1. ‘Ona lē mafai ai lea e Iosefa ‘ona ‘o‘ono i luma o latou uma na tutū mai i ona luma, ‘ona ‘alaga ai lea o ia, “‘Ia ō ‘ese tagata uma ‘iā te a‘u.” E le‘i tu mai fo‘i se tasi ‘iā Iosefa ‘ina ‘ua fa‘aali o ia i ona uso.
2. ‘Ua na tagi fo‘i ma le leo tele; ‘ona lagona ai lea e tagata Aikupito, ‘ua lagona fo‘i e le ‘āiga o Farao.
3. ‘Ua fai atu Iosefa i ona uso, “O a‘u o Iosefa, o ola mai pea ‘ea lo‘u tamā?” ‘Ona lē mafai ai lea e ona uso ‘ona tali mai ‘iā te ia; auā ‘ua matuā atuatuvale i ona luma.
4. ‘Ona fai atu ai lea o Iosefa i ona uso:“‘Inā sōsō mai ia ‘iā te a‘u.” ‘Ona latou sōsō mai ai lea. ‘Ona fai atu ai lea o ia, “O a‘u o lo ‘outou uso o Iosefa, na ‘outou fa‘atau mai i Aikupito.
5. O lenei, ‘aua ne‘i tigā ‘outou, pe fai ma mea leaga i o ‘outou manatu ‘ina ‘ua ‘outou fa‘atau mai ‘iā te a‘u i le mea nei; auā na ‘auina mai a‘u e le Atua e muamua ‘iā te ‘outou e fai ma fa‘aola;
6. auā o ia tausaga e lua ‘ua i ai le oge i le nu‘u, o lo‘o totoe fo‘i tausaga e lima e lē i ai se galuega i le suasolo po o se seleselegāsaito.
7. Na ‘auina mai fo‘i a‘u e le Atua e muamua ‘iā te ‘outou e fa‘asaoina ‘outou i le lalolagi, e fa‘aola fo‘i ‘iā te ‘outou i le fa‘aolataga tele.
8. O lenei, e lē o ‘outou na ‘auina mai a‘u ‘i‘inei, a o le Atua; ‘ua ia fai fo‘i a‘u ma tamā o Farao ma ali‘i i lona ‘āiga lima ma pule i le nu‘u uma o Aikupito.
9. ‘Ia ‘outou vave ‘ona ō a‘e i lo‘u tamā ma ‘outou fai atu ‘iā te ia, ‘O fa‘apea mai lou atali‘i o Iosefa, ‘ua fai a‘u e le Atua ma ali‘i o Aikupito uma; ‘ia e sau ‘iā te a‘u, ‘aua ‘e te tuai mai.
10. ‘E te nofo fo‘i i le nu‘u o Kosena, ‘e te latalata mai ‘iā te a‘u, o oe, ma au fānau ma fānau a au fānau ma au mamoe ma au povi, ma au mea uma;
11. ‘ou te tausi fo‘i ‘iā te oe i lea mea, auā e toe lima tausaga o le oge, ‘ina ne‘i fa‘amativaina ai oe, ma lou ‘āiga ma mea uma ‘ua ‘iā te oe.’
12. Fa‘auta, ‘ua iloa mai o ‘outou mata ma mata o lo‘u uso o Peniamina, o lo‘u lava gutu e tautala atu nei ‘iā te ‘outou.
13. ‘Ia ‘outou ta‘u atu fo‘i i lo‘u tamā lo‘u mamalu uma i Aikupito ma mea uma ‘ua ‘outou va‘ai i ai; ‘ia ‘outou fa‘ata‘alise fo‘i ‘ona ‘aumai o lo‘u tamā ‘i‘inei.”
14. ‘Ona fusi ai lea o ia ‘iā Peniamina lona uso ma tagi i lona ua; ‘ua tagi fo‘i Peniamina i lona ua.
15. ‘Ua taufeasogi fo‘i ma ona uso uma ma tagi ‘iā te i latou. Mulimuli ane ‘ona fetautalatala‘i lea ona uso ma ia.
16. ‘Ua logoa fo‘i le tala i le maota o Farao, ‘ua fa‘apea, “‘Ua ō mai uso o Iosefa;” ‘ua fiafia ai Farao ma ana ‘au‘auna.
17. ‘Ona fetalai mai lea o Farao ‘iā Iosefa, “‘Ia e fai atu i ou uso, ‘‘Ia ‘outou faia le mea nei; fa‘ae‘e mea ‘iā ‘outou manu, ma ‘ia ‘outou ō i le nu‘u o Kanana.
18. ‘Ia ‘outou ‘aumai ai lo ‘outou tamā ma o ‘outou ‘āiga ma ‘ia ‘outou ō mai ‘iā te a‘u; ‘ou te avatu ‘iā te ‘outou le lelei o le nu‘u o Aikupito; tou te ‘a‘ai ai mea e sili ‘ona lelei o i le nu‘u.’
19. A o oe, ‘ua o‘o ‘iā te oe le poloa‘iga, ‘‘Ia ‘outou fai le mea nei, ‘ia ‘ave fata fa‘ata‘avalevale ai le nu‘u o Aikupito mo a ‘outou fānau, ma a ‘outou avā ma ‘outou ‘aumai lo ‘outou tamā i le ō mai ai.
20. ‘Aua fo‘i ne‘i manatua a ‘outou mea; auā e ‘iā te ‘outou le lelei o le nu‘u uma o Aikupito.’”
21. ‘Ua fa‘apea ‘ona faia e atali‘i o Isaraelu; ‘ua avatu fo‘i e Iosefa o fata fa‘ata‘avalevale ‘iā te i latou, fa‘apei o le fetalaiga o Farao; na ia avatu fo‘i ‘iā te i latou o oso o le malaga.
22. Na ia avatu fo‘i ‘iā te i latou uma e ta‘itasi ma lona ‘ofu; a o Peniamina, na ia avatu i ai tupe e tolu galau ma ‘ofu e lima.
23. A o lona tamā, ‘ua ia ‘aveina atu i ai nei mea; o asini e sefulu ‘ua ‘ave ai mea lelei a Aikupito ma asini fafine e sefulu ‘ua ‘ave ai saito, ma areto, ‘atoa ma mea e ‘ai mā lona tamā i le malaga.
24. ‘Ona ia ‘a‘auina atu lea o ona uso, ‘ona latou ō ai lea; ‘ua na fai atu fo‘i ‘iā te i latou, “‘Aua ne‘i ‘outou femisa‘i i le ala.”
25. ‘Ua latou ō a‘e a‘i Aikupito, ‘ua ō mai i le nu‘u o Kanana ‘iā Iakopo lo latou tamā,
26. ‘Ona latou ta‘u atu lea ‘iā te ia, ‘ua fa‘apea atu, “O lo‘o ola Iosefa, ‘ua pule fo‘i o ia i le nu‘u uma o Aikupito.” ‘Ona vaivai ai lea o lona loto, auā ‘ua na lē talia a latou ‘upu.
27. A ‘ua latou tautala atu ‘iā te ia i ‘upu uma a Iosefa na ia tautala mai ai ‘iā te i latou; ‘ua ia iloa fo‘i fata fa‘ata‘avalevale na ‘a‘auina mai e Iosefa e ‘a‘ami ‘iā te ia, ‘ona toe malosi ai lea o le loto o Iakopo lo latou tamā.
28. ‘Ona fa‘apea mai ai lea o Isaraelu, “Sōia, o lo‘o ola mai pea lo‘u atali‘i o Iosefa; ‘ou te alu ma te feiloa‘i ma ia manū ‘ou te le‘i oti.”