1. Le Atua e,‘ua ‘iā te oe le vi‘igae faia ma le fa‘alologo i Siona;e avatua lava ‘iā te oe le mea na tautō ai.
2. Le fa‘afofoga tatalo e,e ō atu ‘iā te oe tagata uma lava.
3. ‘Ua manumālō mai ‘iā te a‘u o amio leaga;o a matou solitulafono‘e te togiolaina lava e oe.
4. ‘Amu‘ia lē ‘ua e filifilia,ma e fa‘alatalataina o ia ‘iā te oe,e nofo o ia i ou lotoā.E mā‘o‘ona i matou i mea lelei o i lou fale,o lou lava malumalu pa‘ia.
5. Le Atua o lo matou olataga e,‘e te tali mai ‘iā te i matou ma le tonu i mea mata‘utia;o oe le fa‘atuatuaga o tulu‘iga uma lava o le lalolagi,‘atoa ma ē o mamao i le vasa.
6. O lo‘o fa‘atumauina mauga i lona lava malosi;o lo‘o fusia o ia i le mana.
7. O le ta‘alili o le sami ‘ua fa‘alologo ‘iā te ia,o le ta‘alili fo‘i o ona peau,ma le vāvāō o nu‘u.
8. ‘Ua matata‘u fo‘i i ou fa‘ailoga o ē nonofo i mea mamao;o mea e aliali i le taeao ma le afiafi,o oe ‘ua ‘alalaga fiafia ai ia mea.
9. ‘Ua e asiasi i le lau‘ele‘ele ma e fa‘asūsūina lava;‘ua e fa‘alafulemūteleina ai;o le vaitafe o le Atua ‘ua tumu i le vai;‘ua e saunia a latou saito‘ina ‘ua fa‘apea ‘ona e sauni i ai.
10. ‘Ua e fa‘asūsūteleina ona atu puē;e fa‘atafe ifo le ‘ua i ona utu;‘ua e fa‘amalūlū ai i le uaga;‘e te fa‘aolaolaina fo‘i ona moemoe.
11. ‘Ua e fa‘ae‘e i le tausaga le paleali‘i o lou agalelei;o ou ala ‘ua tautulu ai mea lololo.
12. ‘Ua tautulu ai i le vao i mea e tata‘a ai manu;o mauga fo‘i ‘ua fusia ia i le fusi i le fiafia.
13. O mea e tata‘a ai manu ‘ua liloia i lafu mamoe;‘ua ufitia fo‘i vanu i le saito;‘ua latou ‘alalaga fiafia, ‘ua pepese lava.