1. ‘Ua tele lava le oge i le nu‘u.
2. ‘Ua uma fo‘i ‘ona latou ‘a‘ai i saito na latou ‘aumaia i Aikupito, ‘ona fai atu ai lea o lo latou tamā ‘iā te i latou, “‘Inā toe ō ia e fa‘atau mai sina mea e ‘ai ma tatou.”
3. ‘Ona fai mai ai lea o Iuta ‘iā te ia, ‘ua fa‘apea mai, “Na matuā fai mai le tagata ‘iā te i matou, ‘ua fa‘apea mai, ‘Pe ‘āfai tou te lē ō mai ma lo ‘outou uso, tou te lē iloa lava o‘u mata.’
4. ‘Āfai ‘e te ‘a‘auina i matou ma lo matou uso matou te ō ifo e fa‘atau i mea e ‘ai ma oe.
5. ‘Ae ‘āfai ‘e te lē tu‘una mai o ia, matou te lē ō ifo auā na fai mai le tagata ‘iā te i matou, ‘Tou te lē iloa o‘u mata pe ‘āfai tou te lē ō mai ma lo ‘outou uso.’”
6. ‘Ona fa‘apea atu ai lea o Isaraelu, “Se a le mea ‘ua ‘outou agaleaga mai ai ‘iā te a‘u i lo ‘outou ta‘u atu i le tagata ‘ua toe lo ‘outou uso?”
7. ‘Ona latou fai mai ai lea, “Na matuā fesili mai le tagata i lo tatou ‘āiga, ‘ua fa‘apea mai, ‘Po ‘ua ola mai ‘ea lo ‘outou tamā? Pe i ai se isi o ‘outou uso?’ ‘Ona matou tala atu ai lea ‘iā te ia e tusa ma ia ‘upu; ‘na matou iloa ‘ea a fai mai o ia ‘aumai ia lo ‘outou uso?’”
8. ‘Ona fai mai ai lea o Iuta ‘iā Isaraelu lona tamā. “Tu‘u mai ia le tama ‘iā te a‘u, ‘ona matou tula‘i ai lea ma ō ‘ina ‘ia tatou ola ‘ae lē oti, o i matou ma oe, ‘atoa ma ō matou tamaiti.
9. E fai a‘u mōna moni; ‘e te sā‘ili mai o ia ‘iā te a‘u ‘āfai ‘ou te lē toe ‘aumai o ia ‘iā te oe ma tu‘u ‘iā te ia i ou luma, ‘ona ‘ou nofo sala ai lea ‘iā te oe i aso uma lava.
10. Auā ‘ana matou lē fa‘atuai po o pe na ona aso ia ‘ua matou fo‘i fa‘alua mai ai.”
11. ‘Ona fai atu ai lea o Isaraelu lo latou tamā ‘iā te i latou:“‘Āfai lava o lea, ‘ia ‘outou faia lenei mea, ‘inā ‘ave ia ni mea o le fanua e sili ‘ona lelei ‘iā ‘outou ‘ato, ‘ia ‘ave ifo ai se mea alofa i le tagata, o sina pulu pasama ma sina meli ma pulu seturo ma pulu latano ma petuni ma sekati.
12. ‘Ia ‘outou ‘ave lua fo‘i tupe i o ‘outou lima; o tupe fo‘i na toe ‘aumai i gutu o a ‘outou taga, ‘ia toe ‘ave ia i o ‘outou lima; ai lava o le sesē.
13. ‘Ave fo‘i lo ‘outou uso, ‘inā tutū ia i luga, ‘inā toe o i le tagata.
14. ‘Ia foa‘iina fo‘i ‘iā te ‘outou e le Atua e ona le malosi uma lava ‘ona ia alofaina ‘outou e le tagata, ‘ia na tu‘una mai fo‘i ‘iā te ‘outou le isi o ‘outou uso ‘atoa ma Peniamina; a o a‘u, ‘āfai e ‘ave‘eseina a‘u fānau ‘iā te a‘u, ‘ua ‘ave‘eseina lava.”
15. ‘Ona ‘ave ai lea e le nu‘u ‘ia mea alofa ma tupe ‘ave lua i o latou lima, ‘atoa fo‘i ma Peniamina, ‘ona latou tula‘i ai lea ma ō ifo i Aikupito ma latou tutū i luma o Iosefa.
16. ‘Ua iloa e Iosefa o Peniamina ma i latou, ‘ona fai atu ai lea o ia i lē na pule i lona ‘āiga, “‘Aumai ia o na tagata i le fale ma ia fasi ni manu ma ia sauni; auā matou te ‘a‘ai ma ia tagata pe a o‘o i le aoauli.”
17. ‘Ona faia fo‘i lea e le tagata fa‘apei ‘ona fai atu ai Iosefa, ‘ua na ‘aumai le nu‘u i le fale o Iosefa.
18. ‘Ona matata‘u ai lea o le nu‘u ‘ina ‘ua ‘aumaia o i latou i le fale o Iosefa, ‘ua fa‘apea, “Ai ‘ua ‘aumaia i tatou ‘ona o tupe na toe tu‘uina ‘iā tatou taga ‘ina ‘ua tatou mua‘i ō mai, ‘ina ‘ia na oso mai ai ‘iā te i tatou ma pupu‘e mai ‘iā te i tatou ma a tatou asini, ‘ia fai fo‘i i tatou ma pologa.”
19. ‘Ona latou sōsō atu ai lea i le tagata ‘ua pule i le ‘āiga o Iosefa ma tautala atu ‘iā te ia i le faitoto‘a o le fale.
20. ‘Ua latou fa‘apea atu, “Le ali‘i e, fa‘afofoga mai ia, na matou mua‘i ō mai lava e fa‘atau ni mea e ‘ai.
21. Na o‘o fo‘i i matou i le mea e moe ai, ‘ona matou talai ai lea o a matou taga, fa‘auta fo‘i, ta‘itasi le tagata ma ana tupe i le gutu o lana taga, o a matou tupe ‘atoa lava; ‘ua matou toe ‘aumaia fo‘i i o matou lima.
22. ‘Ua matou ‘aumaia fo‘i isi tupe i o matou lima e fa‘atau a‘i ni mea e ‘ai, ‘ae matou te le‘i iloa po o ai na ia tu‘u a matou tupe ‘iā matou taga.”
23. ‘Ona fai mai ai lea o ia, “‘Ia fīfīlemū ‘outou, ‘aua ne‘i fefefe; o lo ‘outou Atua ma le Atua o lo ‘outou tamā ‘ua avane e ia le ‘oloa ‘iā te ‘outou ‘iā ‘outou taga; na ‘iā te a‘u a ‘outou tupe.” ‘Ona ia ‘aumai ai lea o Simeona ‘iā te i latou.
24. ‘Ona ‘aumaia lea o i latou e le tagata i le fale o Iosefa, ma ‘ua tu‘u atu ‘iā te i latou le vai, ‘ona latou mulumulu ai lea o latou vae; ‘ua na fafaga fo‘i a latou asini.
25. ‘Ona latou sauni lea le mea alofa, a o le‘i sau Iosefa i le aoauli, auā na latou fa‘alogo o le a latou ‘a‘ai i lea mea.
26. ‘Ua sau Iosefa i le fale, ‘ona latou ‘aumai ai lea ‘iā te ia i le fale le mea alofa nai o latou lima, ma latou ifo to‘ele mai ‘iā te ia.
27. ‘Ua na ofo alofa atu fo‘i ‘iā te i latou, ‘ua fai atu, “Po o mālōlō ‘ea lo ‘outou tamā, le toeaina na ‘outou fai mai ai? po o ola mai pea ia?”
28. ‘Ona latou tali mai ai lea, “O lo‘o mālōlō lau ‘au‘auna lo matou tamā, o lo‘o ola mai lava ia;” ‘ona latou punonou ai lea ma ifo ‘iā te ia.
29. ‘Ua ia tepa atu, ‘ona iloa ai lea o Peniamina lona uso, le tama a lona tinā; ‘ona fai atu ai lea, “O lo ‘outou uso aupito itiiti ‘ea lea, na ‘outou fai mai ai ‘iā te a‘u? ‘Ua na fai atu fo‘i, lo‘u atali‘i e, ‘ia alofa atu le Atua ‘iā te oe.”
30. ‘Ona fa‘ata‘alise ai lea o Iosefa, auā na mutimutivale lona alofa i lona uso, ‘ua ia sā‘ili se mea e tagi ai, ‘ona ulu atu ai lea o ia i lona afeafe, ‘ua tagi ai.
31. ‘Ua mulumulu ona mata ‘ona alu ane lea o ia, ‘ua ‘o‘ono ma fai atu, “Laulau mai ia o mea e ‘ai.”
32. ‘Ona latou laulau mai ai lea o ana mea, na o ia, ‘ae laulau a latou mea, na o i latou; ‘ae laulau mea a tagata Aikupito, ē na ‘a‘ai ma ia, na o i latou lava; auā e lē ‘a‘ai fa‘atasi tagata Aikupito ma tagata Eperu; auā o le mea lea e ‘ino‘ino ai tagata Aikupito.
33. ‘Ua latou nonofo i ona luma, o le ulumatua i le mea e nofo ai le ulumatua ma le ui‘i i le mea e nofo ai le ui‘i; ‘ona ofo ai lea o le nu‘u, ‘ua fetepa‘i o le tasi i le tasi.
34. ‘Ua ia avatu fo‘i tufa‘aga ‘iā te i latou i mea na i ona luma; a o le tufa‘aga o Peniamina ‘ua fa‘asili i o latou uma, ‘ua lima. ‘Ua latou feinu ma ‘ua malilie ai fa‘atasi ma ia.