1. O le tolu o tausaga o Kuresa le tupu o Peresia sa fa‘aali mai ai le tasi mea ‘iā Tanielu, o lē ‘ua igoa ‘iā Peletisara; e moni le ‘upu, ‘ae tele tau‘a; na ia iloa fo‘i le mea ma na iloa le fa‘aaliga.
2. O ona po ia, o a‘u o Tanielu sa ‘ou fa‘anoanoa ai i vaiasosa ‘ato‘atoa e tolu;
3. e leai se mea lelei na a‘u ‘ai ai, e leai fo‘i se ‘a‘ano o manu, po o se uaina na o‘o i lo‘u gutu, na ‘ou le u‘u ai lava, ‘ua o‘o ‘ina mavae atu vaiasosa e tolu.
4. O le aso e luafulu ma le fa o le masina muamua, sa a‘u i ai i le ‘auvai o le vaitafe tele, o Hitekelu lea.
5. ‘Ona a‘u tepa a‘e lea ma ‘ou va‘ai, fa‘auta fo‘i, o le tasi tagata ‘ua ‘ofu i le ‘ie lino ma ‘ua fusi lona sulugātiti i le auro lelei o Upasa.
6. O lona tino fo‘i ‘ua pei o le tasesa lea ma ona fofoga ‘ua tino mai pei o le uila ma ona mata ‘ua pei o lamepa mumū ia, o ona lima fo‘i ma ona vae ‘ua pei o ‘apamemea ‘ua fa‘apupulaina, o le si‘ufofoga o lana fetalaiga ‘ua pei o le ta‘alili o le vao tagata e to‘atele.
7. A ‘ua na o a‘u lava o Tanielu na iloa le fa‘aaliga; auā o tagata sa matou i ai na lē iloa e i latou le fa‘aaliga, a ‘ua o‘otia i latou i le tetemū tele lava, na latou sōsōla fo‘i ia lalafi ai i latou.
8. ‘Ua tu‘ua to‘atasi lava na o a‘u, ‘ona a‘u iloa lea o lenā mea tele na fa‘aalia mai, ‘ona leai lea o sē toe malosi ‘iā te a‘u; ‘ua mavae lo‘u matagofie, ‘ua ‘ou pulavale, ‘ua leai lava se malosi ‘ua toe ‘iā te a‘u.
9. A ‘ua ‘ou lagona le si‘ufofoga o lana afioga; ‘ua ‘ou lagona le si‘ufofoga o lana afioga, ‘ona ‘ou moegase ai lea o a‘u ‘ua faō, ‘ua faō lava i le ‘ele‘ele.
10. Fa‘auta fo‘i, ‘ua pa‘i mai ‘iā te a‘u le lima ma fa‘ato‘otuli ‘iā te a‘u i o‘u tulivae ma o‘u alofilima.
11. ‘Ona ia fa‘apea mai lea ‘iā te a‘u, “Tanielu e, o le tagata ‘ua alofateleina, ‘ia e mafaufau i ‘upu ‘ou te fai atu ai, ‘iā te oe ma ‘ia e tu i luga; auā ‘ua ‘auina mai nei a‘u ‘iā te oe.” ‘Ua uma ‘ona fetalai mai ‘iā te a‘u o nei ‘upu, ‘ona ‘ou tu ai lea, ‘ua ‘ou gatete.
12. ‘Ona fa‘apea mai ai lea o ia ‘iā te a‘u, “Tanielu e, ‘aua le fefe; auā talu le lua‘i aso na e sauni ai lou loto e mafaufau ma fa‘atigāina oe e oe i luma o lou Atua, sa fa‘afofogaina au ‘upu, ‘ua a‘u sau fo‘i ‘ona o au ‘upu.
13. A o le ali‘i o le mālō o Peresia na ia tete‘e ‘iā te a‘u i po e luafulu ma le tasi; fa‘auta fo‘i, o Mekaeli o so le ‘au ali‘i sili ia, na ia maliu mai e fesoasoani mai ‘iā te a‘u; na tu‘ua fo‘i a‘u i lea mea fa‘atasi ma tupu o Peresia.
14. O lenei, ‘ua a‘u sau e fa‘ailoa atu ‘iā te oe mea e tutupu i lou nu‘u i ona po amulī; auā e tuai ona po o le fa‘aaliga.”
15. ‘Ua ia fetalai mai na ‘upu ‘iā te a‘u, ‘ona ‘ou fa‘asaga lea o‘u mata i le ‘ele‘ele, ‘ua ‘ou le magagana.
16. Fa‘auta fo‘i, o le tasi e pei se tagata ‘ua pa‘i mai i o‘u laugutu; ‘ona ‘ou tautala atu lea, ‘ua fa‘apea atu i lē ‘ua tu mai i o‘u luma, “Le ali‘i e, ‘ua a‘u puapuagātia ‘ona o le fa‘aaliga, ‘ua leai se malosi ‘ua toe ‘iā te a‘u.
17. ‘Ua mafai fa‘apefea le ‘au‘auna a lo‘u nei ali‘i ‘ona tautala ma lo‘u nei ali‘i? auā o a‘u ‘ua leai lava so‘u malosi, ‘ua leai fo‘i se mānava ‘ua toe ‘iā te a‘u.”
18. ‘Ona toe pa‘i mai lea ‘iā te a‘u o le tasi ‘ua, tino mai pei se tagata, ‘ua ia fa‘amalosi mai ‘iā te a‘u.
19. ‘Ua fa‘apea mai o ia, “O oe o le tagata ‘ua alofateleina, ‘aua ‘e te fefe, ‘ia e manuia ‘ia e fa‘amalosi, ‘ia e fa‘amalosi lava.”‘Ua mavae mai lana fetalaiga ‘iā te a‘u, ‘ona ‘ou malosi ai lea ma a‘u fa‘apea atu, “‘Inā fetalai mai ia lo‘u ali‘i; auā ‘ua e fa‘amalosi mai ‘iā te a‘u.”
20. ‘Ona fa‘apea mai ai lea o ia, “‘Ua e iloa ‘ea le mea ‘ua a‘u sau ai ‘iā te oe? O lenei, o le a a‘u toe fo‘i e tau ma i le ali‘i o Peresia; fa‘auta fo‘i, a a‘u alu atu, ‘ona sau ai lea o le ali‘i o Iavana.
21. ‘Ae peita‘i ‘ou te fa‘aali atu ‘iā te oe le mea ‘ua tusia i le Tusi e fa‘amaoni; ‘ua leai fo‘i se tasi e fesoasoani mai ‘iā te a‘u i na mea, ‘ua na o Mekaeli lo ‘outou ali‘i.