1. Ma ‘ua iloa e Ionatana ‘ua sololelei mea uma mo ia; ‘ona ia tofia lea nisi tagata ma ‘auina atu i Roma e osi ai ma fa‘afou ai le feagaiga o le fa‘auō;
2. ‘ua na ‘auina atu fo‘i ma ni tusi, e uiga i lea lava matā‘upu, i tagata Sepata ma nisi fo‘i nu‘u.
3. Ma ‘ua latou ō atu i Roma ma ‘ua latou ulu atu i le falefono ma ‘ua latou fai atu, “Ionatana, le ositaulaga sili ma le nu‘u o tagata Iutaia ‘ua latou ‘auina mai i matou ‘ina ‘ia matou fa‘afouina le fa‘auō ma le feso‘ota‘iga e tusa ma le mea na mua‘i faia.”
4. Ma ‘ua tu‘uina mai ‘iā te i latou ni tusi mo nu‘u ‘ese‘ese ‘ina ‘ia toe molia ai i latou ma le saogalemū i Iuta.
5. A o le ata lenei o le tusi na tusia e Ionatana i tagata Sepata:
6. “O Ionatana, le ositaulaga sili ma le ‘au toeaina o le nu‘u ma le ‘au ositaulaga ma le nu‘u ‘atoa o tagata Iutaia ‘ua alolofa atu i o latou uso, tagata Sepata.
7. O aso ‘ua mavae atu na ‘auina mai le tusi ‘iā Onia, le ositaulaga sili, e Ariu lē sa fai mo ‘outou tupu, o ta‘utino mai o matou uso lava ‘outou, e pei ‘ona molimau ai le tusi o le a fa‘aopoopoina lona ata i la matou nei tusi.
8. Na talia fo‘i ma le fa‘aaloalo e Onia le tagata na ‘auina mai ma ‘ua na maua mai ai le tusi sa fa‘amanatua ai le feso‘ota‘iga ma le fa‘auō.
9. E ui ‘ina lē matuā aogā o mea ia ‘iā te i matou, auā o lo‘o ‘iā te i matou le fa‘amafanafanaga o tusi pa‘ia ‘ua i o matou lima,
10. a ‘ua matou loto e ‘auina atu ‘iā te ‘outou ni savali, ne‘i o‘o ‘ina ‘avea i matou ma tagata ‘ese ‘iā te ‘outou, auā ‘ua mavae atu tausaga e tele talu ‘ona ‘outou ‘auina mai la ‘outou tusi ‘iā i matou.
11. O lenei e lē aunoa ‘ona matou manatua pea ‘outou ‘iā matou tausamiga ma nisi aso e tatau ai, i taulaga ‘ua matou molia ‘atoa ma a matou sauniga pa‘ia, e pei ‘ona ono ai ma tatau ai le manatu i uso.
12. O lea, ‘ua matou ‘oli‘oli i lo ‘outou manuia.
13. A o i matou na lavea‘iina i ni puapuagā e tele ma ni tau‘a e tele; ma ‘ua oso mai ‘iā te i matou o tupu ‘ua vagavagai ‘iā i matou.
14. A ‘ua matou mumusu ‘ona fa‘asoesā ‘iā te ‘outou po o nisi o matou so‘o ma a matou uō, i le faiga o nei tau‘a.
15. Auā ‘ua matou maua le fesoasoani mai lugā, ma ‘ua lavea‘iina i matou ma ‘ua fa‘amaulaloina o matou fili.
16. O lea na matou tofia ai o Numeni, le atali‘i o Atioko ma Anipateri, le atali‘i o Iasona, ‘ia matou ‘auina atua i tagata Roma e fa‘afouina ai le fa‘auō ma le feso‘ota‘iga sa fai muamua ma i latou;
17. o lea fo‘i na matou poloa‘i atu ai ‘iā te i lā‘ua ‘ia la ō atu fo‘i ‘iā te ‘outou ma ofo alofa atu ‘iā te ‘outou ma tu‘u atu ‘iā te ‘outou la matou tusi e uiga i la tatou fa‘auso.
18. A o lenei, e lelei pe a ‘outou tali mai ‘iā te i matou e uiga i mea ia.”
19. A o le ata lenei o le tusi na ‘auina mai e Ariu ‘iā Onia:
20. “O Ariu, le tupu o tagata Sepata e alofa atu ‘iā Onia le ositaulaga sili.
21. ‘Ua maua ‘iā matou tusi, o le ‘au uso lava tagata Sepata ma tagata Iutaia, i le o le gafa o Aperaamo i tatou.
22. ‘Ona ‘ua matou iloa nei lea mea, e lelei pe a ‘outou tusi mai po ‘ua manuia ‘outou.
23. A o i matou fo‘i matou te tusi atu ‘iā te ‘outou. O a matou manu ma a matou mea uma, o a ‘outou mea fo‘i ia; o a ‘outou mea fo‘i, o a matou mea ia: o lea ‘ua matou poloa‘i atu ai ‘ia tala‘iina mea ia ‘iā te ‘outou.”
24. Ma ‘ua fa‘alogo e Ionatana ‘ua toe fo‘i mai o ta‘ita‘i ‘au a Temetiu ma le itūtau‘a e sili mamao le to‘atele i lo le ‘au muamua, latou te tau le tau‘a ma ia;
25. ma ‘ua ia ulufafo i Ierusalema ma ‘ua fa‘afetaia‘i ‘iā te i latou i le lau‘ele‘ele o Amatu, auā o lana fa‘atatau, ‘ia ‘aua ne‘i lava ni itūlā latou te taunu‘u mai ai i lona lau‘ele‘ele.
26. Ma ‘ua na ‘auina atu ni tagata agaga i lo latou togālauapi ma ‘ua toe fo‘i mai i latou o ta‘u mai ‘ua latou taupulepule o le a oso mai i le po.
27. A ‘ua goto le lā, ‘ona poloa‘i lea e Ionatana i ona tagata ‘ia mataala ma ia nofo sauniuni i le tau‘a ma o latou ‘au‘upega i le po ‘atoa ma ‘ua na tu‘uina ni leoleo e fa‘ata‘ali‘oli‘o i le togālauapi.
28. Ma ‘ua fa‘alogo e le fili o lo‘o nofo sauniuni Ionatana mōna tagata i le tau‘a, ‘ona latou matata‘u ai lea i o latou loto ma ‘ua latou tafu ni afi i o latou togālauapi.
29. A o Ionatana ma i latou sa fa‘atasi ma ia ‘ua latou lē iloa le sola‘aga se‘ia o‘o i le taeao, na ‘ona latou iloa atu o mumū afi;
30. ma ‘ua tuliloa o Ionatana ‘iā te i latou; a ‘ua na lē maua, auā na latou sopo atu i le vaitafe o Eleutero.
31. Ma ‘ua fa‘asaga atu o Ionatana i tagata Arapi sa ta‘ua o Sepatia ma ‘ua na taia i latou ma ‘ua na maua o latou vete.
32. ‘Ona alu ai lea, ‘ua o‘o atu i Tamaseko ma sa fealualua‘i o ia i lenā lau‘ele‘ele uma lava.
33. A o Simona ‘ua alu ia, ‘ua o‘o atu i Asekelona ma ‘olo e felāta‘i ai ma ‘ua fa‘asaga atu i Iopa ma ‘ua na maua le ‘a‘ai;
34. auā sa fa‘alogo o ia sa latou loto e tu‘u atu le ‘olo i le ‘au a Temetiu; ma ‘ua na tu‘uina ai ni leoleo latou te leosia.
35. Ma ‘ua toe fo‘i mai o Ionatana ma ‘ua na fa‘apotopotoina toeaina o le nu‘u ma ‘ua fai le tonu fa‘atasi ma i latou o le a atiina a‘e ni ‘olo i Iuta.
36. E atiina a‘e fo‘i le pavali o Ierusalema ma fa‘atū se pavali maualuga i le vā o le ‘olo ma le ‘a‘ai, ‘ina ‘ia vavae‘eseina le ‘olo ma le ‘a‘ai, ‘ia tutasi le ‘olo, ‘aua fo‘i le fai ai se fēfa‘ataua‘iga.
37. Ma ‘ua latou potopoto e ati a‘e le ‘a‘ai; ‘ua solo le pavali sa i luga o le vaitafe i le itū i sasa‘e ma ‘ua latou toe ati a‘e le mea ‘ua igoa ‘iā Kafenata.
38. A o Simona ‘ua na atiina a‘e Atita i Sefela ma ‘ua na faia ai ‘olo ma ‘ua faia mōna faitoto‘a ma o latou fa‘amau.
39. Ma ‘ua manatu Terufo e fai o ia ma tupu o Asia ma fa‘ae‘e le paleali‘i i lona ulu ma pu‘e le tupu o Atioko; a ‘ua fefe o ia ne‘i vavao e Ionatana lenā mea ma tau le tau‘a ma ia, e i ai ona fia pu‘e ‘iā te ia ma fasioti ‘iā te ia.
40. Ma ‘ua tula‘i o ia ma alu i Peteseana.
41. Ma ‘ua fa‘afetaia‘i ‘iā te ia o Ionatana ma le fagafulu afe o tagata filifilia mo le tau‘a ma ‘ua o‘o atu i Peteseana.
42. Ma ‘ua iloa e Terufo ‘ua alu atu Ionatana ma le itūtau‘a tele, ‘ona mata‘u ai lea, ‘ua lē fia pu‘e ‘iā te ia.
43. Ma ‘ua na talia o ia ma le fa‘aaloalo ma ‘ua na ta‘uleleia o ia i luma o ana uō uma lava ma ‘ua na foa‘i mai i ai ni mea alofa ma ‘ua na poloa‘i atu i lana itūtau‘a ‘ia latou usita‘i ‘iā Ionatana e pei ‘ona usita‘i ‘iā te ia lava.
44. Ma ‘ua fai mai o Terufo ‘iā Ionatana, “Po o le a le mea na e fa‘atigāina ai le nu‘u ‘atoa, pe lā ‘ua vātau i tā‘ua?
45. O lenei, ‘ia e tu‘u atu i latou e ō i o latou ‘āiga; ‘ia e filifilia ni ou tagata e to‘aitiiti, ‘ona tā ō lea ma a‘u i Tulomai, ‘ou te tu‘uina atu ‘iā te oe le ‘a‘ai ma isi ‘olo uma lava ma le itūtau‘a ma i latou uma ‘ua tofia i fe‘au fa‘alemālō, ‘ona ‘ou fo‘i atu lea o a‘u; auā o le mea lea na ‘ou sau ai.”
46. ‘Ua talitonu Ionatana i tala a Terufo ma ‘ua ‘ana‘ana ‘iā te ia ma ‘ua fa‘ata‘alolo le itūtau‘a ma ‘ua latou toe fo‘i mai i le fanua o Iuta.
47. A ‘ua tāofia le tolugaafe o tagata fa‘atasi ma ia, i le ‘ua ‘auina atu le lua afe o i latou i Kalilaia; a ‘ua ō atu le to‘aafe fa‘atasi ma ia.
48. A ‘ua ulu atu o Ionatana i Tulomaio, ‘ona punitia lea e tagata Tulomaio o faitoto‘a o le ‘a‘ai ma ‘ua latou pupu‘e ‘iā te ia ma ‘ua latou fasioti i le pelu i latou uma sa ulu atu ai fa‘atasi ma ia.
49. Ma ‘ua ‘auina atu e Terufo le itūtau‘a ma le ‘au e ti‘eti‘e i solofanua i Kalilaia ma le vaimauga tele ‘ina ‘ia latou fa‘aumatia ai o latou uma sa ‘au ‘iā Ionatana.
50. A o i latou nei, ‘ina ‘ua iloa na pu‘eina Ionatana ma ‘ua fasia ‘atoa ma i latou uma sa fa‘atasi ma ia, ‘ua latou feapoapoa‘i le tasi i le tasi ma ‘ua latou liliu atu, o nofo sauni i le tau‘a.
51. A o ē sa tuliloa ‘iā i latou, ‘ua iloa o le a latou tau ‘ina ‘ia ola ai, ‘ona fo‘i atu loa lea i latou.
52. A o i latou ia ‘ua toe fo‘i mai ma le filemū i le fanua o Iuta. Ma ‘ua latou matuā fētāgisi ‘ona o Ionatana ma i latou sa fa‘atasi ma ia ma ‘ua fa‘anoanoa Isaraelu i le fa‘anoanoa tele lava.
53. Ma ‘ua taumafai e nu‘u ‘ese uma sa vagaia i latou, ‘ia nutipala ‘iā te i latou, auā sa latou fai ane, “‘Ua leai so latou ta‘ita‘i po o sē fesoasoani i ai; o lenei ‘ia tatou feosofi ‘iā te i latou ma ‘ia fa‘agaloina i tagata le manatu ‘iā i latou.”