1. Ma ‘ua tula‘i mai lona atali‘i o Iuta, ‘ua igoa ‘iā Makapaio, e sui ‘iā te ia.
2. Ma ‘ua fesoasoani mai ‘iā te ia ona uso uma lava ‘atoa ma i latou sa fa‘atasi ma lona tamā, ma ‘ua latou tau le tau‘a mo Isaraelu ma le loto fiafia.
3. ‘Ua na fa‘alauteleina le mamalu o lona nu‘u;‘ua ‘ofu o ia i le ufifatafata e pei o se fitafita toama ‘ua fusi e ia lona ‘au‘upega o le toae si‘i ai le tau‘a ma ‘ua puipui i le togālauapi i lana pelu.
4. ‘Ua fa‘atusaina i le leona i ana galuega,‘ua pei o se tama‘i leona ‘ua tagi i le tuligāmanu.
5. ‘Ua tuliloa o ē amio leaga,o sā‘ili‘ili solo ‘iā te i latou;ma ‘ua na susunu i le afi i latou sa fa‘atigā i lona nu‘u.
6. ‘Ua solomuli o ē ita mai, ‘ona o le mata‘u ‘iā te ia,‘ua mata‘utuia o ē fai amio leaga;o lona lima na ta‘ita‘iina ai le olataga.
7. Ma ‘ua na fa‘a‘ono‘ono i tupu e to‘atelema ‘ua fa‘afiafia ‘iā Iakopo i ana galuega;e ta‘uleleia fo‘i lona fa‘amanatuga e o‘o i le fa‘avavau.
8. Ma ‘ua fealua‘i i ‘a‘ai o Iuta ma ‘ua na fa‘aumatia ai o ē amio leagama ‘ua liu‘eseina a‘i le to‘asā ia Isaraelu.
9. Ma ‘ua ta‘ua lona igoa e o‘o i tulu‘iga o le lau‘ele‘elema ‘ua na fa‘apotopotoina o ē ‘ua lata ‘ona fano.
10. Ma ‘ua fa‘apotopotoina e Apoloni o nu‘u ‘ese, ‘atoa ma le ‘au e to‘atele ma le malolosi mai Samaria, e tau ai le tau‘a ma Isaraelu.
11. Ma ‘ua iloa e Iuta ma ‘ua alu e fa‘afetaia‘i ‘iā te ia, ma ‘ua na lafoia lana ‘au ma fasioti ‘iā te ia; ma ‘ua pa‘u‘ū nisi e to‘atele i o latou manu‘a, a o ē totoe ‘ua latou sōsōla.
12. Ma ‘ua na maua lo latou vetega ma ‘ua ‘avea e Iuta le pelu a Apoloni, sa tau ai o ia i aso uma.
13. Ma ‘ua fa‘alogo Serona, o le ta‘imua o le ‘au a Suria, ‘ua fa‘apotopoto e Iuta le ‘au o ē fa‘amaoni ma ‘ua latou fa‘atasi ma ia,
14. ‘ona fai ane lea, “‘Ou te faia se mea e ta‘ua ai a‘u, e fa‘amamaluina ai a‘u i le mālō; ‘ou te tau ma Iuta ma i latou ‘ua fa‘atasi ma ia, o ē fa‘alēaogā le poloa‘i a le tupu.”
15. Ma ‘ua sauniuni lava ia; ma ‘ua ō a‘e fa‘atasi ma ia le togālauapi o ē amio leaga; o fesoasoani malolosi, e taui ma sui i le fānauga a Isaraelu.
16. Ma ‘ua latou fa‘alata mai i Peteorona ma ‘ua alu atu Iuta ma le ‘au e to‘aitiiti e fa‘afetaia‘i ‘iā te i latou.
17. A ‘ua latou iloa atu le vaega ‘au ‘ua ō mai e fetaia‘i ai ma i latou, ‘ona latou fai mai lea ‘iā Iuta, “E mafai fa‘apefea ‘iā i tatou e to‘aitiiti ‘ona tau ma lenei ‘au e to‘atele lava ma le malolosi, a o vaivai fo‘i i tatou i le fa‘amatelaina i lenei aso?”
18. Ma ‘ua fai atu o Iuta, “E faigofie ‘ona tu‘uina mai le to‘atele i lima o le to‘aitiiti; ma ‘ua tusa lelei i luma o le Atua o le lagi ‘ona ia lavea‘i i tatou i le to‘atele po o le to‘aitiiti,
19. auā e lē o le to‘atele o le ‘au e mālō ai i le tau‘a, a o le malosi e mai le lagi.
20. ‘Ua ō mai ‘iā te i tatou tagata nei i le tele o le fa‘amaualuga ma le fa‘asausili, i le fia fa‘aumatia i tatou ma a tatou avā ma a tatou fānau ma le fia vetea i tatou;
21. a ‘ua tau le tau‘a e i tatou, i le fia puipui i lo tatou ola ma a tatou tulafono;
22. i le o le Ali‘i lava ia na te nutipalaina i latou i o tatou luma; a o ‘outou, ‘aua ne‘i matata‘u ‘iā te i latou.”
23. ‘Ua uma ana ‘upu ia, ‘ona oso loa lea ‘iā te i latou; ma ‘ua fa‘aumatia i ona luma o Serona ma lana ‘au.
24. Ma ‘ua tuliloa ‘iā te ia i le vaimauga o Peteorona e o‘o atu i le fanua laulelei ma ‘ua fasia ai o latou tagata e valu selau; a ‘ua sōsōla i latou na totoe i le lau‘ele‘ele o tagata Filisitia.
25. ‘Ona o‘o lea o le mata‘u ma le fefe i nu‘u ‘ese ‘ona o Iuta mōna uso.
26. Ma ‘ua o‘o atu lona igoa i le tupu; ma ‘ua talanoaina e nu‘u uma o tau‘a o Iuta.
27. ‘Ua fa‘alogo le tupu o Atioko i tala ia, ‘ona tigā ai lea o lona loto; ma ‘ua poloa‘i ma ‘ua fa‘ala‘ei‘au i lona mālō ‘atoa uma, o le ‘au matuā malosi lava.
28. Ma ‘ua tatala lona tu‘ugā‘oloa ma ‘ua avatu i lana ‘au o le taui mo le tausaga ‘atoa, ma ‘ua poloa‘i atu ‘iā latou nofo sauni i mea uma.
29. Ma ‘ua na iloa ‘ua itiiti le tupe i lona tu‘ugā‘oloa, ma ‘ua itiiti lafoga a le lau‘ele‘ele ‘ona o māseiga ma mea leaga ‘ua na fa‘atupuina i le lau‘ele‘ele i lona vaosia o sauniga sa i ai talu anamua;
30. ma ‘ua fefe ne‘i lē lava ana tupe, e pei ‘ona o‘o fo‘i ‘iā te ia i ni isi aso, e totogi a‘i ana mea ma fai a‘i mea alofa sa mua‘i foa‘iina e ia ma le lima lelei, e sili atu lava i tupu sa muamua ‘iā te ia.
31. Ma ‘ua matuā atuatuvale lona loto ma ‘ua manatu e alu atu i Peresia e tali ai le lafoga a itūmālō e i ai, ma fa‘aputuputu ai ni tupe e tele.
32. Ma ‘ua na tu‘uina Lusia, o le tagata mamalu o le ‘āiga o le tupu, na te tausia le matagaluega a le tupu, e pau mai i le vaitafe o le Eufirate, pau mai i le vaitafe o Aikupito;
33. na te tausia fo‘i o lona atali‘i o Atioko se‘ia toe fo‘i mai o ia.
34. Ma ‘ua tu‘u mai ‘iā te ia le vaeluaga o lana ‘au, ‘atoa ma elefane ma ‘ua poloa‘i atu ‘iā te ia i mea sa loto i ai, ‘ae maise o tagata ‘ua nonofo i Iuta ma Ierusalema;
35. ‘ia ‘auina atu lava ‘iā te i latou le vaega ‘au na te nutipala ma fa‘auma le malosi o Isaraelu ma ē ‘ua totoe o Ierusalema ma ‘ia tineia le fa‘amanatuina o i latou i lea mea.
36. Ma ia tofia o tagata o nu‘u ‘ese e nonofo i le nu‘u ‘atoa uma, ma ‘ia tufatufa o latou lau‘ele‘ele i le vili.
37. Ma ‘ua ‘ave e le tupu le vaega ‘au ‘ua totoe ai, ma ‘ua alu atu nai Anetioka, o le laumua o lona mālō, i le tausaga e tasi le selau ma le fagafulu ma le fitu ma ‘ua na sopo‘ia le vaitafe o le Eufirate ma ‘ua savali atu i le atu mauga.
38. Ma ‘ua tofia e Lusia o Tulonaio, le atali‘i o Turumene ma Nikanora ma Korekia, o ali‘i mamalu, o uō a le tupu.
39. Ma ‘ua tu‘u atu ‘iā te i latou o tagata tau e fagafulu afe ma le fitu o afe, o ē ti‘eti‘e i solofanua, ‘ina ‘ia latou ō atu i le lau‘ele‘ele o Iuta ma fa‘ata‘ape‘ape ‘iā te i latou, e tusa ma le ‘upu a le tupu.
40. Ma ‘ua latou ō ma la latou ‘au ‘atoa ma ‘ua latou ō mai ma ‘ua latou tolauapi e lata ane i Emau, i le fanua laulelei.
41. ‘Ua fa‘alogo e tagata fa‘atau‘oloa o le nu‘u le tala i le ō mai o i latou, ‘ona latou tago lea i le ario ma le auro tele lava, ma a latou ‘au‘auna ma ‘ua latou ō mai i le togālauapi i le fia maua le fānau a Isaraelu e fai mā latou pologa; ma ‘ua fa‘aopoopo ‘iā te i latou le ‘au a Asuria ma le ‘au mai nu‘u ‘ese.
42. Ma ‘ua iloa atu e Iuta mōna uso ‘ua fa‘atuputeleina o mea leaga ma ‘ua aga‘i mai le vaega ‘au i lo latou lau‘ele‘ele; ma ‘ua latou iloa ‘upu a le tupu na ia poloa‘i ai i lona nu‘u ‘ia fasiotia ma fa‘aumatia Isaraelu;
43. ‘ona tautalatala lea le tagata i lē la te tuā‘oi, “‘Ia tatou laga le to‘ilalo o lo tatou nu‘u ma tau le tau‘a mo lo tatou nu‘u ma lo tatou malumalu.”
44. ‘Ona potopoto ai lea i latou ‘ina ‘ia sauniuni i le tau‘a ma fai talosaga ma fa‘atoga atu i le agaalofa ma le alofa mutimutivale.
45. Sa lē ‘ainā fo‘i o Ierusalema,sa tusa ma le fanua tu‘ufua;sa lē i ai se tasi o lana fānau e ulufale ma ulufafo ai;sa solipalaina fo‘i le malumalu,sa i le ‘olo fo‘i o le fānauga a nu‘u ‘ese;‘ua ‘avea lava ia ma nofoaga o nu‘u ‘ese;ma ‘ua ‘ave‘esea le fiafia mai ‘iā Iakopo,‘ua mavae le tagi o le fagufagu ma le kitara.
46. Ma ‘ua fa‘apotopotoina i latou ma ‘ua latou ō mai i Mesepa, auā o Mesepa o le mea sa mua‘i fai ai talosaga a Isaraelu.
47. Ma ‘ua latou anapopogi i le aso lea ma ‘ua latou fa‘a‘ofu i ‘ofu talatala ma lulu‘u le lefulefu i luga i o latou ulu ma ‘ua latou saei o latou ‘ofu;
48. ma ‘ua latou fofola o tusi o le tulafono sa sā‘ilia e nu‘u ‘ese ‘ina ‘ia tusia ai o fa‘atusa o latou tupua;
49. ma ‘ua latou ‘aumaia o teuga o ositaulaga, ma mea fa‘apolopolo, ma mea e sefulua‘i a latou mea; ma ‘ua latou ‘amia mai o Naseri ‘ua uma o latou aso;
50. ma ‘ua latou ‘alalaga atu i le lagi ma le leo tele, o fai ane: “Se a se mea matou te faia i nei tagata, po o fea matou te ta‘ita‘iina atu ai i latou?
51. ‘Ua solipalaina lou malumalu ma ‘ua fa‘aleagaina, o ou ositaulaga fo‘i ‘ua mafatia i le fa‘anoanoa ma le māsiasi.
52. A o lenei ‘ua fa‘apotopoto nu‘u ‘ese e tau ma i matou i le fia fa‘ata‘ape‘ape i matou; ‘ua e silafia o latou manatu ‘iā i matou.
53. A mafai fa‘apefea ‘ona matou tutū i o latou luma, ‘āfai e lē fesoasoani mai lava oe, le Atua e?”
54. Ma ‘ua latou ili pū ma le leo tele lava.
55. ‘Ua mavae atu mea ia, ‘ona tofia lea e Iuta o ta‘ita‘i o le nu‘u, e fai ma ali‘i o ta‘ito‘aafe ma ali‘i o ta‘ito‘aselau ma ali‘i o ta‘ito‘alimagafulu ma ali‘i o ta‘ito‘atinoagafulu.
56. Ma ‘ua fai atu ‘iā i latou sa ati a‘e o latou fale, ma i latou sa fa‘amau e faiavā, ma i latou sa totō a latou tōvine ma i latou sa fefefe, ‘ina ‘ia latou fo‘i atu i o latou fale ta‘ito‘atasi, e tusa ma le tulafono.
57. ‘Ona ‘ave lea o latou fale ‘ie, ‘ua tolauapi i le itū i saute o Emau.
58. Ma ‘ua fai atu o Iuta, “‘Ia fusi ‘outou sulugātiti, ma ‘ia loto malosi ‘outou; ma ‘outou nofo sauni, a taeao, ‘ona tau le tau‘a ma nu‘u ‘ese nei ‘ua fa‘apotopotoina e tau ma tatou, i le fia fa‘aumatia i tatou ma lo tatou malumalu;
59. auā e lelei ‘ona tatou oti i le tau‘a, ‘ae leaga lo tatou iloa atu le fa‘aleagaina o lo tatou nu‘u ma lo tatou malumalu.
60. ‘Ae ‘ia faia lava e tusa ma le finagalo o lē afio i le lagi.”