Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29
  30. 30
  31. 31
  32. 32
  33. 33
  34. 34
  35. 35
  36. 36
  37. 37
  38. 38
  39. 39
  40. 40
  41. 41
  42. 42
  43. 43
  44. 44
  45. 45
  46. 46
  47. 47
  48. 48
  49. 49
  50. 50

Feagaiga Tuai

Feagaiga Fou

Kenese 32 O LE TUSI PA'IA - Ekalesia Katoliko Roma (RSCB)

‘Ua Sauni le Mea Alofa a Iakopo mā Esau

1. ‘Ua alu Iakopo i lana malaga, ‘ua fetaia‘i ma ia agelu a le Atua.

2. ‘Ua fa‘apea fo‘i a Iakopo ‘ina ‘ua iloa atu ‘iā te i latou, “O le ‘au a le Atua lenā;” ‘ona fa‘aigoa atu lea e ia lenā mea o Maanaima.

3. ‘Ua ‘a‘auina atu fo‘i e Iakopo ni ē muamua atu i le fe‘au i lona uso o Esau, i le nu‘u o Seira, o le nu‘u o Etoma.

4. ‘Ua ia fai atu fo‘i ‘iā te i latou, ‘ua fa‘apea atu, “‘Ia ‘outou fa‘apea atu i lo‘u ali‘i o Esau, o lo‘o fa‘apea mai lau ‘au‘auna o Iakopo, ‘‘Ua ‘ou āumau ma Lapana ma ou nofo ai ‘ua o‘o mai i nei ona po;

5. ‘ua ‘iā te a‘u fo‘i o povi ma asini ma mamoe ma ‘au‘auna tane, ma ‘au‘auna fafine; ‘ua ‘ou ‘a‘auina atu fo‘i e ta‘u atu ai i lo‘u ali‘i, ‘ina ‘ia alofagia a‘u e oe.’”

6. ‘Ua fo‘i mai ‘iā Iakopo ē na ‘a‘auina e ia, ‘ua fa‘apea mai, “Na matou o‘o atu i lou uso o Esau, o lo‘o ‘ua maliu mai fo‘i o ia ma tagata e to‘afagalau ma ia, e fa‘afetaia‘i ‘iā te oe.”

7. ‘Ona mata‘u tele ai lea o Iakopo, ma ‘ua atuatuvale; ‘ona vaeluaina lea e ia o tagata sa ‘iā te ia, ‘atoa ma lafu mamoe ma lafu povi ma kamela i vaega e lua.

8. ‘Ua fa‘apea fo‘i o ia, “‘Āfai e sau Esau i le tasi vaega ma fafasi ai, ‘ona sao lea o le isi vaega ‘ua totoe.”

9. ‘Ua fa‘apea fo‘i a Iakopo:“Le ALI‘I e, le Atua o lo‘u tamā o Aperaamo, o le Atua fo‘i o lo‘u tamā o Isaako, o lē na fa‘apea mai ‘iā te a‘u, ‘‘Inā e toe fo‘i atu i lou nu‘u ma lou ‘āiga, ‘ou te agalelei atu fo‘i ‘iā te oe;’

10. ‘ou te lē aogā lava i mea alofa uma ma le fa‘amaoni uma ‘ua e faia i lau ‘au‘auna; auā na ‘ou la‘asia mai i Ioritana nei, na o a‘u ma lo‘u to‘oto‘o; a o lenei, ‘ua ‘ou sau ma vaega e lua.

11. ‘Ou te ‘ai‘oi atu, ‘ia e lavea‘i mai ‘iā te a‘u a‘i le lima o lo‘u uso, o le lima lava o Esau; auā ‘ou te fefe ‘iā te ia ‘ina ne‘i sau ia ma fasia a‘u ma tinā, ‘atoa ma fānau.

12. Na e fa‘apea mai fo‘i, ‘‘Ou te agalelei atu lava ‘iā te oe, ‘ou te faia fo‘i lau fānau ‘ia pei o le oneone i le sami, e lē mafaitaulia ‘ina ‘ua tele.’”

13. Sa nofo ai fo‘i o ia i lea po; na ia ‘ave fo‘i ni mea na ‘iā te ia e fai ma mea alofa i lona uso o Esau;

14. o ‘oti fafine e lua selau, ma ‘oti po‘a e luafulu, o mamoe fafine e lua selau, ma mamoe po‘a e luafulu,

15. o kamela fānanau e tolugafulu ma a latou tama, o povi fafine e fagafulu, ma povi po‘a e sefulu, o asini fafine e luafulu, ma tama‘i asini e sefulu.

16. ‘Ona tu‘uina atu lea e ia o lafu ta‘itasi i lima o ana ‘au‘auna; ‘ua fa‘apea atu fo‘i i ana ‘au‘auna, “‘Ia muamua atu ‘outou i o‘u luma ma ‘ia vā a‘i lea lafu ma lea lafu.”

17. ‘Ua ia fai atu fo‘i i lē a muamua atu, ‘ua fa‘apea atu, “Pe a lua fetaia‘i ma lo‘u uso o Esau, a fesili mai ‘iā te oe, e fa‘apea mai, ‘O ai lou matai? A ē alu ifea? o ai ‘ea e ana ia mea e muamua atu ‘iā te oe?’

18. ‘Ona e tali atu ai lea, ‘O mea a lau ‘au‘auna o Iakopo ia; o mea alofa ‘ua ‘aumai i lo‘u ali‘i o Esau; fa‘auta fo‘i, o lo‘o mulimuli mai o ia ‘iā te i matou.’ ”

19. ‘Ua fa‘apea fo‘i ‘ona fai atu o ia i lona to‘alua ma lona to‘atolu, ma ē mulimuli atu uma lava, i lafu na fa‘apea atu, “‘Ia fa‘apea lava ‘ona ‘outou tautala atu ‘iā Esau pe a ‘outou fetaia‘i ma ia.

20. ‘Ia ‘outou fa‘apea atu fo‘i, ‘Fa‘auta, o lo‘o mulimuli mai lau ‘au‘auna o Iakopo ‘iā te i matou.’” Auā na fa‘apea a ia, “‘Ou te fa‘alaulelei ‘iā te ia i le mea alofa o lo‘o o muamua atu ‘iā te a‘u, mulimuli ane fo‘i ‘ou te iloa atu i ona fofoga; atonu e tali lelei mai o ia ‘iā te a‘u.”

21. ‘Ona muamua atu lea ‘iā te ia o le mea alofa; a o ia ‘ua nofo lava o ia i le toagalauapi i lea po.

‘Ua Fetaia‘i Iakopo ma le Tagata i le po i Penieli

22. ‘Ua ia tula‘i fo‘i i lea po ma ‘ave ana avā e to‘alua ma ana ‘au‘auna fafine e to‘alua ma ona atali‘i e to‘asefulu ma le to‘atasi ma la‘asia atu i le asaga o Iapoka.

23. ‘Ua ia ‘ave ‘iā te i latou ma momoli atu ‘iā te i latou i le tasi itū o le alia, ‘ua ‘aveina atu fo‘i i ai o ana mea.

24. ‘Ua tu‘ua fo‘i Iakopo e to‘atasi;‘Ua la ivi fo‘i ma le tasi tagata ‘ua o‘o ‘ina aoina.

25. ‘Ua iloa fo‘i e ia ‘ua lē mālō ia ‘iā te ia, ‘ona pa‘i atu lea o ia i le fa‘iga o lona suilapalapa, ‘ona se‘e lea o le fa‘iga o le suilapalapa o Iakopo ‘ina o la fagatua ma ia.

26. ‘Ua fa‘apea mai fo‘i o ia, “Tu‘u mai ia o a‘u a ‘ou alu, auā ‘ua ao.”A ‘ua tali atu ia, “‘Ou te lē tu‘uina atu lava oe se‘ia e fa‘amanuia mai ‘iā te a‘u.”

27. ‘Ona fa‘apea mai lea o ia ‘iā te ia, “O ai ‘ea lou igoa?”‘Ona tali atu ai lea o ia, “O a‘u o Iakopo.”

28. ‘Ona fa‘apea mai lea o ia, “E lē toe ta‘ua lou igoa o Iakopo, a o Isaraelu, auā e pei o se ali‘i ‘ua e finau i le Atua ‘atoa ma tagata, ma ‘ua e manumālō.”

29. ‘Ua fesili atu fo‘i Iakopo, ‘ua fa‘apea atu, “‘Inā ta‘u mai ia o lou igoa.”‘Ona tali mai lea o ia, “Se a le mea ‘ua e fesili mai ai i lo‘u igoa?” ‘Ona fa‘amanuia lea o ia ‘iā te ia i lea mea.

30. ‘Ona fa‘aigoa atu lea e Iakopo o lea mea o Penieli; auā ‘ua fa‘apea a ia, “Na ‘ou iloa ai le Atua ‘ua ma fesagai lava, a ‘ua lavea‘iina a‘u.”

31. Na alu a‘e le lā o ui ane o ia i Penueli, ‘ua setusetu fo‘i lona vae.

32. O le mea lea ‘ua lē ‘a‘ai ai le fānauga a Isaraelu i le ‘ua na meme‘i, o lo‘o i le fa‘iga o le suilapalapa, ‘ua o‘o mai i nei ona po; auā na pa‘i atu o ia i le fa‘iga o le suilapalapa o Iakopo i le ‘ua na meme‘i.