1. Na faia e Pelesara le tupu le faigā‘ai tele ma ali‘i e to‘aafe sa ‘iā te ia, ‘ua na inu uaina fo‘i i luma o le to‘aafe.
2. ‘Ua fai ane Pelesara, a o inu uaina, ‘ia ‘a‘ami i ipu auro ma ario na ‘aumaia e Nepukanesa lona tamā nai le malumalu i Ierusalema, ‘ina ‘ia feinu ai le tupu ma ali‘i sa ‘iā te ia, ma ana avā, ‘atoa ma ana palake.
3. ‘Ona latou ‘aumai ai lea o ipu auro na ‘aumaia mai le malumalu o le fale o le Atua Ierusalema, ‘ona feinu ai lea o le tupu ma ali‘i sa ‘iā te ia ma ana avā, ‘atoa ma ana palake.
4. Sa latou feinu uaina ma latou vivi‘i atu i atua auro ma ario, o ‘apamemea, o u‘amea, o la‘au ma ma‘a.
5. O lea lava itū po na o‘o mai ai tamatama‘i lima o le tagata, ma ‘ua tusi i le panisina o le pā puipui ‘ua feagai ma le tu‘ugālamepa i le maota o le tupu; ‘ua iloa fo‘i e le tupu o le lima ‘ua tusi.
6. ‘Ona liua lea o fofoga o le tupu, ‘ua atuatuvale o ia i lona mānatunatu, ‘ua tatalaina so‘otaga o lona pāpātua, o ona tulivae fo‘i ‘ua fa‘afeto‘ai le tasi i le tasi.
7. ‘Ua vala‘au atu le tupu ‘ua leo tele, ‘ia ō mai o va‘afa‘atau, ma le ‘au Kaletaia, ‘atoa ma ē popoto i fetū; ‘ua fai atu le tupu, ‘ua fa‘apea atu i le ‘au popoto o Papelonia, “O le tagata na te faitaulia lenā tusi ma fa‘ailoa mai ‘iā te a‘u lona uiga, e fa‘a‘ofuina o ia i le ‘ofu pauli, e asoa o ia i le filifili auro, e pule fo‘i o ia i le mālō na o le to‘alua e sili ‘iā te ia.”
8. ‘Ona ō mai ai lea o le ‘au popoto uma o le tupu, a ‘ua lē mafaia i latou ‘ona faitau o le tusi ma fa‘ailoa i le tupu lona uiga.
9. ‘Ona atuatuvale tele ai lea o le tupu o Pelesara, ‘ua liua ona fofoga, ‘ua femēmēa‘i fo‘i ali‘i sa ‘iā te ia.
10. ‘Ua ulufale atu le sa‘o tama‘ita‘i i le fale e fai ai taumafataga, ‘ona o ‘upu a le tupu ma ali‘i sa ‘iā te ia; ‘ua fai atu le sa‘o tama‘ita‘i, ‘ua fa‘apea atu, “Le tupu e, ‘ia soifua oe e fa‘avavau; ‘aua ne‘i atuatuvale i lou mānatunatu, ‘aua fo‘i ne‘i liua ou fofoga.
11. O lo‘o i ai i lou mālō le tasi tagata o i ai le agaga o atua pa‘ia, sa iloa fo‘i ‘iā te ia i ona po o lou tamā o le malamalama ma le mafaufau ma le poto e tusa ma le poto o atua, na tofia o ia e lou tamā le tupu o Nepukanesa, o lou lava tamā le tupu e fai ma matai o taulāitu ma va‘afa‘atau ma le ‘au Kaletaia ma ē popoto i fetū.
12. Auā sa iloa i lenā Tanielu, o lē na fa‘aigoaina e le tupu, o Peletisara, o le atamai tele ma le poto, ma le mafaufau, e fa‘amatalaina e ia o li‘a, na te matea mai tupua, e talatalaina e ia mea faigatā; o lenei, ‘ia vala‘auina Tanielu na te fa‘ailoa mai le uiga.”
13. ‘Ona ‘aumaia lea o Tanielu i luma o le tupu; ‘ona fai atu lea o le tupu, ‘ua fa‘apea atu ‘iā Tanielu, “O oe ‘ea o Tanielu mai le tāfeaga o sa Iuta na ‘aumaia e lo‘u tamā, le tupu mai Iuta?
14. ‘Ua ‘ou fa‘alogo i le tala ‘iā te oe, ‘ua ‘iā te oe le agaga o atua, ‘atoa ma le malamalama ma le mafaufau ma le poto ‘ua sili ‘ua ‘iā te oe.
15. ‘Ua uma ‘ona ‘aumaia i o‘u luma le ‘au popoto, o va‘afa‘atau, ‘ina ‘ia latou faitau ai lenā tusi ma fa‘ailoa mai ‘iā te a‘u lona uiga; a ‘ua lē mafaia e i latou ‘ona fa‘ailoa mai o le uiga o le ‘upu.
16. A ‘ua ‘ou fa‘alogo i le tala ‘iā te oe, ‘ua e mafaia ‘ona fa‘amatala uiga ma talatalaina mea faigatā; o lenei, ‘āfai ‘ua e mafaia ‘ona faitau mai o le tusi ma fa‘ailoa mai ‘iā te a‘u lona uiga, e fa‘a‘ofuina oe i le ‘ofu pauli, e asoa fo‘i oe i le filifili auro, e pule fo‘i oe i le mālō na o le to‘alua e sili ‘iā te oe.”
17. ‘Ona tali mai lea o Tanielu, ‘ua fa‘apea mai i luma o le tupu, “Tu‘u ai pea ‘iā te oe au mea alofa, ‘ia e avatu i se tasi au taui; a o le tusi ‘ou te faitauina atu lava i le tupu ma fa‘ailoa ‘iā te ia lona uiga.
18. O oe na le tupu e, na foa‘iina e le Atua silisili ‘iā Nepukanesa lou tamā o le mālō ma le mamalu, ma le vi‘iga ma le fa‘ane‘ene‘ega.
19. O le mamalu fo‘i na ia foa‘iina atu ‘iā te ia, sa gatete ai ma matata‘u ai i ona luma o nu‘u ma atunu‘u ma gagana ‘ese‘ese; na ia fasia lē na ia finagalo i ai, na ia fa‘aola fo‘i i lē na ia finagalo i ai; ‘ina ‘ia fa‘aeaina lē na ia finagalo i ai, na ia fa‘amaulaloina fo‘i lē na ia finagalo i ai.
20. A ‘ua o‘o ‘ina fa‘amaualugaina o lona loto ma ‘ua ma‘a‘a lona loto e fa‘amaualuga ai, ona tuleia lea o ia a‘i lona nofoāli‘i, na ‘ave‘eseina fo‘i ‘iā te ia lona mamalu.
21. Sa tulia fo‘i o ia ‘ua te‘a ma tagata, o lona loto sa liua ‘ua pei o le loto o le manu, sa mafuta fa‘atasi o ia ma asini o le vao; sa taumafa o ia i le mutia pei o povi, sa susū fo‘i lona tino i le sau mai le lagi, ‘ina se‘ia silafia e ia ‘ua pule le Atua silisili i le mālō o tagata, na te tofia i ai lē ‘ua ia finagalo i ai.
22. O oe fo‘i lona alo, Pelesara e, e ui lava ‘ina e silafia ia mea uma, ‘e te le‘i fa‘amaulaloina lou finagalo,
23. a ‘ua e fa‘amaualuga oe i le Ali‘i o le lagi; ‘ua ‘aumaia fo‘i i ou luma o ipu o lona malumalu, ‘ua inu ai uaina e oe ma ali‘i ‘ua ‘iā te oe, o ou faletua ma au palake; ‘ua e vivi‘i atu fo‘i i atua ario ma auro ma ‘apamemea ma u‘amea ma la‘au ma ma‘a, e le va‘ai i latou, e lē lagona, e lē iloa ni mea; a o le Atua ‘ua i lona ‘a‘ao lou manava, ‘ua ‘iā te ia fo‘i ou ala uma, ‘e te le‘i vivi‘i atu i ai.
24. “E i ai ‘ona tu‘uina mai e ia o le lima; ‘ona tusia ai lea o lenei tusi.
25. O lenei le tusi na tusia, MENE, MENE, TEKELE, UPERESA.
26. O le uiga lenei o le ‘UPU, MENE, ‘Ua faitaulia e le Atua lou mālō, ‘ua fa‘ai‘uina.
27. TEKELE, ‘Ua fuatia oe i le fua fa‘atautau, a ‘ua iloa oe ‘ua māmāsagia.
28. PERESA, ‘Ua vaevaeina lou mālō, ‘ua foa‘iina atu ‘iā Metai ma Peresia.”
29. ‘Ua fai atu Pelesara, ‘ona latou fa‘a‘ofu ai lea ‘iā Tanielu i le ‘ofu pauli ma le filifili auro e asoa ai, ma ‘ua latou tala‘i atu ‘ia pule o ia i le mālō na o le to‘alua e sili ‘iā te ia.
30. O le po lava lea na fasiotia ai Pelesara le tupu o Kaletaia.
31. Na maua le mālō o Tariu le Metai i le onogafulu ma le lua o ona tausaga.#