1. ‘Ua finagalo Tariu ‘ia tofia e pule i le mālō o ali‘i sili e tasi le selau ma le to‘aluafulu, latou te i ai i le mālō uma lava.
2. ‘Ua tofia fo‘i ali‘i silisili e to‘atolu, ‘ua i ai Tanielu; latou te pule i ia ali‘i sili, ‘ina ‘ia logologo mai ia ali‘i sili ‘iā te i latou, ‘ina ‘ia lē maumau mea a le tupu.
3. A ‘ua sili lenei Tanielu i ali‘i silisili ma ali‘i sili, ‘ina ‘ua tele lona atamai, sa manatu fo‘i le tupu ‘ia tofia o ia e pule i le mālō uma.
4. ‘Ona tausā‘ili lea e ali‘i silisili ma ali‘i sili ‘ina ‘ia maua se mea a le mālō e fa‘alani ai se sala ia Tanielu; a ‘ua lē maua e i latou se mea e fa‘alani ai po o se mea leaga e tasi; auā sa fa‘amaoni o ia, ‘ua lē maua fo‘i sona sesē e tasi, po o se mea leaga.
5. ‘Ona fa‘apea atu ai lea o ia tagata, “E lē maua e i tatou se mea leaga i lenei Tanielu, pe ‘āfai tatou te lē maua se mea ‘iā te ia i le tulafono a lona Atua.”
6. ‘Ona lolofi atu ai lea o ia ali‘i silisili ma ali‘i sili i le tupu, ‘ua fa‘apea atu ‘iā te ia, “Le tupu e, Tariu, ‘ia soifua oe e fa‘avavau;
7. ‘ua uma ‘ona filifili o ali‘i silisili uma o le mālō, o faipule ma ali‘i sili uma, o tulafale, ‘atoa ma ē pule i le nu‘u, ‘ia fa‘atūina se tulafono a le tupu ma ‘ia fa‘amauina se vavao, ‘ai se tasi na te fa‘atoga atu se mea mai se tasi atua, po o se tagata, ‘ae tau lava o oe e fa‘atoga i ai, le tupu e, i po e tolugafulu, ‘ia lafoina o ia i le lua o leona.
8. O lenei, le tupu e, ‘ia e fa‘amauina, le vavao, ma tusi, le tusi, ‘ina ‘ia lē tālaina, fa‘apei o tulafono a Metai ma Peresia ‘ua lē tālaina.”
9. O le mea lea na tusi ai e le tupu o Tariu le tusi ma le vavao.
10. ‘Ua iloa e Tanielu ‘ua tusia le tusi, ‘ona alu atu ai lea o ia i lona fale, ‘ua avanoa fa‘amalama o lona potu e fa‘asaga i Ierusalema, ‘ua ta‘i fo‘i fa‘atolu i aso ‘ona to‘otuli o ia i ona tulivae ma tatalo ma fa‘afetai i luma o lona Atua, fa‘apei ‘ona masani ai o ia.
11. ‘Ona lolofi ane ai lea o ia tagata, ‘ua maua Tanielu o lo‘o tatalo ma fa‘atoga atu i luma o lona Atua.
12. ‘Ona latou ō atu ai lea, ‘ua fa‘apea atu i le tupu i le vavao a le tupu, “E le‘i tusia ‘ea e oe le vavao, ‘ai se tasi tagata e fa‘atoga, atu i se tasi atua, po o se tasi tagata, ‘ae tau lava o oe e fa‘atoga i ai, le tupu e, i po e tolugafulu, e lafoina o ia i le lua o leona?”‘Ua tali mai le tupu, ‘ua fa‘apea mai, “E moni lava lea mea, fa‘apei o tulafono a Metai ma Peresia e le tālaina.”
13. ‘Ona latou tali atu lea, ‘ua fa‘apea atu i le tupu, “O lenā Tanielu, o le tagata o le tāfeaga o Iuta, e le āva o ia ‘iā te oe, le tupu e ma le vavao na e tusia, a ‘ua tatalo o ia ta‘i fo‘i fa‘atolu i aso.”
14. ‘Ua fa‘alogo le tupu i na ‘upu, ‘ona tigā tele ai lea o ia ‘iā te ia lava ‘ua naunau o ia ‘ia lavea‘iina o Tanielu; ‘ua o‘o ‘ina goto le lā o taumafai pea lava ia ‘ina ‘ia lavea‘i ‘iā te ia.
15. ‘Ona lolofi ane ai lea o ia tagata i le tupu, ‘ua fa‘apea atu i le tupu, “Le tupu e, ‘ia e silafia le tulafono a Metai ma Peresia, e le tālaina lava se vavao, po o se tulafono ‘ua fa‘amauina e le tupu.”
16. ‘Ua fai atu le tupu, ‘ona latou ta‘ita‘iina ane ai lea o Tanielu, ‘ua lafo ‘iā te ia i le lua o leona. ‘Ua fai atu le tupu, ‘ua fa‘apea atu ‘iā Tanielu, “O lou Atua, o lē ‘ua e ‘au‘auna i ai e lē aunoa, o ia na te lavea‘iina oe.”
17. ‘Ua ‘aumai fo‘i le ma‘a, ‘ua tu‘u ai i le gutu o le lua, ‘ona fa‘amaufa‘ailogaina lea e le tupu i lana mama, ‘atoa ma le mama a ali‘i sa ‘iā te ia, ‘ina ne‘i liua le pule ‘iā Tanielu.
18. ‘Ona alu atu lea o le tupu i lona maota ‘ua lē taumafa ia i lea po; e leai fo‘i ni la‘aupese na avane i ona luma, ma ‘ua te‘a ‘iā te ia le moe.
19. ‘Ua tula‘i le tupu i le vave ao, ‘ua fa‘ata‘alise atu i le lua o leona.
20. ‘Ua o‘o ia i le lua, ‘ona ‘alaga atu lea o ia ma le leo fa‘amama‘i ‘iā Tanielu; ‘ua fai atu le tupu, ‘ua fa‘apea atu ‘iā Tanielu, “Tanielu e, le ‘au‘auna a le Atua soifua, ‘Ua mafai ‘ea e lou Atua, o lē ‘ua e ‘au‘auna i ai e lē aunoa, ‘ona lavea‘i ‘iā te oe ai leona?”
21. ‘Ona tali mai lea o Tanielu i le tupu, “Le tupu e, ‘ia soifua oe e fa‘avavau,
22. ‘ua ‘auina mai e lo‘u Atua o lana agelu, ‘ua punitia ai gutu o leona, ‘ua lē afaina ai a‘u; auā ‘ua silafia e ia ‘ua leai sa‘u amio i ona luma; e leai fo‘i se mea leaga ‘ua a‘u faia i ou luma, le tupu.”
23. ‘Ona fiafia tele lea o le tupu ‘ona o ia, ‘ua ia fetalai atu ‘ia ‘aveina a‘e Tanielu a‘i le lua; ‘ona ‘aveina a‘e ai lea o Tanielu a‘i le lua, ‘ua lē afaina lava o ia, auā na ia fa‘atuatua i lona Atua.
24. ‘Ua fai atu le tupu, ‘ona ta‘ita‘iina mai ai lea o ia tagata ē na molia Tanielu ma ‘ua lafo ‘iā te i latou ‘atoa ma a latou fānau ma a latou avā i le lua o leona; ‘ua manumālō leona ‘iā te i latou, ‘ua lamupala o latou ivi uma, a o le‘i o‘o ifo i latou i le tā‘ele o le lua.
25. ‘Ona tusi atu lea o le tupu o Tariu i nu‘u uma, ma atunu‘u ma gagana ‘ese‘ese o ē nonofo i le lalolagi uma, ‘ua fa‘apea atu,“‘Ia tupu tele so ‘outou manuia.
26. ‘Ou te pule ‘ina ‘ia gatete ma matata‘u i luma o le Atua o Tanielu o tagata i itū mālō uma i lo‘u mālō:Auā o ia o le Atua e Soifua,e tumau o ia e fa‘avavau,e lē fa‘aumatia lona mālōma lana pule e o‘o i le gata‘aga.
27. E ana e fa‘aola ma lavea‘i,‘ua faia fo‘i e ia fa‘ailoga ma vāvega i le lagi ma le lalolagi,o lē na lavea‘i ‘iā Tanielu a‘i lima o leona.”
28. Sa manuia fo‘i lenei Tanielu i le nofoa‘iga a Tariu, ‘atoa ma le nofoa‘iga a Kuresa le Peresia.#