1. ‘Ua mavae tausaga e lua, ‘ona fai ai lea o le miti a Farao; fa‘auta fo‘i, ‘ua tu ia i le ‘auvai o le vaitafe.
2. Fa‘auta fo‘i, ‘ua ō a‘e i le vaitafe o povi e fitu tino lelei ma le pepeti, ‘ua latou ‘a‘ai fo‘i le vaofalī.
3. Fa‘auta fo‘i, o isi povi e fitu ‘ua tino leaga ma le pā‘e‘e‘e ‘ua mulimuli ‘ona ō a‘e ‘iā te i latou i le vaitafe, ‘ua latou tutū i tafatafa o isi povi i ‘auvai o le vaitafe.
4. ‘Ua ‘a‘ai fo‘i e povi tino leaga ma le pā‘e‘e‘e i povi e fitu ‘ua tino lelei ma le pepeti. ‘Ona ala mai ai lea o Farao.
5. ‘Ua toe moe fo‘i o ia, ‘ona fai ai lea o le isi ana miti, fa‘auta fo‘i, o ‘au o saito e fitu ‘ua tutupu mai i le ‘au e tasi, ‘ua so‘ona puputa ma le tino lelei mai.
6. Fa‘auta ‘ua mulia‘i tutupu ‘iā te i latou o ‘au saito e fitu e tino leaga ma le mamae i le matagi mai sasa‘e.
7. ‘Ua ‘aina fo‘i e ‘au saito tino leaga o ‘au saito e fitu e tino lelei ma le matutua? ‘Ona ala mai ai lea o Farao; fa‘auta, o le miti lava.
8. ‘Ua o‘o i le taeao, ‘ona atuatuvale ai lea o lona loto, ‘ona ‘ami‘ami ai lea i taulāitu uma o Aikupito ‘atoa ma tagata popoto uma na i ai. ‘Ona tala atu ai lea e Farao o lana miti ‘iā te i latou; ‘ae leai se na te fa‘amatalaina mai ‘iā Farao.
9. ‘Ona fai mai ai lea o lē ‘ua sili i ē tautū uaina ‘iā Farao, ‘ua fa‘apea mai:“‘Ou te manatua i le aso nei lo‘u sesē.
10. Na to‘asā mai Farao i ana ‘au‘auna, ‘ua tu‘u atu ai ‘iā te a‘u ‘ia leoleoina i le fale o le ali‘i e pule i le ‘au e fa‘afeao, o a‘u nei ‘atoa ma lē ‘ua sili i ē fai mea e ‘ai.
11. ‘Ona fai ai lea o a ma miti i le po e tasi, o a‘u lava ma ia, ‘ua ta‘itasi ma fai lana miti e tusa ma le fa‘amatalaga.
12. Na matou i ai i ma le tasi taule‘ale‘a o le Eperu, a o le ‘au‘auna a le ali‘i e pule i le ‘au e fa‘afeao, na ma tala atu ‘iā te ia, ‘ona fa‘amatala mai ai lea e ia ‘iā te i mā‘ua o mā miti, o le tagata ma lana miti na ia fa‘amatala mai.
13. Na taunu‘u lava fa‘apei ‘ona ia fa‘amatala mai ‘iā te i mā‘ua; na ma fa‘afo‘i ‘iā te a‘u i lo‘u faiva, a ‘ua na fa‘atautau ‘iā te ia.”
14. ‘Ona fe‘au atu lea o Farao, ‘ua ‘a‘ami ‘iā Iosefa, ‘ua fa‘avaevave fo‘i ‘ona latou ‘aumai ‘iā te ia a‘i le lua, ‘ua na tafi i lana ‘ava ma sui ona ‘ofu, ‘ona alu atu ai lea ‘iā Farao.
15. ‘Ona fai mai ai lea o Farao ‘iā Iosefa, “‘Ua fai la‘u miti, ‘ae leai sē na te fa‘amatalaina mai ‘iā te a‘u; ‘ua ‘ou fa‘alogo fo‘i i le tala ‘iā te oe, pe a e fa‘alogo i se miti ‘e te iloa ‘ona fa‘amatalaina.”
16. ‘Ona tali atu ai lea o Iosefa ‘iā Farao, ‘ua fa‘apea atu, “E lē o a‘u, a o le Atua na te avatu se tali lelei ‘iā Farao.”
17. ‘Ona tala mai ai lea e Farao ‘iā Iosefa:“Fa‘auta, o la‘u miti na a‘u tu ai i le ‘auvai o le vaitafe.
18. Fa‘auta fo‘i, na ō a‘e i le vaitafe o povi e fitu e tino lelei ma le pepeti, na latou ‘a‘ai i le vaofalī.
19. Fa‘auta fo‘i, e mulimuli ‘iā te i latou ‘ona ō a‘e o isi povi e fitu e matuā tino leaga lava ma le pā‘e‘e‘e, ‘ou te lē iloa lava ni e fa‘apea ‘ona leaga i le nu‘u uma o Aikupito;
20. na ‘aina fo‘i e povi tino leaga ma le pā‘e‘e‘e o povi pepeti e fitu na muamua.
21. ‘Ua o‘o i o latou manava, ‘ae lē iloa lava po ‘ua o‘o i o latou manava, ‘ae peita‘i ‘ua tino leaga pea fa‘apei anamua. ‘Ona ‘ou ala ai lea.
22. Fa‘auta fo‘i, na ‘ou iloa i la‘u miti na fua mai o ‘au saito e fitu i le ‘au e tasi, e so‘ona puputa ma le tino lelei mai.
23. Fa‘auta, na mulimuli ‘ona tutupu mai ‘iā te i latou o isi ‘au saito e fitu e laiti, e tino leaga ma le mamae i le matagi mai sasa‘e.
24. ‘Ona folo ai lea e ‘au saito tino leaga o ‘au saito lelei e fitu. Na ‘ou talaina atu fo‘i i le au taulāitu, ‘ae leai sē na te mafaia ‘ona fa‘amatalaina mai ‘iā te a‘u.”
25. ‘Ona fai atu ai lea o Iosefa ‘iā Farao:“E faitau fa‘atasi miti a Farao; ‘ua fa‘aali atu ai e le Atua ‘iā Farao o le mea o le a na faia
26. o povi lelei e fitu, o tausaga ia e fitu, o ‘au saito lelei e fitu, o tausaga fo‘i ia e fitu; e tasi lava le miti
27. o povi fo‘i e fitu e pā‘e‘e‘e ma le tino leaga na mulimuli ‘ona ō a‘e ‘iā te i latou, o tausaga ia e fitu; o ‘au o saito fo‘i e fitu e leaga ma le mamae i le matagi mai sasa‘e, o tausaga oge ia e fitu.
28. O le ‘upu lava lea ‘ua ‘ou fai atu ai ‘iā Farao, ‘ua fa‘aali atu e le Atua ‘iā Farao o le mea o le a na faia.
29. Fa‘auta, o le a o‘o mai tausaga e fitu e matuā tele ai le mau i le nu‘u uma o Aikupito.
30. ‘Ona mulia‘i o‘o mai ai lea o tausaga oge e fitu, e galo ai le mau uma lava i le nu‘u o Aikupito; e fa‘aumatia ai le nu‘u i le oge.
31. E lē toe iloa fo‘i le mau i le nu‘u ‘ona o le oge e mulimuli i ai; auā e velavela lava ia.
32. Na fo‘i fa‘alua mai le fa‘alepo ‘iā Farao auā o le mea ‘ua matuā fa‘amauina e le Atua e vave fo‘i ‘ona fa‘ataunu‘u mai e le Atua.
33. O lenei, ‘ia sā‘ili e Farao se tagata mafaufau ma le poto ma ‘ia tofia o ia e pule i le nu‘u o Aikupito.
34. ‘Ia fai lea mea e Farao, ‘ia tofia fo‘i matai i le nu‘u ma ‘ia ‘ava‘e lona lima o fua o le fanua o Aikupito i tausaga mau e fitu.
35. ‘Ia latou fa‘aputu fo‘i i le mea e ‘ai uma i ia tausaga, lelei o le a o‘o mai ma ‘ia tu‘u ai saito i le pule a Farao, ma ‘ia latou teua mea e ‘ai i ‘a‘ai.
36. E fai fo‘i lea mea e ‘ai ma mea e teu mā le nu‘u i tausaga e fitu o le oge e i ai i le nu‘u o Aikupito, ‘ina ‘ia lē fano le nu‘u i le oge.”
37. ‘Ua lelei fo‘i lea ‘upu i le manatu o Farao ma le manatu o ana ‘au‘auna uma,
38. ‘Ona fai ane ai lea o Farao i ana ‘au‘auna, “Pe tatou te maua ‘ea sē tusa ma lenei tagata, o lē ‘ua i ai le Agaga o le Atua.”
39. ‘Ona fai mai ai lea o Farao ‘iā Iosefa, “‘Ua fa‘aali, atu e le Atua lea mea uma ‘iā te oe, o le mea lea e leai ai sē tusa ma oe i le mafaufau ma le poto.
40. ‘E te pule oe i lo‘u ‘āiga, o lau lava ‘upu fo‘i e pulea ai lo‘u nu‘u uma, na o le nofoāli‘i ‘ou te sili ai ‘iā te oe.”
41. ‘Ona fai mai, ai lea o Farao ‘iā Iosefa, “Fa‘auta mai, ‘ua ‘ou tu‘u atu ‘iā te oe le pule i le nu‘u uma o Aikupito.”
42. ‘Ona tō ‘ese ai lea e Farao lana mama i lona lima, ‘ua tu‘u mai i le lima o Iosefa, ‘ua fa‘a‘ofu fo‘i ‘iā te ia i ‘ofu ‘ie vavae ma fa‘aasoa fo‘i i le filifili auro i lona ua.
43. ‘Ua na fa‘ati‘eti‘e fo‘i ‘iā te ia i le lua o ona nofoa fa‘ata‘avalevale, ‘ona latou ‘alalaga lea i ona luma, “Ifo ia.” ‘Ua na tu‘u atu fo‘i ‘iā te ia le pule i le nu‘u uma o Aikupito.
44. ‘Ua fai mai fo‘i Farao ‘iā Iosefa, “O a‘u o Farao, e lē si‘i e se tasi lona lima po o lona vae e aunoa ma oe i le nu‘u uma o Aikupito.”
45. ‘Ua fa‘aigoa fo‘i e Farao ‘iā Iosefa o Sapenapaenea; ‘ua avane fo‘i ‘iā te ia o Asenati e fai māna avā, o le afafine ia o Potifere le ositaulaga i Onu; ‘ona alu atu ai le o Iosefa i le nu‘u uma o Aikupito.
46. O le tolugafulu fo‘i o ona tausaga na tu ai Iosefa i luma o Farao le tupu, o Aikupito. ‘Ona alu atu ai lea o Iosefa nai luma o Farao ‘ua ui ane i nu‘u uma o Aikupito.
47. ‘Ua pesi tele mai fua o le fanua i tausaga mau e fitu.
48. ‘Ona ia fa‘aputuina ai lea o mea e ‘ai uma i tausaga e fitu na i ai i le nu‘u o Aikupito, ‘ua na tu‘uina atu le mea e ‘ai i ‘a‘ai; o le mea e ai o le fanua na vagavagaia le ‘a‘ai na ia tu‘uina atu i totonu o lea lava ‘a‘ai.
49. E tele lava saito ‘ua fa‘aputuina e Iosefa pei o le oneone i le sami, ‘ua i‘u ‘ina tu‘ua o le faitau auā ‘ua lē masino lava.
50. Na fānaua fo‘i e Iosefa ona atali‘i e to‘alua a o le‘i o‘o mai tausaga oge, na fānau ai ‘iā te ia e Asenati le afafine o Potifere le ositaulaga i Onu.
51. ‘Ua fa‘aigoa e Iosefa lana ulumatua o Manase “Auā,” ‘ua fa‘apea ane ia, “‘Ua faia e le Atua ‘ina ‘ia galo ‘iā te a‘u lo‘u tigā uma ‘atoa ma le ‘āiga uma, o lo‘u tamā.”
52. ‘Ua ia fa‘aigoa fo‘i i lē ‘ua aupito ane i ai o Efaraima, ‘ua fa‘apea ane ia, “Auā ‘ua fa‘auluolaina a‘u e le Atua i le nu‘u na puapuagātia ai a‘u.”
53. ‘Ua mavae fo‘i le fitu o tausaga mau na i le nu‘u o Aikupito.
54. ‘Ona amata ai lea ‘ona o‘o mai o tausaga e fitu o le oge e fa‘apei ‘ona fai atu ai o Iosefa; ‘ua i ai fo‘i le oge i nu‘u uma a o le nu‘u uma o Aikupito sa i ai mea e ‘ai.
55. ‘Ua matelaina le nu‘u uma o Aikupito, ‘ona ‘alalaga mai ai lea o le nu‘u ‘iā Farao i le mea e ‘ai; ‘ona fai atu ai lea o Farao i tagata uma o Aikupito, “‘Ia ‘outou ō atu ‘iā Iosefa; o le mea e fai atu ai o ia ‘iā te ‘outou, ‘ia ‘outou faia.”
56. ‘Ua i ai fo‘i le oge i nu‘u uma, ‘ona talai ai lea e Iosefa o mea uma na fa‘aputuina ai saito ma na fa‘atau atu i tagata Aikupito; sa velavela fo‘i le oge i le nu‘u o Aikupito.
57. ‘Ua ō mai fo‘i nu‘u uma i Aikupito e fa‘atau saito ‘iā Iosefa; auā sa velavela le oge i nu‘u uma lava.