1. A o Tanielu sa ‘ai lava ia i le la‘o‘ai a le tupu, ‘ua sili ‘ona fa‘aaloaloina o ia i uō uma a le tupu.
2. Sa i ai fo‘i le tupua o tagata Papelonia ‘ua igoa ‘iā Pele, sa latou fa‘aaogāina mo ia i aso ta‘itasi uma o le falaoa mata e sefulu ma le lua fua, o mamoe e fagafulu ma vai ‘omea e ono ‘ua tūtūmu i uaina.
3. Sa fa‘aaloalo fo‘i i ai o le tupu, sa alu atu i aso uma lava e ifo atu ‘iā te ia. A o Tanielu sa ifo atu i lona Atua; ma ‘ua fai mai ‘iā te ia e le tupu, “Se ā le mea ‘e te lē ifo atu ai ia Pele?”
4. A ‘ua tali atu i ai e ia, “Auā ‘ou te lē ifo i tupua ‘ua faia i lima, a o le Atua soifua ‘ua na faia le lagi ma le lalolagi ma ‘ua ‘iā te ia le pule i agaga o tagata uma.”
5. Ma ‘ua fai mai le tupu ia Tanielu, “O Pele, ‘ua lē mata ‘ea i se atua soifua ‘iā te oe? ‘E te lē va‘ava‘ai atu ‘ea i le tele o mea e ‘ai ma inu e ia i aso uma?”
6. Ma ‘ua fai atu Tanielu, o soisoi lava ia, “Le tupu e, ‘aua ne‘i sesē oe; auā o le ali‘i lenei o le ‘omea i totonu, a o le ‘apamemea i fafo, e lē faia lava sana ‘āiga e tasi.”
7. ‘Ona ita lea le tupu, ‘ua vala‘au mai o ositaulaga a Pele ma ‘ua fai atu ‘iā te i latou, “‘Āfai tou te lē ta‘u mai po o ai na te ‘ai o mea uma ia, tou te oti lava.
8. ‘Ae ‘āfai tou te fa‘aali tonu mai e ‘ai lava e Pele mea ia, ‘ona oti lea o Tanielu, auā ‘ua na fāifai ia Pele.” Ma ‘ua fai atu Tanielu i le tupu, “‘Ia faia e tusa ma lau ‘upu.”
9. A o ositaulaga a Pele ‘ua to‘afitugafulu i latou, ‘ae le‘i taulia a latou avā ma a latou fānau. Na ō atu le tupu ma Tanielu i le malumalu o Pele;
10. ma ‘ua fai mai o ositaulaga a Pele, “Fa‘auta, matou te ulufafo nei, a o oe, le tupu, ia e laulau mea e ‘ai ma e suia le uaina, ‘ona e punitia lea o faitoto‘a ma fa‘amaufa‘ailogaina i lau mama.
11. A o‘o lava ‘ina e ulufale mai i le taeao, ‘āfai ‘ua e lē maua mai ‘ua ‘aina mea uma e Pele, ia fasiotia lava i matou, po o Tanielu lē ‘ua molimau pepelo ‘iā i matou.”
12. Sa māmāsagia le mea ‘iā i latou, auā na latou ‘elia se ala lilo i lalo o le laulau, sa latou ulufale ai pea ma ‘a‘ai ai taulaga.
13. O lenei, ‘ua ulufafo i latou ia, ‘ona poloa‘i lea o Tanielu i ana ‘au‘auna ‘ia ‘aumaia se lefulefu, ma ‘ua lūlū ai i le fola ‘atoa o le malumalu i luma o le tupu; ma ‘ua latou ulufafo ma pupuni o faitoto‘a ma fa‘amaufa‘ailogaina i le mama a le tupu, ‘ona latou ō ai lea.
14. A o ositaulaga, ‘ua latou ulufale atu i le po, e tusa i la latou masani, ma a latou avā ma a latou fānau, ma ‘ua latou ‘a‘ai ma feinu o mea uma.
15. A ‘ua tula‘i le tupu i le vaveao lava, o Tanielu fo‘i ‘ua fa‘atasi ma ia.
16. Ma ‘ua fa‘apea mai a le tupu: Tanielu e, po ‘ua sao ‘ea o fa‘amaufa‘ailoga?
17. A ‘ua tali atu o ia, “Le tupu e, ‘ua sao lava.”
18. ‘Ua tatala faitoto‘a e le tupu, ‘ona tepa atu loa lea i le laulau, ‘ua ‘alaga ai ma le leo tele, “Pele e! ‘ua e silisili oe, ‘ua leai se pepelo e tasi ‘iā te oe!”
19. Ma ‘ua soisoi o Tanielu ma ‘ua ia tāofi le tupu ne‘i ulufale atu ai, ma ‘ua fai atu, “Fa‘auta i le fola! ‘Ia e mātau po o ai e o latou tulagāvae nei?”
20. Ma ‘ua fai mai le tupu, “‘Ua ‘ou iloa atu tulagāvae o tane, o fafine ma tamaiti.” Ma ‘ua loto tigā le tupu.
21. ‘Ona pu‘e lea i ositaulaga ma a latou avā ma a latou fānau, ma ‘ua latou fa‘aali mai ‘iā te ia o avanoa lilo sa latou ulufale atu ai ma ‘a‘ai o mea sa i luga o le laulau.
22. ‘Ona fasioti ai lea i latou e le tupu, ma ‘ua na tu‘uina Pele i lima o Tanielu, ‘ua na lepetia ia ma lona malumalu.
23. Sa i ai fo‘i i lea mea o le tarako tele, sa ifo atu ‘iā te ia o tagata Papelonia.
24. Ma ‘ua fa‘apea mai le tupu ‘iā Tanielu, “O lenei ‘ua lē toe mafai ‘ona e ta‘u mai e lē se Atua ola lenei; o lea, ia e ifo atu ‘iā te ia!”
25. ma ‘ua tali atu e Tanielu, “‘Ou te ifo atu i le Ali‘i lo‘u Atua, auā o ia lava le Atua soifua; a o lenā e lē se atua ola ia!
26. A o oe, le tupu e, tu‘u mai ‘iā te a‘u le pule, ‘ona ‘ou fasimate lea le tarako e aunoa ma se pelu po o se la‘au.” Ma ‘ua fai mai le tupu, “‘Ou te tu‘u atua!”
27. ‘Ona tago lea o Tanielu i le pulu safeta, ma le ga‘o ma fulufulu o manu, ma ‘ua tunu fa‘atasi ma fai ai pōtoi, ma ‘ua togi atua i le gutu o le tarako; ma ‘ua pā le manava o le tarako. ‘Ona fa‘apea atu ai lea, “Fa‘auta i lē sa ‘outou ifo atu i ai.”
28. ‘Ua logo lea mea i tagata Papelonia, ‘ona matuā ita tele ai lea i latou; ma ‘ua fa‘apotopoto i latou e tete‘e atu i le tupu, o fa‘apea atu, “‘Ua ‘avea le tupu ma tagata Iutaia; ‘ua na lepetia Pele, ‘ua na fasimateina le tarako ma fasiotia ositaulaga.”
29. Ma ‘ua latou fai atu i le tupu ‘ina ‘ua tutū i ona luma, “‘Ia e tu‘u mai Tanielu ‘iā i matou; a leai, ‘ona matou fasioti lea ‘iā te oe ma lou lava ‘āiga.”
30. ‘Ua iloa lava e le tupu ‘ua latou matuā feosofi ‘iā te ia, ‘ua fa‘atauānauina o ia, ma ‘ua tu‘u atu Tanielu ‘iā te i latou.
31. A ‘ua latou lafoina o ia i le lua o leona, ma ‘ua i ai lava ia i aso e ono.
32. ‘Ae sa i ai i le lua o leona e fitu, sa tu‘uina mai ‘iā te i latou i aso ta‘itasi uma o tino tagata e lua ma mamoe e lua; ‘ona lē toe tu‘uina mai ai lava, ‘ina ‘ia latou ‘aina Tanielu.
33. o le perofeta o Sapakuka sa i Iuta lava ia; o ia fo‘i ‘ua na tunuina se mea e ‘ai ma oloina se areto i le ‘ulo, sa aga‘i atu ia i le fanua na te tu‘uina atu i tagata fai seleselega.
34. Ma ‘ua fa‘apea atu le agelu ia Sapakuka, “‘Ia e ‘ave le mea e ‘ai ‘ua ‘iā te oe i Papelonia, ia Tanielu o lo‘o i le lua o leona.”
35. Ma ‘ua tali mai e Sapakuka, “Le Ali‘i e, ‘ou te le‘i iloa atu Papelonia, ‘ou te lē iloa fo‘i le lua.”
36. Ma ‘ua ‘a‘apa atu le agelu a le Ali‘i i lona tumua‘i, ma ‘ua na ‘ave o ia i lona foga, ma ‘ua na tu‘uifo o ia i Papelonia i le malosi o lona agaga.
37. Ma ‘ua ‘alaga ifo o Sapakuka, o fa‘apea atu, “Tanielu e, le ‘au‘auna a le Atua, ‘ia e tago i le mea e ‘ai ‘ua ‘auina mai ‘iā te oe e le Atua.”
38. Ma ‘ua fa‘apea ane a Tanielu, “Le Atua e, ‘ua e manatua mai a‘u, ‘ua e le tu‘ulafoa‘i ‘iā i latou e alolofa atu ‘iā te oe.”
39. ‘Ona tula‘i lea o Tanielu ma ‘ua ‘ai. A o le agelu a le Ali‘i, ‘ua na fa‘afoisia loa o Sapakuka i lona ‘āiga.
40. ‘Ua sau le tupu i lona fitu o aso, ‘ina ‘ia tagi fa‘anoanoa ai ia Tanielu; ma ‘ua fa‘alata i le lua, ma ‘ua ia punou ifo, fa‘auta o lo‘o nofo Tanielu i totonu o leona.
41. Ma ‘ua ‘alaga le tupu ma le leo tele, o fa‘apea ane, “‘Ua e silisili lava oe, le Ali‘i e, le Atua o Tanielu, ma ‘ua e lavea‘i ‘iā te ia mai le lua o leona.” A o i latou na pogai ai lana fa‘asalaga, ‘ua na lafoina i le lua; ma ‘ua ‘aina i latou i ona luma i le ‘emo o le mata.
42. ‘Ona fai ane lea le tupu: ‘Ia matata‘u i le Atua o Tanielu i tatou uma ‘ua nonofo i le lau‘ele‘ele, auā o ia o le Fa‘aola, o fai ni fa‘ailoga ma ni vāvega i le lalolagi, ‘ua na lavea‘iina Tanielu ai le lua o leona.