1. ‘Ae ‘ua logo ‘iā Temetiu ‘ua fasia Nikanora ma lana ‘au i le tau‘a, ‘ona tonu lea ‘iā te ia e toe ‘auina atu o Pakite ma Alekimo i Iuta ma tu‘u atu i ai le vaega taumatau o lana itūtau‘a.
2. Ma ‘ua latou ō atu i le ala e tau atu i Kilikala ma ‘ua tolauapi i Mesalota i le fanua o tagata Arepela; ma ‘ua latou maua le ‘a‘ai ma ‘ua latou fasiotia ai ni tagata e to‘atele.
3. O le ulua‘i masina o le tausaga e tasi le selau ma le limagafulu ma le lua, ‘ua latou tolauapi ai i luma o Ierusalema;
4. ‘ona latou tula‘i lea ma ‘ua ō atu i Perea, o fitafita e luasefulu ni afe ma le lua o afe o ē ti‘eti‘e i solofanua.
5. A o Iuta sa tolauapi i Laisa, o fa‘atasi ma ia o fitafita filifilia e tolugaafe.
6. Ma ‘ua latou iloa atu le tele o le itūtau‘a, ‘ua to‘atele anoanoa‘i, ‘ona latou matuā fefefe lea; ma ‘ua sola ‘ese ni isi e to‘atele mai le togālauapi ma ‘ua totoe ai na o le valu selau o tagata.
7. Ma ‘ua iloa e Iuta ‘ua tausōsōla lana itūtau‘a, ma ‘ua vave na‘uā le tau‘a, ‘ona momomo lea lona loto ‘ina ‘ua lē avanoa sona itūlā e fa‘apotopotoina ai i latou, ‘ona lailoa ai lea o ia.
8. A ‘ua fai atu ‘iā te i latou ‘ua totoe, “‘Ia tatou tūtūla‘i ma ō atu i o tatou fili, pe mafai ‘ona tatou tau le tau‘a ma i latou.”
9. Ma ‘ua latou lapata‘i ‘iā te ia, o fa‘apea mai, “Tatou te lē mafaia lava, a ‘ia tatou fa‘asao lo tatou ola i le aso nei ma fo‘i atu i o tatou uso, ‘ona tatou tau lea le tau‘a ma i latou; ‘ae ‘ua to‘aitiiti na‘uā i tatou nei.”
10. Ma ‘ua fai atu o Iuta, “‘Aua lava ne‘i tatou fai lea mea ma sola ‘ese ‘iā te i latou; ‘āfai lava ‘ua lata lo tatou itū aso, ‘ia tatou oti ma le loto malosi ‘ona o tatou uso, ‘ae ‘aua ne‘i tatou fa‘aleagaina lo tatou igoa lelei.”
11. Ma ‘ua sau le itūtau‘a nai le togālauapi, ‘ua fa‘afetaia‘i ‘iā te i latou; sa vaeluaina le ‘au e ti‘eti‘e i solofanua; sa sāvavali le ‘au a ma‘atā ma le ‘au fanafana i ū i luma o le itūtau‘a, a o le muā‘au o i latou uma e aupito malolosi;
12. sa i ai Pakite i le itū taumatau o le ‘au; ‘ona fa‘alatalata mai ai lea le vaega ‘au mai itū e lua ma ‘ua latou ili a latou pū.
13. ‘Ua ili fo‘i a latou pū e i latou ‘ua i le itūtau‘a a Iuta ma ‘ua gatete le lau‘ele‘ele i le vāvāō o itūtau‘a ma ‘ua tau le tau‘a e āfua mai i le taeao e o‘o i le afiafi.
14. Ma ‘ua iloa atu e Iuta e sili ‘ona malosi le vaega ‘au a Pakite i le itū taumatau, ‘ona fa‘apotopotoina lea fa‘atasi ma ‘iā i latou ‘ua lotomau;
15. ma ‘ua tu‘imomomoina e i latou le ‘au i le itū taumatau ma ‘ua na tuliloaina i latou e o‘o atu i le mauga o Asetota.
16. Ma ‘ua iloa e i latou ‘ua i le itū tauagavale ‘ua lafoia le ‘au i le itū taumatau, ‘ona latou mulimuli atu lea mai tua ‘iā Iuta ma i latou sa fa‘atasi ma ia.
17. ‘Ona velavela lea le tau‘a ma ‘ua fasia i le pelu ni isi e to‘atele i lea itūtau‘a ma lea itūtau‘a.
18. Ma ‘ua fasia o Iuta, ‘ona sōsōla ai lea o ona tagata.
19. A o Ionatana ma Simona ‘ua la ‘ave o Iuta lo la uso ma ‘ua latou teu lona tino i le tu‘ugamau o latou tamā i le ‘a‘ai o Motei.
20. Ma ‘ua fētāgisi uma le nu‘u o Isaraelu ‘ona o ia i le tagi lotulotu ma ‘ua fa‘anoanoa i latou i aso e tele;
21. ma sa latou fai ane:“Pe na pa‘ū fa‘apefea le toa,lē sa na fa‘aolaina le nu‘u o Isaraelu?”
22. A o toe o ‘upu i tau‘a o Iuta ma mea e ta‘uleleia a‘i na na faia, ma lona mamalu, e lē o tusia ia, auā na matuā tele lava.
23. ‘Ua oti o Iuta, ‘ona o‘o lea ‘ina tūtūla‘i o ē amio leaga i le lau‘ele‘ele uma o Isaraelu ma ‘ua tutū i latou uma ‘ua fai amio leaga.
24. O ona po ia na tupu ai le oge matuā tele lava, ma ‘ua ‘au ai ‘iā Pakite le lau‘ele‘ele uma ‘atoa mōna tagata.
25. Ma ‘ua filifilia e Pakite ni tagata amio leaga ma ‘ua na tofia i latou e pule i le nu‘u;
26. ma ‘ua latou su‘esu‘e ma sā‘ili‘ili i uō a Iuta, ma ‘ua latou molia ‘iā Pakita, sa ia taui ma sui ‘iā te i latou ma tauemu ‘iā te i latou.
27. Ma ‘ua o‘o le puapuagā tele ‘iā Isaraelu, e leai sona tusa talu mai i le aso na lē toe iloa ai se perofeta ‘iā Isaraelu.
28. Ma ‘ua fa‘apotopoto mai o uō uma a Iuta ma ‘ua latou fai atu ‘iā Ionatana,
29. “Talu ‘ona oti o Iuta lou uso, ‘ua leai se tagata e tusa ma ia, na te oso atu i o tatou fili, o Pakite ma i latou ‘ua ‘ino‘ino i lo tatou nu‘u.
30. A o lenei ‘ua matou filifilia oe i le aso nei e ‘avea mo matou ta‘imua e sui ‘iā te ia ma ta‘ita‘i fo‘i i matou i lo tatou tau‘a.”
31. Ma ‘ua pule Ionatana i aso ia ma ‘ua tula‘i e sui ‘iā Iuta lona uso.
32. Ma ‘ua logo lea mea ‘iā Pakite ma ‘ua fia fasioti ‘iā te ia.
33. Ma ‘ua logo lea mea ‘iā Ionatana ma Simona lona uso ma i latou uma sa fa‘atasi ma ia, ‘ona latou sōsōla lea i le fanua tu‘ufua o Tikoa ma ‘ua latou nonofo i le ‘auvai o le vailepa o Asefara.
34. Ma ‘ua logo lea mea ‘iā Pakite ma ‘ua na sopo‘ia le Ioritana i le aso sapati, o ia ma lana itūtau‘a uma.
35. Ma ‘ua ‘auina atu e Ionatana lona uso e ta‘ita‘i i le nu‘u ma ‘ua ia tagi atu i tagata Napata, o ana uō, i le fia tu‘u i ai a latou meafale sa matuā tele lava.
36. Ma ‘ua oso le fānauga a Iameri mai Metepa, ma ‘ua latou pupu‘e ‘iā Ioane ma mea uma ‘ua ‘iā te ia, ‘ua ‘ave mā latou, ‘ona latou ō lea.
37. ‘Ua mavae atu mea ia, ‘ua talaina mai ‘iā Ionatana ma Simona lona uso, “O lo‘o fai le fa‘aipoipoga tele e le fānau a Iameri: ma ‘ua latou molia mai Metepa ma le mamalu tele, o le fa‘ato‘ānofotane, o le afafine ia o le tasi o ta‘imua sili o Kanana.”
38. Ma ‘ua la manatua le toto o Ioane lo la uso, ‘ona latou ō a‘e lea ma ‘ua latou lalafi i le lafitaga o le mauga.
39. Ma ‘ua tepa a‘e o latou mata ma ‘ua latou iloa atu, fa‘auta o le pisapisaō tele ma le motu o tagata e to‘atele; ma ‘ua savali atu le fa‘ato‘āfaiavā mana uō mōna uso e fa‘afetaia‘i ‘iā te i latou ma ni topa ma le fa‘aili ma le ‘au‘upega tele lava.
40. Ma ‘ua latou feosofi i ai nai le mea lilo ma ‘ua latou fasiotia ma ‘ua oti i le pelu nisi e to‘atele ma ‘ua sōsōla i le atumauga o ē ‘ua totoe; ‘ona maua lea lo latou vete uma lava.
41. Ma ‘ua liua le fa‘aipoipoga i le fa‘anoanoa ma ‘ua liu auega le leo fo‘i ia o le fa‘aili.
42. Ma ‘ua la taui ma sui mo le toto o lo la uso ma ‘ua la fo‘i mai i le ‘auvai o le Ioritana.
43. Ma ‘ua logo ‘iā Pakite ma ‘ua sau i le aso sapati i le ‘auvai o le Ioritana ma le itūtau‘a e to‘atele.
44. Ma ‘ua fai atu Ionatana i ona tagata, “‘Ia tatou tūtūla‘i ma tau ma o tatou fili, auā e ‘ese le aso nei, ‘ese aso ‘ua mavae atu;
45. auā o lenei, o lo‘o i ai le tau‘a i o tatou luma, a o lea itū ma lea itū e i ai le vai o Ioritana ma le ‘auvai, o le vai lepa ma le vaomatua; e leai se ala e liliu atu ai.
46. O lenei, ‘ia ‘outou ‘alalaga atu i le lagi, ‘ina ‘ia lavea‘iina ai ‘outou a‘i lima o ‘outou fili.” Ma ‘ua tau le tau‘a.
47. Ma ‘ua fa‘aloaloa e Ionatana lona lima e fasi ‘iā Pakite ma ‘ua solomuli Pakite a‘i ona luma.
48. Ma ‘ua feosofi o Ionatana ma ē sa fa‘atasi ma ia i le Ioritana ma ‘ua latou fe‘ausi i le isi itūvai e fa‘afetaia‘i ‘iā te i latou.
49. Ma ‘ua fasia i lea aso o tagata e tasi le afe o le ‘au a Pakite. ‘Ona latou fo‘i atu lea i Ierusalema.
50. Ma ‘ua latou ati a‘e o ‘a‘ai nofo‘olo i Iuta, o le ‘olo e lata ane i Ieriko ma Emau ma Peteorana ma Peteli ma Tamenata ma Farato ma Tofo ma ‘aupā vali maualuluga ma faitoto‘a ma fa‘amau;
51. ma ‘ua tu‘u i ai leoleoga e tau le tau‘a ma Isaraelu.
52. Ma ‘ua ati a‘e le ‘olo i le ‘a‘ai o Petesura, ma Kasara ma lona ‘olo; ma ‘ua tu‘uina i ai fitafita ma teu i ai mea e ‘ai;
53. ma ‘ua na ‘avea o atali‘i o ta‘imua o le lau‘ele‘ele e fai ma fa‘afo‘i ita ma ‘ua na tu‘uina i latou i le ‘olo o Ierusalema ‘ia leoleoina ai.
54. A o le tausaga e tasi le selau ma le limagafulu ma le tolu, i lona lua o masina, ‘ua poloa‘i e Alekimo ‘iā lepetia o pavali o le lotoifale o le malumalu, ‘ia lepetia le galuega a le ‘au perofeta; ma ‘ua amata ‘ona lepetia.
55. O ona po ia na taia ai Alekimo ma ‘ua tāofia ana galuega; ma ‘ua punitia lona gutu ma ‘ua lavea i le ma‘i supa ma ‘ua lē mafai ‘ona toe lafo sana ‘upu e tasi, pe fai se poloa‘iga e uiga i lona ‘āiga.
56. Ma ‘ua oti Alekimo i ona po ia ma le puapuagā tele.
57. Ma ‘ua iloa e Pakite ‘ua oti Alekimo, ‘ona fo‘i atu lea o ia i le tupu o Temetiu ma ‘ua filemū le lau‘ele‘ele i tausaga e lua.
58. Ma ‘ua mānatunatu i latou uma ‘ua amio leaga, ‘ua fa‘apea ane, “O lenei o lo‘o nonofo ma le filemū ma le manuia o Ionatana ma ē ‘ua fa‘atasi ma ia; o lenei, ‘ia tatou ‘a‘ami ‘iā Pakite, na te pu‘e ‘iā te i latou i le po lava e tasi.”
59. Ma ‘ua latou ō ma ‘ua latou fa‘aali ‘iā te ia lo latou manatu.
60. Ma ‘ua sauniuni e sau ma le itūtau‘a tele ma ‘ua na ‘auina atu ni tusi i ona tagata ‘ua i Iuta, ‘ina ‘ia latou pupu‘e ‘iā Ionatana ma ē ‘ua fa‘atasi ma ia; ‘ae na latou lē mafaia, auā ‘ua fa‘aalia ‘iā te i latou la latou taupulepulega.
61. Ma ‘ua pu‘e e Ionatana o tagata e to‘alimagafulu o le lau‘ele‘ele, o ta‘ita‘i i latou o le ‘au ma ‘ua fasiotia i latou.
62. Ma ‘ua ō atu Ionatana ma Simona ma ē ‘ua fa‘atasi ma i lā‘ua, i Petepasi, o le ‘a‘ai lea o le fanua tu‘ufua; ma ‘ua ati a‘e o pā na lepetia ma ‘ua latou ‘avea ma ‘olo.
63. Ma ‘ua iloa e Pakite ma ‘ua fa‘apotopoto e ia lana itūtau‘a uma lava ma ‘ua vala‘au i ana uō ‘ua i Iuta,
64. ma ‘ua sau o ia ma ‘ua tolauapi i luga o Petepasi; ma ‘ua na vagaia i aso e tele ma ‘ua fai ana mea e fana a‘i.
65. A o Ionatana ‘ua na tu‘ua Simona lona uso i le ‘a‘ai, ma ‘ua alu i le nu‘u ma ‘ua toe sau ma le ‘au.
66. Ma ‘ua na fasia Otomera mōna uso ma le fānauga a Fasirona i o latou lava fale ‘ie; ma ‘ua amata ‘ona ia fasia le fili ma ‘ua tupu atili pea lona malosi.
67. A o Simona ma ē sa fa‘atasi ma ia ‘ua latou ulufafo mai le ‘a‘ai ma ‘ua latou susunu o mea e fana a‘i;
68. ma ‘ua latou tau le tau‘a ma Pakite ma ‘ua tu‘imomomoina e i latou; ma ‘ua latou matuā fa‘atigā lona loto auā ‘ua i‘uvale lona fa‘amoemoe ma lana taumafai.
69. Ma ‘ua ita o ia i tagata amio leaga na latou fa‘atonu ‘iā te ia ‘ia sau o ia i lo latou nu‘u, ‘ua na fasia nisi e to‘atele o i latou; a o ia ‘ua manatu e toe fo‘i atu i lona nu‘u fa‘atasi ma le toe o lana ‘au.
70. Ma ‘ua iloa e Ionatana lea mea ma ‘ua ‘auina atu ‘iā te ia ni savali latou te talatala ma ia i se fa‘alelei ma le toe fa‘afo‘i mai o ē na pu‘eina e ia.
71. Ma ‘ua talia e ia ma le fiafia ma ‘ua faia e tusa ma ‘upu a Ionatana ma ‘ua tautō na te lē fai se mea leaga e tasi ‘iā te ia i aso uma lava o lona ola.
72. Ma ‘ua toe fa‘afo‘i mai ‘iā te ia o tagata ‘ua na pu‘eina fa‘amalosi i le fanua o Iuta i aso ‘ua alu; ma ‘ua liliu o ia ma fo‘i atu i lona lau‘ele‘ele ma ‘ua lē taumafai lava ‘ona toe fo‘i mai ia i lenei nu‘u.
73. Ma ‘ua lavea‘iina Isaraelu a‘i le pelu ma ‘ua nofo Ionatana i Mekemase ma ‘ua amata e Ionatana ‘ona fa‘amasino i le nu‘u i lea mea; ma ‘ua na fa‘aumatia o tagata amio leaga i Isaraelu. #