Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29
  30. 30
  31. 31
  32. 32
  33. 33
  34. 34
  35. 35
  36. 36
  37. 37
  38. 38
  39. 39
  40. 40
  41. 41
  42. 42
  43. 43
  44. 44
  45. 45
  46. 46
  47. 47
  48. 48
  49. 49
  50. 50

Feagaiga Tuai

Feagaiga Fou

Kenese 19 O LE TUSI PA'IA - Ekalesia Katoliko Roma (RSCB)

O le mū o Sotoma

1. ‘Ua o‘o atu agelu e to‘alua i Sotoma i le afiafi, a o nofo Lota i le faitoto‘a o Sotoma, ‘ua iloa atu e Lota, ‘ona tula‘i lea e fa‘afetaia‘i ‘iā te i lā‘ua; ‘ona ifo to‘ele lea o ia.

2. ‘Ua fai atu fo‘i o ia, “Le Ali‘i e, fa‘auta mai, se‘i ‘oulua afe mai i le fale o la ‘oulua ‘au‘auna, ma tofā ai, se‘i mulumulu fo‘i o ‘oulua vae; i le ala usu ai la ‘oulua malaga.”‘Ona tali mai lea o i lā‘ua, “Sōia, auā ma te momoe pea i fafo.”

3. ‘Ona pulunaunau atu lava lea o ia ‘iā te i lā‘ua; ‘ona la ō ane lea ma ia ma ulufale atu i lona fale; ‘ona saunia lea e ia o le mea e ‘ai ma i lā‘ua, ma ‘ua tunu areto e lē fa‘afefeteina, ‘ona la ‘a‘ai ai lea.

4. A o le‘i ta‘o‘oto i lā‘ua ‘ua si‘omia le fale e tagata o lea ‘a‘ai, o tagata lava o Sotoma, o taulele‘a ‘atoa ma toeaina o le nu‘u uma lava mai itū uma.

5. ‘Ua latou vala‘au ‘iā Lota, ‘ua fa‘apea atu, “O ifea ‘ea tagata na ō mai ‘iā te oe i le pō nei? Tu‘u mai ia i lā‘ua ‘iā te i matou nei, ‘ina ‘ia matou iloa i lā‘ua.”

6. ‘Ona ulufafo lea o Lota i le faitoto‘a ‘iā te i latou, ‘ua pupuni le faitoto‘a i ona tua,

7. ‘ua fa‘apea atu, “O‘u uso e, ‘aua lava tou te agaleaga.

8. Fa‘auta mai, o ‘iā te a‘u o‘u afafine e to‘alua, e le‘i iloa tane e i lā‘ua, se‘i ou tu‘uina mai i lā‘ua ‘iā te ‘outou, e faitalia lava ‘outou ‘iā te i lā‘ua; a o na tagata, ‘aua tou te faia se mea ‘iā te i lā‘ua, auā o le mea lava lea na ō mai ai i lalo ifo o lo‘u fale.”

9. ‘Ona fa‘apea mai lea o i latou, “Alu ‘ese ia!” ‘Ua fa‘apea ane fo‘i i latou, “‘Ua sau lenā tagata e ta‘asē, a o le a fai o ia ma fa‘amasino, o lenei, o le a sili le leaga matou te faia ‘iā te oe ‘ae itiiti ‘iā te i lā‘ua.” ‘Ua latou matuā fetuleni mai lava ‘iā Lota ma ‘ua fa‘alatalata mai e sofa‘i i le faitoto‘a.

10. A ‘ua fetāgofi atu ia tagata ‘iā Lota, ‘ua ‘aumai i le fale o i ai i lā‘ua, ‘ona la pupuni lea o le faitoto‘a.

11. A o tagata sa i le faitoto‘a o le fale, ‘ua la fa‘atauaso ‘iā te i latou o tama ‘atoa ma ē matutua; ‘ona lailoa ai lea o i latou i sā‘ili le faitoto‘a.

‘Ua Tu‘ua e Lota o Sotoma

12. ‘Ona fai atu lea o ia tagata ‘iā Lota, “O ai ‘ea nisi o lou ‘āiga o ‘i‘inei? O se tane a sou afafine, po o sou atali‘i, po o sou afafine, ‘atoa ma i latou uma ē ‘ua ‘iā te oe o i le ‘a‘ai, ‘inā ‘ave ‘ese ia i le mea nei?

13. Auā o le a ma fa‘aumatia lenei mea auā ‘ua tele lo latou ‘alaga i luma o le ALI‘I; ‘ua ‘a‘auina mai fo‘i i mā‘ua e le ALI‘I e fa‘aumatia ai.”

14. ‘Ona alu atu lea o Lota ma tautala atu i tane a ona afafine, o ē ‘ua fai avā i ona afafine, ‘ua fa‘apea atu, “‘Inā tutū ia, ‘inā ‘outou ō ‘ese i lenei mea, auā o le a fa‘aumatia e le ALI‘I lenei ‘a‘ai.” A o ia ‘ua pei se tagata faianaga i le manatu o tane a ona afafine.

15. ‘Ua malama a‘e le taeao ‘ona nanati lea o agelu ‘iā Lota, o lo‘o fa‘apea atu, “‘Inā tula‘i ia, ‘ave lau avā ma ou afafine e to‘alua, o lo‘o ‘i‘inei, ‘ina ne‘i malaia oe i le sala a le ‘a‘ai.”

16. ‘Ua fa‘atuatuai o ia, ‘ona fetāgofi lea o ia tagata i lona lima, ma le lima o lana avā, ma lima o ona afafine e to‘alua, ‘ina ‘ua alofaina o ia e le ALI‘I; ‘ua la ta‘ita‘i atu fo‘i ‘iā te ia, ma tu‘u atu ‘iā te ia i tua o le ‘a‘ai.

17. ‘Ua ta‘ita‘iina i latou e i lā‘ua i tua, ‘ona fa‘apea atu lea o ia, “‘Inā sōsōla ia ‘outou, tou te ola ai, ‘aua tou te tepa i tua ‘aua fo‘i tou te tutū i se mea o le fanua laugatasi; a ‘ia sōsōla lava i le mauga ‘ina ne‘i malaia ‘outou.”

18. ‘Ona tali mai lea o Lota ‘iā te i lā‘ua, “Le Ali‘i e, ‘aua lava;

19. fa‘auta mai, ‘ua alofagia lau ‘au‘auna e oe, ‘ua e fa‘ateleina mai fo‘i lou alofa ‘ua e alofa mai ai ‘iā te a‘u, i lou fa‘aola mai ‘iā te a‘u ‘ou te lē lavā sola i le mauga, ne‘i maua a‘u i le leaga, i le ‘ou oti ai.

20. Fa‘auta mai ‘ea, o le ‘a‘ai lelā e lata mai, ‘ou te sola i ai, o si ‘a‘ai itiiti fo‘i lea; se‘i ‘ou sola ane i ai, e lē o si ‘a‘ai itiiti ‘ea? ‘Ona ola ai lea o a‘u.”

21. ‘Ona fa‘apea atu lea o ia, “Fa‘auta, ‘ua ‘ou talia fo‘i lou mana‘o i lenā mea, ‘ou te lē fa‘aumatia lenā ‘a‘ai ‘ua e fai mai ai.

22. ‘Inā e sola atu ia i ai, ‘ia vave; auā ‘ou te lē mafaia ‘ona fai o se mea se‘ia e o‘o atu i ai.”E i ai ‘ona fa‘aigoa ai o lea ‘a‘ai o Soara.

O le Fa‘atafunaga o Sotoma ma Komoro

23. ‘Ua alu a‘e le lā i luga o le lalolagi ma ‘ua o‘o Lota i Soara.

24. ‘Ona fa‘atotō fa‘aua ifo lea e le ALI‘I i Sotoma ma Komoro o le teiō ma le afi mai le ALI‘I mai le lagi.

25. Na ia fa‘aumatia o ia lava ‘a‘ai, ma le fanua laugatasi uma, ma i latou uma sa mau i ia ‘a‘ai, ‘atoa ma mea na tutupu i le ‘ele‘ele.

26. ‘Ua tepa i tua lana avā sa mulimuli atu ‘iā te ia, ‘ona liua lea o ia ma tupua masima.

27. ‘Ua ala usu Aperaamo i le taeao i le mea sa tu ai o ia i luma o le ALI‘I;

28. ‘ua ia va‘ai atu i Sotoma ma Komoro, ma le fanua laugatasi uma, ‘ua iloa atu fa‘auta fo‘i, ‘ua alu a‘e le asu o le nu‘u e pei o le asu o se umu.

29. ‘Ua fa‘aumatia e le Atua o ‘a‘ai o le fanua laugatasi, ‘ona manatua lea e le Atua o Aperaamo, ma ‘ona ‘auina o Lota ai le malaia, ‘ina o fa‘aumatia e ia o ‘a‘ai sa mau ai Lota.

O le Tupuga o Tagata Moapi ma Tagata Amoni

30. ‘Ua alu a‘e fo‘i Lota nai Soara, ‘ona mau ai lea o ia i le mauga, fa‘atasi ma ona afafine e to‘alua; auā ‘ua fefe o ia i mau i Soara; ‘ua mau fo‘i i le ana, o ia ma ona afafine e to‘alua,

31. ‘Ona fai atu lea o lē matua i le itiiti, “‘Ua toeaina lo tā‘ua tama, e leai fo‘i se tane i le nu‘u e sau ‘iā te i tā‘ua e pei o le masani a le lalolagi uma.

32. Sau ia, se‘i tā fa‘ainua lo tā tamā i le uaina, ‘ona tatou ta‘o‘oto ai lea ma ia, ‘ina ‘ia tutupu ai ‘iā te i tā‘ua ni fānau ai lo tā tamā.”

33. ‘Ua fa‘ainua e i lā‘ua lo la tamā i le uaina i lea lava pō, ‘ona alu ane ai lea o lē matua, ma la ta‘o‘oto ma lona tamā; a ‘ua lē iloa e ia ‘ona ta‘oto o ia ma ‘ona toe tula‘i.

34. ‘Ua o‘o i le taeao, ‘ona fai atu ai lea o lē matua i le itiiti, “Fa‘auta mai, o anapō na ma ta‘o‘oto ai ma lo tā tamā; se‘i tā toe fa‘ainu ‘iā te ia i le uaina i le pō nanei, i le ē alu ane ai fo‘i lua te ta‘o‘oto ma ia, ‘ina ‘ia tutupu ai ‘iā te i tā‘ua ni fānau ai lo tā tamā.”

35. ‘Ua la toe fa‘ainua fo‘i lo la tamā i le uaina i lea po, ‘ona tula‘i ane lea o lē itiiti, ma la ta‘o‘oto ma ia; ‘ua lē iloa fo‘i e ia ‘ona ta‘oto o ia, ma ‘ona toe tula‘i.

36. ‘Ona totō ai lea o afafine e to‘alua o Lota, i lo la tamā.

37. ‘Ua fānau e lē matua o le tama tane, ma ‘ua fa‘aigoa ‘iā te ia, o Moapi; o ia o le tupuga o sa Moapī; ‘ua o‘o mai i nei ona po.

38. O lē itiiti fo‘i, na fānau o ia o le tama tane, ma ‘ua fa‘aigoa ‘iā te ia o Pename; o ia o le tupuga o le fānauga a Amoni ‘ua o‘o mai i nei ona po.