1. Le ALI‘I e, ‘ua e su‘esu‘e mai ‘iā te a‘u,‘ua e silafia lava a‘u.
2. O oe lava ‘ua e silafia lo‘u nofo i lalo ma lo‘u tula‘i i luga;‘ua e silafia mamao mai ‘ou mānatunatu.
3. ‘Ua e su‘esu‘e i lo‘u savali ma lo‘u ta‘oto,‘ua e masani lava ma o‘u ala uma.
4. A o leai lava se ‘upu i lo‘u gutu,fa‘auta, le ALI‘I e, ‘ua e silafia uma lava.
5. ‘Ua e si‘osi‘o mai i o‘u tua ‘atoa ma o‘u luma,‘ua e fa‘ae‘e mai fo‘i lou ‘a‘ao i luga ‘iā te a‘u.
6. O le poto lea e sili ‘ona faigatā ‘iā te a‘u,‘ua maualuga, ‘ou te lē mafaia.
7. ‘Ou te alu ‘ea ifea a‘i lou Agaga?‘Ou te sola ifea a‘i ou luma?
8. ‘Āfai ‘ou te alu a‘e i le lagi, o i ai lava oe;‘āfai ‘ou te fofola so‘u moega i seoli, fa‘auta, o i ai lava oe.
9. ‘Āfai e faia mo a‘u ‘apa‘au o le taeao,ma ‘ou nofo i le tulu‘iga o le sami;
10. e ta‘ita‘i mai ‘iā te a‘u i lea lava mea e lou ‘a‘ao,e tāofi mai fo‘i ‘iā te a‘u lou ‘a‘ao taumatau.
11. ‘Āfai ‘ou te fa‘apea atu,“E ufitia lava a‘u i le pouliuli;”‘ona fai lea o le po ma malamalama e si‘osi‘omia ai a‘u.
12. Auā o le pouliuli e lē pouliuli lava lea ‘iā te oe;e malamalama le po pei o le ao;e tusa lava ‘iā te oe le pouliuli ma le malamalama.
13. Auā sa ‘iā te oe ‘ou mānatunatu;na e ufiufi ‘iā te a‘u i le manava o lo‘u tinā.
14. ‘Ou te vivi‘i atu ‘iā te oe,auā na faia a‘u e ala ai ‘ona mata‘utia ma ofo tele ai.O mea na e faia, o mea mamana ia;‘ua ‘ou matuā iloa e a‘u nei mea.
15. E le‘i lilo lo‘u tino ‘iā te oe,‘ina ‘ua faia a‘u i le mea lilo,‘ina ‘ua saunia a‘u i mea loloto i le lalolagi.
16. Na silasila mai ou fofoga i ‘ou tino uma ‘ina o afuafua;‘ua tusia fo‘i uma lava i lau tusi,o ona aso fo‘i na faia ai, a o leai ni ‘ou tino.
17. Le Atua e,‘ua matuā sili ou mānatunatu ‘ona aogā ‘iā te a‘u,‘ua sili lava ‘ona tele o lo latou faitau aofa‘i.
18. ‘Āfai ‘ou te faitaulia, ‘ua sili ia ‘ona tele i le oneone;a a‘u ala, tā te i ai pea ma a‘u.
19. E moni, le Atua e, ‘e te fasioti i ē amio leaga; o lea,‘ia ō ‘ese atu ai ‘iā te a‘u ‘outou tagata ‘ua totolima;
20. O ē fai ‘upu ‘iā te oe e fa‘atupu ai le leaga;e ta‘uta‘u fua i lou suafa o ē ita ‘iā te oe.
21. Le ALI‘I e,‘ou te lē ‘ino‘ino ‘ea ‘iā te i latou o ē ‘ino‘ino ‘iā te oe?ma ē o laga atu ‘iā te oe,‘ou te lē matuā ‘ino‘ino ‘ea i ai?
22. ‘Ou te ‘ino‘ino lava ‘iā te i latou ma le matuā ‘ino‘ino tele;‘ua fai i latou mo‘u fili.
23. Le Atua e, ‘ia e su‘esu‘e mai ‘iā te a‘u,ma ‘ia e silafia lo‘u loto;tofotofo mai ia ‘iā te a‘u,ma ‘ia e silafia ‘ou mānatunatu;
24. ma ‘ia e silafia po o ‘iā te a‘u se ala e tigā ai;ma e ta‘ita‘iina mai a‘u i le ala o le fa‘avavau.