1. Na i ai fo‘i le oge i le nu‘u, ‘ae ‘ese le ulua‘i oge sa i ona pō o Aperaamo. ‘Ona alu ai lea o Isaako i Kira ‘iā Apimeleko le tupu o tagata o Filisitia.
2. ‘Ua fa‘aali mai le ALI‘I ‘iā te ia, ‘ua fa‘apea mai:“‘Aua ‘e te alu ifo i Aikupito, a ‘ia e nofo i le nu‘u ‘ou te fai atu ai ‘iā te oe.
3. ‘Ia e nofo fa‘aaumau i lenei nu‘u ‘ou te i ai fo‘i ‘iā te oe, ma ‘ou fa‘amanuia ‘iā te oe, auā ‘ou te foa‘i atu ‘iā te oe ma au fānau ia nu‘u uma lava; ‘ou te fa‘ataunu‘uina fo‘i le tautoga na a‘u tautō ai ‘iā Aperaamo lou tamā.
4. ‘Ou te fa‘ato‘ateleina fo‘i au fānau e pei o fetū o le lagi ma ‘ou foa‘iina atu i au fānau ia nu‘u uma, o lau fānau fo‘i e manuia ai nu‘u uma o le lalolagi.
5. Auā na fa‘alogo Aperaamo i a‘u ‘upu ma na tausi i a‘u sauniga, ma a‘u poloa‘iga ma a‘u fa‘atonuga ma a‘u tulafono.”
6. ‘Ona nofo ai lea o Isaako i Kira.
7. ‘Ona fesili mai ai lea o tagata o le nu‘u i lana avā, ‘ona fai atu ai lea o ia, “O lo‘u tuafafine ia;” auā na fefe o ia e fai atu, “O la‘u avā ia,” sa fa‘apea o ia, “Ne‘i fasia a‘u e tagata o le nu‘u ‘ona o Repeka; auā o ia ‘ua lālelei.”
8. ‘Ua loa ‘ona nofo ai o ia, ‘ona va‘ai atu ai lea o Apimeleko le tupu o Filisitia i le fa‘amalama, fa‘auta fo‘i, ‘ua iloa, ‘ua ta‘a‘alo Isaako ma Repeka lana avā.
9. ‘Ona vala‘au atu ai lea e Apimeleko ‘iā Isaako, ‘ua fa‘apea atu, “Fa‘auta ‘ea, o lau avā lava ia, pe se a fo‘i le mea na e fai mai ai, ‘o lo‘u tuafafine ia?’”‘Ona fai mai ai lea o Isaako ‘iā te ia, “Auā na a‘u fa‘apea, ne‘i ‘ou oti ‘ona o ia.”
10. ‘Ona fa‘apea atu ai lea o Apimeleko, “Se a lenei mea ‘ua e faia ‘iā te i matou? ‘Ana mao atu se tasi o le nu‘u i lau avā po ‘ua o‘o mai ‘iā te i matou le agasala ‘ona o oe.”
11. ‘Ona fetalai atu ai lea o Apimeleko i le nu‘u uma, ‘ua fa‘apea atu, “O sē papa‘i atu i lenei tagata po o lana avā e matuā oti lava ia.”
12. ‘Ona lūlūina lea e Isaako o saito i lea nu‘u, na maua ai fo‘i le ta‘iselau i fua i lea tausaga; na fa‘amanuia fo‘i e le ALI‘I ‘iā te ia.
13. ‘Ua tagata ola lenei tagata, ‘ua tupu pea lava, ‘ua atili ai ‘ua o‘o ‘ina matuā tagata ola lava ia;
14. auā sa ‘iā te ia le lafu mamoe ma lafu povi ma ‘au‘auna e to‘atele; ‘ua loto leaga fo‘i Filisitia ‘iā te ia.
15. O vai‘eli uma fo‘i na ‘eli e ‘au‘auna a lona tamā i ona po o Aperaamo lona tamā, na tatanu e Filisitia ma fa‘atūtūmu i ‘ele‘ele.
16. ‘Ua fai atu fo‘i Apimeleko ‘iā Isaako, “‘Ia e alu ‘ese ‘iā te i matou auā ‘ua sili lava oe ‘iā te i matou.”
17. ‘Ona alu ‘ese ai lea o Isaako, ‘ua tō lona fale ‘ie i le vanu o Kira, ‘ua nofo ai.
18. ‘Ua toe ‘eli fo‘i e Isaako o vai‘eli na latou ‘eli i ona po Aperaamo lona tamā, auā na tatanu e Filisitia ‘ina ‘ua oti o Aperaamo; ‘ua ia fa‘aigoaina i igoa na fa‘aigoa ai e lona tamā.
19. ‘Ua ‘eli ‘au‘auna a Isaako i le vanu, ‘ona maua ai lea o le vaipuna.
20. ‘Ona fefinaua‘i ai lea o ē leoleo manu a Kira ma leoleo manu a Isaako, ‘ua fa‘apea ane, “O lo matou vai lea;” ‘ua ia fa‘aigoa le vai‘eli, o Eseki, auā na latou fefinaua‘i ma ia.
21. ‘Ua latou toe ‘eli le tasi vai, ‘ona latou toe fefinaua‘i ai lea; ‘ua ia fa‘aigoa ai o Setani.
22. ‘Ua tu‘ua e ia lea mea, ‘ua ‘eli le tasi vai; ‘ua latou lē fefinaua‘i ai, ‘ona ia fa‘aigoa ai lea o Reopo, ‘ua fa‘apea ane, “Auā ‘ua fa‘alauteleina nei e le ALI‘I se mea e nonofo ai, tatou te uluola ai i le nu‘u.”
23. ‘Ona ia alu a‘e ai lea i lea mea i Peresepa.
24. ‘Ona fa‘aali mai ai lea o le ALI‘I ‘iā te ia i lea lava po, ‘ua fa‘apea mai, “O a‘u o le Atua o Aperaamo lou tamā; ‘aua ‘e te fefe, auā ‘ou te ‘iā te oe, ‘ou te fa‘amanuia fo‘i ‘iā te oe, ma fa‘ato‘ateleina lau fānau, ‘ona o la‘u ‘au‘auna o Aperaamo.”
25. ‘Ua ia fai ai le fatafaitaulaga ma vala‘au i le suafa o le ALI‘I; ‘ua ia tō ai fo‘i lona fale ‘ie, ‘ua ‘eli ai fo‘i e ‘au‘auna a Isaako le vai‘eli.
26. ‘Ona alu atu ai lea ‘iā te ia Apimeleko mai Kira, o i latou ma Aasata o le tasi o ana uō, ‘atoa ma Fikolu, le ali‘i e pule i ana ‘au.
27. ‘Ona fai ane ai lea o Isaako ‘iā te i latou, “Se a le mea ‘ua ‘outou ō mai ai ‘iā te a‘u, auā ‘ua ‘outou ‘ino‘ino ‘iā te a‘u, ‘ua ‘outou tulia fo‘i a‘u?”
28. ‘Ona latou fai atu ai lea, “‘Ua matou matuā iloa ‘ua ‘iā te oe le ALI‘I, ‘ona matou fa‘apea ai lea, ‘iā tatou faia nei se tautoga o i matou lava ma oe, ‘ia tatou faia fo‘i la tatou mavaega ma oe;
29. ‘e te lē agaleaga mai lava ‘iā te i matou, pei ‘ona matou lē tagofia oe, pei ‘ona matou faia fo‘i ‘iā te oe na o le lelei, ma matou tu‘u atu ‘iā te oe e alu ma le filemū; ‘ua fa‘amanuia nei oe e le ALI‘I.”
30. ‘Ua ia sauni se taumafataga mo i latou, ‘ua latou ‘a‘ai ma inu.
31. ‘Ua latou tula‘i i le taeao, ‘ua tautō le tasi i le tasi, ‘ona tu‘uina atu lea o i latou e Isaako, ‘ona latou ō ‘ese ai lea ‘iā te ia ma le filemū.
32. O lea lava aso ‘ua ō mai ai ‘au‘auna a Isaako, ‘ua ta‘u mai ai ‘iā te ia i le vai‘eli na latou ‘elia, ‘ua fa‘apea mai ‘iā te ia, “‘Ua matou maua le vai.”
33. ‘Ua ia fa‘aigoa ai o Sepa, o le mea lea ‘ua igoa ai le ‘a‘ai o Peresepa, ‘ua o‘o i lenei aso.
34. ‘Ua o‘o Esau i ona tausaga e fagafulu, ‘ona fai avā, ai lea ‘iā Iutiti le afafine o Peeri, o le sa Hetī ma Pasemeta le afafine o Aluna o le sa Hetī.
35. ‘Ua fai i lā‘ua ma fa‘atigā loto ‘iā Isaako ma Repeka.