aso, mulimuli ane ‘ona fia taumafa ai lea o ia.
3. ‘Ona fai mai lea o le tiapolo ‘iā te ia, “‘Āfai o oe o le Alo o le Atua, ‘inā fetalai ane ia i lenei ma‘a ia liu areto.”
4. ‘Ona tali atu lea o Iesu ‘iā te ia, “‘Ua tusia, ‘E lē na o mea e ‘ai e ola ai le tagata.’”
5. ‘Ona ‘aveina a‘e lea o ia e le tiapolo i le mauga maualuga, ma fa‘aali ‘iā te ia mālō uma o le lalolagi ‘ua se ‘emo lava.
6. ‘Ona fai mai lea o le tiapolo ‘iā te ia, “‘Ou te avatua ‘iā te oe lenei pule uma ma lo latou mamalu; auā ‘ua tu‘uina mai ‘iā te a‘u, ‘ou te avatu ai fo‘i i lē ‘ou te mana‘o i ai.
7. O lenei, ‘āfai ‘e te ifo mai ‘iā te a‘u, e fai ma oe nei mea uma.”
8. ‘Ona tali atu lea o Iesu, ‘iā te ia, “‘Ua tusia,‘‘E te ifo i le Ali‘i lou Atua,‘ua na o ia lava ‘e te ‘au‘auna i ai.’”
9. ‘Ona ‘ave ai lea e le tiapolo ‘iā Iesu i Ierusalema, ‘ua fa‘atū ‘iā te ia i le tumutumu o le malumalu, ‘ona fai mai lea o ia ‘iā Iesu, “‘Āfai o oe o le Alo o le Atua, ‘inā oso ia oe i lalo i le mea nei;
10. auā ‘ua tusia,‘E poloa‘i o ia i ana agelu ‘iā te oe,e tausi ‘iā te oe;’ ma lenei fo‘i,
11. ‘latou te ‘ave ‘iā te oe i o latou lima,ne‘i tū‘ia lou vae i se ma‘a.’”
12. ‘Ona tali atu lea o Iesu, “‘Ua fai mai le ‘upu, ‘‘Aua ‘e te tofotofo i le Ali‘i lou Atua.’”
13. ‘Ua fa‘auma e le tiapolo le tofotofoga uma, ‘ona alu ‘ese ai lea ‘iā te ia se‘ia o‘o i se isi aso.
14. ‘Ona fo‘i atu lea o Iesu i le mana o le Agaga i Kalilaia; ‘ua logo atu fo‘i le tala ‘iā te ia ‘ua so‘o ai lava itū uma.
15. ‘Ua a‘oa‘o o ia i o latou sunako, ‘ua vi‘ia ai o ia e tagata uma.
16. ‘Ua o‘o fo‘i o Iesu i Nasareta, na tupu ai o ia, ‘ona ulufale lea o ia i le sunako i le aso sapati, o lana masani lea; ‘ua tu i luga fo‘i o faitau.
17. ‘Ua tu‘uina mai ‘iā te ia le Tusi a le perofeta o Isaia. ‘Ona fofola lea e ia le Tusi, ‘ona maua ai lea o ia le mea ‘ua tusia ai lenei ‘upu.
18. “‘Ua i o‘u luga le Agaga o le Ali‘i, auā ‘ua nā fa‘au‘u mai ‘iā te a‘u e folafola le tala lelei i ē matitiva.‘Ua ‘auina mai a‘u e ia e fa‘amālōlō i ē loto momomo,e tala‘i le sa‘olotoga i le tāfeaga,ma ‘ia pupula mata o ē tauaso,e tu‘u sa‘oloto i ē ‘ua fa‘asauāina,
19. e tala‘i le tausagae finagalo malie mai ai le Ali‘i.”
20. ‘Ua tā‘ai e ia le Tusi, ‘ona tu‘u atu ai lea i le ‘au‘auna, ‘ua nofo i lalo; ‘ona pulato‘a mai lea ‘iā te ia o mata o tagata uma i le sunako.
21. ‘Ona amata lea ‘ona fetalai atu o ia ‘iā te i latou, “O le aso nei ‘ua taunu‘u ai lenei Tusi, o ‘outou o fa‘alogologo ai.”
22. ‘Ua latou vivi‘i uma ‘iā te ia, ‘ua ofo fo‘i i ‘upu alofa na pa‘ū mai lona fofoga; ma ‘ua latou fai ane, “E lē o le atali‘i ‘ea lenei o Iosefa?”
23. ‘Ona fetalai atu lea o ia ‘iā te i latou, “E fai mai lava e ‘outou lenei ‘upu fa‘atusa ‘iā te a‘u, ‘Le foma‘i e, ‘inā fa‘amālōlō ia oe ‘iā te oe;’ ma ‘o mea uma na faia i Kapanaumi, na matou fa‘alogo i ai, ‘ia e faia fo‘i ‘i‘inei i lou nu‘u moni.’”
24. ‘Ua fetalai atu o ia, “E moni, ‘ou te fai atu ‘iā te ‘outou, e lē talia se perofeta i lona nu‘u moni.
25. “E moni, ‘ou te fai atu ‘iā te ‘outou; sa i Isaraelu i ona po o Elia, o fafine e to‘atele ‘ua oti a latou tane, na punitia ai le lagi i tausaga e tolu ma masina e ono, ‘ua oge tele ai le nu‘u uma.
26. ‘Ae le‘i ‘auina atu Elia i so latou, ‘ua nā o Sarefata le ‘a‘ai o Saitonu, i le fafine ‘ua oti lana tane.
27. Sa i Isaraelu fo‘i lepela e to‘atele i ona po o le perofeta o Elisaia; ‘ae le‘i fa‘amamāina so latou, ‘ua nā o Naamanu lava le Suria.”
28. ‘Ua fa‘alogo i latou uma ‘ua i le sunako i nei mea, ‘ona lilivau ai lea o i latou.
29. ‘Ua latou tutū mai ma tuli ‘iā te ia i tua o le ‘a‘ai, ‘ua ta‘ita‘i fo‘i ‘iā te ia i le tofē o le mauga ‘ua tu ai la latou ‘a‘ai, ‘ina ‘ia latou tulei ifo ‘iā te ia.
30. A ‘ua sāvali ane o ia i o latou vā, ‘ua maliu ‘ese.
31. ‘Ona maliu ifo lea o Iesu i Kapanaumi, o le ‘a‘ai o Kalilaia. ‘Ua a‘oa‘o o ia ‘iā te i latou i sapati.
32. ‘Ua matuā ofo i latou i lana a‘oa‘oga; auā o lana fetalaiga ‘ua i ai le pule.
33. Sa i le sunako o le tagata ‘ua i ai le agaga o le temoni leaga; ‘ua ‘alaga mai fo‘i o ia, ‘ua leo tele,
34. ‘ua fa‘apea mai, “Auē! Iesu e, le Nasareta, se a ‘ea se mea ‘e te mana‘o ai ‘iā te i matou? ‘Ua e maliu mai ‘ea e fa‘aleaga i matou? ‘Ua ‘ou iloa oe, o le Pa‘ia oe o le Atua.”
35. ‘Ona vavao lea o Iesu ‘iā te ia, ‘ua fa‘apea atu, “‘Inā fa‘alologo ia, ma e alu i fafo nai ‘iā te ia.” ‘Ona lafo i lalo lea o le temoni ‘iā te ia i o latou luma; ‘ona alu lea i fafo ‘iā te ia, ‘ua lē afaina lava ia.
36. ‘Ona ofo lea o i latou uma, ‘ua fetautalatala‘i fo‘i, ‘ua fa‘apea ane, “O le a ‘ea lenei ‘upu? Auā o le pule ma le mana ‘ua fetalai atu ai o ia i agaga leaga, ‘ona latou ō ‘ese lea i fafo.”
37. ‘Ona logo atu lava lea o le tala ‘iā te ia i mea uma o lea itū.
38. ‘Ua tula‘i o Iesu ma tu‘ua le sunako, ‘ae ulu atu i le fale o Simona. ‘Ua maua le tinā o le avā a Simona e le ma‘i vevela, ‘ua tele; ‘ua latou fa‘atoga atu ‘iā Iesu mo ia.
39. ‘Ona tu lea o ia i ona tafatafa, ‘ua vavao le ma‘i vevela, ‘ona te‘a ai lea; ‘ona tula‘i loa lea o ia, ‘ua ‘au‘auna ‘iā te i latou.
40. O i latou uma sa i ai tagata ē mama‘i i ma‘i ‘ese‘ese, ‘ua latou ‘aumaia i latou ‘iā te ia i le goto o le lā; ‘ua pa‘ipa‘i tasi atu ona ‘a‘ao ‘iā te i latou, ma fa‘amālōlō ‘iā te i latou.
41. ‘Ua ō atu fo‘i temoni i fafo i ē to‘atele, o ‘alalaga, ‘ua fa‘apea mai, “O oe lava le Keriso, le Alo o le Atua.”‘Ona vavao lea o ia ‘iā te i latou, ‘ua lē mafai ‘ona latou tautala; auā ‘ua latou iloa o ia o le Keriso.
42. ‘Ua ao, ‘ona ulufafo lea o ia, ‘ua maliu atu i le mea tu‘ufua; ‘ua sā‘ili fo‘i ‘iā te ia le motu o tagata, ‘ona ō mai ai lea ‘iā te ia, ma tāofi ‘iā te ia, ‘ina ‘ia lē maliu ‘ese o ia ‘iā te i latou.
43. A ‘ua fetalai atu o ia ‘iā te i latou, “E tatau ‘ona ‘ou folafola le tala lelei o le mālō o le Atua i nisi ‘a‘ai fo‘i; auā o le mea lea na ‘auina mai ai a‘u.”
44. ‘Ona tala‘i atu lea o ia i sunako o Kalilaia.