1. Mulimuli ane ‘ua tofia e le Ali‘i nisi e to‘afitusefulu, ‘ua ‘a‘auina atu o i latou e ta‘ito‘alua ‘ua muamua atu ‘iā te ia, i ‘a‘ai uma ma mea uma o le a maliu atu i ai o ia.
2. ‘Ua fetalai atu fo‘i o ia ‘iā te i latou, “E tele le saito e seleseleina, a o le ‘au faigaluega e to‘aitiiti ia; o lea ‘ia ‘outou ‘ai‘oi ai i le Ali‘i e ana le saito e seleseleina, ‘ina ‘ia ‘a‘auina mai e ia ni ē galulue i lana saito e seleseleina.
3. ‘Inā ō atu ia, fa‘auta, ‘ou te ‘a‘auina atu ‘outou e pei o tama‘i mamoe i le vā o luko.
4. ‘Aua tou te ‘ave se ‘ato tupe, po o se taga, po o se‘evae; ‘aua fo‘i tou te ofo alofa atu i se tasi i le ala.
5. O le fale tou te ulu atu i ai, tou te mua‘i fai atu, ‘‘Ia manuia le ‘āiga nei.’
6. Pe ‘āfai o i ai se tagata o le manuia, e o‘o atu ‘iā te ia la ‘outou fa‘amanuia; a leai, e toe fo‘i mai ‘iā te ‘outou.
7. ‘Ia ‘outou nonofo i lea fale ma ‘a‘ai ma inu i mea latou te avane; auā e tatau ‘ona avatu i lē faigaluega lona taui. ‘Aua tou te feoa‘i i lea fale ma lea fale.
8. O le ‘a‘ai tou te o‘o atu i ai ma latou talia fo‘i ‘outou, ‘ia ‘outou ‘a‘ai i mea e laulauina mai ‘iā te ‘outou.
9. ‘Ia ‘outou fa‘amālōlō fo‘i i ē mama‘i o i ai ma ‘ia fai atu ‘iā te i latou, ‘‘Ua latalata ‘iā te ‘outou le mālō o le Atua.’
10. A o le ‘a‘ai tou te o‘o atu i ai, ‘ua latou lē talia fo‘i ‘outou, tou te ō ai i o latou auala ma fa‘apea atu,
11. ‘O le ‘ele‘ele lava mai la ‘outou ‘a‘ai, ‘ua pipi‘i mai ‘iā te i matou, matou te sōloi atu ‘iā te ‘outou; ‘ae peita‘i ‘ia ‘outou iloa lenei mea, ‘ua latalata ‘iā te ‘outou le mālō o le Atua.’
12. ‘Ou te fai atu ‘iā te ‘outou, o lea aso e feoloolo ai Sotoma i lea lava ‘a‘ai.
13. “‘Oi talofa ‘iā te oe Koasini, ‘oi talofa ‘iā te oe Petesaita! Auā ‘ana faia i Turo ma Saitonu o vāvega ‘ua faia ‘iā te ‘outou, po ‘ua leva ‘ona latou salamō o nonofo i le ‘ie talatala ma le lefulefu.
14. ‘Ae feoloolo Turo ma Saitonu ‘iā te ‘outou i le fa‘amasinoga.
15. O oe fo‘i Kapanaumi,‘ua fa‘aeaina ‘ea oe e o‘o i le lagi?E lafotūina oe i lalo lava i seoli.
16. “O lē fa‘alogo ‘iā te ‘outou, ‘ua fa‘alogo o ia ‘iā te a‘u o lē fa‘alēaogā ‘iā te ‘outou, ‘ua ia fa‘alēaogā ‘iā te a‘u; o lē fa‘alēaogā fo‘i ‘iā te a‘u, ‘ua ia fa‘alēaogā i lē na ‘auina mai a‘u.”
17. ‘Ua toe fo‘i mai le to‘afitusefulu ma le ‘oli‘oli, ‘ua fa‘apea mai, “Le Ali‘i e, ‘ua usiusita‘i mai temoni ‘iā te i matou, ‘ona o lou suafa.”
18. ‘Ua fetalai atu o ia ‘iā te i latou, “Na ‘ou iloa Satani ‘ua pa‘ū mai le lagi pei o le uila.
19. Fa‘auta, ‘ou te foa‘i ‘iā te ‘outou le pule e soli ai gata ma akarava ma le malosi uma o le fili; e leai lava se mea e leaga ai ‘outou.
20. ‘Ae peita‘i ‘aua tou te ‘oli‘oli i lenei mea, ‘ina ‘ua usiusita‘i agaga ‘iā te ‘outou, a ‘ia ‘oli‘oli ‘ona ‘ua tusia o ‘outou igoa i le lagi.”
21. O lea lava itū aso ‘ua matuā fiafia ai o ia i le Agaga Pa‘ia, ‘ua fa‘apea atu, “‘Ou te fa‘afetai ‘iā te oe lo‘u Tamā e, o le Ali‘i o le lagi ma le lalolagi, ‘ina ‘ua e nanā ia mea i ē popoto ma ē atamamai, a ‘ua fa‘aalia atu ia mea i tama valevale; o lea lava lo‘u Tamā, auā o lou finagalo lava lea.
22. “‘Ua tu‘uina mai mea uma ‘iā te a‘u e lo‘u Tamā; e leai se tasi ‘ua iloa le Atali‘i, ‘ua nā o le Tamā; e leai fo‘i se tasi ‘ua iloa le Tamā, ‘ua nā o le Atali‘i ma sē ‘ua loto le Atali‘i e fa‘aali atu i ai.”
23. ‘Ua fāliu Iesu i ona so‘o ma fetalai lemū ane, “‘Amu‘ia mata ‘ua iloa mea tou te iloa,
24. auā ‘ou te fai atu ‘iā te ‘outou, e to‘atele perofeta ma tupu na fia matamata i nei mea ‘ua ‘outou iloa, a ‘ua latou lē iloa lava; na latou fia fa‘alogo fo‘i i nei mea ‘ua ‘outou fa‘alogo i ai, ‘ae le‘i fa‘alogo ai lava.”
25. Fa‘auta fo‘i, ‘ua tula‘i le tasi o a‘oa‘o tulafono ma tofotofo ‘iā Iesu, ‘ua fa‘apea mai, “Le a‘oa‘o e, se a se mea ‘ou te faia ‘ina ‘ia ‘ou maua ai le ola e fa‘avavau?”
26. ‘Ua fetalai atu Iesu ‘iā te ia, “O le a ‘ea ‘ua tusia i le tulafono? O le a lau faitau?”
27. ‘Ua tali mai o ia, ‘ua fa‘apea mai, “‘E te alofa atu i le Ali‘i lou Atua ma lou loto ‘atoa ma lou agaga ‘atoa ma lou malosi ‘atoa ma lou manatu ‘atoa; ‘e te alofa atu fo‘i i lē lua te tuā‘oi, ‘ia pei o oe lava ‘iā te oe.”
28. ‘Ona fa‘apea atu lea o Iesu ‘iā te ia, “‘Ua tonu lau tali; ‘ia e fa‘apea ‘ona fai, ‘e te ola ai.”
29. A ‘ua fa‘afiatonu o ia, ‘ua fai mai ‘iā Iesu. “O ai fo‘i le tagata ma te tuā‘oi?”
30. ‘Ua tali atu Iesu, “O le tasi tagata na alu ifo mai Ierusalema i Ieriko, ‘ua maua o ia e tagata faomea; ‘ua latou tō‘eseina ona ‘ofu, ma fasi ‘iā te ia, ‘ua latou ō ‘ua tu‘ua o ia, ‘ua tāli oti.
31. ‘Ua so‘ona alu ifo le tasi ositaulaga i lea ala; ‘ua iloa atu ‘iā te ia, ‘ona ui ane lea o ia i le tasi itū ala.
32. ‘Ua fa‘apea fo‘i le sa Levī, ‘ua o‘o i lea mea, ‘ua alu ane ma matamata i ai; ‘ona ui ane fo‘i lea o ia i le tasi itū ala.
33. A o le tasi Samaria ‘ua alu lana malaga, ‘ua o‘o atu i le mea o i ai o ia, ‘ua iloa o ia, ‘ona mutimutivale lea o lona alofa;
34. ‘ua alu atu, ma fusifusi i ona manu‘a, ‘ua liligi fo‘i i ai le suāu‘u ma le uaina; ‘ua fa‘ati‘eti‘e ‘iā te ia i lana lava manu ma ta‘ita‘i ‘iā te ia i le fale talimālō ma tausi ‘iā te ia.
35. O le taeao, ‘ua ia tō a‘e ai tenari e lua ma avatu i lē e pule i le fale talimālō, ‘ua fai atu ‘iā te ia, ‘‘Inā e tausi ‘iā te ia; ‘ai se mea ‘e te toe fa‘atau ai, ‘ou te taui atu ‘iā te oe pe a ‘ou toe sau.’
36. O le a sou manatu, o ai o latou nei o le to‘atolu ‘ua fai ma tagata la te tuā‘oi ma lē na maua e tagata faomea?”
37. ‘Ua fai mai o ia, “O lē na alofa atu ‘iā te ia.”‘Ona fa‘apea atu ai lea o Iesu ‘iā te ia, “‘Inā alu ia ma ‘ia e fa‘apea ‘ona fai.”
38. ‘Ua latou ō, ‘ona afe atu lea o ia i le tasi ‘a‘ai, o le tasi fafine fo‘i e igoa ‘iā Mareta, ‘ua na talia o ia i lona fale.
39. O lona uso fo‘i e igoa ‘iā Maria, ‘ua nofo o ia i lalo i tafatafa o vae o Iesu ma fa‘alogo i lana fetalaiga.
40. A ‘ua tigā Mareta i le fatu‘āiga ‘ua tu mai ma fa‘apea mai, “Le Ali‘i e, ‘e te lē manatu mai ‘ea, ‘ina ‘ua tu‘u mai e lo‘u uso ‘iā te a‘u e sauni to‘atasi? ‘ia e fetalai ane ‘iā te ia, ‘ia fesoasoani mai ‘iā te a‘u.”
41. A ‘ua tali atu le Ali‘i ‘iā te ia, “Mareta e, Mareta e, ‘ua e popole, ma ‘ua pūpū lou loto i mea e tele;
42. a o le mea lava e tasi e ao ‘ina ‘ia maua; ‘ua filifilia fo‘i e Maria lea mea lelei, e lē ‘ave‘eseina ‘iā te ia.”