1. O le tausaga e tasi le selau ma le fitugafulu ma le lua, na alu ai o le tupu o Temetiu ma lana itūtau‘a i le fanua o Metai i le fia maua ai ni fitafita e fesoasoani ‘iā te ia e tau ma Terufo.
2. Ma ‘ua fa‘alogo o Asake, le tupu o Peresia ma Metai, ‘ua sopo‘ia e Temetiu ona tuā‘oi, ‘ona ia ‘auina atu lea le tasi o ona ta‘ita‘i ‘au ‘ina ‘ia pu‘eolaina o ia ma ‘aumai ‘iā te ia.
3. Ma ‘ua alu ma ‘ua oso i le itūtau‘a a Temetiu ma ‘ua pu‘e ‘iā te ia ma ‘ua ta‘ita‘i ‘iā te ia ‘iā Asake, ma ‘ua na tu‘uina o ia i le fale puipui.
4. Ma ‘ua to‘afilemū le lau‘ele‘ele uma o Iuta i aso uma lava o Simona; ma ‘ua na sā‘ilia o mea e lelei ai lona nu‘u ma ‘ua latou fiafia pea lava i lana pule ma lona mamalu.
5. ‘Ae ui i nisi mea uma ‘ua mamalu ai, a ‘ua na maua fo‘i le taulaga o Iopa e fai mōna ala i motu o le sami tuloto.
6. ‘Ua na fa‘alauteleina tuā‘oi o lona nu‘u ma ‘ua ia puipui i le lau‘ele‘ele.
7. Ma ‘ua na maua ni tagataotau‘a e to‘atele lava, ma ‘ua pu‘eina e ia o Kasara ma Petesura ma le ‘olo; ‘ua na ‘ave‘esea ai o mea ‘ele‘elea uma lava ma ‘ua leai se tasi e tete‘e mai ‘iā te ia.
8. Ma ‘ua ta‘ito‘atasi ma fa‘ato‘a ona fanua ma le filemū ma ‘ua fua mai ona fua e le ‘ele‘ele o Iuta; o la‘au fo‘i o le fanua ‘ua fua mai o latou fua.
9. Sa nonofo o toeaina i malae ma talatala i fua o le lau‘ele‘ele, a o taulele‘a sa latou fa‘a‘ofuina ma le mitamita i ‘ofu o le tau‘a.
10. Sa tufatufa e ia o mea e ‘ai i ‘olo ‘ese‘ese ma fa‘aputu i ai o mea e fa‘amalosia a‘i; ‘ua o‘o ‘ina ta‘ua ai lona igoa mamalu e o‘o i tulu‘iga o le lalolagi.
11. ‘Ua na fa‘atupu le manuia i le lau‘ele‘ele ma ‘ua fiafia Isaraelu i le fiafia tele.
12. Ma ‘ua ta‘itasi ma nofo i lalo o lona vine ma lalo o lona fiku; sa leai fo‘i sē na te fa‘amata‘u ‘iā te i latou.
13. ‘Ua lē toe i ai i le lau‘ele‘ele se tasi na te tau ma i latou; o aso ia na tu‘ipalaina ai o tupu.
14. ‘Ua na fa‘aeaina o ē puapuagātia uma o lona nu‘u ma ‘ua na tausia le tulafono ma ‘ua na ‘ave‘esea o ē amio leaga ma ē loto leaga;
15. ‘ua na fa‘amamaluina le malumalu ma fa‘ateleina o ipu o le malumalu.
16. Ma ‘ua logo i Roma ‘ua oti Ionatana, fa‘apea fo‘i i Sepata ma ‘ua latou fa‘anoanoa tele ai.
17. A ‘ua latou fa‘alogo ‘ua ‘avea Simona, lona uso, ma ositaulaga sili, e sui a‘i ia ma ‘ua na maua le lau‘ele‘ele uma ‘atoa ma ‘a‘ai ‘ua i ai.
18. ‘Ona latou tusi mai lea ‘iā te ia le tusi i ni papa ‘apamemea, ‘ina ‘ia fa‘afouina a‘i le fa‘auō ma le feso‘ota‘iga sa latou fa‘afeagai ai ma Simona ma Ionatana, ona uso.
19. Ma ‘ua faitauina i luma o le potopotoga i Ierusalema. A o le ata lenei o le tusi na ‘auina mai e tagata Sepata:
20. “O ta‘imua ma le ‘a‘ai o tagata Sepata ‘ua alolofa atu ‘iā Simona, le ositaulaga sili ma le ‘au toeaina ma ositaulaga ma nisi uma o le nu‘u o tagata Iutaia, o matou uso.
21. O sāvali ‘ua ‘auina mai i lo matou nu‘u ‘ua latou tala mai lo ‘outou mamalu ma lo ‘outou mamafi ma lo ‘outou fiafia; i le ‘ua matou ‘oli‘oli ‘ina ‘ua latou taunu‘u mai.
22. Ma ‘ua matou tusia o mea na latou talaina mai i luma o le fono a le nu‘u, e fa‘apea: ‘O Numeni le atali‘i o Atioko, ma Anipateri, le atali‘i o Iasona, o sāvali a tagata Iutaia, ‘ua la ō mai ‘iā te i matou, e fa‘afou ai la latou ulua‘i fa‘auō ma i matou.
23. Ma ‘ua loto le nu‘u ‘ia talia ma le mamalu o savali ma ‘ia tu‘uina le ata o a la ‘upu i tusi filifilia a le nu‘u, ‘ina ‘ia ‘avea ma fa‘amanatuga i le nu‘u o tagata Sepata. A ‘ua matou ‘auina atu ‘iā Simona, le ositaulaga sili, le ata o tusi ia.’”
24. ‘Ua mavae atu mea ia, ‘ona ‘auina atu lea e Simona i Roma o Numeni ma le talitā auro lautele, e tusa lona mamafa ma le afe mina, ‘ina ‘ia osi ma i latou le feagaiga o le feso‘ota‘iga. A ‘ua fa‘alogo e le nu‘u o Roma i ‘upu ia.
25. ‘Ona latou fai ane loa lea, “Se a se fa‘afetai tatou te momoli atu ‘iā Simona mōna atali‘i?
26. Auā na fa‘aola e ia ona uso ma ‘ua na tuli‘esea ai o ē ita ‘iā Isaraelu ma ‘ua latou fa‘amaonia lana pule sa‘oloto.” Ma ‘ua latou tusia o mea ia i ni papa ‘apamemea ma ‘ua latou fa‘amauina i pouma‘a i le mauga o Siona.
27. A o le ata lenei o le tusi:“O le aso e sefulu ma le valu o le masina o Elula, o le tausaga e tasi le selau ma le fitugafulu ma le lua, o lona tolu o tausaga o le pule a Simona, le ositaulaga sili, i Asaramelu,
28. i le fa‘apotopotoga tele o le ‘au ositaulaga ma le nu‘u ma ta‘imua o le nu‘u ma le ‘au toeaina o le lau‘ele‘ele, ‘ua fa‘aalia o mea nei:
29. “O aso faiso‘o na tau ai le tau‘a i lo tatou lau‘ele‘ele, i le o Simona, le atali‘i o Matatia, o so le fānauga a Iaripa, mōna uso, ‘ua latou sagai atu i le fa‘alavelave ma ‘ua latou te‘ena o ē ita i o latou nu‘u ‘ina ‘ia tutū ai lo latou malumalu ma la latou tulafono ma ‘ua latou fa‘amamaluina lo latou nu‘u i le mamalu tele.
30. Ma ‘ua fa‘apotopoto lona nu‘u e Ionatana ma ‘ua ‘avea o ia mo latou ositaulaga sili, ‘ona fa‘atasiina atu lea o ia i lona nu‘u.
31. ‘Ua manatu fo‘i o latou fili e solipala ma tu‘imomomo lo latou lau‘ele‘ele ma fa‘ao‘o atu o latou lima i lo latou malumalu.
32. ‘Ona tula‘i ai lea o Simona ma ‘ua tau le tau‘a mo lona nu‘u ma ‘ua na foa‘iina ni ‘oloa e tele ma ‘ua tu‘uina ni ‘au‘upega i tagata malolosi o lona nu‘u ma ‘ua na fa‘aolaina i latou;
33. ma ua na ati a‘e ni ‘olo i ‘a‘ai o Iuta, ‘ae maise o Petesura o lo‘o i le tuā‘oi o Iuta, o le mea na mua‘i tu‘u i ai le ‘au‘upega o nu‘u ‘ese; ma ‘ua na tofia ai le leoleoga o tagata Iutaia.
34. Ma ‘ua na fa‘amalosia Iopa, o le ‘a‘ai tumatafaga ma Kasara o i tuā‘oi o Asetota, sa mua‘i nonofo i ai le fili; ma ‘ua na tu‘uina i ai ni tagata Iutaia ma ‘ua tu‘u atu ‘iā te i latou mea uma e aogā e puipui a‘i ‘iā te i latou.
35. “Ma ‘ua iloa e le nu‘u le amio a Simona ma le mamalu sa ia manatu e fa‘amamalu a‘i lona nu‘u, ‘ona latou tofia lea o ia e fai mo latou ta‘ita‘i ma ositaulaga sili, auā o lona faia o mea uma ia, ma lana amiotonu ma lona fa‘amaoni tumau i lona nu‘u, ma lona taumafai i ala uma lava ‘ona fa‘aea lona nu‘u.
36. O ona fo‘i aso na tupu ai le manuia i ona lima, ‘ua tuli‘esea o nu‘u ‘ese nai lo latou lau‘ele‘ele, ‘atoa ma i latou sa i Ierusalema, i le ‘a‘ai o Tavita, i le ‘olo, sa latou oso mai ai ma fa‘a‘ele‘elea o mea uma ‘ua felāta‘i ma le malumalu, o matuā fa‘aleaga lona pa‘ia;
37. ma ‘ua na tu‘uina i ai ni tagata Iutaia latou te puipui i le lau‘ele‘ele ma le ‘a‘ai ma ‘ua na atiina a‘e le pavali o Ierusalema.
38. “Ma ‘ua fa‘amaonia ai ‘iā te ia e le tupu o Temetiu le tofiga o ositaulaga sili.
39. Ma le tasi fo‘i, ‘ua na ‘avea o ia mana uō ma ‘ua na fa‘amamaluina o ia i le mamalu tele.
40. Auā na logo ‘iā te ia na ta‘ua tagata Iutaia e tagata Roma o a latou uō ma o latou fesoasoani ma o latou uso ma ‘ua latou tali ma le mamalu i savali a Simona.
41. “Ma ‘ua loto tagata Iutaia ma le ‘au ositaulaga ‘ia ‘avea o ia mo latou ta‘ita‘i ma lo latou ositaulaga sili e fa‘avavau, se‘ia o‘o ‘inā tula‘i mai se perofeta fa‘amaoni;
42. ma ‘ia ‘avea ia mo latou ta‘ita‘i ma ‘ia tausia e ia le malumalu ma tofia e ia o ta‘ita‘i i galuega o le malumalu ma le lau‘ele‘ele ma le tausiga o le ‘au‘upega ma ‘a‘ai nofo ‘olo.
43. ‘Ia ‘iā te ia fo‘i le tausiga o mea pa‘ia, ma ‘ia ‘ana‘ana tagata uma ‘iā te ia ma ‘ia ta‘ua lona igoa i tusitusiga uma a le nu‘u ma ‘ia fa‘a‘ofuina o ia i le ‘ie pāuli ma le auro.
44. “Ma ‘ia ‘aua le fa‘atagaina i se tasi o le nu‘u po o le ‘au ositaulaga ‘ona fa‘alēaogāina se tasi o mea ia, po o le fa‘afiti atu i mea ‘ua ta‘ua mai e ia, po o le tala‘i se fa‘apotopotoga i le lau‘ele‘ele, e aunoa ma ia, po o le fa‘a‘ofu i le ‘ie pāuli po o le fai fa‘amau auro;
45. ‘ai se tasi na te solia mea ia, pe fa‘alēaogāina se tasi o mea ia, e nofosala ai o ia.”
46. Ma ‘ua lotogatasi le nu‘u uma ‘ia fa‘amaonia lenā pule ‘iā Simona ma ‘ia faia lava e tusa ma ‘upu ia.
47. Ma ‘ua talia e Simona ma ‘ua loto e faia o ia ma ositaulaga sili ma ‘ia ‘avea o ia ma ta‘ita‘i ma ta‘imua o le nu‘u o tagata Iutaia ma le ‘au ositaulaga ma ‘ia pule o ia i tagata uma.
48. Ma ‘ua latou fa‘atonu ‘ia tusitusi lenā i‘ugafono i papa ‘apamemea ma ‘ia tu‘uina i le fa‘apaologa o le malumalu, i se tulaga mamalu;
49. ma ‘ia tu‘uina le tasi ata o lea tusi i le mea e teu ai tupe o le malumalu ‘ina ‘ia aogā ai ‘iā Simona mōna atali‘i.