1. ‘Inā fa‘alogologo mai ia i lenei mea o ‘outou nu‘u uma;‘inā ua‘i mai ia o ‘outou taliga o ‘outou uma o ē nonofo i le lalolagi.
2. O tagatanu‘u ‘atoa ma ali‘i;o ē tamao‘āiga fa‘atasi ma ē matitiva.
3. E tautala lo‘u gutu i le poto;e atamamai fo‘i mafaufauga o lo‘u loto.
4. ‘Ou te ua‘i atu o‘u taliga i le fa‘ata‘oto,‘ou te fa‘amatala a‘u ‘upu lilo i le kitara.
5. Se a le mea ‘ou te fefe ai i aso vale,pe a vagavagaia mai a‘u a le agasalaa ē lamalama ‘iā te au?
6. O i latou o ē fa‘atuatua i o latou ‘oa,ma mitamita i latou ‘ona o le tele o a latou ‘oloa;
7. e lē mafaia lava e so latou ‘ona fa‘atau i lona uso,pe avatu i le Atua se togiola mo ia,
8. auā e matua faigatā le togiola o latou agaga,e lē mafaia lava ia e fa‘avavau;
9. ‘ina ‘ia ola pea ia e fa‘avavau;‘ia lē iloa e ia le tu‘ugamau.
10. Auā ‘ua iloa e ia e oti tagata popoto,e fano fo‘i le tagata valea ‘atoa ma le vale;‘ona tu‘ua lea e i latou a latou ‘oa mā nisi.
11. O lo latou tāofi, e fa‘avavau o latou fale,ma mea e mau ai i latou a augatupulaga ia;‘ua fa‘aigoa e i latou o latou fanua i o latou lava igoa.
12. ‘Ae lē tumau le tagata i lona lelei;e tusa i latou ma manu ‘ona fano.
13. O lo latou ala lenei, o lo latou lea valea;a ‘ua fiafia ē ‘ua mulimuli ‘iā te i latou ‘iā latou ‘upu. Selā.
14. ‘Ua tu‘uina atu i latou e pei o mamoe i le tu‘ugamau;e ‘aina i latou e le oti;e pule ē ‘ua amiotonu ‘iā te i latou i le taeao;e mavae lo latou matagofie i le tu‘ugamau,mai le mea latou te mau ai.
15. ‘Ae peita‘i e fa‘aola e le Atua lo‘u agagaa‘i le pule a le tu‘ugamau;auā na te talia mai a‘u. Selā.
16. ‘Aua ‘e te fefe pe a fa‘atamao‘āigaina se tasi,pe a fa‘ateleina le mamalu o lona ‘āiga.
17. Auā e leai se mea na te ‘avea pe a oti o ia;e le mulimuli ifo ‘iā te ia lona mamalu.
18. E ui ‘ina fa‘a‘amu‘ia atu o ia i lona agaga ‘ina o ola o ia;e vi‘ia fo‘i oe pe a e agalelei oe ‘iā te oe.
19. E o‘o lava ia i le tupulaga o ona tamā;e lē iloa e i latou le malamalama e o‘o i le fa‘avavau.
20. O tagata o lo‘o i le lelei, ‘ae lē mafaufau,e tusa i latou ma manu ‘ona fano.