1. Ma ‘ua o‘o ‘ina fa‘alogo o nu‘u ‘ese ‘ua vagavagai ‘iā Isaraelu, o lo ‘ua atiina a‘e le fatafaitaulaga ma le malumalu e pei ‘ona i ai muamua, ‘ona ita tele ai lea i latou.
2. Ma ‘ua latou manatu e fa‘aumatia le fānau a Iakopo ‘ua i totonu ‘iā te i latou ma ‘ua amata ‘ona latou fasioti i tagata o le nu‘u ma tuliloa ‘iā te i latou.
3. Ma ‘ua si‘i le tau‘a e Iuta i le fānauga a Esau i Itumaia, ma ē ‘ua i Akarapatene, auā sa latou si‘osi‘o ‘iā Isaraelu; ma ‘ua na taia i latou i le matuā tu‘imomomo.
4. Ma ‘ua na manatua le loto leaga o le fānauga a Paiana, sa ‘avea ma mailei ma tausuaiga mo le nu‘u, o sauni mailei ‘iā te i latou i le ala.
5. Ma ‘ua na sisi‘o ‘iā te i latou i o latou ‘olo, ma ‘ua vagavagai ‘iā te i latou ma ‘ua na fa‘atoina i latou ma ‘ua susunu i le afi o latou ‘olo ‘atoa ma i latou uma ‘ua i ai.
6. Ma ‘ua ia fa‘asaga atu i le fānauga a Amona, ma ‘ua maua ai le itūtau‘a malosi ma le nu‘u e to‘atele, o Timoteo fo‘i o lo latou ta‘ita‘i;
7. ma ‘ua na tau ni tau‘a e tele ma i latou ma ‘ua nutipalaina i latou i ona luma ma ‘ua na taia i latou;
8. ma ‘ua na maua le ‘a‘ai o Kaseru ma fafine ‘ua i ai ma ‘ua fo‘i mai i Iuta.
9. Ma ‘ua fa‘apotopotoina o nu‘u ‘ese o lo‘o i Kiliata, e tau ma le fānauga a Isaraelu ‘ua i o latou lau‘ele‘ele, ‘ina ‘ia fasi ‘iā te i latou; a ‘ua latou sōsōla i le ‘olo o Tatema,
10. ma ‘ua latou ‘auina atu ‘iā Iuta mōna uso le tusi ‘ua fa‘apea atu, “‘Ua potopoto o nu‘u ‘ese o le lau‘ele‘ele e tau ma i matou ‘ina ‘ia fa‘aumatia i matou.
11. Ma ‘ua latou sauniuni mai e pu‘e le ‘olo ‘ua matou sōsōla i ai; i le o Timoteo o le ta‘ita‘i o la latou ‘au.
12. O lenei, ‘inā sau ia ma e lavea‘i i matou a‘i o latou lima, auā ‘ua fasia ni o matou tagata e to‘atele.
13. Ma na fasiotia uma lava o tatou uso sa i le ‘ele‘ele o Tupiu; ma ‘ua ‘avea fa‘atagataotau‘a a latou avā ma a latou fānau, ‘ua ‘avea fo‘i o latou ‘oloa, ma ‘ua latou fasi ai o tagata pe tasi le afe.”
14. ‘Ua lē uma le faitau o lea tusi, fa‘auta, ‘ua ō mai ni sāvali mai Kalilaia, o māsae o latou ‘ofu, o tala mai le ‘upu fa‘apea,
15. “O fai mai ‘ua fa‘apotopotoina le ‘au e tau ma i latou mai Tulomai ma Turo ma Saitonu: ‘ua fa‘atumuina Kalilaia ‘atoa i tagata ‘ese, ‘ina ‘ia fa‘aumatia i matou.”
16. ‘Ua fa‘alogo o Iuta ma le nu‘u i ‘upu ia, ‘ona fa‘apotopotoina lea le motu o tagata e to‘atele e mafaufau pe se a se mea latou te faia i o latou uso ‘ua puapuagātia ma ‘ua tau o nu‘u ‘ese ma i latou.
17. Ma ‘ua fai atu Iuta ‘iā Simona lona uso, “‘Ia e filifili ni ou tagata ma e alu e lavea‘i i ou uso i Kalilaia; a o i mā‘ua ma lo‘u uso o Ionatana, ma te ō i Kiliata.”
18. Ma ‘ua na tu‘uina Iosefa, le atali‘i o Sakaria ma Asaria e ta‘ita‘i i le nu‘u ma le itūtau‘a ‘ua totoe i Iuta, latou te leosia.
19. Ma ‘ua poloa‘i ‘iā te i lā‘ua, o fai atu, “‘Ia ‘oulua pule i lenei nu‘u ma ‘aua le tau le tau‘a ma nu‘u ‘ese se‘ia matou toe fo‘i mai.”
20. Ma ‘ua tu‘uina o tagata e tolugaafe ‘iā Simona ‘ina ‘ia latou ō ai i Kalilaia; ‘ae valugaafe ‘iā Iuta e o i Kiliata.
21. Ma ‘ua alu Simona i Kalilaia ma ‘ua tau ni tau‘a e tele ma nu‘u ‘ese ma ‘ua nutipalaina nu‘u ‘ese i ona luma; ‘ua na tuliloaina i latou e o‘o atu i faitoto‘a o Tulomai;
22. ma ‘ua fasia o tagata nu‘u ‘ese e tolugaafe, ma ‘ua na maua o latou vete;
23. ma ‘ua na ‘avea o ē sa i Kalilaia ma Arepata, ‘atoa ma a latou avā ma a latou fānau ma mea uma ‘ua ‘iā te i latou ma ‘ua ta‘ita‘i mai latou i Iuta ma le fiafia tele.
24. A o Iuta Makapaio ma Ionatana, lona uso, ‘ua la sopo‘ia le Ioritana ma ‘ua la malaga i ni aso e tolu i le fanua tu‘ufua.
25. Ma ‘ua fa‘afetaia‘i ‘iā te i lā‘ua tagata Napata ma ‘ua latou talia i lā‘ua ma le filemū; ma ‘ua tala mai ‘iā te i lā‘ua mea ‘ua o‘o i o latou uso i Kiliata:
26. “‘Ua pu‘eina lava ni isi e to‘atele o i latou i Posora ma Peseri ma Alema, ma Kasefo ma Maketa ma Kanaima;” o ‘a‘ai malolosi uma ia ma le tetele.
27. “O isi fo‘i ‘a‘ai o Kiliata ‘ua maua ai i latou ma ‘ua tāofia. ‘Ua o‘o i le taeao, ‘ua latou fai le tonu e alu le itūtau‘a i ‘a‘ai ia ma pupu‘e a ‘ave i latou i le aso e tasi.”
28. Ma ‘ua afe atu fa‘afuase‘i o Iuta ma lana itūtau‘a i le ala i le fanua tu‘ufua i Posora ma ‘ua na maua le ‘a‘ai; ma ‘ua na fasia i le pelu tane uma lava, ma ‘ua na ‘avea uma lo latou vete ma ‘ua na susunu le ‘a‘ai i le afi.
29. Ma ‘ua latou tūtūla‘i i le po ma ‘ua latou ō atu i le ‘olo o Tatema.
30. Ma ‘ua o‘o i le taeao, ‘ua tepa a‘e o latou mata, fa‘auta, o le ‘au e to‘atele e lē mafaitaulia ‘ua latou fe‘avea‘i apefa‘i ma la‘au e tu‘i a‘i pavali, ‘ina ‘ia latou ā‘ea le ‘olo ma tau ma Isaraelu.
31. Ma ‘ua iloa e Iuta ‘ua amata le tau‘a ma ‘ua a‘e i le lagi le leo o le tau‘a e pei o le pū vala‘au ma le ‘alaga tele mai le ‘a‘ai.
32. Ma ‘ua fai atu i lana itūtau‘a, “‘Ia ‘outou tau le tau‘a i le asō mo ‘outou uso.”
33. Ma ‘ua mulimuli atu ‘iā te i latou ma vaega ‘au e tolu, ma ‘ua latou ‘alalaga i le iligāpu ma ‘ua latou leo tele i le tatalo.
34. Ma ‘ua iloa e le itūtau‘a a Timoteo o Makapaio lenā, ma ‘ua latou sōsōla ai ona luma; ma ‘ua taia i latou i le matuā tu‘imomomo; ma ‘ua fasia i lea aso o latou tagata pe valugaafe.
35. Ma ‘ua sagai atu Iuta i Mesepa; ma ‘ua fai le oso ma ‘ua na maua ma ‘ua fasioti i tane uma ‘ua i ai, ma ‘ua na ‘ave ona vete ma ‘ua susunu le ‘a‘ai i le afi.
36. ‘Ua alu loa mai lea mea, ma ‘ua na maua Kasefo ma Maketa ma Peseri ma isi ‘a‘ai uma o Kiliata.
37. ‘Ua uma mea ia, ‘ua fa‘apotopoto e Timoteo le tasi itūtau‘a ma ‘ua tolauapi i luma o Rafo, i tala atu o le vaitafe.
38. Ma ‘ua ‘auina atu e Iuta ni ē agaga i le ‘au ma ‘ua latou tala mai ‘iā te ia o fai mai, “‘Ua fa‘apotopotoina ‘iā te ia o nu‘u ‘ese uma ‘ua vagaia ai i tatou, o le itūtau‘a e to‘atele anoanoa‘i;
39. ma ‘ua fai la latou feagaiga ma tagata Arapi e fesoasoani ‘iā te i latou; ma ‘ua latou tolauapi i tala atu o le vaitafe, o nofo sauni e ō mai ‘iā te oe e tau ai le tau‘a.” Ma ‘ua alu Iuta e fa‘afetaia‘i ‘iā te i latou.
40. Ma ‘ua fai atu Timoteo i ta‘ita‘i o lana itūtau‘a, “A fa‘alatalata mai Iuta ma lana itūtau‘a i le vaitafe, ‘āfai e lua‘i sopo mai ‘iā te i tatou, tatou te lē lavā tali ‘iā te ia, auā e malosi lava ia e tete‘e mai ‘iā te i tatou;
41. ‘ae ‘āfai e fefe i sopo i le vai ma ‘ua tolauapi i le la itūvai, ‘ia tatou sopo atu ‘iā te i latou, ‘ona tatou mafafai ai lea ‘ona tete‘e atu ‘iā te i latou.”
42. ‘Ua fa‘alatalata atu Iuta i le vaitafe, ‘ua na tu‘uina o tusi‘upu o le nu‘u i le ‘auvai ma ‘ua poloa‘i atu ‘iā te i latou, o fai atu, “‘Aua ne‘i tu‘uina se to‘atasi o le nu‘u, a ‘ia latou ō atu uma i le tau‘a.”
43. Ma ‘ua mua‘i sopo atu ‘iā te i latou, ‘ae mulimuli atu ‘iā te ia le nu‘u uma ma ‘ua nutipalaina o nu‘u ‘ese uma i ona luma; ma ‘ua latou lafoa‘i o latou ‘au‘upega ma ‘ua latou sōsōla i le malumalu ‘ua i Kanaima.
44. Ma ‘ua maua le ‘a‘ai lava ia, ma ‘ua susunu i le afi le malumalu ma i latou uma ‘ua i ai; ma ‘ua faia‘ina Kanaima ma ‘ua lē mafai ‘ona tu i luma o Iuta.
45. Ma ‘ua fa‘apotopotoina e Iuta o tagata Isaraelu uma lava ‘ua i Kiliata, o tagatanu‘u ‘atoa ma ali‘i, ma a latou avā ma a latou fānau ma le itūtau‘a e to‘atele lava, ‘ina ‘ia latou ō mai i le fanua o Iuta.
46. Ma ‘ua latou ō mai i Eferona, o le ‘a‘ai tele lea ma le matuā malosi lava ma ‘ua tutonu i le ala ma ‘ua lē mafai ‘ona ‘alo ‘ese ai i le itū taumatau po‘o le itū tauagavale, a ‘ua ui atu le ala i totonu lava o le ‘a‘ai.
47. Ma ‘ua sulu i le ‘olo tagata o le ‘a‘ai ma ‘ua latou pupuni faitoto‘a i ma‘a. Ma ‘ua ‘auina atu e Iuta ‘iā te i latou ana savali ma ‘upu malū,
48. o fai atu, “Tu‘u mai ‘iā matou te ui atu i lo ‘outou lau‘ele‘ele i lo matou ō atu i lo matou lava nu‘u; i le e lē fa‘aleagaina ai ‘outou e se to‘atasi, na ‘ona ui atu ai o matou lava vae.” Ma ‘ua latou mumusu ‘ona tatala faitoto‘a ‘iā te i latou.
49. Ma ‘ua poloa‘i e Iuta ‘ia talai atu i le togālauapi ‘ia ta‘ito‘atasi ma sauniuni i le mea ‘ua i ai lava ia.
50. Ma ‘ua sauniuni tagata o le itūtau‘a; ma ‘ua fai le oso i le ‘a‘ai i le aso ‘atoa lenā ma le po ‘atoa, ma ‘ua tu‘uina mai le ‘a‘ai i ona lima.
51. Ma ‘ua latou fasioti i le pelu o tane uma lava, ma ‘ua lepetia le ‘a‘ai ma ‘ua ‘ave ona vete ma ‘ua na sopo‘ia le ‘a‘ai ‘atoa i luga o tino o ē fasia.
52. Ma ‘ua latou sopo‘ia le Ioritana, i le fanua laulelei ma le lautele e fesagai ma Peteseana.
53. Ma ‘ua sagai o Iuta e fa‘apotopoto o ē telegese ma ‘ua apoapoa‘i atu pea i le nu‘u i le ala se‘ia o‘o mai i latou i le fanua o Iuta.
54. Ma ‘ua latou ō a‘e i le mauga o Siona ma le fiafia ma le ‘oli‘oli ma ‘ua momoli taulaga mū, ‘ona ‘ua lē pa‘ū se tasi o i latou, a ‘ua latou toe fo‘i mai ma le manuia.
55. A o aso ‘ua i ai o Iuta ma Ionatana i le fanua o Kiliata, a o i ai o Simona, lona uso, i Kalilaia i luma o Tulomai,
56. ‘ua fa‘alogo e Iosefa, le atali‘i o Sakaria ma Asaria le ta‘ita‘i, i mea malolosi na faia ma tau‘a sa latou tau ai,
57. ‘ona fa‘apea ane ai lea, “‘Ia faia fo‘i e tā‘ua ni mea e ta‘uleleia ai i tā‘ua; tā ō e tau le tau‘a ma nu‘u ‘ese ‘ua vagaia ai i tatou.”
58. Ma ‘ua poloa‘i e Asaria i lana itūtau‘a ma ‘ua latou o i Samaria.
59. Ma ‘ua ulufafo nai le ‘a‘ai o Korekia ma lana itūtau‘a e fa‘afetaia‘i ‘iā te i latou ma tau ai le tau‘a.
60. Ma ‘ua tuliloaina o Iosefa ma Asaria e o‘o mai i tuā‘oi o Iuta; ma ‘ua pa‘u‘ū i lea aso pe lua afe tagata o le nu‘u o Isaraelu ma ‘ua matuā sōsōla lava le nu‘u.
61. Auā na lē ‘ana‘ana i lā‘ua ‘iā Iuta mōna uso, na manatu i lā‘ua la te faia ni mea e ta‘uleleia ai.
62. Sa lē ‘auai i latou i le gafa o tagata ia na o‘o mai ai le olataga ‘iā Isaraelu.
63. Ma ‘ua matuā fa‘amamaluina e tagata o Iuta ma ona uso i luma o Isaraelu uma ma nu‘u ‘ese uma sa logo ai o latou igoa.
64. Ma ‘ua latou fa‘apotopotoina mai ‘iā te i latou, o fa‘amanū ‘iā te i latou ma le leo tele.
65. Ma ‘ua ō atu Iuta ma ona uso ma ‘ua latou tau le tau‘a ma le fānauga a Esau i le lau‘ele‘ele o lo‘o i le itū i saute; ma ‘ua na maua Heperona mōna faoa ‘a‘ai, a o ona pavali mōna ‘olo sa si‘omia ai, ‘ua na susunuina i le afi.
66. Ma ‘ua si‘i lona togālauapi, ‘ina ‘ia alu ai i le lau‘ele‘ele o tagata nu‘u ‘ese, ‘ua fealua‘i o ia i Samaria.
67. O ona po ia na fasia ai o ositaulaga i le tau‘a, ‘ona ‘ua latou fa‘afiamalolosi ma ‘ua latou ō i le tau‘a ma le lē taupulea.
68. Ma ‘ua afe atu o Iuta i Asetota, i le lau‘ele‘ele o tagata nu‘u ‘ese; ma ‘ua na lepeti o latou fatafaitaulaga ma ‘ua susunu i le afi fa‘atagata o o latou atua; ma ‘ua na maua o vete o ‘a‘ai ma ‘ua toe fo‘i mai i le fanua o Iuta.