Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16

Feagaiga Tuai

Feagaiga Fou

1 Makapaio 10 O LE TUSI PA'IA - Ekalesia Katoliko Roma (RSCB)

‘Ua Osi le Feagaiga a Ionatana ma le Tupu o Alesana

1. A o le tausaga e tasi le selau ma le onogafulu na alu a‘e ai Alesana Epifano, le atali‘i o Atioko, lē ‘ua ta‘ua o le mamalu ma ‘ua na pu‘eina le ‘a‘ai o Tulomai ma ‘ua latou talilelei ‘iā te ia ma ‘ua fai ai o ia ma tupu.

2. Ma ‘ua logo lea mea i le tupu o Temetiu ma ‘ua na fa‘apotopoto le itūtau‘a matuā tele lava ma ‘ua alu e fa‘afetaia‘i ‘iā te ia i le tau‘a.

3. Ma ‘ua ‘auina atu e Temetiu ‘iā Ionatana le tusi i ‘upu o le filemū, o le a fa‘amamalu lava ‘iā te ia.

4. Auā sa fa‘apea ifo, “‘Ia fa‘avave ‘ona tatou fai le fa‘alelei ma ia, a o le‘i osi sana feagaiga ma Alesana e tau ma i tatou.

5. Auā o le a manatua lava e ia mea leaga uma na tatou faia ‘iā te ia ma lona uso ma lona nu‘u.”

6. Ma ‘ua ta‘u atu ‘iā te ia le pule e fa‘ala‘ei‘au ma gaosi ni ‘au‘upega ma ‘ia ‘avea lava ia mōna fesoasoani ma ‘ua poloa‘i ‘ia tu‘u mai ‘iā te ia o tama na fai ma fa‘afo‘i ita ‘ua i le ‘olo.

7. Ma ‘ua alu atu o Ionatana i Ierusalema ma ‘ua na lauina ai le tusi, o fa‘alogo i ai le nu‘u uma ma i latou ‘ua i le ‘olo.

8. Ma ‘ua matuā matata‘u i latou nei ‘ina ‘ua latou fa‘alogo ‘ua tu‘u mai e le tupu ‘iā te ia le pule e fa‘ala‘ei‘au.

9. Ma ‘ua tu‘uina mai ‘iā Ionatana o tama fa‘afo‘i ita ma ‘ua na tu‘uina atu i latou i o latou mātua.

10. Ma ‘ua nofo o Ionatana i Ierusalema ma ‘ua fa‘asaga e ati a‘e ma fa‘afou le ‘a‘ai.

11. Ma ‘ua fai atu i ē faigaluega ‘ia latou ati a‘e pavali ma sisi‘o le mauga o Siona i ma‘a fa‘atafafā ‘ina ‘ia ‘avea ma ‘olo ma ‘ua fa‘apea ‘ona latou faia.

12. Ma ‘ua sōsōla o tagata ‘ese sa i ‘olo na atiina a‘e e Pakite;

13. ma ‘ua ta‘ito‘atasi o i latou ma tu‘ua lona nofoaga ma alu i lona lau‘ele‘ele.

14. Na o Petesura na nonofo ai nisi o ē na latou tu‘ulafoa‘i le tulafono ma poloa‘iga a le Atua; auā sa faia lea ‘olo ma sulufa‘iga ‘iā te i latou.

15. Ma ‘ua logo i le tupu o Alesana o folafolaga na faia e Temetiu ‘iā Ionatana ma ‘ua latou tala atu ‘iā te ia o tau‘a ma mea malolosi na faia e ia mōna uso, ‘atoa ma puapuagā na latou tigāina ai.

16. Ma ‘ua fa‘apea a ia, “Pe mafai ‘ea ‘ona tatou maua se tasi tagata e pei o ia? O lenei ‘ia tatou ‘avea o ia ma tatou uō ma tatou fesoasoani.”

17. Ma ‘ua na tusia le tusi ma ‘ua ‘auina mai ‘iā te ia, e tusa ma ‘upu nei, o fai mai:

18. “O le tupu o Alesana ‘ua alofa atu i lona uso o Ionatana.

19. O le mea na matou fa‘alogo ai ‘iā te oe, o oe o le tagata ‘ua tele lou malosi ma ‘ua e loto e fa‘auō ma i matou.

20. O lenei ‘ua matou tofia ai oe ma ositaulaga sili o lou nu‘u, e ta‘ua fo‘i oe o le uō a le tupu (ma ‘ua ‘auina atu ‘iā te ia le ‘ofu pāuli ma le pale auro); ‘ia e to‘aga ‘iā matou mea, e pei lava o i matou ma ‘ia tumau lau fa‘auō ‘iā i matou.”

21. Na fa‘a‘ofu o Ionatana i ‘ofu pa‘ia i lona fitu o masina o le tausaga e tasi le selau ma le onogafulu, i le tausamiga o fale apitaga ma ‘ua fa‘ala‘ei‘au ma ‘ua na gaosia ‘au‘upega e tele.

‘Ua Fa‘auō Ionatana ‘iā Alesana

22. Ma ‘ua fa‘alogo o Temetiu i mea ia, ‘ona fa‘anoanoa tele lava lea ma ‘ua fai ane,

23. “Se a le mea ‘ua tatou faia, ‘ua muamua atu ai ‘iā i tatou o Alesana i le fai la latou fa‘auō ma tagata Iutaia e fa‘amausalīina a‘i o ia.

24. ‘Ou te tusi atu fo‘i a‘u ‘iā te i latou ma folafola malie atu i ai o tofiga mamalu ma ni mea alofa, ‘ina ‘ia ‘avea ai i latou mo‘u fesoasoani.”

25. Ma ‘ua tusi atu i ai i ‘upu nei,“O le tupu o Temetiu ‘ua alofa atu i le nu‘u o tagata Iutaia.

26. ‘Ua tausia e ‘outou la tatou feagaiga, ‘ua ‘outou tūtūmau i le fa‘auō ma i matou ma ‘ua ‘outou le ‘auai i o matou fili; ‘ua matou fa‘alogo i lea mea, ‘ua matou fiafia ai.

27. O lenei, ‘ia ‘outou tūtūmau pea lava ma tausisi i le fa‘amaoni ‘iā te i matou, ‘ona matou taui atu lea i mea lelei la ‘outou amiotonu ‘iā i matou;

28. matou te fa‘amāgaloina ‘outou i galuega e tele ma foa‘i atu fo‘i ni mea alofa ‘iā te ‘outou.

29. “A o lenei, ‘ou te fa‘amāgalo o ‘outou ma tagata Iutaia uma i lafoga; ‘ou te fa‘amāgalo atu fo‘i i lafoga i le masima ma le lafoga i paleali‘i, ma le vaetoluga o le seleselega;

30. o le vaeluaga fo‘i o fua o la‘au ‘ua i la‘u pule, ‘ou te tu‘u atu lea ‘iā te ‘outou e āfua mai i le aso nei, fa‘apea fo‘i o aso amulī; ‘aua ne‘i toe aoina lea i le ‘ele‘ele o Iuta, ‘atoa ma ‘a‘ai e tolu o Samaria ma Kalilaia ‘ua fa‘aopoopoina i ai; e āfua mai lava i le aso nei ma ‘ia tumau i aso uma lava.

31. O Ierusalema fo‘i, ‘ia pa‘ia ma ‘ia sa‘oloto, ‘atoa ma lona lau‘ele‘ele, ‘ia faia māna o mea e sefulua‘i ‘atoa ma lafoga.

32. ‘Ua ‘ou tu‘ua fo‘i la‘u pule i le ‘olo o lo‘o i Ierusalema, ‘ou te foa‘i atua i le ositaulaga sili, na te tofia ai o tagata e loto i ai o ia, latou te leoleoina.

33. A o tagata Iutaia uma lava ‘ua ‘aumaia i le tāfeaga i lo‘u mālō ‘atoa, ai le lau‘ele‘ele uma o Iuta, ‘ou te fa‘asa‘olotoina i latou e aunoa ma se taui, ‘ia fa‘amāgaloina fo‘i ‘iā te i latou o lafoga uma lava, e o‘o i lafoga i manu.

34. “A o tausamiga uma lava ma sapati ma aso o masina fa‘ato‘ā va‘aia ma aso fa‘ailogaina, e fa‘apea fo‘i o aso e tolu e muamua i tausamiga ma aso e tolu e mulimuli i tausamiga, ‘ia ‘avea uma ma aso o le sulufa‘iga ma le sa‘olotoga mo tagata Iutaia uma lava ‘ua i lo‘u mālō;

35. e leai lava se to‘atasi e pule e fai ai so se mea, pe fa‘atupu ni fa‘alavelave i se tasi o i latou i aso ia, so se mea ‘ua tupu.

36. “Ma ‘ia tofia i le vaega ‘au a le tupu o tagata Iutaia, e o‘o i le tolugafulu o afe o tagata, e tu‘uina fo‘i ‘iā te i latou le taui e tusa ma le mea ‘ua tu‘uina i vaega ‘au uma lava a le tupu; i le tofia fo‘i ni isi o i latou i ‘olo o le tupu silisili;

37. e tofia fo‘i ni isi o i latou i fe‘au a le mālō ‘ua tu‘uina i ē fa‘amaoni; ‘ia tofia fo‘i ni o latou ta‘imua, ma ‘ia latou sāvavali ‘iā latou lava tulafono, e pei ‘ona poloa‘iina e le tupu e uiga i le lau‘ele‘ele o Iuta.

38. “A o ‘a‘ai e tolu o le lau‘ele‘ele o Samaria ‘ua fa‘aopoopoina i Iuta, ‘ia taulia fa‘atasi ma Iuta, ‘ia pei o le nu‘u e tasi, ‘aua ne‘i latou usita‘i i le pule a se tasi, ‘ia na o le ositaulaga sili lava;

39. ‘ou te avatu fo‘i Tulomai ma lona lau‘ele‘ele e fai ma mea alofa mo le malumalu o lo‘o i Ierusalema, e tusa ma le tausaga tatau o le malumalu.

40. ‘Ou te avatu fo‘i i tausaga ta‘itasi uma le sefulu ma le lima afe o sekeli auro, a‘i le tu‘ugā‘oloa o le tupu ‘ou te pule i ai;

41. a o tupe ‘ua totoe, e le‘i tu‘u mai e i latou sa pule i tupe i tausaga ‘ua mavae atu, latou te tu‘u atua mo galuega o le malumalu.

42. Ma le tasi, o sekeli ario e limagaafe sa vavae ‘ese i tupe o le malumalu i tausaga ta‘itasi uma, ‘ia pule i ai o ositaulaga e ‘au‘auna i le malumalu.

43. So se tasi fo‘i e sulufa‘i i le malumalu o lo‘o i Ierusalema ma lona lau‘ele‘ele ‘atoa uma, a o nofo sala o ia i luma o le tupu, so se ala e nofosala ai, e fa‘amāgaloina ai o ia; ‘ia tāofi pea fo‘i e ia o ana mea uma i totonu o lo‘u mālō.

44. “O galuega fo‘i e atiina a‘e ai pe teuina ai le malumalu, e maua ai le taui ai le tu‘ugā‘oloa a le tupu;

45. e togia fo‘i i ‘oloa a le tupu le atiina a‘e o pavali o Ierusalema ma le faiga o ‘olo e si‘omia a‘i; a fa‘apea fo‘i ‘ona fai i le atiina a‘e o pavali i Iuta.”

46. A ‘ua fa‘alogo Ionatana ma le nu‘u i ‘upu ia, ‘ua latou lē talitonu i ai, ‘ua latou lē talia lava, auā ‘ua latou manatua o mea matuā leaga na ia faia ‘iā Isaraelu, na na matuā fa‘atigā ai ‘iā te i latou.

47. Ma ‘ua latou loto malie ‘iā Alesana, auā o ia na mua‘i faia ‘upu o le filemū ‘iā te i latou; sa latou fesoasoani atu fo‘i ‘iā te ia i aso ta‘itasi uma.

48. Ma ‘ua fa‘apotopotoina e le tupu o Alesana le itūtau‘a tele lava ma ‘ua si‘i le tau‘a ‘iā Temetiu.

49. Ma ‘ua tau le tau‘a e tupu e to‘alua ma ‘ua sola le itūtau‘a a Temetiu; ma ‘ua tuliloa i latou e Alesana, ‘ua oso ‘iā te i latou.

50. Ma ‘ua matuā velavela le tau‘a se‘ia o‘o ‘ina goto le lā; ma ‘ua fasia o Temetiu i lea aso.

O le Feagaiga a Tulomaio ma Alesana

51. Ma ‘ua ‘auina atu e Alesana ‘iā Tulomaio, le tupu o Aikupito, o ana savali ma ‘upu nei, o fai atu:

52. “‘Ua ‘ou toe fo‘i mai i lo‘u mālō ma ‘ua ‘ou nofo i le nofoāli‘i o o‘u tamā ma ‘ua ‘ou maua le pule ma ‘ua ‘ou nutipalaina Temetiu, ‘ua ‘ou maua ai lo matou lau‘ele‘ele;

53. ‘ua ‘ou si‘i fo‘i le tau‘a ‘iā te ia ma ‘ua nutipalaina o ia ma lana itūtau‘a e i matou ma ‘ua matou nonofo i le nofoāli‘i o lona mālō;

54. a o lenei, ‘ia osia e i tā‘ua le feagaiga o le fa‘auō, ‘ia e ‘aumai fo‘i o lou afafine e fai ma a‘u avā, ‘ona ‘avea lea a‘u ma tane a lou afafine; ‘ou te avatu ‘iā te oe, e fa‘apea fo‘i ‘iā te ia, ni mea alofa e tusa ma lou mamalu.”

55. Ma ‘ua tali mai e le tupu o Tulomaio, o fai mai, “Manuia le aso na e toe fo‘i atu ai i le lau‘ele‘ele o ou tamā ma ‘ua e nofo ai i lo latou nofoāli‘i!

56. A o lenei o le a ‘ou faia ‘iā te oe mea na e tusi mai ai; a e sau e fa‘afetaia‘i ‘iā te a‘u i Tulomai, ‘ina ‘ia tā fesilafa‘i ai, ‘ona ‘ou osi lea ma oe le feagaiga, e pei ‘ona e fai mai ai.”

57. Ma ‘ua alu o Tulomaio nai Aikupito, o ia ma Keleopatara, lona afafine, ‘ua ō mai i Tulomai i le tausaga e tasi le selau ma le onogafulu ma le lua.

58. Ma ‘ua fa‘afetaia‘i ai ‘iā te ia le tupu o Alesana ma ‘ua tu‘u mai ‘iā te ia lona afafine o Keleopatara; ma ‘ua faia la la fa‘aipoipoga i Tulomai ma le mamalu tele, e tusa ma le tu a tupu.

59. Ma ‘ua tusi mai e le tupu o Alesana ‘iā Ionatana, ‘ia alu atu e fa‘afetaia‘i ‘iā te ia.

60. Ma ‘ua alu fa‘amamalu i Tulomai ma ‘ua feiloa‘i ma tupu e to‘alua ma ‘ua foa‘i atu ‘iā te i lā‘ua le ario e tele ma le auro ma mea alofa ma ‘ua alofagia o ia e i lā‘ua.

61. Ma ‘ua taupulepule isi tagata leaga o Isaraelu e tete‘e atu ‘iā Ionatana, o tagata amio leaga e tu‘ua‘i ‘iā te ia; a ‘ua lē to‘aga i ai le tupu o Alesana.

62. Ma ‘ua poloa‘i ‘ia ‘ave‘eseina ‘ofu o Ionatana, a ‘ia fa‘a‘ofuina i le ‘ie pāuli; ma ‘ua fa‘apea ‘ona latou faia. Ma ‘ua fa‘ati‘eti‘e o ia e le tupu fa‘atasi ma ia;

63. ma ‘ua fai atu i ona ta‘imua, “‘Inā ō ia ‘outou fa‘atasi ma ia i totonu o le ‘a‘ai ma ‘ia tala‘i atu ‘ia ‘aua le tu‘ua‘iina lava ia e se tasi i so se matā‘upu, ‘ia ‘aua fo‘i le fa‘atigā ‘iā te ia e se tasi i so se ala.”

64. A o i latou sa tu‘ua‘i ‘iā te ia, na latou iloa atu na fa‘amamaluina o ia ma fa‘a‘ofuina i le ‘ie pāuli, ‘ona sōsōla ai lea i latou uma lava.

65. Ma ‘ua fa‘amamaluina o ia e le tupu ma ‘ua tusia o ia i ana uō aupito sili ma ‘ua tofia o ia ma ta‘ita‘i ‘au ma soapule i le mālō.

66. Ma ‘ua toe fo‘i mai o Ionatana i Ierusalema ma le filemū ma le fiafia.

O le Fa‘ato‘ilaloga o Apoloni e Ionatana

67. O le tausaga e tasi le selau ma le onogafulu ma le lima, na a‘e ai o Temetiu, le atali‘i o Temetiu, mai Kereta i le lau‘ele‘ele o ona tamā.

68. Ma ‘ua logo i le tupu o Alesana ma ‘ua fa‘anoanoa tele ai ma ‘ua toe fo‘i atu i Anetioka.

69. A o le tupu o Temetiu ‘ua na tofia mōna ta‘ita‘i ‘au o Apoloni sa pule i Koile-Suria ma ‘ua na fa‘apotopotoina le itūtau‘a tele; ma ‘ua tolauapi Iameneia ma ‘ua ‘auina mai le savali ‘iā Ionatana, le ositaulaga sili,

70. o fai mai: “‘Ua na o oe e tete‘e mai ‘iā i matou, a ‘ua ‘avea a‘u ma ulaga ma tauemuga ‘ona ‘ua e fai lau pule i le atumauga ma tete‘e mai ‘iā i matou.

71. O lenei, ‘āfai ‘ua e fa‘atuatua i lou malosi, ‘ia e fa‘aifo ‘iā te i matou i le fanua laulelei, ‘ona tā fa‘atusatusaina lea lo tā malosi, auā o lo‘o fa‘atasi ma a‘u le malosi e fai ai o tau‘a.

72. ‘Inā e fesilisili ia, ‘ona e iloa po o ai a‘u ma nisi uma o fesoasoani mai ‘iā te a‘u, ‘ua latou fai mai fo‘i e lē mafai ‘ona tu so ‘outou vae i o matou luma, auā e fa‘alua ‘ona tulia ou tua‘ā i o latou lava lau‘ele‘ele.

73. A o lenei, pe fa‘apefea ‘ona e talitali le ‘au e ti‘eti‘e i solofanua ma le itūtau‘a matuā tele i le fanua ‘ua lē o i ai se ma‘a po o se papa po o se ala e sola ‘ese ai?”

74. ‘Ua fa‘alogo o Ionatana i ‘upu a Apoloni, ‘ona tigā lea lona loto; ma ‘ua na filifili o tagata tau e sefulu ni afe ma ‘ua ulufafo nai Ierusalema ma ‘ua fa‘afetaia‘i ‘iā te ia lona uso o Simona e fesoasoani mai ‘iā te ia;

75. ma ‘ua latou tolauapi i luma o Iopa, a ‘ua punitia faitoto‘a o le ‘a‘ai ‘iā te ia, auā sa i ai i Iopa le leoleoga a Apoloni; ‘ona ia vagavagai lea i le ‘a‘ai.

76. Ma ‘ua mata‘utuia i latou ‘ua i le ‘a‘ai ma ‘ua latou tō mai faitoto‘a ‘iā te ia ma ‘ua maua Iopa e Ionatana.

77. Ma ‘ua logo ‘iā Apoloni, ‘ona ia fa‘ala‘ei‘au lea le ‘au e ti‘eti‘e i solofanua e tolugaafe ma le itūtau‘a tele.

78. Ma ‘ua sāvavali atu i Asetota e peiseaī o le a alu ‘ese o ia, a ‘ua fa‘alatalata atu i le fanua laulelei, auā sa i ai lana ‘au ti‘eti‘e i solofanua e to‘atele lava, sa ia fa‘alagolago ‘iā te i latou. Ma ‘ua mulimuli atu ‘iā te ia o Ionatana i Asetota ma ‘ua latou tau le tau‘a.

79. ‘Ae na tu‘ua fa‘ananā e Apoloni o tagata ti‘eti‘e i solofanua e tasi le afe i le togālauapi, e mulimuli ‘iā te i latou.

80. Ma ‘ua iloa e Ionatana ‘ua i ai ni ‘au na lalafi i ona tua. Ma ‘ua latou ta‘amilomilo i lona togālauapi, ma ‘ua latou velo ni tao i le nu‘u, e āfua mai i le taeao e o‘o i le afiafi.

81. A o le nu‘u ‘ua tutū lava i latou e pei ‘ona poloa‘i mai ai e Ionatana; ma ‘ua tauāu ‘ina vaivai a latou solofanua.

82. Ma ‘ua fa‘aoso e Simona lana itūtau‘a ma ‘ua ia oso i le vaega ‘au, auā sa vaivai a latou solofanua; ma ‘ua nutipalaina i latou e ia ma ‘ua latou sōsōla.

83. O i latou fo‘i na ta‘ape‘ape i le fanua laulelei, na latou sōsōla i Asetota, ‘ua latou ulu atu ai i le malumalu o Petetakona, lo latou tupua, ‘ina ‘ia sulufa‘i ai i latou.

84. Ma ‘ua susunu e Ionatana o Asetota ma ‘a‘ai sa felāta‘i ai ma ‘ua na maua lo latou vete; ma ‘ua susunu fo‘i i le afi le malumalu o Petetakona ‘atoa ma i latou uma na sōsōla i ai.

85. Ma ‘ua tali ‘atoa le valu afe o tane o ē na fasia i le pelu ‘atoa ma ē na susunuina.

86. Ma ‘ua alu o Ionatana nai lea mea, ‘ua tolauapi i luma o Asekelona ma ‘ua latou ulufafo nai le ‘a‘ai i ona luma ma le fa‘aaloalo tele ‘iā te ia.

87. Ma ‘ua toe fo‘i mai i Ierusalema o Ionatana mōna tagata, o ‘iā te i latou o le vete e tele lava.

88. Ma ‘ua o‘o ‘ina fa‘alogo e le tupu o Alesana i mea ia, ‘ua loto ai o ia e fa‘amamalu atili ‘iā Ionatana.

89. ma ‘ua na ‘auina mai ‘iā te ia le fa‘amau auro, e pei ‘ona masani ‘ona ‘auina atu i ‘āiga o le tupu ma ‘ua foa‘i mai ‘iā te ia o Ekerona ma lona lau‘ele‘ele uma e fai mōna.