1. Ma ‘ua fealua‘i le tupu o Atioko i le lau‘ele‘ele o le atumauga ma ‘ua fa‘alogo o lo‘o i ai i Peresia le ‘a‘ai o Elumai, le ‘a‘ai matuā mamalu lava, e faula‘i i ai le auro ma le ario;
2. o le malumalu fo‘i e i ai ‘ua matuā fa‘a‘oloaina; ‘ua i ai fo‘i o ufifatafata auro ma ‘ofu tau, ma talitā na tu‘uina i ai e Alesana, le atali‘i o Filipo, le tupu Maketonia, na mua‘i pule i le nu‘u o Eleni.
3. Ma ‘ua alu atu ai, ‘ua taumafai ‘ona pu‘eina le ‘a‘ai ‘ina ‘ia vetea; ma ‘ua na lē mafaia, auā ‘ua iloa lona manatu e tagata ‘ua i le ‘a‘ai,
4. ma ‘ua latou feosofi i le tau‘a ma ‘ua ia sola ‘ese i lea mea, ‘ua alu ma le fa‘anoanoa tele, ‘ua toe aga‘i mai i Papelonia.
5. Ma ‘ua alu atu i Peresia se tasi na te tala‘i atu ‘iā te ia ‘ua lafoia o itūtau‘a sa i le ‘ele‘ele o Iuta;
6. na alu i ai Lusia ma le itūtau‘a ‘ua sili ‘ona malosi ma ‘ua tulia o ia i luma o tagata Iutaia ma ‘ua fa‘amalosia ai i latou nei i le tele o ‘au‘upega ma tagata tau ma le vete matuā tele na latou maua i togālauapi o itūtau‘a na lafoia.
7. Ma ‘ua latou lepetia le mea e ‘inosia sa na fa‘atūina i luga o le fatafaitaulaga ‘ua i Ierusalema, ma ‘ua latou si‘omia le malumalu i ‘aupā vali maualuluga e tusa ma le mea sa i ai muamua, e fa‘apea fo‘i ‘ona fai i Petesura, o le tasi o latou ‘a‘ai.
8. A ‘ua fa‘alogo le tupu i ‘upu ia, ‘ona gatete loa lea o ia ma ‘ua matuā tetemū; ma ‘ua ta‘oto i lona moega ma ‘ua o‘otia i le ma‘i talu o lona fa‘anoanoa, ‘ona ‘ua lē o‘o ‘iā te ia mea sa ia manatu i ai.
9. Na i ai i lea lava mea i aso e tele, auā sa saga tupu pea lona fa‘anoanoa tele ma ‘ua fa‘apea ifo o le a oti ai lava ia.
10. Ma ‘ua vala‘au mai i ana uō uma lava ma ‘ua fai atu ‘iā te i latou, “‘Ua te‘a‘ese le moe i o‘u mata ma ‘ua ‘ou lailoa, ‘ua momomo lo‘u loto ‘ona o le fa‘anoanoa;
11. ma ‘ua ‘ou fa‘apea ifo i lo‘u loto: ‘‘Ua matuā tele le puapuagā ‘ua o‘o mai ‘iā te a‘u ma le tele o galu o le fa‘anoanoa ‘ua lofia ai a‘u, ‘ae sa manuia lava a‘u ma le alofagia i la‘u pule‘aga!’
12. A ‘ua ‘ou manatua nei le leaga na ‘ou fa‘ao‘o ‘iā Ierusalema, ‘ua ‘ou ‘ave‘esea uma lava o vete o le auro ma le ario sa i ai ma ‘ua ‘ou poloa‘i fua lava ‘ina ‘ia fa‘aumatia o ē nonofo i Iuta.
13. O lenei ‘ua ‘ou iloa o le mea lava lea na o‘o mai ai ‘iā te a‘u o nei mea leaga. A o lenei ‘ou te oti ma le fa‘anoanoa tele i le fanua ‘ese.”
14. Ma ‘ua vala‘au mai ‘iā Filipo, o le tasi o ana uō ma ‘ua tofia o ia e pule i lona mālō uma lava,
15. ma ‘ua tu‘u atu ‘iā te ia lona paleali‘i, lona ‘ofu pulupulu ma lana mama, ‘ina ‘ia a‘oa‘o atu ‘iā Atioko, o lona atali‘i, ma tausi ‘iā te ia ‘ina ‘ia ‘avea ma tupu.
16. Ma ‘ua oti ai o le tupu o Atioko i lea mea, i le tausaga e tasi le selau ma le fagafulu ma le iva.
17. Ma ‘ua iloa e Lusia ‘ua oti le tupu, ‘ona ia fa‘anofo lea ma tupu o Atioko lona atali‘i, sa na tausia talu lona itiiti ma ‘ua fa‘aigoa ‘iā te ia o Eupato.
18. A o i latou ‘ua i le ‘olo na latou vagavagai ‘iā Isaraelu i tafatafa o le malumalu; sa latou tauivi pea e fa‘aleaga ‘iā te i latou, sa ‘avea fo‘i i latou ma fa‘alagolago o nu‘u ‘ese.
19. Ma ‘ua manatu o Iuta e fa‘ata‘ape‘ape ‘iā te i latou ma ‘ua na fa‘apotopotoina le nu‘u uma ‘ina ‘ia sisi‘o ai ‘iā te i latou.
20. Ma ‘ua fa‘atasia i latou uma ma ‘ua latou si‘omia i latou i le tausaga e tasi le selau ma le limagafulu,. ma ‘ua latou gaosia ni ‘olo fa‘ata‘avalevale ma ni la‘au e tu‘i a‘i pavali.
21. Ma ‘ua ō ‘ese nisi o ē ‘ua si‘omia ma ‘ua fa‘atasia ma i latou ni nai tagata amio leaga o Isaraelu.
22. Ma ‘ua latou ō atu i le tupu ma ‘ua latou fai atu, “‘E te lē fa‘amasino ‘ea ma taui mo o matou uso se‘ia afea?
23. ‘Ua tonu ‘iā i matou, matou te ‘au‘auna i lou tamā ma sāvavali i ana poloa‘iga ma ‘ana‘ana i ana tulafono;
24. a o tagata o lo matou nu‘u ‘ua ‘alo ‘ese ‘iā i matou ‘ona o lea mea; o so matou e maua, e fasia, ma ‘ua faoa o matou tofi.
25. ‘Ua lē gata ‘iā i matou fo‘i ‘ona fa‘ao‘o i ai o latou lima, ‘ae o‘o lava i nu‘u uma matou te tuā‘oi;
26. a o lenei ‘ua latou vagaia le ‘olo o Ierusalema i le fia maua ma ‘ua latou nofo ‘olo i Petesura;
27. ‘āfai fo‘i e lē vave ‘ona e tāofia i latou, latou te faia nisi mea e sili a‘e ai, ‘ona e lē mafaia ai lea ‘ona e maua i latou.”
28. Ma ‘ua ita le tupu ‘ina ‘ua fa‘alogo i mea ia ma ‘ua na fa‘apotopotoina ana uō uma lava ma ta‘ita‘i ‘au ma ē pule i le ‘au e ti‘eti‘e i solofanua;
29. na ō mai fo‘i ‘iā te ia vaega ‘au o ē fai taui mai nisi mālō ma motu o le sami.
30. I le o le aofa‘i o lana itūtau‘a, o fitafita e sāvavali e selau afe ma le luafulu afe o ē ti‘eti‘e i solofanua ma elefane e tolugafulu ma le lua ‘ua a‘oa‘oina mo le tau‘a.
31. Ma ‘ua latou ui ane i Itumaia ma ‘ua latou tolauapi i Petesura ma ‘ua tau ai le tau‘a i aso e tele ma ‘ua latou faia ni la‘au e tu‘i a‘i pavali; a ‘ua ulufafo tagata Isaraelu ma ‘ua latou susunuina i le afi ma ‘ua latou tau fa‘atamatane.
32. Ma ‘ua tu‘ua e Iuta le ‘olo, ‘ua alu e tolauapi i Petesakara e fa‘asaga atu i le togālauapi o le tupu.
33. Ma ‘ua tula‘i le tupu i le vaveao ma ‘ua fa‘aoso lana itūtau‘a ma le televave i le ala o Petesakara, ma ‘ua sauniuni ‘au i le tau‘a ma ‘ua ili a latou pū.
34. Ma ‘ua latou fa‘aali atu i elefane le sua mūmū o fuāvine ma fuāpeka e fa‘aoso a‘i i latou i le tau‘a.
35. Ma ‘ua latou tufatufa o manu i vaega ‘au ta‘itasi, i le o elefane ta‘itasi ‘ua tofia i ai o tagata e to‘aafe o ē fai ufifatafata fa‘afilifili u‘amea, ma ni pulou ‘apamemea i o latou ulu; ‘ae lima selau tagata filifilia o ē ti‘eti‘e i solofanua ‘ua tutū i ona tafatafa.
36. O i latou ia sa masani ‘ona i ai pea i le mea ‘ua i ai le manu; o mea uma sa alu i ai, ‘ua latou ō i ai fo‘i, ‘ua lē te‘a ‘ese ‘iā te ia.
37. ‘Ua i ai fo‘i ni ‘olo na gaosia i la‘au ‘ua fa‘amauina i ni filifili malolosi i luga o manu ta‘itasi e puipui a‘i ‘iā te ia; a o fitafita e tolugafulu ma le to‘alua o le vaega ‘au ‘ua i ‘olo ta‘itasi, sa tau ai le tau‘a i luga o manu, ma le tagata Initia, o le ta‘ita‘i ia o le manu.
38. Ma ‘ua vaevaeina le toe o le ‘au e ti‘eti‘e i solofanua i vaega e lua ‘ua tu‘uina i lea itū ma lea itū latou te fa‘amalosi i le itūtau‘a ‘iā latou iligāpu ma fa‘aoso i vaega ‘au sāvavali o ana vaega ‘au.
39. Ma ‘ua pupula le lā i talitā auro ma ‘apamemea, ‘ua suluia a‘i loa o mauga ma ‘ua fepulafi e pei o ni sulu mumū.
40. Ma ‘ua tu‘u le tasi vaega o le ‘au a le tupu i mauga maualuluga, a o le tasi vaega i vaimauga, ma ‘ua latou sāvavali ai fa‘avasega ma le fa‘aeteete lelei.
41. Ma ‘ua mata‘utuia o i latou uma ‘ua nonofo i le lau‘ele‘ele i le vāvāō o le ‘au e to‘atele, ma le sāvavali o le vao tagata ma le pa‘ō o ‘au‘upega; auā o le itūtau‘a matuā tele lava ma le malosi.
42. Ma ‘ua oso o Iuta ma lana itūtau‘a e tau ma i latou, ma ‘ua fasia o tagata e ono selau.
43. Ma ‘ua iloa atu e Eleasaro, le atali‘i o Saura, le tasi o elefane ‘ua teuteuina i teu o le tupu, sa maualuga fo‘i ia i ni isi elefane uma; ma ‘ua manatu o ia o lo‘o i ai le tupu;
44. ma ‘ua tonu ‘iā te ia na te lavea‘iina lona nu‘u ma maua ai mo ia le igoa e fa‘avavau.
45. Ma ‘ua tamo‘e atu i ai ma le loto oti i totonu lava o le vaega ‘au, o tā tagata i le itū taumatau ma le itū tauagavale ma sa latou ‘alo ‘ese ‘iā te ia i lea itū ma lea itū.
46. Ma ‘ua alu ifo i vae o le elefane ma ‘ua sulu i ona lalo ma ‘ua na fasia ma ‘ua pa‘ū ifo le manu i ona luga ma ‘ua oti ai o ia i lea mea.
47. Ma ‘ua iloa e tagata Iutaia le malosi o le tupu ma le oso malosi a lana itūtau‘a, ‘ona latou ‘alo ‘ese lea i ai.
48. A ‘ua a‘e le itūtau‘a a le tupu e tau ma i latou i Ierusalema, ma ‘ua tolauapi le tupu e sagai atu i le nu‘u o Iuta ma le mauga o Siona.
49. Ma ‘ua fa‘alelei ma i latou ‘ua i Petesura ma ‘ua latou ulufafo ai le ‘a‘ai, auā sa leai ni mea e ‘ai mo i latou ‘ua vagaia, auā o aso o le sapati o le lau‘ele‘ele.
50. Ma ‘ua maua Petesura e le tupu ma ‘ua na tofia le leoleoga e leoleo i ai.
51. Ma ‘ua tolauapi i luma o le malumalu i aso e tele ma ‘ua na fa‘atūina ai ni ‘olo fa‘ata‘avalevale ma la‘au e tu‘i a‘i pavali ma mea e fana a‘i tao afi mumū, o la‘au fo‘i e fana a‘i o ma‘a ma tao, ma ni ‘aufana e fana a‘i ū, ma ni ma‘atā.
52. A ‘ua faia fo‘i e tagata Iuta ni mea e fana a‘i, ma ‘ua latou tau i aso e tele.
53. ‘Ae ‘ua leai ni mea e ‘ai i le ‘a‘ai, auā o lona fitu lea o tausaga, i le o tagata na ‘aumaia i Iuta ai nu‘u ‘ese ‘ua latou ‘a‘ai o toe mea sa teuina ai.
54. Ma ‘ua to‘aitiiti ai ni isi ‘ua totoe i le mea pa‘ia, auā ‘ua maua i latou i le oge ma ‘ua ta‘ito‘atasi ma alu i lona ‘āiga.
55. Ma ‘ua fa‘alogo e Lusia ‘iā Filipo na tofia e le tupu o Atioko, a o le‘i oti o ia, na te tausia lona atali‘i o Atioko ‘ina ‘ia ‘avea ma tupu;
56. ‘ua toe fo‘i mai o ia a‘i Peresia ma Metai ma lana itūtau‘a na alu ma ia, sa taumafai e ia ‘ona fao le pulega o le mālō.
57. ‘Ua alu loa o Lusia ma ‘ua fai atu i le tupu ma ta‘ita‘i o le ‘au, “‘Ua saga māui la tatou ‘au i aso uma ma ‘ua itiiti la tatou mea e ‘ai ma ‘ua nofo ‘olo le mea ‘ua tatou vagaia ma ‘ua tatau ‘ona tatou fa‘atonu o mea tau le mālō.
58. O lenei, ‘ia tatou fetāgofi i lima taumatau o nei tagata, ma fa‘alelei ma i latou ma lo latou nu‘u ‘atoa;
59. ma fa‘atonu ‘iā te i latou ‘ia latou sāvavali ‘iā latou lava tulafono, e pei o aso muamua; auā ‘ua latou ita mai ‘ona o a latou tulafono ‘ua tatou fa‘aleagaina ma ‘ua latou fai ai o nei mea uma.”
60. Ma ‘ua lelei lea ‘upu i luma o le tupu ma luma o ta‘imua; ma ‘ua ‘auina atu ni savali ‘iā te i latou e fai le fa‘alelei ma ‘ua latou talia;
61. ma ‘ua tautō ai ‘iā te i latou le tupu ma ta‘imua o le ‘au ma ‘ua latou ulufafo nai le ‘olo.
62. Ma ‘ua ulu atu le tupu i le mauga o Siona ma ‘ua iloa le faiga o ‘olo i lea mea; ma ‘ua soli loa le tautoga na ia tautō ai, ma ‘ua poloa‘i ‘ia lepetia le pavali ‘ua si‘omia ai.
63. Ma ‘ua alu ma le televave le tupu ma ‘ua toe fo‘i i Anetioka ma ‘ua maua ai Filipo o pule i le ‘a‘ai; ma ‘ua tau le tau‘a ma ia ma ‘ua maua le ‘a‘ai.