Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29
  30. 30
  31. 31
  32. 32
  33. 33
  34. 34
  35. 35
  36. 36
  37. 37
  38. 38
  39. 39
  40. 40
  41. 41
  42. 42
  43. 43
  44. 44
  45. 45
  46. 46
  47. 47
  48. 48
  49. 49
  50. 50

Feagaiga Tuai

Feagaiga Fou

Kenese 42 O LE TUSI PA'IA - Ekalesia Katoliko Roma (RSCB)

O le Tala i le Malaga a Atali‘i o Iakopo i Aikupito e Fa‘atau ai Saito

1. ‘Ua iloa e Iakopo ‘ua i Aikupito saito, ‘ona fai atu ai lea o Iakopo i ona atali‘i, “Se a le mea tou te feva‘aia‘i ai?”

2. ‘Ua na fai atu fo‘i, “Fa‘auta, ‘ua ‘ou fa‘alogo e i ai saito i Aikupito; ‘ia ‘outou ō ifo i ai ma fa‘atau mai ai ma tatou, ‘ina ‘ia tatou ola ai, ‘ae ‘aua le oti.”

3. ‘Ona ō ifo ai lea o uso o Iosefa e to‘atinoagafulu e fa‘atau saito i Aikupito.

4. A o Peniamina le uso o Iosefa, na lē ‘auina ia e Iakopo fa‘atasi ma ona uso, auā na fa‘apea o ia, ‘ina ne‘i o‘o ‘iā te ia se mea leaga.

5. Na ō fo‘i atali‘i o Isaraelu e fa‘atau fa‘atasi ma ē na ō e fa‘atau auā na i ai le oge i le nu‘u o Kanana.

6. ‘Ua pule fo‘i Iosefa i le nu‘u, o ia lava na fa‘atau atu i tagata uma o le nu‘u; ‘ona ō mai lea o uso o Iosefa, ‘ua latou ifo to‘ele ‘iā te ia.

7. ‘Ua va‘ai atu Iosefa i ona uso, ‘ona iloa lea o i latou, a ‘ua fai ia fa‘atagata ‘ese o ia ‘iā te i latou ma ‘ua tautala fa‘asiasia ‘iā te i latou, ‘ua fai atu ‘iā te i latou, “Maifea ‘outou?”‘Ona latou tali mai ai lea, “Matou te ō mai i le nu‘u o Kanana e fa‘atau mea e ‘ai.”

8. ‘Ua iloa lava e Iosefa ona uso, a ‘ua latou lē iloa o ia.

9. ‘Ona manatua lea e Iosefa o ana miti na fai ‘iā te i latou; ‘ua na fai atu fo‘i ‘iā te i latou, “O tagata agaga ‘outou, ‘ua ‘outou ō mai lava e va‘ava‘ai i se mea e saogofie ai le nu‘u.”

10. ‘Ona latou tali mai ai lea, “Le ali‘i e, e leai lava, o le ō mai nei au ‘au‘auna e fa‘atau i mea e ‘ai

11. o i matou uma o atali‘i o le tagata e to‘atasi, e fa‘amaoni lava i matou, e lē ni tagata agaga au ‘au‘auna.”

12. A ‘ua na fai atu ‘iā te i latou, “E leai lava, ‘ae peita‘i ‘ua ‘outou ō mai i le fia iloa se mea o saogofie ai le nu‘u.”

13. ‘Ona latou fai mai ai lea, “O au ‘au‘auna o le uso e to‘asefulu ma le to‘alua i matou, o atali‘i o le tagata e to‘atasi i le nu‘u o Kanana; fa‘auta fo‘i, o ona po nei i ai le ui‘i ma lo matou tamā, a o le tasi ‘ua leai.”

14. ‘Ona fai atu ai lea o Iosefa ‘iā te i latou:“O le ‘upu lava lea na ‘ou fai atu ai ‘iā te ‘outou o lo‘o fa‘apea, o ‘outou o tagata agaga.

15. O le mea lenei e iloa ai lo ‘outou fa‘amaoni, O lo‘o soifua Farao, tou te lē ō ‘ese i le mea nei se‘i ‘iloga e sau ‘i‘inei lo ‘outou uso aupito itiiti.

16. ‘Inā ‘auina atu ia so ‘outou na te ‘amia lo ‘outou uso, ‘ae noanoatia ‘outou ‘ina ‘ia tofotofo ai a ‘outou ‘upu po ‘ua moni a ‘outou.” ‘ae ‘āfai e leai, o lo‘o soifua Farao, e moni o tagata agaga lava ‘outou.

17. ‘Ona ia tu‘u lea ‘iā te i latou fa‘atasi i le fale puipui i aso e tolu.

18. O le aso tolu fo‘i na fai atu ai Iosefa ‘iā te i latou:“‘Ia faia e ‘outou le mea nei tou te ola ai; auā o a‘u ‘ou te mata‘u i le Atua.

19. ‘Āfai e fa‘amaoni ‘outou, ‘ia noanoatia so ‘outou uso i le fale puipui, ‘ae ō pea ia ‘outou e ‘ave saito i le oge o ‘outou ‘āiga.

20. ‘Ia ‘outou ‘aumai fo‘i ‘iā te a‘u lo ‘outou uso aupito itiiti, ‘ona fa‘amaonia ai lea a ‘outou ‘upu, ‘ona ‘outou lē oti ai lea.”‘Ua fa‘apea fo‘i ‘ona latou faia.

21. ‘Ona latou fetautalatala‘i ai lea, “E moni lava, ‘ua tatou sala ‘ona o lo tatou uso, na tatou iloa le puapuagā o lona loto, ‘ina ‘ua ‘ai‘oi mai o ia ‘iā te i tatou, ‘ae tatou te le‘i mafafai lava; o le mea lea ‘ua o‘o mai ai ‘iā te i tatou lenei puapuagā.”

22. ‘Ona tali atu ai lea o Reupena ‘iā te i latou, ‘ua fa‘apea atu, “‘Ou te le‘i fai atu ‘ea ‘iā te ‘outou, fa‘apea, ‘Aua ne‘i ‘outou agaleaga atu i le tama, a ‘ua ‘outou lē fa‘alogo mai lava? fa‘auta fo‘i, ‘ua tauia mai lona toto.”

23. A ‘ua latou lē iloa ‘ua lagona e Iosefa a latou ‘upu auā na ‘iā te i latou ma ia lē fa‘amatala ‘upu.

24. ‘Ona alu ‘ese lea o ia ‘iā te i latou ma tagi; ‘ua toe fo‘i atu ‘iā te i latou, ‘ua tautala ma i latou, ‘ua na ‘ave ‘ese fo‘i Simeona ‘iā te i latou, ‘ua noanoa ‘iā te ia i o latou luma.

‘Ua Toe Fo‘i atu Uso o Iosefa i Kanana

25. ‘Ona poloa‘i ai lea o Iosefa e fa‘atūtūmu ‘iā latou taga i saito, ma ‘ia toe avatu a latou tupe ‘ia ta‘itasi i lana taga, ‘ia avatu fo‘i ‘iā te i latou ni oso mo la latou malaga. ‘Ua fa‘apea ‘ona faia e ia ‘iā te i latou.

26. ‘Ua latou fa‘ae‘e saito ‘iā latou asini, ‘ona latou ō ‘ese ai lea i lea mea.

27. ‘Ua tatala fo‘i e le tasi lana taga e fafaga lana asini i le mea e moe ai, ‘ona iloa ai lea e ia o ana tupe, fa‘auta, ‘ua i le gutu o lana taga.

28. ‘Ona fai atu ai lea o ia i ona uso, “‘Ua toe ‘aumai a‘u tupe, fa‘auta fo‘i, e i ai lava i la‘u taga.” ‘Ona segia ai lea o latou mauli, ‘ua atuatuvale, ‘ua fa‘apea ane le tasi i le tasi, “Pe se a lenei mea ‘ua faia e le Atua ‘iā te i tatou?”

29. ‘Ona latou o‘o atu ai lea ‘iā Iakopo lo latou tamā i le nu‘u o Kanana, ‘ua latou tala atu ‘iā te ia i mea uma na o‘o ‘iā te i latou, ‘ua fa‘apea atu,

30. “‘Ua tautala fa‘asiasia mai ‘iā te i matou le tagata e ali‘ita‘i o le nu‘u ma ‘ua masalo mai o tagata agaga i matou.

31. ‘Ona matou fai ai lea ‘iā te ia, ‘Matou te fa‘amaoni lava; e lē ni tagata agaga i matou

32. o le uso e to‘asefulu ma le to‘alua i matou, o atali‘i o lo matou tamā; o le tasi ‘ua leai, a o le ui‘i, o i ai i ona po nei ma lo matou tamā i le nu‘u o Kanana.’

33. ‘Ona fai mai ai lea ‘iā te i matou le tagata e ali‘ita‘i o le nu‘u, ‘O le mea lea ‘ou te iloa ai e fa‘amaoni ‘outou, tu‘u mai ia so ‘outou uso ‘iā te a‘u ma ‘ave mea e ‘ai i le oge o ‘outou ‘āiga, i le ‘outou ō ai;

34. ‘ae ‘aumai ‘iā te a‘u lo ‘outou uso e aupito itiiti, ‘ona ‘ou iloa ai lea e fa‘amaoni ‘outou, e lē ni tagata agaga; ‘ona ‘ou tu‘u atu ai lea o lo ‘outou uso ‘iā te ‘outou, ‘ona ‘outou fa‘atau lea i le nu‘u.’”

35. ‘Ua latou sasa‘a fo‘i a latou taga, fa‘auta fo‘i, ‘ua ta‘itasi le tagata ma lana ‘ofu‘ofu tupe i lana taga; ‘ua iloa e i latou ma lo latou tamā a latou ‘ofu‘ofu tupe, ‘ona latou fefefe ai lea.

36. ‘Ona fai atu ai lea o lo latou tamā o Iakopo ‘iā te i latou, “‘Ua ‘outou ‘ave ‘ese a‘u fānau ‘iā te a‘u; o Iosefa ‘ua leai, o Simeona ‘ua leai; o le a ‘outou ‘ave ‘ese fo‘i ‘iā Peniamina; o ia mea uma ‘ou te leaga ai.”

37. ‘Ona fai mai ai lea o Reupena i lona tamā, ‘ua fa‘apea mai, “‘Ia e fasiotia o‘u atali‘i e to‘alua pe ‘āfai ‘ou te lē ‘aumai o ia ‘iā te oe. Tu‘u mai ia o ia ‘iā te a‘u, ‘ou te toe ‘aumai o ia ‘iā te oe.”

38. A ‘ua ia fai atu, “Tou te lē ō ifo ma lo‘u atali‘i; auā ‘ua oti lona uso, na o ia lava e toe, pe a o‘o se mea leaga ‘iā te ia i le ala o le a ‘outou ō ai, ‘ona ‘outou ‘aveina ifo lea o‘u lauulu sinā i le tu‘ugamau ma le fa‘anoanoa.”#