1. ‘Ua fa‘ato‘ilaloina o Tariu, o le tupu o tagata Peresia ma tagata Meati, e Alesana, le atali‘i o Filipo, o le tagata Maketonia ‘ua tupu mai i le fanua o Kitimo, sa lua‘i ‘avea o ia ma tupu o tagata Eleni.
2. ‘Ona ia tau ai lea ni tau‘a i aso e tele, ‘ua na maua ai o ‘a‘ai nofo ‘olo uma ma ‘ua fasia e ia o tupu o le lau‘ele‘ele.
3. Ma ‘ua o‘o atu o ia i tulu‘iga o le lau‘ele‘ele ma ‘ua maua o vete a nu‘u e tele lava ma ‘ua fa‘alologo le lalolagi i ona luma.
4. Ma ‘ua fa‘ala‘ei‘au, o le ‘au matuā malosi lava; ma ‘ua fa‘aeaina lona loto ma ‘ua fa‘amaualugaina;
5. ma ‘ua maua e ia o le lau‘ele‘ele o nu‘u ‘ese ma o latou tupu, ‘ua latou fai lafoga ‘iā te ia.
6. ‘Ona o‘o lea ‘ina pa‘ū o ia i lona moega ma ‘ua iloa ai o le a oti o ia.
7. Ma ‘ua vala‘au mai i tamaali‘i o lona ‘au‘āiga, sa tausia fa‘atasi ma ia talu mai i lo latou itiiti ma ‘ua vaevae atu ‘iā te i latou lona mālō, a o ola pea o ia.
8. Ma ‘ua fai o Alesana ma tupu i tausaga e sefulu lua, ‘ona oti ai lea;
9. ma ‘ua ‘avea o ona atali‘i ma tupu, e ta‘ito‘atasi i lona lau‘ele‘ele;
10. ma ‘ua fa‘ae‘e e i latou uma ni paleali‘i ‘iā te i latou lava, ‘ina ‘ua oti o ia, e fa‘apea ma o latou atali‘i ‘ua mulimuli mai ‘iā te i latou i tausaga e tele; ma ‘ua fa‘atuputeleina o mea leaga i le lalolagi.
11. ‘Ua tupu mai ‘iā te i latou le pogati agasala, o Atioko Epifano le mamalu, o le atali‘i o le tupu o Atioko, na lua‘i ‘avea ma fa‘afo‘i ita i Roma; ‘ua fai o ia ma tupu i le tausaga e selau ma le tolugafulu ma le fitu o le nofoa‘iga a tagata Eleni.
12. I ona po ia na tūtūla‘i i Isaraelu o le fānau amio leaga ma ‘ua latou fa‘a‘ole‘ole i ni isi e to‘atele, o fai atu, “‘Inā tatou ō ia ma osi a tatou feagaiga ma nu‘u ‘ua vagavagai ‘iā te i tatou, auā e āfua mai i lo tatou tēte‘a‘ese ma i latou, ‘ua maua i tatou i mea leaga e tele.”
13. Ma ‘ua talileleia lenā ‘upu e i latou.
14. Ma ‘ua ofo ni isi o le nu‘u latou te ō atu i le tupu ma ‘ua na tu‘uina mai ‘iā te i latou le pule e tausi i sauniga a nu‘u ‘ese.
15. Ma ‘ua latou fau i Ierusalema se fale e fai ai ta‘aloga a tama talavou, e tusa ma tulafono o nu‘u ‘ese,
16. ma ‘ua lē tausia le peritome e i latou ma ‘ua mavae ‘ese ai i latou i le feagaiga pa‘ia ma ‘ua fa‘atasia i latou ma nu‘u ‘ese ma ‘ua fa‘atauina i latou ‘ia fai le amio leaga.
17. Ma ‘ua manatu o Atioko ‘ua mausalī lona mālō, ‘ona ia taumafai ai lea ‘ona ia pule i Aikupito, ‘ina ‘ia fai ai o ia ma tupu i mālō ia e lua.
18. Ma ‘ua ulu atu i le ‘ele‘ele o Aikupito ma le ‘au e to‘atele anoanoa‘i, ma nofoa ta‘avalevale ma elefane ma le ‘au ti‘eti‘e i solofanua ma le fuāva‘a e matuā tele lava;
19. ma ‘ua si‘i tau‘a ‘iā Tulomaio le tupu o Aikupito, ma ‘ua mata‘u o Tulomaio ‘iā te ia, ma ‘ua sola ‘ese o ia ma ‘ua pa‘u‘ū ai o ni isi e to‘atele o manunu‘a.
20. Ma ‘ua na maua o ‘a‘ai nofo ‘olo i le lau‘ele‘ele o Aikupito ma ‘ua na talia o vete o le lau‘ele‘ele o Aikupito.
21. ‘Ua taia Aikupito e Atioko i le tausaga e selau ma le fagafulu ma le tolu, ‘ona ia fo‘i mai ai lea ma ‘ua alu a‘e ‘iā Isaraelu.
22. Ma ‘ua alu a‘e i Ierusalema ma le ‘au e to‘atele lava.
23. Ma ‘ua ulu atu ma le fa‘amaualuga i totonu o le mea pa‘ia; ma ‘ua ‘ave e ia le fatafaitaulaga auro, ma le tu‘ugāmolī fa‘amalamalama mōna ipu uma lava, ma le la‘o‘ai e laulauina ai areto ma ona ipu e asu a‘i, ma tanoa ma ipu auro e fa‘amū ai mea manogi, ma le ‘ie puipui, ma paleali‘i ma le teuga auro sa i le matafale o le malumalu; ma ‘ua nutipalaina mea uma.
24. Ma ‘ua na ‘avea le ario ma le auro ma ipu tāua; ‘ua na ‘avea fo‘i o ‘oloa lilo na maua i mea nanā, ma ‘ua tago i mea uma ma alu i lona nu‘u.
25. Ma ‘ua na fasia o tagata ma ‘ua tautala o ia ma le matuā fa‘asausili.
26. Ma ‘ua tele ai le tagitu‘i i Isaraeluma lo latou lau‘ele‘ele uma;
27. ma ‘ua fētāgisi o ta‘imua ma toeaina;o teine ma taulele‘a ‘ua lailoa i latouma ‘ua mavae le lālelei o fafine.
28. ‘Ua tagiauē o tane uma lavama ‘ua feoi o ē nofotane i o latou afeafe.
29. Ma ‘ua fa‘agae‘etia le lau‘ele‘ele ‘ona o ē sa nonofo ai,ma ‘ua ufitia i le māsiasi le ‘āiga ‘atoa o Iakopo.
30. ‘Ua mavae atu aso e tusa ma tausaga e lua, ‘ona ‘auina mai lea e le tupu i ‘a‘ai o Iuta le tagata e pule i lafoga ma ‘ua alu ‘ae i Ierusalema ma le motu o tagata e to‘atele.
31. Ma ‘ua tautala mai ‘iā te i latou ma le fa‘aoleole i ‘upu o le filemū; ma ‘ua latou talitonu ‘iā te ia.
32. Ma ‘ua oso fa‘afuase‘i i le ‘a‘ai, ma ‘ua na taia ma tu‘imomomo leaga le ‘a‘ai ma ‘ua na fasia tagata e to‘atele o Isaraelu.
33. Ma ‘ua na ‘avea o vete o le ‘a‘ai ma susunu le ‘a‘ai i le afi; ma ‘ua na lepeti ona fale ma pavali ‘ua si‘omia ai;
34. ma ‘ua latou ‘avea o fafine fa‘atagata o tau‘a ma fai mā latou le fānau ‘atoa ma lafu manu.
35. Ma ‘ua latou ati a‘e le ‘a‘ai o Tavita i le pavali tele ma le malosi ma ‘olo malolosi, ma ‘ua ‘avea ma ‘a‘ai nofo ‘olo ‘iā te i latou,
36. ma ‘ua latou fa‘anofo i ai le nu‘u agasala, o tagata amio leaga, ‘ua fa‘amausalīina ai i latou; ma ‘ua avane i ai a latou ‘au‘upega ma a latou mea e ‘ai; ma ‘ua latou fa‘aputu le vete o Ierusalema,
37. ma ‘ua latou tu‘uina atu i lea mea; ma ‘ua ‘avea i latou ma matuā mailei.
38. Ma ‘ua ‘avea ma lamataga i le malumalu,ma fili leaga fo‘i ‘iā Isaraelu;
39. ma ‘ua latou sasa‘a solo le totoo ē le sala i tafatafa o le malumaluma ‘ua latou fa‘aleagaina le mea pa‘ia.
40. Ma ‘ua sōsōla ē o nonofo i Ierusalema ‘ona o i latou,‘ua ‘avea Ierusalema ma mea e nonofo ai tagata ‘ese,‘ua ‘avea fo‘i ma fanua ‘ese i lana lava fānau,ma ‘ua tu‘ua o ia e ana lava tama.
41. O lona malumalu ‘ua fa‘agaogaoina e pei o le fanua tu‘ufua;o ona aso pa‘ia ‘ua liua i fa‘anoanoaga,o ona sapati ‘ua fa‘alumaina,‘ua lē toe i ai lava sona mamalu.
42. Na fa‘atuputeleina lona gao e tusa ma lona ulua‘i mamalu,ma ‘ua liua i le fa‘anoanoaga o lona tulaga sili.
43. Ma ‘ua tusi atu o le tupu o Atioko i lona mālō ‘atoa, ‘ina ‘ia tasi lava le nu‘u uma ma ‘ia tu‘ulafoa‘i e tagata ta‘itasi a latou lava tulafono.
44. Ma ‘ua ‘ana‘ana i ai o nu‘u ‘ese uma, e tusa ma le ‘upu a le tupu o Atioko;
45. ma ‘ua ‘ana‘ana fo‘i o ni isi e to‘atele o Isaraelu i le nofopologa ‘iā te ia, ma ‘ua latou faitaulaga i tupua ma ‘ua latou solia le sapati.
46. Ma ‘ua ‘auina atu e le tupu ana savali ma ni tusi i Ierusalema ma ‘a‘ai uma o Iuta, ‘ina ‘ia latou ‘ana‘ana i tulafono a nu‘u ‘ese o le lau‘ele‘ele;
47. ma ‘ia latou vavao ‘ia ‘aua le osia i le malumalu o le Ali‘i ni taulaga mū ma ni taulaga ma ni togiola.
48. Ma ‘ia latou vavao le fa‘amamaluga o le sapati ma aso pa‘ia;
49. ma ‘ua poloa‘i ‘ia fa‘aleagaina le mea pa‘ia ma le nu‘u pa‘ia o Isaraelu;
50. ma ‘ua poloa‘i ‘ia fa‘atūina ni fatafaitaulaga ma ni malumalu ma ni tupua ma ‘ia osia taulaga i ‘a‘ano o pua‘a ma manu e sā;
51. ma ‘ia ‘aua le fa‘aperitomeina a latou tama tane, ma ‘ia fa‘aleaga o latou agaga i mea ‘ele‘elea uma ma mea ‘inosia, ‘ina ‘ia galo a‘i ‘iā te i latou le tulafono ma ‘ia latou talaina o sauniga uma lava i le Ali‘i;
52. a ‘ia oti i latou uma e lē ‘ana‘ana i le ‘upu a le tupu o Atioko.
53. O mea uma ia na ia tusi atu ai i lona mālō ‘atoa ma ‘ua na tofia i le nu‘u o ta‘imua latou te tauānau atu ai i le faia o mea ia.
54. Ma ‘ua latou poloa‘i atu i ‘a‘ai o Iuta ‘ia latou osi taulaga i tupua.
55. Ma ‘ua fa‘aopoopoina ‘iā te i latou o ni isi e to‘atele o le nu‘u, o ē na latou tu‘ulafoa‘iina le tulafono a le Ali‘i; ma ‘ua latou faia le mea leaga i le lau‘ele‘ele;
56. ma ‘ua latou tutuli le nu‘u o Isaraelu i ana ma lafitaga lilo.
57. O le aso sefulu ma le lima o le masina o Kaseleu, o le tausaga e tasi le selau ma le fagafulu ma le lima, na fa‘atūina ai e le tupu o Atioko le tupua ‘inosia e fa‘atafunaina a‘i i luga o le fatafaitaulaga o le Atua; ma ‘ua latou atiina a‘e solo ni fatafaitaulaga i ‘a‘ai uma o Iuta;
58. ma ‘ua latou fa‘amū le mea manogi ma osi taulaga i luma o faitoto‘a o fale, ‘atoa ma auala tele.
59. O tusi fo‘i o le tulafono a le Atua ‘ua latou saeia ma susunu i le afi;
60. ‘ai se tasi fo‘i e maua i ai o tusi o le feagaiga a le Ali‘i, po o se tasi fo‘i na te tausia le tulafono a le Ali‘i, sa latou fasioti ‘iā te ia e tusa ma le poloa‘iga a le tupu.
61. O la latou pule sauā sa latou fa‘apea ai i tagata sa maua i ‘a‘ai o Isaraelu i lea masina ma lea masina.
62. A o le aso luasefulu ma le lima o le masina, sa latou ositaulaga ai i le fata sa fa‘atūina i luga o le fatafaitaulaga o le malumalu.
63. O fafine fo‘i sa fa‘aperitomeina a latou tama, sa fasiotia i latou e tusa ma le poloa‘i a le tupu o Atioko;
64. sa fa‘atautau o tamaiti i o latou ua i o latou fale uma, sa latou fasioti fo‘i o ē sa fa‘aperitomeina ‘iā te i latou.
65. A o ni isi e to‘atele o le nu‘u Isaraelu ‘ua tonu i o latou loto, latou te lē ‘a‘ai i mea e sā, ma ‘ua fa‘asili e i latou le oti i le fa‘aleagaina i latou i mea e ‘ai e sā;
66. ma ‘ua latou mumusu e soli le tulafono pa‘ia a le Atua ma ‘ua fasiotia ai i latou.
67. Ma ‘ua matuā tele lava le ita o tagata Suria i le nu‘u.