1. O le tolu o tausaga o le nofoa‘iga a le tupu o Pelesara, o a‘u o Tanielu, na ‘ou iloa le fa‘aaliga, e mulimuli ane i le na ‘ou lua‘i iloa.
2. Na ‘ou iloa fo‘i le fa‘aaliga, na ‘ou iloa ai a o i ai a‘u i Susana, i le maota, ‘ua i ai i le itū mālō o Elama; na ‘ou iloa fo‘i i le fa‘aaliga sa a‘u i ai e lata ane i le vaitafe o Ulai.
3. Na ‘ou tepa a‘e ‘ona ‘ou iloa lea, fa‘auta fo‘i, ‘ua tu i tafatafa o le vaitafe o le mamoe po‘a, ‘ua i ai nifo e lua, o nifo fo‘i ‘ua ‘u‘umi, a ‘ua sili ‘ona umi o le tasi i le tasi, o le ‘ua umi fo‘i sa mulia‘i tupu ia.
4. Na ‘ou iloa ‘ua sua le mamoe po‘a i sisifo ma le itū i matū, ‘atoa ma le itū i saute; ‘ua leai fo‘i se manu e tasi ‘ua mafai ‘ona tu i ona luma, ‘ua leai fo‘i se na te lavea‘i mai ai lona lima; a ‘ua ia fai mea ‘ua ia loto i ai ma ‘ua fa‘asilisili lava ia.
5. O a‘u sa a‘u mānatunatu, fa‘auta fo‘i, o le ‘oti po‘a ‘ua sau mai sisifo i le fogā‘ele‘ele uma, a ‘ua lē pa‘i i le lau‘ele‘ele; ‘ua i ai fo‘i i le ‘oti le nifo tele i le vā o ona mata.
6. ‘Ua alu atu lava ia i le mamoe po‘a ‘ua i ai nifo e lua, o le na a‘u iloa o tu i tafatafa o le vaitafe, ‘ua oso atu ‘iā te ia ma lona malosi tele.
7. Na ‘ou iloa o ia, ‘ua ia fa‘alatalata atu i le mamoe po‘a, ‘ua matuā lili ‘iā te ia ma na tuia le mamoe po‘a, ‘ua gaugau ai ona nifo e lua; ‘ua lē lavā lava le mamoe po‘a ‘ona tu i ona luma, a ‘ua na lafotūina ia i le ‘ele‘ele ma soli ‘iā te ia; ‘ua leai lava se na te lavea‘iina le mamoe po‘a a‘i lona lima.
8. ‘Ona fa‘asilisili lava lea o le ‘oti po‘a; ‘ua o‘o ‘ina malosi o ia, ‘ona gaui‘esea lea o le nifo tele; a ‘ua tutupu a‘e ni nifo tetele e fa e sui a‘i, ‘ua fa‘asaga fo‘i i matagi e fa o le lagi.
9. ‘Ua tupu a‘e fo‘i a‘i totonu o le tasi o i latou o le tasi nifo itiiti, ‘ua tupu tele lava ia i le itū i saute, ma sasa‘e ‘atoa ma le nu‘u matagofie.
10. ‘Ua tupu tele fo‘i o ia, ‘ua o‘o i ‘au o le lagi, ma ‘ua na lafotū ifo i le ‘ele‘ele nisi ‘au ‘atoa ma nisi fetū, ma na soli i ai.
11. ‘Ua fa‘asilisili o ia ‘ua o‘o lava i le ‘ave ‘au, na ia ‘ave‘esea le taulaga e fai i aso fai so‘o, ‘ua ia lafotūina fo‘i lona malumalu pa‘ia.
12. ‘Ona tu‘uina atu lea o ‘au, ‘atoa ma le taulaga e fai i aso fai so‘o mo agasala, ‘ua ia lafotūina le ‘upu moni i le ‘ele‘ele, ‘ua ia fai fo‘i lona loto ma ‘ua manuia.
13. ‘Ona ‘ou fa‘alogo lea, ‘ua tautala le tasi o le ‘au pa‘ia, ‘ua fai ane fo‘i le tasi o le ‘au pa‘ia ‘iā te ia lava na tautala, “Se‘ia afea ‘ea le fa‘aaliga i la le taulaga e fai i aso fai so‘o ma le agasala e fa‘atafuna ai, ‘ona tu‘uina atu lea o le malumalu ‘atoa ma ‘au ia solia lava?”
14. ‘Ona fa‘apea mai lea o ia ‘iā te a‘u, “Se‘ia ‘atoa afiafi ma taeao e lua afe ma le tolu o selau, ‘ona fa‘apa‘iaina ai lea o le malumalu.”
15. Na a‘u iloa le fa‘aaliga, o a‘u lava o Tanielu, ‘ona a‘u su‘esu‘e ai lea o le uiga, fa‘auta fo‘i, ‘ua tu mai i o‘u luma se tasi ‘ua tino mai pei se tagata.
16. ‘Ona a‘u lagona lea o le leo o le tagata i le vā o ‘auvai o Ulai, ‘ua vala‘au, ‘ua fa‘apea ane, “Kaperielu e, ‘ia e fa‘amatalaina le fa‘aaliga i lenei tagata.”
17. ‘Ua ia sau e lata ane i le mea na a‘u tu ai; ‘ua sau lava ia, ‘ona a‘u fefe ai lea, ‘ua ‘ou fa‘apa‘ū faō; ‘ona fa‘apea mai lea o ia ‘iā te a‘u, “‘Ia e iloa, le atali‘i e, o le tagata, auā o ona po o le i‘uga e taunu‘u ai le fa‘aaliga.”
18. O lo‘o tautala mai o ia ‘iā te a‘u, ‘ua ‘ou moe gase fa‘afaō lava i le ‘ele‘ele; a ‘ua pa‘i mai o ia ‘iā te a‘u ma na fa‘atūina a‘u i luga.
19. ‘Ua ia fa‘apea mai fo‘i, “Fa‘auta mai, ‘ou te fa‘ailoa ‘iā te oe mea e tutupu i ona po e taufa‘ai‘u ai le to‘asā; auā o ona po ‘ua tu‘upoina e o‘o ai le i‘uga.
20. O le mamoe po‘a na e iloa ‘ua i ai nifo e lua, o tupu ia o Metai ma Peresia.
21. O le ‘oti taufulufulu fo‘i, o le tupu lea o Iavana; a o le nifo tele o i le vā o ona mata, o le tupu muamua lea.
22. ‘Ua gau fo‘i lenā nifo, a ‘ua tutū mai ai isi e fa e sui a‘i, e tutū mai mālō e fa mai le atunu‘u, ‘ae lē o i ai lona malosi.
23. A o‘o i le gata‘aga o latou mālō,pe a fa‘a‘ato‘atoaina agasala a ē agasala,‘ona tu mai ai lea o le tupu mata sauā,na te iloa fo‘i ‘upu e faigatā.
24. E tele lona malosi, ‘ae lē o lona lava malosi;e fa‘asilisili lava ia ‘ona fa‘aumatia.E manuia ia, fai fo‘i lona loto,na te fa‘aumatia i ē malolosi,‘atoa ma le nu‘u pa‘ia.
25. O lona fa‘autauta fo‘i na te fa‘amanuia ai ana sauniga pepelo;e fa‘asilisili o ia i lona loto, na te fa‘aumatia fo‘i tagata e to‘atele,a o maninoa; e tula‘i atu fo‘i o ia i le Ali‘i o ali‘i;e olopalaina, ‘ae lē se lima e olopalaina ai.
26. O le fa‘aaliga o le afiafi ma le taeao sa ta‘ua ‘ua fa‘amaoni lea; ia e pupuni fo‘i le fa‘aaliga, auā e tele ona aso.”
27. O a‘u o Tanielu, sa ‘ou vaivai, na ‘ou ma‘i fo‘i i isi aso; ‘ona ‘ou tula‘i lea, ma a‘u faia le fe‘au a le tupu; na ‘ou ofo tele i le fa‘aaliga, a ‘ua lē iloa e se tasi.