1. “O ona po fo‘i ia e tula‘i ai Mekaeli, o le ali‘i sili, o lē na te tula‘i ‘ona o tagata o lou nu‘u; e o‘o mai fo‘i aso vale, e leai sona tusa talu ‘ona fa‘ato‘ā tupu o nu‘u, ‘ua o‘o i ia lava aso; o ona po fo‘i ia e lavea‘iina ai ou tagata, o i latou uma o ē ‘ua tusia i le tusi.
2. E to‘atele fo‘i o ē momoe i le efuefu o le ‘ele‘ele latou te ala mai, o isi i le ola e fa‘avavau, a o isi i le fa‘alumaina ma le ‘inosia e fa‘avavau.
3. O ē popoto fo‘i, e fepulafi i latou fa‘apei o le pupula o le lagi; o i latou fo‘i ‘ua fa‘aliliu ai tagata e to‘atele ia amiotonu e pei o fetū i latou e fa‘avavau fa‘avavau lava.
4. A o oe Tanielu e, ‘ia e pupuni o ia ‘upu ma fa‘amaufa‘ailogaina le tusi, se‘ia o‘o i ona po o le i‘uga; e fetaufetulia‘i tagata e to‘atele, e tupu tele fo‘i le malamalama.”
5. O a‘u o Tanielu, na a‘u va‘ai atu, fa‘auta fo‘i, o isi e to‘alua ‘ua tutū mai, o le tasi i le ‘auvai i le itū vai mai o le vaitafe, a o le tasi i le ‘auvai i lelā itū o le vaitafe.
6. ‘Ona fa‘apea atu lea o le tasi i le tagata na ‘ofu i le ‘ie lino, “‘Ua i luga o le vai o le vaitafe, pe o‘o mai afea le i‘uga o ia mea e ofo ai?”
7. ‘Ona a‘u fa‘alogo lea i le tagata ‘ua ‘ofu i le ‘ie lino, ‘ua i luga o le vai o le vaitafe, ‘ua si‘i i luga i le lagi lona lima taumatau ma lona lima tauagavale, ‘ua tautō fo‘i o ia i le soifua e fa‘avavau, e o‘o ia mea i le tausaga ma tausaga ma le vaeluagalemū o le tausaga; a uma fo‘i ‘ona fa‘ata‘ape‘apeina le malosi o le nu‘u pa‘ia, ‘ona taunu‘u fo‘i lea o na mea uma.
8. Na a‘u fa‘alogo fo‘i, a ‘ua ‘ou le lagona; ‘ona ‘ou fa‘apea atu lea, “Le ali‘i e, pe se a le i‘uga o ia mea?”
9. ‘Ona fa‘apea mai lea o ia, “Tanielu e, ‘inā alu ia; auā na punitia ma fa‘amaufa‘ailogaina o ‘upu se‘ia o‘o i ona po o le i‘uga.
10. E to‘atele ē fa‘amamāina ma fa‘asinasinaina, ma tofotofoina; ‘ae agasala o ē agasala, e lē lagona fo‘i so latou e to‘atasi o ē agasala; a o ē popoto e lagona lava i latou.
11. E āfua i ona po e ‘ave‘eseina ai le taulaga e fai i aso fai so‘o, e o‘o fo‘i i le tu‘uina atu o le mea ‘inosia e fa‘atafunaina ai, e ‘atoa aso e tasi le afe ma le lua o selau ma le ivagafulu.
12. ‘Amu‘ia o lē fa‘atalitali atu ma aulia atu ona aso e afe ma le tolu o selau ma le tolugafulu ma le lima.
13. A o oe ‘ia e alu atu se‘ia o‘o i le i‘uga; auā ‘e te mālōlō, ‘e te tu mai fo‘i i lou tofi pe a o‘o i le i‘uga o aso.”#