Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16

Feagaiga Tuai

Feagaiga Fou

1 Makapaio 8 O LE TUSI PA'IA - Ekalesia Katoliko Roma (RSCB)

O le Malosi o Tagata Roma

1. Ma ‘ua logo a‘e e Iuta i tagata Roma, fai mai e malolosi i latou i tau‘a ma ‘ua latou ‘amana‘ia mea uma e tagi atu ai ‘iā te i latou; ma ‘ua fa‘auō i nu‘u uma e o‘o atu ‘iā te i latou ma ‘ua latou malolosi i le tau‘a.

2. Ma ‘ua na fa‘alogo i o latou tau‘a ma mea e ta‘uleleia ai ‘ua latou faia i Kalatia, ‘ua latou mauaina ma ‘ua fai ma ē avatu taulaga;

3. ma mea tetele na latou faia i le lau‘ele‘ele o Sepania ma ‘ua latou pule i ‘eliga ario ma ‘eliga auro ‘ua i ai ma ‘ua latou maua le lau‘ele‘ele uma i la latou faipoto ma lo latou ‘onosa‘i;

4. a o nu‘u ‘ua matuā mamao ma i latou ma tupu fo‘i ‘ua o‘o atu ‘iā te i latou ai tulu‘iga o le lalolagi, ‘ua latou nutipalaina ma ‘ua latou tāina i le matuā tu‘imomomo; a ‘ua avatu taulaga ‘iā te i latou e isi tupu i tausaga uma.

5. A o Filipo ma Pereseo, o tupu o tagata Maketonia, ma nisi ‘ua si‘i le tau‘a ‘iā te i latou, ‘ua nutipalaina e i latou i le tau‘a ma ‘ua latou mauaina;

6. o Atioko le sili fo‘i, o le tupu o Asia, na si‘i le tau‘a ‘iā te i latou, o ‘iā te ia o elefane e tasi le selau ma le luasefulu ma le ‘au e ti‘eti‘e i solofanua, ma nofoa fa‘ata‘avalevale ma le itūtau‘a e matuā tele lava, ‘ua nutipalaina e i latou;

7. ma ‘ua latou pu‘e olaina o ia ma ‘ua latou togitū ‘iā te ia ma ē soloa‘i ane ‘iā te ia, e avatu ‘iā te i latou le taulaga tele ma avatu ni tagata fa‘afo‘iita ma le vaega o le lau‘ele‘ele;

8. o fanua o tagata Initia ma tagata Metai ma tagata Luti ma le vaega o ona itūmālō e aupito lelei, ‘ua latou talia mai ‘iā te ia ma ‘ua latou avatua i le tupu o Eumene.

9. Ma ‘ua manatu o tagata o le nu‘u o Eleni e oso atu ma fa‘auma ‘iā te i latou ma ‘ua logo le tala ‘iā te i latou.

10. Ma ‘ua latou ‘auina atu i ai le ta‘ita‘i ‘au e to‘atasi, ma ‘ua tau le tau‘a ma i latou ma ‘ua fasia e le itutau‘a o tagata Roma nisi e to‘atele o i le itutau‘a o tagata Eleni ma ‘ua ‘avea fa‘atagataotau‘a a latou avā ma a latou fānau ma ‘ua vetea i latou, ma ‘ua maua lo latou lau‘ele‘ele ma ‘ua lepetia o latou ‘olo ma ‘ua fa‘apologaina i latou e o‘o mai i nei ona po.

11. A o isi mālō ma atumotu na tete‘e atu ‘iā te i latou, ‘ua latou nutipalaina ma ‘ua latou pule i ai;

12. a o a latou uō ma ē fa‘alagolago ‘iā te i latou, ‘ua latou tausia fa‘auō; ma ‘ua latou maua o mālō ‘ua felāta‘i ma mālō ‘ua mamao, auā sa matata‘u ‘iā te i latou tagata uma sa logo i ai lo latou igoa.

13. A o ē sa latou fesoasoani i ai ‘ia ‘avea ma tupu, sa ‘avea ma tupu; ‘ae sa latou fa‘apa‘ū o tupu sa latou loto e fa‘apa‘ū; ma ‘ua matuā fa‘amamaluina i latou;

14. ma ‘ua leai se tasi o i latou uma ia sa fa‘apaleina pe fa‘a‘ofuina i le ‘ie pāuli ‘ina ‘ia mamalu a‘i o ia;

15. ma ‘ua fai lo latou fale fono, ‘ua fono ai i aso uma o tagata e to‘atolu selau ma le to‘alua, o felafolafoa‘i pea i mea tau le nu‘u, ‘ina ‘ia sa‘o lelei la latou faiga;

16. ma ‘ua latou tofia i tausaga ta‘itasi uma le tagata e to‘atasi e fa‘amasino ‘iā te i latou ma pule i lo latou lau‘ele‘ele uma ma ‘ua latou usita‘i uma lava i le to‘atasi ma ‘ua leai se matau‘a po o se losilosivale ‘iā te i latou.

‘Ua Osia le Feagai e Tagata Iutaia ma tagata Roma

17. Ma ‘ua tofia e Iuta o Eupolemo, le atali‘i o Ioane, o le atali‘i ia o Iakopo, ma Iasone le atali‘i o Eleasaro; ma ‘ua ‘auina atu i lā‘ua i Roma e osi ma i latou le feagaiga o le feso‘ota‘iga ma le fa‘auō.

18. ‘Ina ‘ia latou ‘ave‘ese fo‘i ‘iā te i latou le amo a tagata Eleni, auā ‘ua iloa ‘ua latou taufa‘apologaina le mālō o Isaraelu.

19. Ma ‘ua la ō atu i Roma, o le malaga mamao lava ma ‘ua la ulu atu i le fale fono ma ‘ua la fai atu,

20. “O Iuta Makapaio mōna uso ma le nu‘u o tagata Iutaia, ‘ua latou ‘auina mai i mā‘ua ‘iā te ‘outou e osi ma ‘outou le feagaiga o le feso‘ota‘iga ma le fealofani ma ‘ia tusia i matou o ‘outou fesoasoani ma a ‘outou uō.”

21. Ma ‘ua lelei lenā ‘upu i manatu o tagata Roma.

22. A o lenei le tali ‘ua latou tusia i papa ‘apamemea ma ‘ua latou ‘auina atu i Ierusalema, ‘ia ‘avea ai ‘iā te i latou ma fa‘amanatuga o le fealofani ma le feso‘ota‘iga:

23. “‘Ia fa‘amanuiaina tagata Roma ma le nu‘u o tagata Iutaia i le sami ma le lau‘ele‘ele, i le fa‘avavau; ‘ia mamao fo‘i ma i latou le pelu ma le fili.

24. ‘Āfai ‘ua mua‘i tau le tau‘a e tagata Roma po o mālō uma ‘ua latou feso‘ota‘i ai, i la latou pule‘aga ‘atoa,

25. ‘ona fesoasoani mai ai lea le nu‘u o tagata Iutaia, pe a o‘o ‘ina mafaia lea ma le loto ‘ato‘atoa.

26. A o ē tau i ai le tau‘a, latou te lē foa‘i atu i ai pe avatu i ai se saito, po o ni ‘au‘upega po o se tupe po o ni va‘a, o le loto lea o tagata Roma; latou te tausi fo‘i i la latou feagaiga, e aunoa ma se taui e maua mai ai.

27. “E fa‘apea fo‘i, ‘āfai ‘ua mua‘i tau le tau‘a e le nu‘u o tagata Iutaia, ‘ona fesoasoani atu lea o tagata Roma ma le loto ‘atoa, pe a o‘o ‘ina mafaia lea;

28. e lē tu‘uina atu fo‘i i le itūtau‘a e fesoasoani i le fili se saito, po o ni ‘au‘upega, po o se tupe po o ni va‘a, o le loto lea o tagata Roma; latou te tausi fo‘i i la latou feagaiga ma le fa‘amaoni.

29. O matā‘upu ia o le feagaiga a tagata Roma ma le nu‘u o tagata Iutaia.

30. ‘Āfai fo‘i e fia fa‘aopoopo pe tō‘ese se mea i matā‘upu ia e itū e lua, latou te faia e tusa ma se mea latou te loto i ai; o mea uma fo‘i latou te fa‘aopoopoina pe tō‘esea i ai, e talia lava.

31. “A o mea na fa‘aleagaina ai i latou e le tupu o Temetiu, ‘ua matou tusi atu ‘iā te ia, o fa‘apea atu: Po o le a le mea na e fa‘amamafa ai lau amo i luga o tagata Iutaia, o a matou uō ma o matou fesoasoani?

32. O lenei, ‘āfai latou te toe ō mai ai ‘iā i matou, matou te talia a latou tagi e fa‘asaga ‘iā te oe, ‘ona matou tau lea le tau‘a ma oe i le ‘ele‘ele ‘atoa ma le sami.’”