Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14

Feagaiga Tuai

Feagaiga Fou

Tanielu 4 O LE TUSI PA'IA - Ekalesia Katoliko Roma (RSCB)

O le Fa‘alauiloga e Nepukanesa

1. O a‘u o Nepukanesa le tupu, o la‘u ‘upu lenei i nu‘u uma ma atunu‘u ma gagana ‘ese‘ese o ē nonofo i le lalolagi uma ia tupu tele so ‘outou manuia.

2. Sa a‘u manatu e tatau ‘ona a‘u fa‘ailoa atu fa‘ailoga ma vāvega na faia ‘iā te a‘u e le Atua silisili ‘ese.

3. O ona fa‘ailoga ‘ua matuā tetele,o ona vāvega ‘ua mamana lava ia;o lona mālō o le mālō e fa‘avavau lea,o lana pule e āu tupulaga lea.

O le Lua o Miti a Nepukanesa

4. O a‘u o Nepukanesa sa a‘u filemū i lo‘u fale, sa a‘u manuia fo‘i i lo‘u maota.

5. Na fai la‘u miti na ‘ou fefe ai, o ‘ou mānatunatu fo‘i i lo‘u moega ‘atoa ma mea na ‘ou va‘aia sa ‘ou atuatuvale ai.

6. ‘Ona a‘u pule lea ‘ia ‘aumaia i o‘u luma le ‘au popoto uma o i Papelonia, ‘ina ‘ia latou fa‘ailoa mai ‘iā te a‘u le uiga o le miti.

7. ‘Ona ō mai ai lea o taulāitu ma va‘afa‘atau ma le ‘au Kaletaia, ‘atoa ma ē o popoto i fetū, ‘ona a‘u ta‘uina atu lea o le miti ‘iā te i latou, a ‘ua latou le fa‘ailoa mai ‘iā te a‘u lona uiga.

8. Mulimuli ane, ‘ua sau i o‘u luma Tanielu, o lona igoa o Peletisara, ‘ua i ai le igoa o lo‘u atua, o lo‘o i ai fo‘i le agaga o atua pa‘ia, ‘ona a‘u ta‘uina atu lea ‘iā te ia la‘u miti, ‘ua fa‘apea atu,

9. “Peletisara e, o le matai o taulāitu, auā ‘ua ‘ou iloa o lo‘o ‘iā te oe le agaga o atua pa‘ia, e leai se mea lilo e faigatā ‘iā te oe; ‘ia e ta‘u mai ‘iā te a‘u o fa‘aaliga na ‘ou va‘aia i la‘u miti, ‘atoa ma lona uiga.

10. O fa‘aaliga ia na a‘u iloa i lo‘u moega;fa‘auta, na a‘u iloa le la‘au i totonu o le lalolagi,‘ua tele lava lona maualuga.

11. ‘Ua tupu tele le la‘au ma ‘ua malosi,o lona maualuga fo‘i ‘ua o‘o i le lagi,‘ua iloa mai o ia i le tulu‘iga o le lalolagi uma.

12. ‘Ua matagofie ona lau ma lona fua ‘ua tele,‘ua i ai fo‘i mea e ‘ai ma mea uma;‘ua fa‘apaoloina i ona lalo ifo o manu o le vao;o ‘ona la ‘ua to‘aga i ai manu felelei, ‘ua ‘a‘ai ai lava o mea ola uma.

13. Na ‘ou va‘aia i fa‘aaliga i lo‘u moega, fa‘auta, o le leoleo, o le ‘ua pa‘ia, ‘ua alu ifo ia mai le lagi.

14. ‘Ua ‘alaga tele o ia, ‘ua fa‘apea atu:‘‘Inā tu‘u ia i lalo le la‘au, ma vavae ‘ese ‘ona la;ma lūlū ‘ese ia ona lau, ma fa‘ata‘ape‘ape ona fuama ‘ia sōsōla manu a‘i ona lalo ifo ma manu felelei a‘i ‘ona la.

15. A o le tagutugutu o lona pogai, tu‘u ai pea ia i le ‘ele‘ele,‘ia mau ai i le fusi u‘amea ma le ‘apamemea i le mutia o le vao;‘ia fa‘asūsūina i le sau mai le lagi.‘Ia fai fo‘i lona tofi fa‘atasi ma manui le mutia o le lau‘ele‘ele.

16. ‘Ia liua lona loto tagata ma ‘ia tu‘uina atu ‘iā te ia le loto o le manu,se‘ia mavae atu ona tausaga e fitu.

17. O le pule a le ‘au leoleo lenei mea,o le ‘upu a le ‘au pa‘ia ‘ua ala ai lenei mea,‘ina ‘ia iloa e tagata ola ‘ua pule le Silisili‘ese i le mālō o tagata,na tu‘uina atu ai i lē ‘ua ia finagalo i ai,e tofia fo‘i e ia e pule i ai tagata ‘ua aupito fa‘atauva‘a.’

18. O le miti lava lenā na ‘ou va‘aia, o a‘u o Nepukanesa le tupu; o oe fo‘i Peletisara e, ‘inā e ta‘u mai ia lona uiga, auā e lē mafaia e le ‘au popoto uma i lo‘u mālō ‘ona fa‘ailoa mai ‘iā te a‘u le uiga; ‘ae mafai ‘iā te oe; auā o lo‘o ‘iā te oe le agaga o atua pa‘ia.”

‘Ua Fa‘amatalaina e Tanielu le Miti a le Tupu

19. ‘Ona femēmēa‘i ai lea o Tanielu, ‘ua igoa ia Peletisara, pe ‘atoa le itūlā e tasi, ‘ua atuatuvale fo‘i i lona mānatunatu. ‘Ona fai atu lea o le tupu, ‘ua fa‘apea atu, “Peletisara e, ‘aua ‘e te atuatuvale i le miti po o lona uiga.”‘Ua tali mai Peletisara, ‘ua fa‘apea mai, “Lo‘u ali‘i e, ‘ia i ai i ē o ita atu ‘iā te oe le miti; ‘ia i ai i ē o fai oe mo latou fili lona uiga.

20. O le la‘au na e silafia, sa tupu tele ma le malosi, o lona maualuga ‘ua o‘o i le lagi, ‘ua iloa mai i le lalolagi uma.

21. O ona lau ‘ua matagofie ma ona fua ‘ua tele, ‘ua i ai fo‘i mea e ‘ai mā mea uma; ‘ua nonofo i ona lalo ifo manu o le vao, ‘ua to‘aga fo‘i i ‘ona la o manu felelei.

22. I le tupu e, o oe lava lea ‘ua tupu tele ma ‘ua malosi, auā o lou mamalu ‘ua tele, ‘ua o‘o i le lagi, o lau pule fo‘i ‘ua o‘o i le tulu‘iga o le lalolagi.

23. Na silafia e le tupu, o le leoleo, o lē ‘ua pa‘ia, ‘ua alu ifo ia mai le lagi, ‘ua fa‘apea atu, ‘‘Inā tu‘u i lalo ia le la‘au ma fa‘atauma‘oi i ai, a o le tagutugutu o lona pogai, tu‘u ai pea ia i le ‘ele‘ele, ‘ia mau ai i le fusi u‘amea ma le ‘apamemea i le mutia o le vao; ia fa‘asūsūina ai fo‘i i le sau mai le lagi, ‘ia fai fo‘i lona tofi fa‘atasi ma manu o le vao, se‘ia mavae atu ona tausaga e fitu.’

24. “Le tupu e, o lona uiga lenei, o le pule lava lenei a lē Silisili‘ese ‘ua o‘o atu i lo‘u ali‘i le tupu:

25. e tulia oe ‘ia te‘a ma tagata, ‘ae mau oe fa‘atasi ma manu o le vao; ‘e te taumafa i le mutia e pei o povi, e susū oe i le sau mai le lagi, e mavae atu ai ou tausaga e fitu, se‘ia e silafia ‘ua pule lē Silisili‘ese i le mālō o tagata, na te tu‘uina atu ai fo‘i i lē ‘ua ia finagalo i ai.

26. Na fetalai mai fo‘i e tu‘u ai pea le tagutugutu o lona pogai; e tumau pea lau nofoa‘iga, e fai mo oe pe a e silafia ‘ua pule Le o i le lagi.

27. O lenei, le tupu e, ‘ia mālie la‘u ‘upu ‘iā te oe, ‘ia e lafoa‘i au agasala, ‘ae fai le amiotonu, ‘ia e lafoa‘i au amio fa‘api‘opi‘o, ‘ae alofa i ē matitiva, pe mafai ‘ona fa‘alevaleva ane ai lou filemū.”

28. Na o‘o ia mea uma ‘iā Nepukanesa le tupu.

29. ‘Ua mavae masina e sefulu ma le lua ona fealua‘i ai lea o ia i luga o le maota o le mālō i Papelonia.

30. ‘Ua fai ane le tupu, ‘ua fa‘apea ane, “E lē o Papelonia tele ‘ea lenei, na a‘u faia i lo‘u i lo‘u malosi tele lava, e fai ma fale o le mālō, ia vi‘ia ai fo‘i lo‘u mamalu?”

31. A o tautala mai le tupu, ‘ua tulei ifo le si‘ufofoga mai le lagi, ‘ua fa‘apea mai, “Nepukanesa e, le tupu, o le fai atu nei ‘iā te oe, ‘ua te‘a ma oe le mālō.

32. E tulia oe ‘ia te‘a ma tagata, ‘e te mau fa‘atasi ma manu o le vao, ‘e te ‘ai i le mutia e pei o povi, e mavae atu ai ou tausaga e fitu, se‘ia e iloa ‘ua pule lē Silisili‘ese i le mālō o tagata, na te tu‘uina atu i ai fo‘i i lē ‘ua ia finagalo i ai.”

33. O lea lava itū aso na taunu‘u ai le ‘upu ‘iā Nepukanesa; ‘ona tulia lea o ia mai tagata, ‘ua ‘ai fo‘i o ia i mutia pei o povi, ‘ua susū lona tino i le sau mai le lagi, ‘ua o‘o ‘ina tutupu o lona lauulu ‘ua pei o fulufulu o aeto ma ona matiu‘u ‘ua pei o atigivae o manu felelei.

‘Ua Vivi‘i atu Nepukanesa i le Atua

34. ‘Ua uma ia aso, ‘ona ‘ou fa‘asaga a‘e ai lea o‘u mata i le lagi, o a‘u o Nepukanesa, ‘ona a‘u toe atamai ai lea; ‘ona ‘ou fa‘afetai ai lea i lē Silisili‘ese, ‘ua ‘ou fa‘ane‘ene‘e atu fo‘i ma vivi‘i atu ‘iā te ia o lē soifua e fa‘avavau,O lana pule o le pule e fa‘avavau lea,o lona mālō fo‘i e āu tupulaga lava lea.

35. O i latou uma o ē nonofo i le lalolagi, ‘ua peiseaī ‘ua leai i latou‘ua ia faia fo‘i e tusa ma lona finagalo i ‘au o le lagi,‘atoa ma ē o nonofo i le lalolagi;e leai se tasi na te tāofia lona ‘a‘aope fai atu ‘iā te ia, “O le a ‘ea le mea ‘e te fai?”

36. O ona po lava ia na ‘ou toe atamai ai; ‘ua toe fo‘i mai ‘iā te a‘u lo‘u mamalu ma lo‘u matagofie, ‘ina ‘ia mamalu ai lo‘u mālō o ‘ou tulafale fo‘i ma ali‘i sa ‘iā te a‘u, ‘ua latou sā‘ili ‘iā te a‘u, ‘ua fa‘atumauina fo‘i a‘u i lo‘u mālō, ma ‘ua fa‘aopoopoina mai ‘iā te a‘u le mamalu e tele.

37. O lenei, o a‘u o Nepukanesa ‘ou te fa‘amanū atu ma vivi‘i atu ma fa‘ane‘ene‘e atu i le Tupu o le lagi, e fa‘amaoni ana galuega uma ma ona ala ‘ua tonu; na te mafaia fo‘i ‘ona fa‘amaulaloina ē o sāvavali ma le fa‘amaualuga.#