1. O a‘u fo‘i, na a‘u tu atu i le tausaga muamua o Tariu le Metai, e fesoasoani ma fa‘amalosi ‘iā te ia.
2. “O lenei fo‘i, ‘ou te fa‘aali atu ‘iā te oe le ‘upu moni.
3. Fa‘auta, e toe tutū mai tupu o Peresia e to‘atolu, a o lona to‘afa e sili lava ia ‘ona mau‘oa ‘iā te i latou uma; o lona malosi fo‘i, e maua i lona ‘oloa, na te lagaina mai ai i latou uma e tau ma le mālō o Iavana. E tula‘i fo‘i le tupu lima malosi, e pule lava ia i mālō e tele, ma fai mea na te loto i ai.
4. A o‘o ‘ina tula‘i o ia, ‘ona lepetia lea o lona mālō, ma vaevaeina i matagi e fa o le lagi, ‘ae lē fai ma ana fānau, e lē tusa fo‘i ma lana pule e pule ai o ia; auā e lia‘iina lona mālō, e fai fo‘i mo nisi a o le o i latou.
5. “E malosi fo‘i le tupu o le itū i saute, ma le tasi ali‘i e ‘iā te ia; sili fo‘i lona malosi i lona, e pule fo‘i ia; o lana pule, o le pule tele lea.
6. A o‘o i le tulu‘iga o tausaga, la te soso‘o fa‘atasi; auā o le afafine o le tupu o le itū i saute e sau o ia i le tupu o le itū i matū e fai ai se leleiga; ‘ae lē tumau ‘iā te ia le lima malosi, e lē tumau fo‘i o ia, po o lona malosi; ‘ae tu‘uina atu o ia, ‘atoa ma i latou e molia o ia, ma lē fānaua e ia, ‘atoa ma lē na te fa‘amalosia o ia.“I ia ona po,
7. a o le tātupu o ona a‘a e tu mai ai se tasi i lana nofoa‘iga, e sau fo‘i o ia ma ‘au ma alu atu i le ‘olo o le tupu o le itū i matū, e fai lona loto ‘iā te i latou ma manumālō ai.
8. Na te ‘avea fo‘i fa‘atagataotau‘a i Aikupito o latou atua, ma o latou ali‘i, ‘atoa ma o latou ipu mana‘omia o ario ma auro; e tumau fo‘i o ia i tausaga e sili i tausaga o le tupu o le itū i matū.
9. E alu atu fo‘i o ia i le mālō o le tupu o le itū i saute ma toe fo‘i i lona lava nu‘u.
10. “A o ona atali‘i la te laga mai ma la fa‘apotopoto le vao ‘au e tele; ‘ona matuā sau ai lea o le tasi, e lofia ai e ia le nu‘u ma ui ane ai; ‘ona toe laga mai lea o ia e o‘o i lona ‘olo.
11. E matuā ita fo‘i le tupu o le itū i saute, ‘ona alu atu lea o ia la te tau ma le tupu o le itū i matū; na te ‘aveina atu ‘au e tele lava; ‘ae tu‘uina atu i lana pule le vao ‘au e tele.
12. A ‘ave‘esea fo‘i ia ‘au e tele ‘ona fa‘amaualugaina ai lea o lona loto; e manomānō fo‘i o ē lafotūina e ia, ‘ae lē malosi ai o ia.
13. Auā e toe fo‘i mai le tupu o le itū i matū, na te ‘aveina atu ‘au e sili ‘ona tele i ē na muamua; a mavae isi tausaga e sau ai lava o ia ma ‘au e tele, ‘atoa ma le ‘oloa tele.
14. “O ia ona po fo‘i e to‘atele latou e tutū atu e tete‘e atu i le tupu o le itū i saute; e fa‘amaualuga fo‘i tagata e i lou nu‘u, latou te fa‘ataunu‘u ai le fa‘aaliga, ‘ae pa‘u‘ū i latou.
15. ‘Ona sau ai lea o le tupu o le itū i matū, e tanu e ia se mea maupu‘epu‘e, na te ā‘ea ‘a‘ai nofo ‘olo; o ‘au fo‘i a le itū i saute, ‘atoa ma ona tagata ‘ua filifilia latou te lē tete‘e atu, e leai lava se malosi e tete‘e atu ai.
16. O lē alu atu ‘iā te ia na te faia mea ‘ua ia loto i ai, e leai fo‘i se tasi e tu i ona luma; e tu lava ia i le nu‘u matagofie, e fa‘aumaina fo‘i i lona lima.
17. E fa‘asaga fo‘i o ia ‘ina ‘ia alu atu ma le ‘au tau o lona mālō uma, e fa‘atasi fo‘i ma ‘ia e amiotonu, ma na faia lava; na te avatu fo‘i ‘iā te ia le teine muli ‘ina ‘ia leaga ai le loto o le teine; ‘ae lē tumau ai o ia, e le ‘au fa‘atasi fo‘i ma ia.
18. ‘Ona fa‘asaga lea o ia i nu‘u tu tai ma na faoa nu‘u e tele; a o le tasi ali‘i na te fa‘ai‘uina e ia lona gao; na te fa‘aliliu atu fo‘i ‘iā te ia lea mea, ‘ae lē gaogaoina ai o ia.
19. ‘Ona toe fa‘asaga lea o ia i le ‘olo o lona nu‘u; ‘ae tausuai o ia ma pa‘ū e lē toe iloa fo‘i o ia.
20. “‘Ae tu mai se tasi i lana nofoa‘iga, o lē na te fa‘aui ane le fa‘au taulaga i le nu‘u matagofie o lona mālō; ‘ae mavae nai aso ‘ona fano ai lea o ia, ‘ae lē o se ita po o se tau‘a.
21. ‘Ona tu mai lea i lana nofoa‘iga o lē e ‘inosia, latou te lē tu‘uina atu ‘iā te ia le mamalu o le mālō; ‘ae sau fa‘afifilemū ia, o fa‘aoleolega, fo‘i na te maua mai ai le mālō.
22. O a‘u fo‘i ‘ae lolofi mai e lofia ai i latou mai ona luma, e fa‘aumatia ai i latou, ‘atoa ma le ali‘i o le feagaiga.
23. A uma fo‘i ‘ona soso‘o ma ia, e fai mea pepelo lava ia; auā e alu a‘e lava ia, o se nu‘u itiiti fo‘i e malosi ai o ia.
24. E alu atu o ia ma le fīfīlemū i mea e sili ‘ona lelei o le itū mālō; na te faia fo‘i mea na lē faia e ona tamā, po o tamā o ona tamā; na te tufatufaina ‘iā te i latou o mea faoa ma vete, ‘atoa ma ‘oloa, na te taumafaufau i lona loto e ā‘ea ai ‘olo, se‘ia o‘o i se aso.
25. E fa‘amalosi atu fo‘i o ia ma lona loto ‘atoa e tau ma le tupu o le itū i saute ma le itūtau‘a e to‘atele; o le tupu fo‘i o le itū i saute e laga mai o ia i le tau‘a ma le itūtau‘a tele ma le malosi tele lava; ‘ae lē tumau o ia, auā latou te taupulepule ‘iā te ia.
26. O ē ‘a‘ai i ana mea taumafa, e fano ai o ia, e lolofi mai fo‘i ana ‘au; e to‘atele fo‘i e fasiotia.
27. E finagalo ia tupu e lua e fai mea leaga, la te tala pepelo i le la‘o‘ai e tasi, ‘ae lē manuia ai, auā e o‘o lava le i‘uga i ona po ‘ua ‘atofaina ai.
28. ‘Ona toe fo‘i ai lea o ia i lona nu‘u ma le ‘oloa tele; e ita fo‘i o ia i le feagaiga pa‘ia; na te faia fo‘i lona loto, ‘ona toe fo‘i lea o ia i lona nu‘u.
29. “O ona po ‘ua tu‘upoina e toe, fo‘i mai ai o ia, ma alu atu i le itū i saute; ‘ae lē i‘u fa‘apei o lē na muamua, po o lē mulimuli.
30. Auā e alu atu le fua Kitimo e tete‘e atu ‘iā te ia; e tigāina ai lona loto. ‘Ona toe fo‘i mai ai lea, e ita atu fo‘i o ia i le feagaiga pa‘ia; na te fa‘apea lava ‘ona fai, na te toe fo‘i mai ma fa‘asaga lona manatu i ē ‘ua lafoa‘i le feagaiga pa‘ia.
31. O ‘au fo‘i latou te ‘au ma ia, latou te fa‘aleagaina malumalu e malu ai, latou te ‘ave‘eseina fo‘i le taulaga fai so‘o ma tu‘uina ai le mea ‘inosia e fa‘atafunaina ai.
32. O ē agasala i le feagaiga e leaga i latou ‘iā te ia i fa‘aoleolega; a o le nu‘u o ē ‘ua iloa lo latou Atua latou te fa‘amalolosi ma fai mea tetele.
33. O ē ‘ua popoto i le nu‘u latou te a‘oa‘oina atu i tagata e to‘atele; a o aso e tele e pa‘u‘ū ai i latou i le pelu ma le afi ma le tāfeaga ma le veteina.
34. A pa‘u‘ū fo‘i i latou, latou te maua se fesoasoani, o se fesoasoani itiiti, ‘ae to‘atele e pipi‘i atu ‘iā te i latou ma fa‘aoleolega.
35. E pa‘u‘ū fo‘i nisi o ē popoto, e tofotofoina ai i latou ma fa‘amamāina ai ma fa‘asinasinaina ai, se‘ia o‘o i ona po o le i‘uga; auā e le‘i o‘o i ona po ‘ua tu‘upoina.
36. “O le tupu fo‘i na te faia e tusa ma lona loto, ma fa‘amaualuga o ia e ia ma fa‘asili ‘iā te ia i atua uma; na te faia ‘upu fa‘asausili i le Atua o atua, e manuia fo‘i o ia se‘ia ‘ato‘atoa le to‘asā; auā e faia lava le mea ‘ua tu‘u i ai le pule.
37. Na te lē manatu i le Atua o ona tamā, na te lē manatu i le mana‘o i fafine, na te lē manatu fo‘i i se tasi atua; auā e fa‘asilisili o ia e ia i mea uma.
38. E āva o ia i le atua o ‘olo i le mea e nofo ai o ia o le atua fo‘i sa lē iloa e ona tamā na te āva i ai ma avatu i ai auro ma ario ma ma‘a tāua, ‘atoa ma mea matagofie.
39. E faia lava lea e ia i ‘olo e sili ‘ona malolosi, i le atua ‘ese, o lē e manatua e ia ma fa‘asilisili ‘ona āva i ai; na te tu‘uina atu fo‘i ‘iā te i latou le pule i tagata e to‘atele, na te vaevaeina fo‘i le lau‘ele‘ele e maua ai le taui.
40. “A o‘o i ona po o le i‘uga, ‘ona si‘i atu lea ‘iā te ia o le tau‘a e le tupu o le itū i saute; e pei se afā ‘ona oso atu ‘iā te ia o le tupu o le itū i matū ma kariota ma ē o ti‘eti‘e i solofanua, ‘atoa ma va‘a e tele na te o‘o atu fo‘i i nu‘u ma lolofi i ai, ma ui ane ai.
41. E o‘o atu fo‘i o ia i le nu‘u matagofie, e fa‘aumatia fo‘i nu‘u e tele; ‘ae sao nai lona lima o nu‘u ia, o Etoma ma Moapi, ‘atoa ma ē ‘ua sili i le fānauga a Amoni.
42. Na te fa‘ao‘o atu lona lima i nu‘u, e lē sao fo‘i le nu‘u o Aikupito.
43. ‘Ae pule o ia i ‘oloa, o auro ma ario ‘atoa ma mea matagofie uma o Aikupito; e mulimuli atu fo‘i ‘iā te ia o Lipua ma Aitiope.
44. A o tala mai sasa‘e ma le itū i matū e atuatuvale ai o ia; ‘ona alu atu ai lea o ia ma le ita tele ‘ia fa‘aumatia ma fasiotia tagata e to‘atele.
45. Na te fa‘atūina fale ‘ie o lona maota i le vā o sami, i le mauga matagofie ma le pa‘ia; ‘ae o‘o atu i lona i‘uga, e leai fo‘i se tasi e fesoasoani ‘iā te ia.