1. ‘Ua fa‘auma e Iesu ana fetalaiga uma, o fa‘alogo ai le nu‘u, ‘ona maliu ai lea o ia i Kapanaumi.
2. ‘Ua ma‘i le ‘au‘auna a le tasi ta‘ita‘i o le to‘aselau, sa fa‘apelepeleina e ia, ‘ua tāli oti.
3. ‘Ua fa‘alogo o ia ‘iā Iesu, ‘ona ‘auina mai lea e ia o toeaina o Iutaia e ‘ai‘oi mai ‘iā te ia ‘ina ‘ia maliu atu ma fa‘aola lana ‘au‘auna.
4. ‘Ua latou ō mai ‘iā Iesu, ‘ona latou matuā fa‘atoga mai lea ‘iā te ia, ‘ua fa‘apea mai, “‘Ua aogā o ia ‘e te fai ai le mea nei;
5. auā ‘ua alofa mai o ia i lo tatou nu‘u, ‘ua na faia fo‘i le sunako mo i matou.”
6. ‘Ona maliu atu ai lea o Iesu ma i latou; ‘ua latalata ia i le fale, ‘ona ‘auina mai lea e le ta‘ita‘i o le to‘aselau o ana uō ‘iā te ia, ‘ua fa‘apea mai ‘iā te ia, “Le Ali‘i e, ‘aua ne‘i fa‘alavelaveina oe; auā e lē aogā a‘u ‘e te ulu mai ai i lo‘u fale.
7. O lea fo‘i na ‘ou manatu ai ‘ou te lē aogā ‘ona ‘ou alu atu ‘iā te oe; a ‘ia o‘o mai sau fetalaiga, e fa‘amālōlōina ai lau ‘au‘auna.
8. Auā o a‘u fo‘i le tagata ‘ua pule i ai le tasi, ‘ua ‘ou pule fo‘i i le ‘au tau; a a‘u fai atu i se tasi. ‘‘Inā alu ia,’ ‘ona alu ai lea; ma le tasi, ‘‘Inā sau ia,’ ‘ona sau ai lea; ma la‘u ‘au‘auna, ‘‘Inā faia lenei mea,’ ‘ona fai ai lea.”
9. ‘Ua fa‘afofoga Iesu i nei mea, ‘ona ofo ai lea ‘iā te ia; ‘ua fāliu o ia, ma fetalai atu i le motu o tagata ē ‘ua mulimuli mai ‘iā te ia, “‘Ou te fai atu ‘iā te ‘outou, ‘ou te le‘i iloa ‘iā Isaraelu lava se fa‘atuatua e fa‘apenā ‘ona tele.”
10. O ē na ‘auina mai ‘ua fo‘i atu i le fale, ‘ona iloa lea e i latou o le ‘au‘auna sa ma‘i, ‘ua mālōlō.
11. Mulimuli ane ‘ua maliu atu o Iesu i le ‘a‘ai, o Naina le igoa, ‘ua ō fa‘atasi ma ia ona so‘o e to‘atele, ma le motu o tagata e to‘atele.
12. ‘Ua latalata o ia i le faitoto‘a o le ‘a‘ai, fa‘auta fo‘i, ‘ua fata mai le tagata oti, o le tama e to‘atasi o ia a lona tinā, o ia fo‘i le fafine ‘ua oti lana tane; ‘ua ‘iā te ia fo‘i tagata o le ‘a‘ai e to‘atele.
13. ‘Ua silasila atu le Ali‘i ‘iā te ia, ‘ona mutimuti alofa lea o ia ‘iā te ia, ‘ua fetalai atu ‘iā te ia, “‘Aua ‘e te tagi.”
14. ‘Ua maliu ane ia, ‘ua pa‘i atu i le fata; ‘ona tutū mai ai lea o le ‘au fata, ‘ona fetalai atu lea o ia, “Le taule‘ale‘a e, ‘ou te fai atu ‘iā te oe, ‘Inā tula‘i ia.”
15. ‘Ona nofo ai lea i luga o lē na oti, ‘ua tautala; ‘ona ia tu‘uina atu lea o ia i lona tinā.
16. ‘Ua o‘o le mata‘u ‘iā te i latou uma, ‘ua latou vivi‘i atu i le Atua, ‘ua fa‘apea ane, “‘Ua tu mai ‘iā te i tatou le perofeta sili;” i le ma lea, “‘Ua asiasi mai le Atua i lona nu‘u.”
17. ‘Ua so‘o lava Iutaia uma ma le itū uma i lenei tala ‘iā te ia.
18. ‘Ua fa‘ailoa atu ‘iā Ioane nei mea uma e ona so‘o.
19. ‘Ona vala‘au atu lea e Ioane i ona so‘o se to‘alua, ‘ua ‘a‘auina atu i lā‘ua ‘iā Iesu, ‘ua fa‘apea ane, “Po o oe ‘ea lē maliu mai? pe matou te fa‘atali atu i se tasi?”
20. ‘Ua ō mai ia tagata ‘iā te ia, ‘ua fa‘apea mai, “‘Ua ‘a‘auina mai i mā‘ua e Ioane le papatiso ‘iā te oe, ‘ua fai mai, ‘Po o oe ‘ea lē maliu mai? pe matou te fa‘atali atu i se tasi?’”
21. O lea lava itū aso ‘ua fa‘amālōlō ai e ia tagata e to‘atele sa i ai ma‘i, ma ma‘i tigā, ma agaga leaga; ‘ua foa‘i atu fo‘i ‘ina ‘ia va‘ai o ē tauaso e to‘atele.
22. ‘Ona tali atu lea o Iesu ‘iā te i lā‘ua, ‘ua fa‘apea atu, “‘Inā ō atu ia ‘oulua, ma fa‘ailoa atu ‘iā Ioane o mea ‘ua ‘oulua va‘ai i ai, ma fa‘alogo i ai; ‘ua pupula tauaso, ‘ua sāvavali pipili, ‘ua fa‘amamāina lepela, ‘ua logo tutuli, ‘ua fa‘atutūina ē nā oti, ‘ua folafolaina le tala lelei i ē matitiva.
23. E manuia fo‘i sē lē tausuai ‘iā te a‘u.”
24. ‘Ua ō ē na ‘auina mai e Ioane, ‘ona amata ai lea o ia ‘ona fetalai atu i le motu o tagata e uiga ‘iā Ioane, “Na ‘outou ō i le vao e matamata i ni a? O le u ‘ea ‘ua lūlūina e le matagi?
25. Pe na ‘outou ō e matamata i ni a? O le tagata ‘ea ‘ua ‘ofu i ‘ofu malūlū? Fa‘auta, o ē ‘ofu i ‘ofu matagofie, ma ‘ua solo lelei, o i maota o tupu ia.
26. Pe na ‘outou ō e matamata i ni a? O le perofeta ‘ea? E moni, ‘ou te fai atu ‘iā te ‘outou, E sili lava ia i le perofeta.
27. O ia lea ‘ua tusi mai i ai,‘Fa‘auta, ‘ou te ‘auina atu la‘u sāvali i ou luma,na te teuteua lou ala i ou luma.’
28. ‘Ou te fai atu fo‘i ‘iā te ‘outou, E leai se perofeta i ē na fānanau i fafine e sili ‘iā Ioane le papatiso; a o lē aupito itiiti i le mālō o le Atua, e sili lea ‘iā te ia.”
29. ‘Ona ta‘uamiotonuina ai lea o le Atua o le nu‘u uma lava ē na fa‘alogo ai, ‘atoa ma tagata ao lafoga, ‘ina ‘ua papatisoina i latou i le papatisoga a Ioane.
30. A o le ‘au faresaio ma le ‘au a‘oa‘o tulafono, ‘ua latou fa‘alēaogā ‘iā te i latou le pule a le Atua, ‘ina ‘ua lē papatisoina i latou e ia.
31. ‘Ua fetalai atu Iesu, “‘Ou te fa‘atusa i ni a tagata o lenei tupulaga? latou te tusa ma ni a?
32. E tusa ia ma tamaiti ‘ua nonofo i le malae ma fevala‘aua‘i, ‘ua fa‘apea ane,‘‘Ua matou fa‘aili atu ‘iā te ‘outou,‘ae tou te le‘i sa‘asa‘a mai;‘ua matou fētāgisi atu ‘iā te ‘outou,‘ae tou te le‘i taufaitagitu‘i mai.’
33. Auā na sau Ioane le papatiso, ‘ua lē ‘ai areto, ‘ua lē inu fo‘i uaina; ‘ona ‘outou fai ane lea, ‘‘Ua ‘iā te ia le temoni.’
34. ‘Ua sau le Atali‘i o le tagata, ‘ua ‘ai o ia ma inu; ‘ona ‘outou fai ane lea, ‘Fa‘auta, o le tagata ‘ai tele ma le inu uaina, o le uō a tagata ao lafoga ma ē agasala.’
35. A ‘ua ta‘uamiotonuina le poto e ana tama uma.”
36. ‘Ua fai mai le tasi o le ‘au faresaio se‘i la ‘a‘ai ma ia ‘ua maliu atu ia i le fale o le faresaio, ‘ona ta‘oto ai lea o ia e taumafa.
37. Fa‘auta fo‘i, o le fafine o le ‘a‘ai, o ia o le fafine agasala, ‘ua iloa e ia ‘ua ta‘oto o ia e taumafa i le fale o le faresaio, ‘ona ‘aumai lea o ia o le fagu alapasa ‘ua tumu i le suāu‘u manogi;
38. ‘ua tu fo‘i o ia i tua i ona vae, ‘ua tagi, ‘ua fa‘asisina ifo e ia ona loimata i ona vae, ‘ua sōloi ai i lona lava lauulu, ‘ua sogi fo‘i i ona vae, ma fa‘au‘uina i le suāu‘u manogi.
39. ‘Ua iloa e le faresaio ‘ua fai atu ‘iā te ia, ‘ona fa‘apea ifo ai lea o ia i lona loto, “‘Ana se perofeta lenei, po ‘ua iloa e ia lenei fafine, ma lana amio, ‘ua ia pa‘i atu ‘iā te ia; auā o le fafine agasala ia.”
40. ‘Ona fetalai atu ai lea o Iesu ‘iā te ia, “Simona e, o la‘u ‘upu ‘ou te fai atu ‘iā te oe.”‘Ua fai mai o ia, “Le a‘oa‘o e, ‘inā fetalai mai ia.”
41. “O tagata e to‘alua sa la nonō mai tupe i le tagata e to‘atasi; sa nonō mai le tasi i tenari e lima selau, e a le tasi e limagafulu.
42. ‘Ua leai ni a lā tupe e toe avatu, ‘ona fa‘amāgalo fua lea o ia ‘iā te i lā‘ua uma. ‘Inā fai mai ia, po o ai so lā‘ua e tele lona alofa ‘iā te ia?”
43. ‘Ua tali mai Simona, “‘Ai lava o lea na fa‘amāgaloina atu ana mea e tele.”‘Ua fetalai atu Iesu ‘iā te ia, “‘Ua tonu lau tāofi.”
44. ‘Ona fāliu atu lea o ia i le fafine, ‘ua fetalai atu ‘iā Simona, “‘Ua e iloa ‘ea le fafine nei? Na ‘ou ulu mai i lou fale, ‘e te le‘i ‘aumai ni vai mo o‘u vae; peita‘i o ia, ‘ua fa‘asisina ifo e ia ona loimata i o‘u vae, ma sōloi ai i lona lava lauulu.
45. ‘E te le‘i feasogi mai ‘iā te a‘u; peita‘i o ia, ‘ua lē aunoa ‘ona sogi i o‘u vae talu lava ‘ona ulufale mai o ia.
46. ‘E te le‘i fa‘au‘u mai i lo‘u ulu i le suāu‘u; peita‘i o ia, ‘ua fa‘au‘u e ia i o‘u vae i le suāu‘u manogi.
47. ‘Ou te fai atu ‘iā te oe, ‘ua fa‘amāgaloina ana agasala e tele, auā ‘ua alofa tele mai o ia; a o lē ‘ua fa‘amāgaloina i ai se mea itiiti, ‘ua itiiti fo‘i lona alofa.”
48. ‘Ua fetalai atu o ia i le fafine, “‘Ua fa‘amāgaloina au agasala.”
49. O ē na ta‘o‘oto e ‘a‘ai ‘ua latou fa‘apea ifo i o latou loto, “O ai fo‘i lenei o lē fa‘amāgaloina agasala?”
50. ‘Ua fetalai atu o ia i le fafine, “O lou fa‘atuatua ‘ua fa‘aolaina ai oe; ‘inā alu ia oe ma le manuia.”