1. ‘Ua mavae nisi aso i ona po o le seleselegāsaito, ‘ona asiasi atu lea e Samasoni o lana avā ‘ua ‘ave ai se tama‘i ‘oti; ‘ua fai ane, “‘Ou te alu atu i la‘u avā i le afeafe.”‘Ae lē mafai lona tamā ‘ina ‘ia ulu atu ai o ia.
2. ‘Ua fai mai lona tamā, “Sa ‘ou iloa lava, ‘ua e ‘ino‘ino i lau avā, ‘ona ‘ou avatu lea o ia i lau uō; e lē ‘ua sili ‘ea ‘ona lālelei lona uso itiiti ‘iā te ia? ia fai lea mōna sui ‘iā te oe.”
3. A ‘ua fai atu Samasoni ‘iā te i latou, “‘Ou te lē sala a‘u i lenei mea ‘iā Filisitia, pe a a‘u faia se mea e tigā ai i latou.”
4. ‘Ona alu lea o Samasoni, ‘ua ia pu‘ea alope e tolu selau; ‘ua ia ‘ave fo‘i sulu, ma na liliu le tasi i‘u i le tasi i‘u, ‘ua tu‘u fo‘i le sulu e tasi i le vā o i‘u e lua i totonugalemū.
5. ‘Ona togia lea e ia o sulu i le afi, ma tu‘u atu ai i saito o tu a Filisitia; ‘ona mū lea o fa‘aputuga saito ‘atoa ma saito o tu, o tōvine ‘atoa ma olive.
6. ‘Ona fai ane lea o Filisitia, “O ai ‘ea ‘ua faia lenei mea?” ‘Ua latou fai atu ai, “O Samasoni le tane a le afafine o le Timenata, ‘ina ‘ua na fao lana avā, ma avatu ai i lana uō.” ‘Ona ō a‘e lea o Filisitia, ma latou susunu o ia ma lona tamā i le afi.
7. ‘Ua fai atu Samasoni ‘iā te i latou, “E ui lava ‘ina ‘outou faia o lea mea, ‘ae ‘ou te taui atu ‘iā te ‘outou, e mulimuli ane ‘ona ‘ou mapu lea.”
8. ‘Ona fasia lea o i latou e ia o vae ma ‘ogāvae, o le fasi tele; ‘ona alu ifo lea o ia, ‘ua nofo i le vā i papa o Etama.
9. ‘Ona ō a‘e lea o Filisitia, ‘ua tolauapi i Iuta, sa fa‘asalalau i latou i Lei.
10. ‘Ua fai atu tagata o Iuta, “O le a le mea ‘ua ‘outou ō mai ai e tau ma i matou?”‘Ua fai mai i latou, “Matou te ō mai e fusifusi ‘iā Samasoni, e fai ‘iā te ia e pei ‘ona faia e ia ‘iā i matou.”
11. ‘Ona ō ifo lea o tagata o Iuta e tolu gaafe i le vā i papa o Etama, ‘ua latou fai mai ‘iā Samasoni, “‘E te le‘i iloa ‘ea ‘ua pule lava Filisitia ‘iā i tatou? O le a lenei mea ‘ua e faia ‘iā te i matou?”‘Ua fai atu o ia ‘iā te i latou, “E fa‘apei ‘ona latou faia ‘iā te a‘u, ‘ua fa‘apea ‘ona ‘ou faia ‘iā te i latou.”
12. ‘Ua latou fai mai ‘iā te ia, “‘Ua matou ifoifo mai nei e fusifusi ‘iā te oe, ma tu‘u atu ‘iā te oe i lima o Filisitia.”‘Ona fai atu lea o Samasoni ‘iā i latou, “‘Inā ‘outou tautō mai ‘iā te a‘u, tou te lē fasia a‘u e ‘outou.”
13. ‘Ua latou fai mai ‘iā te ia, o lo‘o fa‘apea, “E leai; ‘ae matou te fusifusia lava oe, ma tu‘u atu ‘iā te oe i o latou lima, ‘ae matou te lē fasia lava oe.” ‘Ona latou fusifusia lea o ia i maea fou e lua, ‘ua latou ‘ava‘e ‘iā te ia ai le papa.
14. ‘Ua o‘o o ia i Lei, ‘ona ‘alalaga fiafia lea o Filisitia ‘ona o ia. ‘Ona osofia lea o ia e le Agaga o le ALI‘I, ‘ua ‘avea maea sa i ona lima e pei se manoa lino ‘ua mū i le afi, ‘ua matala noanoaga i ona lima.
15. ‘Ona maua lea e ia o le ivi ‘auvae fou o le asini, na ia tu‘u atu lona lima, ma tago i ai, ma fasi a‘i tagata e afe.
16. ‘Ona fai ane lea o Samasoni,“O le ivi ‘auvae o le asini, o le faupuega, e lua faupuega;o le ivi ‘auvae o le asini na ‘ou fasi a‘i tagata e afe.”
17. ‘Ua o‘o ‘ina uma lana ‘upu, ‘ona ia lafoa‘i lea o le ivi ‘auvae nai lona lima; ‘ua ia fa‘aigoa ai lea mea o Ramalei.
18. ‘Ona matuā fia inu lea o ia; ‘ua ia vala‘au i le ALI‘I, ‘ua fa‘apea atu, “‘Ua e foa‘i mai i lau ‘au‘auna lenei olataga tele a o le a a‘u oti i le fia inu, ‘ona maua lea o a‘u e le ‘au lē peritomeina.”
19. ‘Ona tatala lea e le Atua le mea magoto sa i Lei, ‘ona alu atu ai lea o le vai, ‘ua inu ai o ia, ‘ona fo‘i atu lea o lona agaga, ‘ua ola lava ia; o le mea lea ‘ua ia fa‘aigoa ai lea mea o Eniakori, o lo‘o i Lei, ‘ua o‘o mai i lenei lava aso.
20. ‘Ua ia fa‘amasino ‘iā Isaraelu i ona po na mālō ai Filisitia, o tausaga e luafulu.#