1. ‘Ua ‘ave ifo Iosefa i Aikupito, ‘ua fa‘atauina ia e Potifara le ‘au‘auna sili a Farao, o le pule i le ‘au e fa‘afeao, o le tagata Aikupito, a‘i lima o sa Isamaelī, na latou avatu ai o ia i lea mea.
2. Sa i ai le ALI‘I ‘iā Iosefa, o le tagata manuia lava ia; sa i le fale o lona ali‘i o le Aikupito.
3. ‘Ua iloa e lona ali‘i ‘ua ‘iā te ia le ALI‘I, o mea uma fo‘i sa na faia ‘ua fa‘amanuia e le ALI‘I i lona lima.
4. Sa alofagia Iosefa e ia, ‘ua ia ‘au‘auna ‘iā te ia, ‘ua na tofia ai o ia e pule i lona ‘āiga, o mea uma fo‘i sa ‘iā te ia ‘ua tu‘u atu i lona lima.
5. E āfua mai i ona aso na ia tofia o ia e pule i lona ‘āiga ma ana mea uma, na fa‘amanuia ai le ALI‘I i le ‘āiga o le Aikupito ‘ona o Iosefa, na manuia i le ALI‘I ana mea uma i le fale ‘atoa ma Ilo fanua.
6. ‘Ua ia tu‘u ana mea uma i le lima o Iosefa, ‘ua na lē iloa sana mea na o le mea e ‘ai sa ‘ai ai o ia.Sa ‘aulelei le tino o Iosefa ma ona mata e lālelei ia.
7. E mulimuli ane i nei mea, ‘ua tepa ane le faletua o lona ali‘i ‘iā Iosefa, ‘ua fai mai, “Tā te momoe.”
8. ‘Ae lē mafai o ia, ma ‘ua fai atu i le faletua o lona ali‘i, “Fa‘auta, e lē iloa e lo‘u ali‘i se mea ‘ua ‘iā te a‘u i le fale, o ana mea uma fo‘i ‘ua ia tu‘u mai i lo‘u lima.
9. E leai se sili ‘iā te a‘u i le fale nei, ‘ua na lē tāofi sina mea ‘iā te a‘u, ‘ua na o oe, auā o oe lona faletua; pe fa‘apefea ‘ona ‘ou faia lenei mea leaga tele ma ‘ou agasala ai i le Atua?”
10. ‘Ua tautala o ia ‘iā Iosefa i lea aso ma lea aso, ‘ae lē fa‘alogo o ia ‘iā te ia ‘ina ‘ia la momoe fa‘atasi ma ia pe nofo fa‘atasi ma ia.
11. ‘Ua o‘o i le tasi aso, ‘ua alu atu ai o ia i le fale e fai ai lana galuega, e leai se tasi tagata o le ‘āiga sa i le fale.
12. ‘Ona tago atu lea o ia i lona ‘ofu, o lo‘o fa‘apea, “Tā te momoe;” ‘ona tu‘u lea e ia o lona ‘ofu i lona lima ‘ua sola, ‘ua alu i fafo,
13. ‘Ua iloa e ia ‘ua tu‘u lona ‘ofu i lona lima ma ‘ua sola i fafo,
14. ‘ona vala‘au atu lea o ia i tagata o lona ‘āiga, ‘ua fai atu ‘iā te i latou, ‘ua fa‘apea, “Fa‘auta, ‘ua ia a‘u mai ‘iā te i tatou le tagata Eperu e ula ‘iā i tatou; na sau ia ‘iā te a‘u ma te momoe ma ia, ‘ona ‘ou ‘alaga, lea ma le leo tele;
15. ‘ona fa‘alogo lea o ia ‘ua ‘ou leo tele ma ‘alaga, ‘ona tu‘ua lea e ia lona ‘ofu ‘iā te a‘u, ‘ua sola, ‘ua alu i fafo.”
16. ‘Ua teu lona ‘ofu e ia se‘ia sau lona ali‘i i lona fale.
17. ‘Ona tautala atu lea o ia ‘iā te ia i nei ‘upu, o lo‘o fa‘apea, “Na sau ‘iā te a‘u le ‘au‘auna Eperu na e ‘aumai ‘iā te i matou, e ula mai ‘iā te a‘u.
18. ‘Ona ‘ou leo tele ai lea ma ‘ou ‘alaga, ‘ona tu‘u lea e ia o lona ‘ofu ‘iā te a‘u, ‘ae sola ia i fafo.”
19. ‘Ua fa‘alogo lona ali‘i i ‘upu a lana avā sa tautala ai ‘iā te ia, o lo‘o fa‘apea, “‘Ua faia nei mea ‘iā te a‘u e la‘u ‘au‘auna;” ‘ona ita tele ai lea o ia.
20. ‘Ua tago atu lona ali‘i ‘iā Iosefa, ‘ua tu‘u ‘iā te ia i le fale puipui, o le mea ‘ua fusifusia ai ē ‘ua fusifusia e le tupu; sa i ai o ia i le fale puipui.
21. Sa ‘iā Iosefa le ALI‘I, ‘ua ia alofa ‘iā te ia, ‘ua na fa‘atupuina le alofa o le ali‘i o le fale puipui ‘iā te ia.
22. ‘Ua tu‘u atu e le ali‘i o le fale puipui i le pule a Iosefa o ē ‘ua fusifusia uma sa i le fale puipui; o mea uma na latou faia i lea mea, o ia lava na faia.
23. E le‘i va‘ava‘ai le ali‘i o le fale puipui i se mea e tasi ‘ua i lana pule; auā sa ‘iā te ia le ALI‘I, o mea fo‘i sa na faia ‘ua fa‘amanuia lea e le ALI‘I.