1. O le iva sefulu ma le iva o tausaga o Aperamo na fa‘aali mai ai le ALI‘I ‘iā Aperamo, ‘ua fa‘apea mai fo‘i ‘iā te ia, “O a‘u o le Atua e o‘u le malosi uma lava, ‘ia e savali i o‘u luma ma ‘ia sa‘o lau amio.
2. Tā te osia le feagaiga ma oe, ‘ou te matuā fa‘ato‘ateleina lava au fānau.”
3. ‘Ona fa‘apa‘ū faō lea o Aperamo; ‘ona fetalai mai lea o le Atua ‘iā te ia, ‘ua fa‘apea mai,
4. “O a‘u nei, ‘ou te fai atu, fa‘auta, o ‘iā te i tā‘ua le feagaiga, e fai fo‘i oe ma tupuga o nu‘u e tele.
5. E lē toe vala‘auina lou igoa o Aperamo, a o le a igoa oe o Aperaamo, auā ‘ua ‘ou faia oe ma tupuga o nu‘u e tele.
6. ‘Ou te matuā fa‘auluolaina oe, ‘ou te faia oe ma tupuga o nu‘u; e tupuga mai fo‘i ‘iā te oe o tupu.
7. “‘Ou te fa‘atumauina fo‘i o la tā feagaiga ma oe ma lau fānau, ‘iā latou tupulaga, pe a mavae atu oe, e fai ma feagaiga e fa‘avavau; ‘ia fai a‘u ma Atua ‘iā te oe ma au fānau pe a mavae atu oe.
8. ‘Ou te foa‘i fo‘i ‘iā te oe ma au fānau, pe a mavae atu oe, o le nu‘u o lo‘o e āumau ai, o le nu‘u uma lava lea o Kanana, e fai mo latou e fa‘avavau; e fai fo‘i a‘u mo latou Atua.”
9. ‘Ua fetalai mai fo‘i le Atua ‘iā Aperaamo, “A o oe, ‘ia e tausi i la tā feagaiga, o oe ma lau fānau, ‘iā latou tupulaga, pe a mavae atu oe.
10. O la tatou feagaiga lenei ma ‘outou, ‘atoa ma lau fānau, pe a mavae atu oe, tou te tausia; e peritomeina tane uma o ‘iā te ‘outou.
11. Tou te peritomeina fo‘i pa‘u o ‘outou tino, e fai ai fo‘i ma fa‘ailoga o la tatou feagaiga ma ‘outou.
12. O lē ‘ua valu ona pō o ‘iā te ‘outou ‘ia peritomeina ia, o tane uma ‘iā ‘outou augatupulaga; o lē ‘ua fānau i le ‘āiga ma lē ‘ua fa‘atauina mai i tupe i tagata ‘ese uma lava, e lē o sau fānau ia.
13. ‘Ia peritomeina lava o lē ‘ua fānau i lou ‘āiga, ma lē ‘ua fa‘atauina i au tupe; e i o ‘outou tino la tatou feagaiga o le feagaiga e fa‘avavau.
14. A o le tane fo‘i ‘ua lē peritomeina, o lē ‘ua lē peritomeina i le pa‘u o lona tino e vavae‘eseina lea tagata i lona nu‘u; ‘ua tu‘umavaega ia i le feagaiga.”
15. ‘Ua fa‘apea mai fo‘i le Atua ‘iā Aperaamo, “O Sarai lau avā, ‘aua ‘e te toe vala‘auina lona igoa o Sarai a o Sara o lona igoa lea.
16. ‘Ou te fa‘amanuia fo‘i ‘iā te ia, ma ‘ou foa‘iina atu fo‘i se atali‘i mo oe mai ‘iā te ia; ‘ou te fa‘amanuia lava ‘iā te ia, e fai fo‘i o ia ma tupuga o nu‘u; e tupuga mai fo‘i ‘iā te ia o tupu o nu‘u.”
17. ‘Ona fa‘apa‘ū faō lea o Aperaamo, ‘ua ‘ata‘ata ma fa‘apea ifo i lona loto, “E fānau mai ‘ea se atali‘i i le tagata ‘ua selau ona tausaga? O Sara fo‘i e fānau ‘ea ia ‘ua iva sefulu ona tausaga?”
18. ‘Ua fa‘apea atu fo‘i Aperaamo i le Atua, “E, ‘ou te mana‘o ‘ia ola Isamaeli i ou luma!”
19. ‘Ua fetalai mai le Atua:“E moni lava, e fānau mai sou atali‘i ‘iā Sara lau avā, ‘e te fa‘aigoa fo‘i ‘iā te ia o Isaako; ‘ou te fa‘atumauina fo‘i la ma feagaiga ma ia, ‘atoa ma ana fānau, pe a mavae atu o ia, o le feagaiga e fa‘avavau.
20. I le ma Isamaeli fo‘i, ‘ua ‘ou fa‘alogo ai ‘iā te oe; fa‘auta, ‘ua ‘ou fa‘amanuia ‘iā te ia, ‘ou te fa‘auluola ‘iā te ia, ‘ou te matuā fa‘ato‘ateleina lava; e fānaua fo‘i e ia o ali‘i e to‘asefulu ma le to‘alua; ‘ou te fai fo‘i o ia ma tupuga o le nu‘u tele.
21. ‘Ae peita‘i o la‘u feagaiga ‘ou te fa‘atumauina lea ‘iā Isaako, o le a fānau mai e Sara ‘iā te oe i le fa‘apenei lava i le tausaga atalī.”
22. ‘Ua fa‘ai‘u fo‘i e ia o la la tautalaga ma ia, ‘ona afio a‘e lea o le Atua nai ‘iā Aperaamo.
23. ‘Ona tago lea e Aperaamo i lona atali‘i o Isamaeli ma i latou uma na fānanau i lona ‘āiga, ‘atoa ma i latou uma na fa‘atauina i ana tupe, o tane uma lava i le ‘āiga o Aperaamo, ma ‘ua peritomeina e ia o pa‘u o latou tino i lea lava aso, e pei ‘ona fetalai mai ai le Atua ‘iā te ia.
24. O le iva sefulu ma le iva o tausaga o Aperaamo na peritomeina ai o ia i le pa‘u o lona tino.
25. A ‘ua sefulu ma le tolu tausaga o lona atali‘i o Isamaeli ‘ina ‘ua peritomeina ai o ia i le pa‘u o lona tino.
26. O lea lava aso e tasi na peritomeina ai Aperaamo ma lona atali‘i o Isamaeli;
27. o tane uma fo‘i i lona ‘āiga, ē na fānanau mai i le ‘āiga, ‘atoa ma ē na fa‘atauina i tupe i tagata ‘ese, na peritomeina i latou fa‘atasi ma ia.