1. O le tupu o Aikupito o Tulomaio ‘ua na fa‘apotopotoina le itūtau‘a e pei o le oneone o le matāfaga, ‘atoa ma ni va‘a e tele; ma ‘ua sā‘ili se ala e maua ai i le fa‘a‘ole‘ole le mālō o Alesana ma fa‘aopoopo i lona ia mālō;
2. ma ‘ua alu i Suria, o tautala i ‘upu o le filemū; sa latou tatala fo‘i ‘iā te ia faitoto‘a o latou ‘a‘ai ma fa‘afetaia‘i ‘iā te ia, auā na poloa‘i e le tupu o Alesana ‘ia latou fa‘afetaia‘i ‘iā te ia, auā o le tane ia a lona afafine.
3. ‘Ae a ulu atu loa o Tulomaio i le ‘a‘ai, ‘ona tu‘uina lea e ia leoleoga o fitafita i ‘a‘ai ta‘itasi.
4. Ma ‘ua fa‘alata atu i Asetota, ‘ona latou fa‘aali atu lea ‘iā te ia le malumalu o Petetakona na susunu i le afi ma Asetota mōna faoa ‘a‘ai ‘ua lepetia ma tino oti o ta‘ape‘ape solo ma tu‘ugamau o i latou na fasia i le tau‘a sa latou ati a‘e i le auala.
5. ma ‘ua latou tala atu i le tupu o mea lava ia na faia e Ionatana, ‘ina ‘ia ‘inosia ai o ia; a ‘ua fa‘alologo le tupu.
6. Ma ‘ua fa‘afetaia‘i o Ionatana i le tupu i Iopa ma le mamalu tele; ma ‘ua la feofoa‘i ma ‘ua la tofafā i lea mea,
7. ma ‘ua la ō, o Ionatana ma le tupu, se‘ia o‘o atu i le vaitafe e ta‘ua o Eleutero, ‘ona fo‘i mai lea o Ionatana i Ierusalema.
8. A o le tupu o Tulomaio ‘ua na maua le pule i ‘a‘ai uma e o‘o i le ‘a‘ai tumatafaga o Selukeia ma ‘ua mafaufau o ia i ni togafiti e fa‘aleaga a‘i ‘iā Alesana.
9. Ma ‘ua na ‘auina atu ana savali ‘iā Temetiu, o fai atu, “‘Inā sau ia, ‘ia osi la tā feagaiga; ‘ou te foa‘i atu fo‘i ‘iā te oe lo‘u afafine o lo‘o ‘iā Alesana, ‘ona e pule ai lea i le mālō o lou tamā.
10. Auā ‘ua ‘ou salamō ‘ina ‘ua ‘ou tu‘u atu lo‘u afafine ‘iā te ia; auā na fia fasioti ‘iā te a‘u.”
11. Ma ‘ua ‘upuleagaina Alesana, ‘ona ‘ua manumanu i lona mālō.
12. Ma ‘ua ‘ave‘esea ‘iā te ia lona afafine ma ‘ua tu‘u atu ‘iā Temetiu ma ‘ua la masesei ma Alesana; ma ‘ua aliali lona ‘ino‘ino i ai.
13. Ma ‘ua alu atu Tulomaio i Anetioka ma ‘ua fa‘ae‘e i luga o lona ulu o paleali‘i e lua o Aikupito ma Asia.
14. A o ona po ia sa i ai i Kilikia le tupu o Alesana, auā na fou ‘iā te ia o i latou sa i nu‘u ia.
15. Ma ‘ua fa‘alogo e Alesana i mea a Temetiu, ‘ona alu atu lea e tau ma ia; ma ‘ua fa‘aoso i ai e Tulomaio lana itūtau‘a, ‘ua fa‘afetaia‘i ‘iā te ia ma le ‘au malosi ma ‘ua na tulia.
16. Ma ‘ua sola le tupu o Alesana i Arapi, ‘ina ‘ia sulufa‘i i ai, a ‘ua fa‘amamaluina le tupu o Tulomaio.
17. Ma ‘ua vavae ‘ese le ulu o Alesana e le tagata Arapi o Sapetielu, ‘ua na ‘auina atu ‘iā Tulomaio.
18. A o lona tolu o aso ‘ua oti ai le tupu o Tulomaio ma ‘ua fasia ona tagata sa i ‘olo e tagata sa nonofo i le nu‘u.
19. Ma ‘ua faia Temetiu ma tupu i le tausaga e tasi le selau ma le onogafulu ma le fitu.
20. O aso ia na fa‘apotopoto ai e Ionatana i latou ‘ua i Iuta ‘ina ‘ia latou si‘i le tau‘a i le ‘olo ‘ua i Ierusalema ma ‘ua latou faia ai o mea e tele e fana a‘i.
21. A o ni isi tagata amio leaga sa ‘ino‘ino i lo latou nu‘u, na latou ō atu i le tupu o Temetiu ma ‘ua latou ta‘u atu ‘iā te ia ‘ua vagaia le ‘olo e Ionatana.
22. ‘Ua fa‘alogo i ai o ia, ‘ona ita loa lea ma ‘ua sau loa i Tulomai ma ‘ua tusi mai ‘iā Ionatana ‘ia ‘aua ne‘i vagaia le ‘olo, a ‘ia vave alu atu la te talatala.
23. ‘Ua fa‘alogo ai o Ionatana, ‘ona poloa‘i ai lea ‘ia vagaia pea le ‘olo ma ‘ua na filifilia ni isi a‘i le ‘au toeaina o Isaraelu ma le ‘au ositaulaga, ‘ona latou ‘ana‘ana atu ai lea.
24. Ma ‘ua na ‘ave le auro ma le ario ‘atoa ma ‘ofu ma ni isi mea alofa e tele ma ‘ua alu atu i le tupu i Tulomai ma ‘ua alofaina o ia e le tupu.
25. Ma ‘ua tu‘ua‘i ‘iā te ia nisi tagata amio leaga o lona nu‘u,
26. a ‘ua fai e le tupu ‘iā te ia le mea na faia e i latou na muamua ‘iā te ia ma ‘ua na fa‘amamaluina o ia i luma o ana uō uma lava,
27. ma ‘ua fa‘amaonia ‘iā te ia le tofiga o ositaulaga sili, ma isi fa‘ailoga mamalu uma sa na mua‘i maua ma ‘ua faia o ia ma lana uō sili.
28. Ma ‘ua tagi atu Ionatana i le tupu, ‘ia fa‘amāgaloina i lafoga o Iuta ma itūmālō e tolu, ma Samaria ma lona lau‘ele‘ele ma ‘ua folafola atu ‘iā te ia o taleta e tolu selau.
29. Ma ‘ua loto i ai le tupu ma ‘ua na tusia ‘iā Ionatana o tusi e uiga i mea uma ia, ‘ua i ai ‘upu nei:
30. “O le tupu o Temetiu ‘ua alofa atu i lona uso o Ionatana ma le nu‘u o tagata Iutaia.
31. ‘Ua matou ‘auina atu ‘iā te ‘outou le ata o le tusi na matou tusia i lo matou tamā o Lasetene, ‘ina ‘ia malamalama ai ‘iā te ‘outou.
32. ‘O le tupu o Temetiu ‘ua alofa atu i lona tamā o Lasetene.
33. O le nu‘u o tagata Iutaia, o a matou uō ia, ‘ua latou tausia le mea tonu i la matou fa‘afeagai, ‘ua matou loto e agalelei atu ‘iā te i latou ‘ona o lo latou agalelei mai ‘iā te i matou.
34. O lea ‘ua matou fa‘atonuina, o le lau‘ele‘ele uma lava o Iuta, ma ‘a‘ai e tolu o Samaria, o Lita ma Ramataima ‘ua fa‘aopoopoina i le nu‘u o Iuta, ‘atoa ma lo latou lau‘ele‘ele, ‘ia vavae‘eseina mo i latou uma e osi taulaga i Ierusalema, e sui ai i mea sa talia ai e le tupu mai ‘iā te i latou i tausaga ta‘itasi uma, ‘atoa ma fua o le lau‘ele‘ele ma ona fuāla‘au.
35. O isi fo‘i mea sa matou pule i ai, o mea e sefulua‘i ‘atoa ma lafoga, matou te tu‘uina ‘iā te i latou e āfua mai i le aso nei, e fa‘apea fo‘i lafoga o le masima ma paleali‘i sa molia ‘iā i matou.
36. ‘Ua matou tu‘uina atu mea uma ia ‘iā te i latou, e lē solia se mea e tasi o ia mea e āfua mai i le aso nei ma aso uma o lumana‘i.
37. O lenei la, ‘ia ‘outou fa‘asaga e fai se ata o le tusi nei, ma ‘ia tu‘uina atu ‘iā Ionatana ma ‘ia tu‘ua i le mauga pa‘ia i se tulaga mamalu.’”
38. Ma ‘ua iloa e le tupu o Temetiu ‘ua filemū le lau‘ele‘ele i ona luma ma ‘ua leai sē na te tete‘e atu ‘iā te ia, ‘ona ia fa‘ata‘alolo lea lana itūtau‘a ‘atoa uma, ta‘ito‘atasi i lona lava nu‘u, ‘ua tāofi na o le vaega ‘au o tagata ‘ese na fa‘aoloatau‘a e ia mai motu o nu‘u ‘ese, i le ‘ua ‘avea ai mōna fili o vaega ‘au uma lava a ona tamā.
39. O Terufo, sa mua‘i‘au o ia ‘iā Alesana, ‘ua iloa fo‘i e ia ‘ua muimui ‘iā Temetiu le itūtau‘a uma lava, ‘ona alu lea ‘iā Imelekule, le tagata Arapi sa na tausia Atioko, le atali‘i o Alesana;
40. ma ‘ua tauānau atu ‘iā te ia ‘ia tu‘u mai Atioko ‘iā te ia, ‘ina ‘ia faia ma tupu e sui i lona tamā; ma ‘ua tala atu ‘iā te ia o mea uma na faia e Temetiu, ma le ‘ino‘ino ‘iā te ia o ana ‘au ma ‘ua nofo i lea mea i aso e tele.
41. Ma ‘ua ‘auina atu ana savali i le tupu o Temetiu ‘ina ‘ia tulia i latou ‘ua i le ‘olo i Ierusalema ma i latou ‘ua i ‘a‘ai nofo ‘olo auā sa latou fa‘asaga tau ‘iā Isaraelu.
42. Ma ‘ua ‘auina atu e Temetiu o ana savali ‘iā Ionatana, o fai mai, “E lē gata i lea mea ‘ou te faia mo oe ma lou nu‘u, ‘ae ‘ou te matuā fa‘amamalu ‘iā te oe ma lou nu‘u, i ona aso e tatau ai.
43. A o lenei, e lelei pe a e ‘auina mai ni fitafita e fesoasoani mai ‘iā te a‘u, auā ‘ua alu ‘ese la‘u itūtau‘a ‘atoa uma.”
44. Ma ‘ua ‘auina atu ‘iā te ia e Ionatana i Anetioka o tagata malolosi e tolugaafe ma ‘ua latou ō atu i le tupu ma ‘ua fiafia tele le tupu ‘ona ‘ua latou ō atu.
45. Ma ‘ua fa‘apotopotoina o tagata o le ‘a‘ai, e selau afe ma le luasefulu o afe o tagata ma ‘ua latou loto e fasioti i le tupu.
46. Ma ‘ua sola le tupu i lona maota ma ‘ua pae tau tagata o le ‘a‘ai i auala o le ‘a‘ai ma ‘ua amata ‘ona tau le tau‘a.
47. Ma ‘ua vala‘au mai le tupu i tagata Iuta e fesoasoani atu ‘iā te ia ma ‘ua latou potopoto fa‘atasi uma lava i ona luma, ona ta‘ape‘ape ai lea i latou i le ‘a‘ai.
48. Ma ‘ua latou fasioti i lea aso le sefulu afe o tagata; ma ‘ua latou susunu le ‘a‘ai ma ‘ua latou si‘i se vete e tele i lea aso ma ‘ua latou lavea‘iina le tupu.
49. Ma ‘ua iloa e tagata o le ‘a‘ai ‘ua maua e tagata Iutaia le ‘a‘ai i la latou pule, ‘ona fa‘avaivai lea o latou loto ma ‘ua latou tagi atu i le tupu ma le ‘ai‘oi, o fai atu,
50. “‘Ia tatou lūlū lima, ‘ae ‘aua le toe tau tagata Iutaia ma i matou ma le ‘a‘ai.”
51. Ma ‘ua latou lafoa‘iina o latou ‘au‘upega ma ‘ua latou fa‘alelei. Ma ‘ua fa‘amamaluina tagata Iutaia i luma o le tupu ma luma o i latou uma ‘ua i lona mālō ma ‘ua ta‘uleleia i latou i le mālō ma ‘ua toe fo‘i i Ierusalema ma le vete e tele.
52. Ma ‘ua nofo le tupu o Temetiu i le nofoāli‘i o lona mālō ma ‘ua filemū le lau‘ele‘ele i ona luma.
53. Ma ‘ua na solia o folafolaga uma na ia faia; ma ‘ua la masesei ma Ionatana ma ‘ua na lē taui mai ‘iā te ia e tusa ma lona agalelei atu ‘iā te ia, a ‘ua matuā fa‘atigā ‘iā te ia.
54. ‘Ua mavae atu mea ia, ‘ona toe fo‘i atu lea o Terufo, ‘ua fa‘atasi ma ia o Atioko, o le tama taule‘ale‘a ma ‘ua fai ma tupu ma ‘ua fa‘ae‘e ‘iā te ia le paleali‘i.
55. Ma ‘ua fa‘apotopoto mai ‘iā te ia o vaega ‘au uma lava na fa‘ata‘ape‘ape e Temetiu ma ‘ua latou tau le tau‘a ma ia ma ‘ua sola o ia ma ‘ua liutuaina.
56. Ma ‘ua maua e Terufo ana elefane ma ‘ua na maua Anetioka.
57. Ma ‘ua tusi mai ‘iā Ionatana e le taule‘ale‘a o Atioko, o fai mai, “‘Ou te tu‘u atu ‘iā te oe le tofiga o ositaulaga sili, ‘ou te foa‘i atu le pule i ‘a‘ai e fā, ‘ina ‘ia ‘avea ai oe ma uō a le tupu.”
58. Ma ‘ua na ‘auina mai ‘iā te ia o ipu auro mo lana la‘o‘ai ma ‘ua fa‘ataga fo‘i ‘iā te ia le inu i ipu auro ma le fa‘a‘ofu i le ‘ie pauli ma le fai le fa‘amau auro,
59. ma ‘ua na tofia lona uso o Simona e pule e pau mai i Turo e o‘o atu i le lau‘ele‘ele o Aikupito.
60. Ma ‘ua alu Ionatana ma ‘ua fealua‘i i ‘a‘ai e i tala atu o le vaitafe ma ‘ua fa‘apotopoto mai ‘iā te ia o vaega ‘au a Suria e fesoasoani i ai; ma ‘ua alu i Asekelona ma ‘ua fa‘afetaia‘i ‘iā te ia tagata o le ‘a‘ai e fa‘amamalu ai ‘iā te ia.
61. ‘Ona alu ai lea i Kasa, a ‘ua pupuni e tagata Kasa o latou faitoto‘a ma ‘ua na vagaia ma ‘ua susunu ona faoa ‘a‘ai ma ‘ua na vetea.
62. Ma ‘ua ‘ai‘oi mai tagata Kasa ‘iā Ionatana ma ‘ua lūlū lima ma i latou ma ‘ua na ‘avea o latou atali‘i ma fa‘afo‘iita ma ‘ua na ‘auina atu i latou i Ierusalema ma ‘ua ia fealua‘i i le lau‘ele‘ele e o‘o atu i Tamaseko.
63. Ma ‘ua fa‘alogo e Ionatana ‘ua feosofi ta‘ita‘i ‘au a Temetiu i le ‘a‘ai o Katesa i Kalilaia ma le itūtau‘a tele, i le fia fa‘ate‘a‘eseina o ia i le tausiga o le mālō;
64. ma ‘ua ia fa‘afetaia‘i ‘iā te i latou, a ‘ua tu‘ua lona uso o Simona e tausi i lona lau‘ele‘ele.
65. Ma ‘ua tolauapi o Simona i luma o Petesura, ma ‘ua tau ai i aso e tele ma ‘ua na vagaia i latou.
66. Ma ‘ua latou tagi mai ‘iā te ia i se fa‘alelei ma ‘ua talia e ia; ma ‘ua na tulia i latou ai lea mea ma ‘ua na maua le ‘a‘ai ma ‘ua na tu‘u i ai le leoleoga.
67. A o Ionatana ma lana itūtau‘a ‘ua latou tolauapi i le ‘auvai o Kenesa; a o le vaveao ‘ua latou ala usu ai i le fanua laulelei o Hasora.
68. A o lenei, ‘ua fa‘afetaia‘i ‘iā te i latou i le fanua laulelei le itūtau‘a o nu‘u ‘ese, a ‘ua uma ‘ona tanu a latou ‘au i le mauga ma ‘ua latou sāvavali tonu e fa‘afetaia‘i ‘iā te ia.
69. A o le ‘au na tanu, ‘ua latou tūtūla‘i nai o latou lafitaga ma ‘ua latou feosofi i le tau‘a.
70. Ma ‘ua sōsōla uma o ē sa fa‘atasi ma Ionatana ma ‘ua leai se tasi na totoe ai, ‘ua na o Matatia le atali‘i o Apisaloma ma Iuta le atali‘i o Kalefi, o ta‘ita‘i o le vaega ‘au.
71. Ma ‘ua saeia e Ionatana lona ‘ofu ma ‘ua lu‘ulu‘u le ‘ele‘ele i luga o lona ulu ma ‘ua tatalo;
72. ‘ona toe fo‘i atu lea o Ionatana ‘iā te i latou e tau ai le tau‘a ma ‘ua na tulia i latou ma ‘ua faia‘ina i latou.
73. Ma ‘ua iloa lea e tagata o lana ‘au na sōsōla, ma ‘ua latou fo‘i mai ‘iā te ia ma ‘ua latou tuliloa uma lava le fili fa‘atasi ma ia se‘ia o‘o i Katesa, ‘ua i ai lo latou togālauapi ma ‘ua latou o‘o atu i ai.
74. Ma ‘ua fasia i lea aso o afe e tolu o tagata nu‘u ‘ese ma ‘ua fo‘i mai Ionatana i Ierusalema.